Мин ханға, Худайох чіли, кӧр сыххам

ПІР ИМҶІ ЧООХТАП ПИРГЕН

РАКНАҢ ағырып, ӱреен кізінің істіндегі органнарын істескен соонда, мин больницадағы конференц-залда имҷілернің алнында чоох тутхам. Мин теем: «Пу кізее кӧп хан урған ӱчӱн аның гемолиз (ханның эритроциттері сайбалғаны) паза острай почечнай недостаточность пол парған. Сынында ол аның ӱчӱн ӱреен».

Пір профессор, турып алып, аахтап сыххан: «Піс ағаа саба группалығ хан урыбысхабыс тіп санапчазар ба?» «Чох, мин іди сағынминчам», — нандырғам мин. Анаң, слайдтарда ӱреен кізінің пӱгӱрегінің оох чардыхтарын кӧзіт пиріп, чоохтанғам: «Піс мында пӱгӱректе сайбал парған эритроциттерні кӧрчебіс. Анзы острай почечнай недостаточностьха ағылған тирге чарир» a. Залда ізіг полыбысхан, минің ӧӧзім прай хурғап парған. Мин наа ла тоғынып пастаан имҷі полғам, миннең тоғыр, тізең, профессор турчатхан. Че мин нандыра пазынмаам.

Ол туста мин Иегованың киречізі полбаам. Мин 1943 чылда Сендайда, Японияның алтынзархы саринда турчатхан саарда тӧреем. Минің пабам патолог паза психиатр полған, аннаңар мин медицинаны ӱгренерге пӧгін алғам. 1970 чылда, медицинскай факультеттің ікінҷі курзында ӱгренчеткемде, піс Масуконаң хоных хон салғабыс.

Патолог полып тоғынчам

Мин ӱгренчеткен туста Масуко тоғынған, піс аның ахчазына чуртаабыс. Мин медицинаа уғаа тың хынғам. Кізінің организмі хайди пӱткенін кӧріп, уғаа тың хайхаам. Андағ даа полза, мин Чайаачыдаңар пір дее сағынмаам. Медицинскай істезіглер чуртазымның смыслы полар тіп сағынғам. Имҷі полып алған соонда, патология кирегінде тоғын сыххам. Ол наука ағырығларның сыхчатханын, хайди иртчеткенін паза нимее ағылчатханын істесче.

Ракнаң ағырып, ӱреен кізілернің ит-сӧӧктерін істезіп, мин хан урғанының тузазында ікінҷілеп сыххам. Рактың халғанҷы стадиязында ағырчатхан кізілернің ханнары ахчатхан ӱчӱн анемия пол сыхча. Химиотерапия анемияны улам аар итче. Аннаңар имҷілер андағ кізее хан ур сыхчалар. Че мин хан урғаны ракты улам таратча тіп сағын сыххам. Пӱӱн, тізең, хан урғаны иммунитетті чабыра пасчатханын пілчелер. Аның ӱчӱн ракнаң хатап ағырыбысхан кізілернің саны ӧсче паза онкологиянаң ағырчатхан кізілер удаа арах ӱрепчелер b.

Статья пасталчатханда чоохталған кирек 1975 чылда полған. Ол профессор гематологияның специализі полған паза ол кізіні имнеен. Аннаңар мин ол кізі хан урғанының ӱчӱн ӱреп парған теемде, ол профессор тарыныбысхан. Че мин позымның кӧрізімні чарыда чоохтаам, аннаңар ол амырап парыбысхан.

Ағырығ даа, ӧлім дее чох полар

Ол туста минің ипчімзер пір улуғланыбысхан ипчі килген. Ол ипчі Иегованың киречізі полған. Чоох аразында «Иегова» тіп сӧсті адабысханда, минің ипчім нимедір ол андағ тіп сурған. Ол ипчі: «Иегова сын Худайның ады»,— тіп чоохтап пирген. Масуко кічігдең сығара Библияны хығырған, че аның Библиязында Худайның адының орнына «Хан Худай» тіп титул турған. Ам, тізең, ол Худай ады пар личность полчатханын піліп алған!

Масуко ол ипчінең Библия ӱгрен сыххан. Мин пір час хараада ибзер килгемде, ол мағаа ӧрініснең чоохтаан: «Библияда ағырығлар даа, ӧлім дее чох полар тіп чоохталча!» Мин ағаа: «Анзы чахсы поларҷых!» — тіп нандырғам. Ол аннаң андар чоохтанған: «Наа тилекей уғаа чағын, аннаңар мин сині тикке тус хоратпазын тіп сағынчам». Ол мині имҷі полып тоғынмазын тіп сағынча тіп сағын парғам, аннаңар тарыныбысхам. Ол тустаң сығара піс чоох алыс полбин сыххабыс.

