Yakyar Moḇ Yahwe Myam Rik Na

Dokter Oso Fyawar Farfyar ro Kankenem Ḇyena

YARO auditorium rum ḇeduf, aya isya yakofenḇair hasil otopsi ro snonggaku ḇemar kwar oso ro barpon dokter ḇesesya. Snonggaku ḇemar ani ismai dafduf tumor ganas, ma yakofen yoḇ si, ”Bisa kokofen roi ḇefrur snonggaku ine imar iso hemolisis [sel rik ḇerik naḇye ḇa kwar] ma ginjal ḇyeja fyararur mnis ḇa kwar kukro ismai transfusi rik nabor manggenem.”

Profesor oso dores bo imsor ma dar naba kaku, ”Inja woḇe nggosun rik ḇesasar ḇe snonggaku ine ke?” Yakarem bo yoḇe, ”Yakofen rarirya ḇa.” Mura yafasnai slide ḇefasnai bar kasun ro snonggaku ani ginjal ḇyedi. Yakofen wer, ”Komam lisis [roi ḇeḇye ḇa] ro sel rik ḇerik na nabor kaku ḇero ginjal ya bandumri inja bisa kokofen ine nafrur fa ginjal fyararur mnis ḇa kwar.” * Kawos mboi rya imbe komasasor kero, rawo jadi fa yawos ḇa. Ayama dokter ḇebabo ma dokter ani ima profesor diri, imboi yakara yasusu awer.

Fyor famfabri ani ḇejadi ya, ayama Saksi Yahwe risaya ḇa. Yaḇeaḇen ro taun 1943 ro Sendai, mnu oso ro sup Jepang bar wambrur. Kma yedi ima patolog ma psikiater, inja yun snemuk fa yakfarkor ḇe dokter. Yafarkor taun ri suru ro rumfarkor faro dokter sya, mura ro taun 1970 yafarḇuk kuker binkbor oso snori Masuko.

Yasun ro Farkarkor Patologi

Fyor yafarkor kaker anya, Masuko fyararur fa dakfnoḇek fandun nuḇena ro ras-ras. Farkarkor ḇe dokter ine yamarisen kaku na. Yamanen kaku kuker nyan moḇsa ḇaken snonggaku koine neḇefrur rai! Rarirya mḇoi, yakara ḇaḇeri Manḇefrur ima isya. Yakara yasewar fa yafawi nabor ro medis na nḇuk payamyum ro kenem yena. Iso ḇefnai fa, yakḇe dokter kwar mura, yakinfir fa yafarkor pdef ro farkarkor dokter ine kuker yun bidang patologi​—ḇefarkor roi ḇebair, roi ḇeḇefnai, ma roi na ḇejadi snar dafduf na.

Rofyor yaḇe otopsi snonggaku ḇemar snar siduf kanker, ine nafrur fa yakyar manggun faro transfusi rik na wer ḇa. Snonggaku ḇeduf kanker ganas rik ḇyena na nado snar rik nasasyar ker. Kukro kemoterapi nafrur fa snonggaku ḇeduf kanker rik sena nado kaku, inja dokter sya sor fa sbuk transfusi. Ḇape, yakara transfusi iso ḇefnai dafduf kanker iryewen ḇe baken ḇesiper. Rarirya mḇoi, baboine sifawi transfusi rik nafrur fa baken nya samambraḇ wer ḇa, inja napyan fa ismai kaber dafduf tumor ma beduf kanker na ikenem kawan ba. *

Ro taun 1975, yasmai kasus imnis yafawar insanja. Profesor ani iso ḇena fakamamar fa myam kasus anya, ima spesialis ro bar hematologi. Iso ḇefnai fa imsor kaku fyor ryower yakofen transfusi rik nafnai kwar snonggaku ḇeduf kanker anya imar! Ḇape, yawos pdef presentasi yena, ma fyoro mura imsor wer ḇa.

Dafduf ḇaido Marmar Noḇa

Rya ro swaf anya kako bin ḇebinsar kaku kwar, ima Saksi Yahwe diri, ryama isrow kuker swa yedi. Dap ker wos ”Yahwe” ro awawos ḇyena, inja swa yedi ifuken rosai knam ro wos ani. Saksi Yahwe ani kyarem, ”Yahwe ima snonsnon ro Allah ḇekaku.” Masuko iwasya Refo kwar ro fafisu iḇaḇa kaker, ḇape Refo ḇyepake anya sfadwer Allah snonsnon Ḇyedi ḇe apap ”MANSEREN”. Kirine insape ifawi Allah ima nya snonsnon mangundi ḇardi!

Ro fafisu anya ḇeri, Masuko fyarkor Refo kuker Saksi ḇeḇesinan kwar ani. Fyor yabur ro rum ḇeduf ro oras 1.00 arwo prim ya, swa yedi kuker marisen ikofen ḇe aya, ”Ro Refo ikofenḇair dafduf ma marmar nari naisya wer ḇa!” Yakarem bo yoḇe, ”Sye na ipyum kaku!” Ikofen wer, ”Kero wer dunya ḇabo na ryama, inja yamewer wafnak oras bena.” Yakara imarisen insama yamnai ro fararur yena ḇe dokter, inja yamsor i ma nukain pyum wer ḇa.

