Ino ma Raha Koran̈iny Baiboly?

Tokony Han̈ano ‘Sport Mahery’ ma Zaho?

“AMINANDRA IZIOTY, MAHAIMARO AMINTSIKA MIALA AMY SEZINOLO AMPIZAHA, KE ATSIKA FOEKY MITSAMBOKINY BAKA AN̈ABONY AVION, BAKA AN̈ABONY BONGO MIJOTSO AMY TADY, MIFAN̈OESA MITANDATSAKA MAN̈ARAKA SARORO AMY LAKA HELY, MIVARIN̈Y AMY RANO MISY REKIN.”​—GAZETY THE WILLOW GLEN RESIDENT.

HITA baka amy fan̈azavan̈a io fa olo izioty mahaitia sport mahery fo, karaha ataony fitsambokinan̈a baka an̈abo avion, fan̈anihan̈a bongo misy lanezy, avio parapente (mitsambokiny baka amy tany miriran̈a, amy parasitista), avio BASE jumping. * Misy raha koa fa karaha tsy posibla vitanolo foeky, snowboard an̈arany (kakazo fisaka igorisian̈a amy lanezy, ke vity in̈y asalisaly na koa vatan̈a), VTT (Bisikilety tout terrain), skate (kakazo fisaka ndreky fohiky misy laroa), baka io koa karazan̈a rollers (kiraro misy laroa), iro koa fa mandeha amy bongo mahitsy be in̈y, baka io bongo misy vatovato farany an̈abo, avio mifan̈oesa mitsambokiny farany an̈abo. Koran̈iny gazety Time fa atahoran̈a mare fitiavanolo sport mahery io. Zen̈y man̈aboaka fa setry mare olo maro han̈ano ‘raha mipaka amy farany itambarany antambo ndreky fahaizan̈a, avio tahotro, ke mahavy iro olo pisoma amizio isaka farany herin̈iandra ndreky iro atlety efa zadraharaha, hahatsapa fa efa nahavita nihoatra raha vitany tamy farany izy.’

Fa kanefa mahaimaro fo olo tia izio, avio izio vangain̈a lafo koa. Mahaimaro fo olo maratra, izikoa sport tsy ratsy, kanefa atao maresaka mare. Karaha ataony ta Etazonỳ taminy 1997, nitombo 33 isanjato isanolo nisoma skateboard (kakazo misy laroany roller) naratra nampidirin̈y tamy réanimation, avio 31 isanjatonolo nisoma snowboard, avio 20 isanjatonolo nan̈aniky bongo koa. Hita baka aminy hamarozany olo maty baka amy sport mahery io fa man̈ody mampivarahontsan̈a olo raha avoa olo man̈ano sport mahery io. Haindro olo aby manohan̈a arabola sport mahery io raha zen̈y. Karaha ty nikoran̈iny man̈angy araiky pirisiky amy fan̈anovan̈a sky io: “Tsy afaka an̈aty jeriko foeky fahafatesan̈a zen̈y.” Nisy pisoma snowboard zay koa nivolan̈a fa “tsy nifen̈y tsarabe anao, izikoa tsiary naratra tamizio.”

Ziska eto, izikoa tarafin̈y baka amy raha jiaby zen̈y, akory tokony ho fahitany Kristianin̈y fan̈anaovan̈a soma karaha zen̈y? Akory hataony Baiboly man̈ampy atsika hanapakevitry han̈ano sa tsy han̈ano amy sport mahery io? Handiniky hevitriny Zan̈ahary momba fahamasin̈any fahin̈ana io atsika, fotony raha zen̈y han̈ampy atsika hamaly iro fan̈ontanian̈a aby io.

Fiheverany Zan̈ahary fahin̈ana

Baiboly mivolan̈a amintsika fa Jehovah “loharanony fahin̈ana.” (Salamo 36:9) Tsy vitany niasa atsika fo izy fa ten̈a tia atsika, fotony namiany raha jiaby ahavitantsika mankafy fiain̈ana. (Salamo 139:14; Asan’ny Apostoly 14:16, 17; 17:24-28) Mazava baka amy zen̈y fa Jehovah io tsara fan̈ahy, ke tiany izikoa atsika man̈aja fahin̈ana namiany atsika io. Lalàn̈a ndreky fitsipiky namiany firenenany Israely man̈ampy atsika hahatakatra raha zen̈y.