Че минің ипчім холларын тӱзірбеен. Пазырып алып, ол мағаа килістіре стихтарны, таап алып, хығыр пирҷең. Экклезиаст 2:22, 23-гі сӧстер чӱрееме уғаа теңеннер: «Прай тоғызының паза аны кӱн алтында тоғындырчатхан кӱстеністерінің ӱчӱн кізі ниме алча?... Хараа даа аның чӱрее истіг узубинча. Анзы ідӧк тик ниме». Пу сӧстер миннеңер пазылғанға тӧӧй полған. Мин чуртазымны медицинскай істезіглерге пиріп, хараа-кӱнӧрте тоғынғам, че иткен киректеріме чӧпсінминчеткем.

От айында 1975 чылда пірсінде позырах иртен минің ипчім Иегованың киречілерінің залынзар чыылыға парыбысхан. Кинетін мин андарох парарға сағынып алғам. Ипчім, мині анда кӧр салғанда, уғаа хайхап парған. Иегованың киречілері прайлары мині чылығ удурлааннар. Ол тустаң сығара мин андар позырах сай чӧр сыххам. Пір айҷа пазынаң пір харындас миннең Библия ӱгрен сыххан. Иегованың киречілері минің ипчімзер пастап килгенінең ӱс ай пазынаң ипчім кіреске тӱскен.

Ханға, Худайох чіли, кӧріп пастапчам

Мин ӱр ниместең Библия христианнарға хан чи́рге чаратпинчатханын піліп алғам (Бытие 9:4; Илҷілернің 15:28, 29). Хан урғанының тузазында мин ікінҷілеп сыххан полғам, аннаңар ханға Худайның кӧрізін позыма аларға оой полған c. Чайаачы пар полза паза ол андағ устағ пирчетсе, ол устағ орта полар тіп сағынғам.

Ідӧк мин кізілер Адам иткен чазыхтың ӱчӱн ағырчатханнарын паза ӱрепчеткеннерін піліп алғам (Римдегілерге 5:12). Ол туста мин склероз сосудов тіп ағырығны істескем. Пола-пола пістің артерияларыбыс ніскеҷек арах пол парчалар паза хат парчалар. Анзы чӱрек ағырығларына, цереброваскулярнай расстройстволарға паза пӱгӱрек ағырығларына ағылча. Мағаа пілдістіг пол парған: піс толдыра нимес, чазыхтығ кізілербіс, аннаңар ағырчабыс паза ӱрепчебіс. Ӱр ниместең медицина мағаа хынығ нимес полыбысхан. Иегова ла ағырығларны паза ӧлімні чох ит полар.

Кӧрік айында, 1976 чылда Библия ӱгреніп пастаанынаң читі ай пазынаң мин университеттегі клиникада иртірген істезіглерімні тохтадыбысхам. Паза, имҷі полып, тоғын полбассым тіп хорыххам, че пасха больницада тоғыс таап алғам. Сілкер айында, 1976 чылда мин кіреске тӱскем. Мағаа прай тузымны пиріп нымысчыланғаны иң чахсы чуртас чолы полар тіп санаам, аннаңар от айында, 1977 чылда мин пионер полып нымысчылан сыххам.

Худайның ханға кӧрізінің алнына турчам

Кічіг хырлас айында, 1979 чылда піс Масуконаң хада Тиба префектурадағы пасха ӧмезер чӧр сыххабыс. Анда искірігҷілер кирек полған. Анда мин чарым кӱн тоғынарға оңдай пирчеткен больница таап алғам. Пастағы кӱн тоғысха килгемдӧк, пасха имҷілер мині сурастырғлап сыхханнар: «Кізее хан урарға кирек пол парза, син, Иегованың киречізі, ниме идерзің?» — тіп сурғаннар.

Мин оларға ханнаңар Худайның принциптерін тудынарбын тіп улуғласнаң нандырғам. Паза мин оларға хан урарынаң пасха имнег оңдайлары пар тіп чоохтаам. Ідӧк ағырығ кізее полыс пирер ӱчӱн, прай кӱзім салам тіп чоохтаам. Ӧӧн хирургнаң пір часча чоохтасхан соонда, ол мағаа теен: «Мин сірернің кӧрізіңерні піліп алдым, че піске кӧп хан чідір салған кізіні ағыл килзелер, піс позыбыстың оңдайынҷа тудынарбыс». Ӧӧн хирург аар хылыхтығ кізі полған. Че іди чоохтазып алған соонда, піс аннаң хада ынағ тоғынғабыс. Ол минің кӧрістерімні улуғлаҷаң.