Ḇape, swa yedi imewer isusu fa ifnoḇek aya insama yakyar. Ḇyenadi ḇe Allah insama ifnoḇek i fa isrow mnuk-mnuk ḇesrow ma fyasnaiḇair na ḇe aya. Wos ḇero Pengkhotbah 2:22, 23 nsun kaku ro sanerido, ”Rosai snonggaku sya sismai ro fararur marbak sena ma raryaḇ ḇedif si fa sfararur marbak ro ḇaḇ ori ya? Ro ras-ras kenem ḇyedi, fararur ḇyena nafrur fa ḇyekandera ma iḇoryae. Ro roḇ na kako, sneri iknon ḇa. Ine kako nefromo monda.” Wos nane ndarirya kaku ro roi yafrur na isoine yaḇuk kenem yenakam faro fararur dokter ine ras ma roḇ ḇape yasmai royoḇa.

Ro ras Minggu arwo paik Juli 1975, fyor swa yedi imḇe rya ḇe Balai Kerajaan Saksi-Saksi Yahwe, yun snemuk fa yakra ḇediwa kako. Swa yedi ikandor kaku myam aya isya rodiwa, ma Saksi sya sisaser pyum aya. Ro swaf anya ḇeri, yaso ker fananjur ras Minggu nakam. Paik oser mura, Saksi oso byuk farkarkor Refo ḇe aya. Paik ri kyor fyor Saksi Yahwe oso ryama ḇe swa yedi mura, dun snemuk fa dakḇe baptis.

Yakyar faro Allah Mamam Ḇyena Ḇekur Rik Na

Yafarkor fyoro ḇa mura yafawi Refo byuk parenta ḇe snonggaku Kristen fa sbinggwanḇur rik na. (Farfyar [Kisah] 15:28, 29; Kejadian 9:4) Snar yakyar manggun ḇa transfusi rik na nbuk pararei, inja samswen ḇe aya ḇa fa yakyar faro Allah mamam Ḇyena ḇekur rik na. * Yakara, ’Manḇedaw isya kaku ma ima wos Ḇyena ido, ima kakaku nairi.’

Yafarkor fa yafawi roi ḇefnai koduf ma komar iso sasar ro Adam i. (Roma 5:12) Ro fafisu ani, yasewar fa yafawi nabor ḇekur arteriosklerosis. Fafisu koḇe mansar binsar, pembuluh rik koḇena npakrek ma nafyos, iso ḇefnai fa kona dafduf jantung, kelainan pembuluh rik ro awuk koḇena, ma dafduf ginjal. Ine imnis kuker roi Refo ikofen ya isoine snar kona sasar ro Adam ma Eva su kwar. Roi ine nafnai fa yamarisen manggun wer ḇa faro fawawi kedokteran ine. Yahwe iso monda nari ḇepyos dafduf ma marmar!

Ro paik Maret 1976, paik ri fik fyor yafarkor Refo ya, yamnai ro sasewar medis yafrur na ro rum ḇeduf ḇero universitas yafarkor anya. Yamgak nari yafararur wer ḇa ḇe dokter, ḇape yana fararur ro rum ḇeduf ḇesena. Yaḇebaptis ro paik Mei 1976. Yakara nyan ḇepyum ya iso yabuk kenem yedi fa yafarmyan ro oras nakam ḇe perintis. Ma yasun randak ro fararur ine ro paik Juli 1977.

Yawoswarek Allah Mamam Ḇyena ḇekur Rik ya

Ro paik November 1979, aya ma Masuko nura nufnoḇek sidang ro Prefektur Chiba ḇefandun kaku manbaryas. Yasrow rum ḇeduf oso ma yasmai fararur ro oras nakam ḇa ro dia. Ras ḇerandak yafararur ro dia, ahli ḇedah ḇeḇeso srama yoḇ aya. Sifuken ker aya, ”Saksi Yahwe disaw inja rosai na wafrur ya fafisu sun ḇedine snonggaku oso ḇefandun transfusi rik na?”

Kuker syowi yakofenḇair ḇe si nari yaso rosai Allah ikofen ḇekur rik na. Yakofenḇair ḇe si nyan ḇeḇeso naisya bisa koḇepake na ḇardibur transfusi rik ma aya bardi nari yasewar kaku fa yafnoḇek snonggaku ḇeduf ḇerama ḇeyor fafnoḇek yena. Oras oser kwar nggawos roi ine ramnai, ḇebukor ro ahli bedah ansi doḇe, ”Yafawi kwar. Ḇape, snonggaku oso rik ḇyena indokada nabro bo sun i ḇe dine ido, nari nggoiso ḇemam i.” Ḇebukor ro ahli bedah ani ima snonggaku sya samswen kaku sfararur kayam kuker i, ḇape ro ras kawawos anya nuna wis ḇepyum, ma ḇyesyowi kaku kakyar ayena.