Nitakiny Lalàn̈any Mosesy fa olo tsiaraikiaraiky mila man̈ano raha hiarovan̈a fahin̈ananolo. Izikoa tsy natao raha zen̈y, ke nisy olo naty, nibaby trosandio edy olo io, fotony tsy nan̈ano raha hisakanan̈a raha namono olo io. Ohatra, tompintran̈o koa miasa tran̈o, nila niasa valavala vy izy, atao mikodidin̈y amy tampony tran̈onany vaovao io. Izikoa izy tsy man̈ano karaha zen̈y, ke misy olo latsaka baka an̈abo an̈y ke naty, tran̈o io nibaby trosandio. (Deoteronomia 22:8) Izikoa nisy aomby ndraiky sendra mitomboko olo ke naty olo voatomboko io, tompinizio tsy tompinandraikitry tamy zen̈y. Fa izikoa ndraiky hay fa izio aomby efa malaza masiaka, ke tompiny efa nampitandremin̈y tamizio kanefa nibanjainy fo aombinany io, ke aomby io baka tio nahafaty olo, nibaby trosandio tompiny aomby io, ke nivonen̈a. (Eksodosy 21:28, 29) Hita amy Lalàn̈any Jehovah io fa ten̈a valera aminany fahin̈ana io, ke mila hajain̈a mare ndreky arovan̈a mare.

Nazava tamindro olo aby tsy nivadiky tamy Zan̈ahary aby io koa fa tokony harehan̈a amy fiain̈ananten̈a manokan̈a koa iro fitsipiky aby io. Tantarainy Baiboly ao fa Davida nikoran̈a hetahetamponany ‘tihigiaka amy rano baka tamy fantsakan̈a ta Betlehema’ tan̈y. Fa tamy zen̈y Filistiny nifehy Betlehema. Ke nisy maramilany Davida telo naharen̈y volan̈anany io, ke niditry forse tamy tobindro filistiny aby io. Nan̈ovo rano baka tao iro, avio raha io nindesindro tamy Davida tan̈y, namiandro izy. Akory ho Davida? Tsy nety nigiaka rano io izy, fa nararany tamy tany raha io. Karaha ty nambarany: “Tsy mety zaho koa higiaka liondro lelahy nitono ain̈y aby ty! Nirisiky fahin̈anandro iro io nitondrasan̈a rano io taminaka tatỳ.” (1 Tantara 11:17-19) Tsy tan̈aty jeriny Davida foeky han̈ano raha hahafaty olo araiky, izikoa baka aminy hetahetamponany fo.

Jesosy nan̈ano karaha zen̈y koa, Devoly koa fa nitsapa jery izy. Nan̈aboahany fahitan̈a izy, ke nirahiny nitsambokiny baka tan̈abony tempoly, misy ahitan̈a asa hiaro izy anjely aby io, ke tsy haratra izy. Fa ho Jesosy: “Aza mitsapa jery Jehovah Zan̈aharinao.” (Matio 4:5-7) Na Davida na Jesosy samy nan̈eky fa ratsy manoloan̈a Zan̈ahary, koa olo araiky manalisaly fahin̈ana amy raha tsisy dikany, ke mety handratra na hamono olo.

Izikoa raha jiaby zen̈y zahan̈a, atsika mety han̈ontany karaha ty: ‘Akory hahaizan̈a tsarabe fa mahery sport araiky na mandratra na mamono foeky? Akory ahaizan̈a limitiny sport mety hatao fotony nata sport tsotra na tsy mampan̈ino, mbala mety avadikinolo sport mahery fo?’

Man̈eva totoen̈a fo ma izio?

Atsika koa mandiniky raha jiaby tiantsika hatao, han̈ampy atsika hahay valiny fan̈ontanian̈a aby io raha zen̈y. Ohatra, atsika mety man̈ontany ten̈a karaha ty: ‘Firy isanjato raha mety havoa zaho amy sport ty? Efa nampianarin̈y zaho ma izio sady efa misy fitaovan̈a fiarovan̈a ain̈inaka koa ma zaho baka tsy haratra? Han̈ano karakory zaho koa diso hely izikoa fa mitsambokiny na izikoa tsy mandeha tsara fitaovan̈a fiarovan̈a ain̈inaka? Ho vontro mora fo ma raha mety havoa zaho io sa mety handratra zaho mare na mety hahafaty zaho foeky?’

Izikoa misy olo araiky manan̈a tombontsoampanompoan̈a manokan̈a amy fiangonan̈a kanefa mirisiky fahin̈ananany izikoa fa mangala diandian̈a, mety hisy vokany amy fifandraisany amy Jehovah na aminy andraikitrinany amy fiangonan̈a raha zen̈y. (1 Timoty 3:2, 8-10; 4:12; Titosy 2:6-8) Ke hita baka amy zen̈y fa Kristianin̈y araiky nata mangala diandian̈a, tsy tokony hadin̈any fa fahin̈ana io masin̈y amy Pamoron̈o atsika.

[Lamariky amy pazy ambany]