Минің киртінізім сынаға урунча

Піс Тиба префектурада нымысчыланчатхан туста Эбинде Иегованың киречілерінің Япониядағы наа филиалы пӱдірілген. Оларның филиалын Вефиль тіп адапчалар. Неделя сай піс андар ол пӱдірігде араласчатхан Иегованың киречілеріне имнег кирегінең полызарға чӧрҷең полғабыс. Нинҷе-де ай пазынаң пісті Эбиндегі Вефильзер нымысчыланарға хығырып алғаннар. Кӧрік айында, 1981 чылда піс андағы ӱр нимеске пӱдірілген тураларзар кӧс парыбысхабыс. Ол тураларда 500 азыра пос кӧңнінең тоғынчатхан кізі чуртапчатхан. Иртен сай мин пӱдірігдегі душевойларны паза туалеттерні арығлаҷаң полғам. Обед соонда имнег тоғызынаң айғасчаң полғам.

Анда пір пиҷе, Илма Излоб, лейкознаң ағырыбысхан. Ол 1949 чылда Япониязар Австралиядаң, миссионер полып, килген. Имҷілер ағаа сағаа нинҷе-де ле ай чуртирға халды тіп чоохтап пиргеннер. Ӱр арах чуртап алар ӱчӱн, ағаа хан урарға кирек тееннер. Илма хан урдырарға отказ полыбысхан. Позының халғанҷы кӱннерін Вефильде чуртирға пӧгін алған. Ол туста организмге кӧп арах эритроциттер сығарарға полысчатхан эритропоэтин осхас имнер чох полған. Пірееде Илманың гемоглобині 3—4 грамм на халҷаң (хазых кізінің 12—15 грамм полча). Мин аны, прай кӱс салып, имнеем. Илма аның соонаң читі чыл чуртаан. Ол кӱрген айында 1988 чылда ӱреп парған. Ол Худайның Сӧзіне, ӱреенҷе, пик киртіністіг халған.

Піс Вефильде нымысчыланчатхан туста пірее доброволецтерге операция идерге кирек полҷаң. Вефиль хыриндағы больницалардағы имҷілер, операцияны хан урбин идіп, піске полысчаңнар. Аның ӱчӱн оларға улуғ алғыс! Мині удаа операция хайди иртчеткенін кӧрерге операционнайзар хығырып алҷаңнар. Пірееде мин ассистировать полҷаң полғам. Иегованың киречілерінің ханға кӧрістерін улуғлапчатхан имҷілерге мин уғаа алғыстығбын. Оларнаң хада тоғынып, мин нинҷе-нинҷе хати оларнаң позымның киртінізімнең ӱлескем. Ӱр ниместе ол имҷілернің пірсі, кіреске тӱзіп алып, Иегованың киречізі полып алған.

Чоохтирға кирек, Иегованың киречілерін, хан урбин, имнирге кӱстенчеткен имҷілер имнег кирегіне уғаа полыс пиргеннер. Хан урбин операция иткені ханнаң тузаланмин имнеені хай-хай артых полчатханын кӧзіт пирген. Істезіглер хан урдырбаан кізілер хай-хай табырах хазыхтанчатханнарын паза оларның операция соонда осложнениелер хай-хай асхынах полчатханын кӧзітчелер.

Илбек Имҷідең аннаң андар ӱгренчем

Мин медицинаның чидіглерінең халбасха кӱстенчем. Че ӧӧнінде Иеговадаң, илбек Имҷідең, ӱгренчем. Ол прай кізілерге кӧрінчеткен нимелерні ле нимес, че кізіні прай ӧтіре кӧрче (1 Самуила 16:7). Мин кізіні имнепчетсем, аның ағыриин не санға алып нимес, че прай личнозын санға алып, имнирге кӱстенчем. Анзы мағаа кізіні чахсы арах имнирге полысча.

Мин Вефильде аннаң андар нымысчыланчам. Че кізее Иегованаң танызып аларға паза аның ханға кӧрізін піліп аларға полысханы мағаа иң улуғ ӧрініс ағылча. Илбек Имҷі, Иегова Худай, ӱр ниместең ағырығларны паза ӧлімні чох идібіссін тіп, пазырчам. (Ясуси Айзава чоохтап пирген.)

[Сноскалар]

[Вставка]

«Мин оларға хан урарынаң пасха имнег оңдайлары пар тіп чоохтаам. Ідӧк ағырығ кізее полыс пирер ӱчӱн прай кӱзім салам тіп чоохтаам».

[Вставка]

«Хан урбин операция иткені ханнаң тузаланмин имнеені хай-хай артых полчатханын кӧзіт пирген».

[Вставка]

Ӱстӱнде: библейскай доклад чоохтапчам.

Оң саринда: пӱӱн ипчімнең, Масуконаң, хада.