ბიბლიაშ თვალსაზრის

ექსტრემალურ სპორტ — ქოღირნო დო ვარ რისკშა ულა?

„ირდღას უმოს დო უმოს ადამიან გინოჭყვიდუნს, მიდართას რისკშა, ნამდა თვითმფრინავშე ქოსხაპას, გვალაშე თოკით გეგმოხოხას, ნავით ჩანჩქერს გეგმაჸუნას დო ზვიგენეფწკუმა ართო გონჩურას“ (გაზეთ WILLOW GLEN RESIDENT).

თე სიტყვეფშე ჯგირო იძირე, მუ ტენდენციეფ რე ამდღა სპორტის. ირიათო უმოს პოპულარულ რე სპორტიშ თიცალ სახეობეფ, მუნერით რე, საპარაშუტო სპორტ, ალპინიზმ, პარაპლანერიზმ დო მაღალ ადგილეფშე პარაშუტით სხაპუა. სნოუბორდეფით, გვალაშ ველისპეტეფით, სკეიტბორდეფით დო „როლიკეფით“ გვალეფშა ეკულა დო დიდ ნახტომეფიშ კეთებაშ მიზან თინა რე, ნამდა ადამიანიშ შეზღუდულ შესაძლებლობეფს ქუმუძინან. მუჭოთ ჟურნალ „ტაიმსის“ ჭარჷ, ექსტრემალურ სპორტის ადამიანეფ საფრთხეშა ინიჸოთანა დუდის, მუთ ოძირანს თინეფიშ სურვილს, მუნეფიშ შეზღუდულ შესაძლებლობეფშე მეტის ქიმიოჭირინუან.

ხშირას სხაპნა მაღალ შენობეფშე, ანტენეფშე, ხიდეეფშე დო კირდეეფშე. თეცალ სიმაღლეეფშე პარაშუტით სხაპუა თიცალ საშიშ რე, ნამდა თე სპორტ ამერიკაშ შეერთებულ შტატეფიშ ეროვნულ პარკეფიშ მომსახურებაშ ბიუროქ აკრძალ.

მუთ უმოს პოპულარულო გინირთუ სპორტიშ თეცალ სახეობეფ, თით უმოსო იძინანს ადამიანეფიშ მსხვერპლ. ირიათო უმოს ადამიან იზარალებ თიშ გურშენ, ნამდა უსაფრთხო სპორტშა ექსტრემალურ სპორტ უსხუნ. 1997 წანას ამერიკას სასწრაფო დახმარებაშ განყოფილებაშა მოჸუნაფილ სკეიტბორდინგიშ დროს დაზარალებურეფიშ რაოდენობა 33 პროცენტით მეტ რდჷ, სნოუბორდინგიშ დროს დაზარალებურეფიშ — 31 პროცენტით დო ალპინიზმიშ დროს — 20 პროცენტით. შხვა სპორტიშ სახეობეფიშ დროს შედეგეფ ხოლო უმოს უარეს რე დო თეს თინა ამტკიცენს, ნამდა თეცალ სპორტით ღურაშ შემთხვევეფქ მიძინ. თეცალ სპორტიშ მიმაჸუნალეფს უღნა ინფორმაცია საფრთხეშ გურშენ. ართ ოსურ, ნამუთ მოთხილამურე რე დო თე სპორტიშ სარისკო სახეობეფს მონაწილენს, იჩიებ: „გონებას ირიათო ღურაშე ფიქრეფ მიღჷ“. პროფესიონალ სნოუბორდერ თეცალ დასკვნას ორთჷ: „მუთუნ ვა დაიზიანებ-და, ესეიგ ბრელ ვაიცადებ“.

თე ირფელს გეფთვალისწინენთ-და, მუნერ დამოკიდებულება ოკო მიღდან ქრისტიანეფს თეცალ სპორტის მონაწილებაშენ? მუჭო მიმეხვარებნა ბიბლია, გეგნობჭყვიდათ, მივაჸუნათ დო ვარ თეცალ სპორტის? თიშ გარჩიება, მუჭო უჯინე ღორონთ სიცოცხლეშ სიწმინდეს, მიმეხვარებნა, ქუპასუხათ თე კითხვეფს.

ღორონთიშ თვალსაზრის სიცოცხლეშენ

ბიბლია მირაგადნა, ნამდა იეჰოვა რე „სიცოცხლეშ წყარო“ (ფსალმუნი 36:9). თიქ გაჭყჷ მთელ კაცობრიობა დო ირფელს მარზენა თიშო, ნამდა სიცოცხლეთ გეფხარათ (ფსალმუნი 139:14; საქმეები 14:16, 17; 17:24—28). ათეშენ ჭკვერულ იჸი თიშ რაგად, ნამდა ღორონთ ჩქინდე თხულენს, დუვაფასათ თი ირფელ, მუთ თიქ მთელ გურით მიძღვინეს. კანონეფ დო პრინციპეფ, ნამუთ იეჰოვაქ ისრაელ ერს მეჩჷ, მოხვარნა თე ირფელიშ დაფასებას.

