Ekj neem daut aun, woo Gott äwa Bloot denkjt

Een Dokta vetalt siene Jeschicht

EKJ wia em Hospitol en eene Stow, wua de Doktasch toopkomen. Un nu wia ekj met eene Grupp Doktasch toop un ekj wees dee doa, waut wie unjasocht hauden, wuarom een Mensch jestorwen wia. De kranka Mensch storf, wäajen dee soon Kjräft haud, waut sikj bosich vespreed un ekj säd: “Wie haben rutjefungen, daut sien Doot soo haustich kjeem, wia wäajen Hämolyse [Hämolyse es, wan de roode Blootzellen venicht woaren]. Un wäajen wie soo väl Bloot enjelakjt hauden, hieeden de Nieren opp met schaufen.”

Een utjelieeda Dokta, waut doa wia, wort doll. Dee stunt opp un breld: “West du doamet sajen, daut wie orrajchtet Bloot enjelakjt haben?” Un ekj säd: “Daut es nich, waut ekj meen.” Ekj wees dee doa Bilda von een poa kjliene Poatjes von dän Kranken siene Nia, un dan säd ekj: “Wie kjennen seenen, daut de roode Blootzellen venicht worden un daut de Nieren doawäajen soo bosich oppjehieet hauden met schaufen.” * Aule wieren ernoa oppjeräacht un ekj wort sea nerwees. Wan ekj uk noch mau een junga Dokta wia un de aundra wia aul utjelieet, docht ekj oba soo, daut ekj nich wudd biejäwen.

Dit passieed, aus ekj noch nich eena von Jehova siene Zeijen wia. Ekj sie aune 1943 en Sendai jebuaren. Daut es eene Staut en daut nuadne Poat von Jaupaun. Wäajen mien Voda uk een Dokta wia, wort ekj mie eenich, daut ekj wull Medizien studieren. Aus ekj daut tweede Joa enne School wia toom Medizien studieren, befried ekj mie met eene junge Fru, waut Masuko heet. Daut wia daut Joa 1970.

Woo ekj mie utlieed toom Dokta sennen

Miene Fru, Masuko, deed schaufen toom mie halpen, daut ekj kunn miene School verecht moaken. Ekj haud eenen grooten Intressaunt aun Medizien studieren. Ekj wia uk sea vewundat, woo besonda de Menschenkjarpa jemoakt wia. Wan daut uk soo wia, haud ekj bat dan noch kjeenmol doaräwa nojedocht, aus daut kunn eenen Schepfa jäwen. Ekj docht soo, daut wan ekj wudd äwa Medizien studieren, dan wudd daut mien Läwen tofräd moaken. Un aus ekj dan ieescht een Dokta wia, deed ekj doawäajen noch wieda studieren, wiels ekj weeten wull, waut de Krankheiten aun ons Menschen deeden.

Wan ekj Menschen unjasocht, waut aun Kjräft jestorwen wieren, dan wort ekj mie onsecha, aus Bloot enlakjen opp iernst eene Help wia. Een Mensch, waut eene schlemme Kjräftkrankheit haft, kaun veleicht weinich roode Blootzellen haben un sea schwak sennen. Wäajen daut foaken bloos schlemma woat, wan se met Kjräft doktren, wellen de Doktasch foaken leewa bloos Bloot enlakjen. Oba ekj kjeem opp Vedocht, aus Bloot enlakjen daut Kjräft bloos dolla vespreeden deed. Vondoag dän Dach weeten de Doktasch daut aul, daut Bloot enlakjen eenen Mensch, waut Kjräft haft, bloos schwaka moakt. Daut moakt daut, daut daut Kjräft leichta trigjkjemt un daut es väl onsechra, aus deejanja woat läwen bliewen. *

Daut, waut doa passieed, wua wie aum Aunfank vom Artikjel von räden, wia aune 1975. De Dokta wia besonda utjelieet fa Krankheiten äwa Bloot, un hee wia veauntwuatlich fa dänjanjen, waut jestorwen wia. Doawäajen wia daut kjeen Wunda, daut hee soo doll wort, aus ekj säd, daut deejanja jestorwen wia, wäajens wie dän hauden Bloot enjelakjt. Oba aus ekj dan bloos wieda muak met daut, waut ekj säd, wort hee soo bie sacht ruja.

Kjeene Krankheiten ooda Doot

To dee Tiet kjeem eene elre Fru von Jehova siene Zeijen no ons un räd met miene Fru. See haud daut Wuat “Jehova” jebrukt un miene Fru haud jefroacht, waut daut meend. Dise Fru von Jehova siene Zeijen haud jesajcht: “Jehova es de Nomen von dän woaren Gott.” Miene Fru, Masuko, haud aul von kjlien aun emma de Schreft jeläst, oba en dee Schreft hauden se Gott sienen Nomen met “HAR” vetuscht. Oba nu wist see, daut Gott eenen Nomen haud!