Syowi Yena faro Rik na Neḇeuji

Rofyor nufarmyan ro Chiba, kantor pusat Saksi-Saksi Yahwe ro Jepang sḇawes babo ro Ebina. Aya ma swa yedi nuyek oto ḇediwa minggu oser kali oser fa numam pararei ro naek srar ḇefararur ḇe relawan fa sbawes aidoram ine, sor ḇe Betel. Paik ḇeḇeso raposa, yasmai undangan fa yafarmyan ro oras nakam ro Betel Ebina. Iso ḇewar fa, ro paik Maret 1981 nggoḇarek ro aidoram sementara sbuk na faro relawan ri 500 sya fa sbarek ro na. Yakbok ro arwo fa yafrur sren moḇ fa sbuki masi ma kakus ḇero moḇ ya, ma ro arkok ya yaḇe priksa ḇefararur sya pararei sena.

Pasien oser yedi iso Ilma Iszlaub, ryama ro Australia ḇe Jepang fa duffarmyan ḇe utusan injil ro taun 1949. Ismai dafduf leukemia ma dokter ḇyedi ikofenḇair kenem ḇyena na paik ri rim monda. Ilma imewer ismai transfusi rik insama ikenem kawane mḇoi kyinfir fa ryama ḇe Betel fa byarek rodine isof ro imar. Ro swaf anya, obat sbuk insama sel ḇerik na neke, raris eritropoietin, naisya ḇaime. Inja, fafisu ono ḇarbor ro hemoglobin ḇyena nado rawo gram ri 3 ḇaido 4 monda! (Ipyum ya gram ri 12 isof 15.) Imḇape, yasewar kaku insama yafaduru pyum i. Ilma fyasnai kakyar ḇesambraḇ ḇyena pdef faro Allah Wos Ḇyena isof ro imar ro paik Januari 1988, taun ri fik ḇyenande fyor ifawi dafduf ḇyena!

Ro taun ḇe taun, relawan ono ro kantor cabang Saksi-Saksi Yahwe ḇero Jepang sfandun pembedahan. Yakofen syowi kasumasa kukro dokter ro rum ḇeduf ḇefanam sifararur kayam kwar insama sifrur oprasi kuker rik ba. Ono ido sor aya fa yaksun ḇe sim seoprasi anya fa yakmam moḇsa sifrur na rai, ma fyorno ido yakso fa yakḇe oprasi kako. Yakofen kasumasa kaku faro dokter ḇefasnai syowi kwar faro Saksi Saksi Yahwe kakyar sena ḇekur rik. Yafarur kayam kuker si nbuk swaf ḇepyum ḇe aya fa yakofenḇair kakyar yena faro si. Oser ro fandu dokter ansi fyoro ḇa ine dakḇebaptis ḇe Saksi Yahwe kwar.

Roi ḇepyum kaku iso snar dokter sya sisewar fa smam Saksi-Saksi Yahwe ḇeduf sya mboi sepake rik na ḇa nafnoḇek kaku fararur ro dokter sya. Sifrur oprasi bo sepake rik na ḇa nfasnai kaku payamyum kosmai snar kopampum transfusi rik na. Penelitian ḇeḇeso na nfasnaibos kaku snonggaku ḇeduf ani na iprei fasaw ma nya dafduf nabor ba fyor oprasi ya raposa.

Yafarkor Pdef ro Dokter Ḇeba Syadi

Yasewar pdef fa yamam roi ḇebabo ro fawawi kedokteran na. Imḇape, yafarkor pdef kako ro Yahwe, Dokter Ḇeba Syadi. Koma komam monda roi ḇero bandi na ḇape ima myam ko ḇe snonggaku oso ḇesiper. (1 Samuel 16:7) Dokter risaya, inja yasewar fa yafrur pyum snonggaku ḇeduf yamamfar ansi kenem sena ḇesiper, yamam faro dafduf sena monda ḇa. Ine nafnoḇek aya fa yabuk fafnoḇek medis ḇepyum syadi ḇe si.

Yafarmyan pdef ro Betel, ma yafnoḇek snonggaku ḇesesya kako fa sfawi Yahwe I. Ma roi oso ḇefrur yamanen I kako iso mamam Ḇyena ḇekur rik ine. Yaḇenadi insama Dokter Ḇeba Syadi, Allah Yahwe, nari ipyosbur dafduf ma marmar nakam.​—Ḇefawar ya iso Yasushi Aizawa.

[Fasfas Kasun]

[Ḇeḇeyap]

”Yakofenḇair ḇe si nyan ḇeḇeso naisya bisa koḇepake na ḇardibur transfusi rik ma aya bardi nari yasewar kaku fa yafnoḇek snonggaku ḇeduf ḇerama ḇeyor fafnoḇek yena”

[Ḇeḇeyap]

”Sifrur oprasi bo sepake rik na ḇa nfasnai kaku payamyum kosmai snar kopampum transfusi rik na”

[Sonin]

Bo ya: Dawos faya ro Refo

Raku: Aya ma Swa yedi, Masuko, ro baboine