მოსეშ კანონ ისრაელეფს არზენდჷ მითითებეფს, ნამდა დეცვესკო შხვეფიშ სიცოცხლე. მიდგაინ თე მითითებეფს ვედეცვენდჷ დო თეშ გურშენ ადამიან დოღურუდ-და, თის ბრალ გიადვალუდ უდანაშაულო ზისხირიშ დობუნას. მაგალთო, ჸუდეშ მინჯექ ორთვალს ბირკულ ოკო გუკეთკო. თინა თაშ ვემიქციებუდ, თევრეშე მიდგაინ ქეითანთხუდ დო დოღურუდ-და, ღურელიშ ზისხირ ჸუდეშ მინჯეს ქიგიადვალუდ (კანონი 22:8). ხოჯ მიდგაინს ველუდუნ თეშ ქარაგუდ დო დოჸვილუნდ-და, მინჯეს ვემეთხიებუდ თეშე პასუხ. მარა მინჯეს ქოუჩქუდ, ნამდა ხოჯ მარაგვინჯე რდჷ დო ჯგირო ვემკაკირ, თიქ მიდგაინს ქარაგვ-და, მინჯეს მეთხიებუდ პასუხ დო თიქ ოკო დოღურკო (გამოსვლა 21:28, 29). იეჰოვაშო ძვირფას რე სიცოცხლე დო თიშ კანონშე სიცოცხლეშ დაცვება დო პატიცემა იძირე.

ღორონთიშ ართგურ მსახურეფს ჯგირო არჩქილედეს, ნამდა თე პრინციპეფიშ გათვალისწინებათ სიცოცხლე საფრთხეშა ოკო ვენიჸოთესკო. ბიბლიაშე ბკითხულენთ ართ შემთხვევას, მუჟამსით მეფე დავითის ბეთლემიშ წყარიშ შუმაქ მაკორინუ. თე დროს ბეთლემ ფილისტიმელეფიშ ხეს რდჷ. მუჭო დავითიშ სიტყვეფ ქიგეგონეს, თიშ სუმ ჯარიშკოჩიქ ფილისტიმელეფიშ ბანაკშა მიშელ, ბეთლემიშ ინჭაშე წყარ გეშეღეს დო დავითის ქუმუღეს. მუჭო მიქცუ თე დროს დავითიქ? თიქ ვაშვჷ ჯარიშკოჩეფიშ მუნაღელ წყარ დო დიხას ქუდაბ. თიქ თქუ. „ღორონთქ დამფარას, ნამდა თეცალ მუდგარენ გუვაკეთე! მუჭო ფშვა თე ვაჟკაცეფიშ ზისხირ, მიდგაქ მუნეფიშ სიცოცხლე საფრთხეშა ქინიჸოთეს!“ (1 მატიანე 11:17—19). დავითის მუთუნით ვაკოდ, ნამდა მუშ ჯგირობუაშ გურშენ შხვაქ სიცოცხლე საფრთხეშა ქინიჸოთკო.

იესოქ ხოლო თეშნერო მიქცუ, მუჟამსით ეშმაკიქ — საეგებიოთ ხილუას — უწუ, ნამდა ტაძარიშ გალავანშე ქოსხაპკო თიშ ოძირაფალო, ქიმეხვარებდეს დო ვარ თის ანგელოზეფ. იესოქ თეცალ პასუხ მეჩჷ: „ვეგმოცადა იეჰოვა, სქან ღორონთ“ (მათე 4:5—7). არგამა რე, ქოთ დავითის დო ქოთ იესოს არჩქილედეს, ნამდა ღორონთიშ თოლს ვა რე სწორ უაზრო რისკშა ულა, მუჟამსით ადამიან მუშ სიცოცხლეს ინიჸოთანს საფრთხეშა.

თე მაგალითეფიშ გარჩიებაშ უკულ, შილებე გოირჩქინდან კითხვეფქ: მუჭო მეფხვადათ, სპორტიშ ნამ სახეობა რე ექსტრემალურ? გართობაშ ნამთინე სახეობა შილებე საშიშ ვა რდას, მარა იშენით ითხინდას ჩქინდე სიფრთხილეს. მუჭო მეფხვადათ, სოდე რე საზღვარ?

ქოღირნო რისკშა ულა?

თე კითხვას ქუპასუხათინ, ალალას ოკო შევაფასათ ირნერ საქმიანობა. მაგალთო, ქოკითხით თქვან დუდის: მუ უბედურ შემთხვევეფ ხვადუ თე სპორტიშ დროს? ქომღუნო საჭირო მომზადება დო დაცვაშ აღჭურვილობა? მუ მოხვადუ, ქუდვანთხჷ, მუდგარენქ ვაგმაზიმ ვარდა დაცვაშ აღჭურვილობაქ ვა გამმართლ-და? მუ მაჸუნუ თეს შედეგო, ჭიჭე დაზიანება, სერიოზულ ტრავმა დოვარ ღურა?

დუდიშ ართუაფალო უაზრო რისკშა ულაქ, შილებე იმოქმედას იეჰოვაწკუმა ჩქინ ურთიერთობაშა დო კრებას პასუხიშმგებლობეფშა (1 ტიმოთე 3:2, 8—10; 4:12; ტიტე 2:6—8). არგამა რე, ქრისტიანეფ გართობაშ დროს ხოლო ითვალისწინენა ღორონთიშ თვალსაზრისის სიცოცხლეშ სიწმინდეწკუმა დაკავშირებით.