Masuko funk fuaz aun, met dise elre Fru toop de Bibel to studieren. Aus ekj Klock 1 de Nacht vom Hospitol no Hus kjeem, säd miene Fru gaunz oppjeräacht: “De Schreft sajcht, daut et de Krankheiten un dän Doot nich mea woat jäwen!” Un dan säd ekj: “Na, daut wudd je oba scheen sennen!” Dan säd see noch: “Wäajen de niee Welt boolt komen woat, well ekj nich haben, daut du diene Tiet saust onneedich vesiemen.” Ekj docht, daut see meend, daut ekj sull opphieren met een Dokta sennen un doawäajen wort ekj sea doll un daut jeef dan uk Trubbel en onse Ehe.

Oba miene Fru jeef bie mie nich Hopninj opp. See bäd to Gott, daut dee ar halpen mucht, Bibelvarzhen to sieekjen toom mie dee wiesen. Twee Varzhen, waut mie sea to Hoaten jinjen, wieren Liera 2:22-23 (PB), wua daut sajcht: “Waut haft de Mensch von aul daut, wua hee oppe Ieed fa jeschauft un sikj bemieecht haft? … Enne Nacht, beorrujen am siene Jedanken. Dit es uk nich to bejriepen.” Dise Bibelvarzhen pausten bie mie bie. Wäajens ekj een Dokta wia, schauft ekj Dach un Nacht un wia oba doch nich tofräd.

En Juli aune 1975, een Sindach zemorjes, aus miene Fru no daut Vesaumlungshus von Jehova siene Zeijen wankt, wort ekj mie haustich eenich, daut ekj uk mol wull doa hanwanken. Miene Fru wia sea vewundat, aus see mie doa sach, un de Zeijen neemen mie aula sea fein opp. Von dan aun wankt ekj jieda Sindach no de Toopkomes. Ojjefäa eene Moonat lota funk een Zeij aun, met mie de Schreft to studieren. Miene Fru leet sikj dree Moonat lota deepen, aus Jehova siene Zeijen ar toom ieeschte Mol besochten.

Ekj neem daut aun, woo Gott äwa Bloot denkjt

Ekj wort boolt en, daut de Schreft lieed, daut de Christen von Bloot wajchbliewen sullen (1. Mose 9:4; Aposteljeschicht 15:28-29). Wäajens ekj mie aul nich secha wia, aus Bloos enlakjen eenen Mensch halpen deed, wia daut fa mie leicht, daut auntonämen, waut de Schreft äwa daut Bloot sajcht. Ekj docht bie mie soo: “Wan daut eenen Schepfa jeft un dit es, waut hee sajcht, dan mott daut uk rajcht sennen.”

Ekj lieed daut uk, daut de Krankheit un de Doot von Adam siene Sind häakjeem, waut wie metjeorwen haben (Reema 5:12). To dee Tiet studieed ekj äwa de Blootodren un ekj wort en, daut wan eena ella woat, dan woaren de Odren hoada un holen toop. Un doa stonen dan veschiedne schlemme Krankheiten opp. Dan wort mie daut kloa, daut et von de Onvolkomenheit häakjeem, waut wie metjeorwen haben. No daut intressieed ekj mie nich mea soo sea fa Medizien, wäajen bloos Jehova Gott kaun met de Krankheiten un dän Doot een Enj moaken!

En Moaz aune 1976, säwen Moonat nodäm daut ekj aunfunk, de Schreft to studieren, hieed ekj dan opp, en de Uniwersität en een Hospitol to studieren. Ekj beduad, aus ekj nich mea wudd kjennen aus Dokta wua schaufen. Oba ekj funk en een aundre Hospitol wada Oabeit. Ekj leet mie en Mei aune 1976 deepen. Ekj wort mie eenich, daut daut baste fa mie em Läwen wia, wan ekj aul miene Tiet wudd brucken toom prädjen, ooda Pionia sennen. Un doamet funk ekj dan aun en Juli 1977.

Doafäa enstonen, woo Gott äwa Bloot denkjt

En Nowamba aune 1979 trocken ekj un Masuko no de Vesaumlunk en Chiba Prefecture, wua daut needich aun Help fäld toom prädjen. Ekj funk doa en een Hospitol Oabeit, wua ekj bloos durf een poa Doag de Wäakj schaufen. Dän ieeschten Dach, aus ekj no dee Oabeit kjeem, kjeem doa eene Grupp Doktasch no mie un hucken mie aun un fruagen: “Wäajens du eena von Jehova siene Zeijen best, waut woascht du doonen, wan doa opp eenst haustich wäa nenkjemt un dän fält Bloot entolakjen?”

Ekj erkjläad daut leeftolich, daut ekj daut soo doonen wudd, aus Gott äwa daut Bloot denkjt. Un ekj säd, daut doa noch aundre Mäajlichkjeiten wieren, enne Städ Bloot entolakjen, un daut ekj mien bastet wudd doonen toom de Kranke halpen. Nodäm daut wie eene Stund jerät hauden, säd de Väaschta von de Doktasch: “Ekj kaun vestonen. Oba wan doa wäa nenkjemt, waut een deel Bloot veloaren haft, dan woa wie ons om dän kjemren.” Dee Dokta, waut de Väaschta wia, wia bekaunt doafäa, daut met dän nich jinkj fein foadich to woaren. Oba no daut word wie goode Frind un hee acht daut emma, waut ekj jleewd.

Daut respakjten, woo Gott äwa Bloot denkjt, wan daut uk schwoa es

Aus wie en Chiba deenden, wort en Jaupaun een nieet Betel von Jehova siene Zeijen jebut – en de Staut Ebina. Ekj un miene Fru fuaren doa eemol de Wäakj han toom dee, waut doa bie daut Betel buen metholpen, äare Jesuntheit unjasieekjen. Een poa Moonat lota wort ons enjelot toom doa en daut Ebina-Betel fa voll schaufen. En Moaz 1981 trock wie dan no daut Jebied, wua äwa 500 friewelje Oabeida ea jewont hauden. Aum zemorjes halpt ekj dan, de Bodstowen reintomoaken, un no Meddach schauft ekj aus Dokta.

Eene Sesta, waut ekj halpen deed, wia Ilma Iszlaub, waut aune 1949 wia von Australien no Jaupaun jekomen toom doa aus Missionoa deenen. See haud eene Blootkrankheit un de Doktasch hauden to ar jesajcht, daut see bloos noch een poa Moonat läwen wudd. See leet sikj nich Bloot enlakjen toom äa Läwen noch velenjren. See wort sikj eenich, doawäajen em Betel to wonen, bat see storf. To dee Tiet jeef daut noch nich de Medizien, waut et vondoag dän Dach jeft. Doawäajen wia äa Hämoglobin soo läach aus 3 ooda 4 Graum! (Jeweenlich saul daut von 12 bat 15 sennen.) Oba see läwd noch ojjefäa säwen Joa! Ekj deed aules, waut ekj kunn, toom ar halpen. Ilma wees eenen stoakjen Gloowen aun Gott, bat see dan Jaunewoa aune 1988 storf.

Met de Joaren haft wesse von de Methalpa en daut Betel von Jaupaun fält to opperieren. Wie sent sea dankboa, daut de Doktasch hia dicht bie en Hospitäla daut jedonen haben, dee onen Bloot to opperieren. Dee haben mie foaken doa nenjekroacht, wua daut Oppereeschen jedonen wort. Un eenjemol hab ekj bie daut Oppereeschen uk kunt methalpen. Ekj sie soo dankboa, daut de Doktasch daut achten, daut Jehova siene Zeijen nich Bloot nämen. Wiels ekj hab kunt met dee toopschaufen, haft mie daut de Jeläajenheit jejäft, von mienen Gloowen to vetalen. Un korz leet een Dokta sikj aus eent von Jehova siene Zeijen deepen.

Wäajen Doktasch daut jelieet haben, Jehova siene Zeijen onen Bloot to opperieren, haft aundre daut uk aul väl jeholpen. Wie weeten nu, daut een Mensch väl ea utjeheelt es, wan se onen Bloot opperieren.

Ekj lia von dän basten Dokta, waut et jeft

Ekj proow wieda, von de Medizien un Doktarieen to lieren. Oba ekj doo uk wieda von Jehova, dän basten Dokta, lieren. Hee sitt nich bloos de Menschen äare Krankheit; oba hee sitt daut, woo daut met eenen Mensch em gaunzen steit (1. Samuel 16:7). Wäajens ekj een Dokta sie, proow ekj daut uk soo to doonen. Ekj proow to seenen, woo de Menschen daut em gaunzen jeit un nich bloos fa dee äare Krankheit to sorjen. Soo kaun ekj de Menschen bäta halpen.

Ekj doo noch wieda em Betel schaufen un halp aundre, mea von Jehova to lieren un woo hee äwa daut Bloot denkjt. Daut es eent von miene jratste Freid. Ekj bäd, daut Jehova, de basta Dokta, boolt woat een Enj moaken met aule Krankheiten un Doot (vetalt von Yasushi Aizawa).

[Footnooten]

[Takjst]

“Ekj säd, daut doa noch aundre Mäajlichkjeiten wieren, enne Städ Bloot entolakjen, un daut ekj mien bastet wudd doonen toom de Kranke halpen”

[Takjst]

“Wie weeten nu, daut een Mensch väl ea utjeheelt es, wan se onen Bloot opperieren”

[Bilt]

Bowen: Hee helt eene biblische Räd

Rajsch: Met miene Fru, Masuko, toop