Go acetà quel che Dio el pensa sora el sangue

UN DOTOR EL CONTA LA SO STÒRIA

Era drio far un discorso in ospedal, davanti de tanti dotori, sora i resultadi de un esame (autópsia) fato a un omo che l’era morto de un bruto càncaro. Go dito: “El motivo prinsipal dela morte l’è stà la destrussion dei glòbuli rossi (hemólise) e i rognoni che no i laorea pi, par via de una granda trasfusion de sangue.”

Un dei professori el se ga tirà su in pié e el ga dito in voce alta tuto inrabià: “Te vol dir che ghemo sbalià el tipo de sangue?” Mi ghe go rispondesto: “No, no volea dir cossita.” Alora ghe go fato veder imàgine de pìcoli tochetini del rognon de quel che l’era morto, e go dito: “Se pol veder i glòbuli rossi del rognon drio finirse fora (lise) par quela el rognon se ga fermà de laorar.” a Ga scominsià esserghe una bruta ària nela sala e gavea la boca seca par la paura. Anca se mi era dotor fà poco tempo e lu un professor, go pensà che no podea pi cambiar quel che gavea dito.

Quando ga sucedesto questa roba, no era gnancora una Testimònia de Geovà. Son nassesto nel ano 1943 nela cità de Sendai, nel nord del Giapon. Come me pare l’era stà un dotor che studiea le malatie e la mente (patologista e psiquiatra), anca mi go dessidio de studiar medissina. Nel ano 1970, fea due ani che era drio studiar medissina, me son maridà con una tosa che gavea nome Masuko.

Scomìnsio studiar sora le malatie

Masuko la laorea par giutar coi soldi fin che mi finisse de studiar. La medissina me piasea tanto e restea maraveià, sensa parole, de veder quanto ben l’è fato el nostro corpo. Ma, no me son mai fermà a pensar se ghen’era o nò un Creador. Pensea che la medissina daria un ogetivo ala me vita. Cossita, dopo de deventar dotor, go dessidio studiar sora le malatie, parché le vien fora e che efeti le fà (patologia).

Quando fea esami (autópsias) a quei che moria de càncaro, go scominsià gaver dubi se le trasfusion de sangue le giutea. Una persona che fà tempo la ga un bruto càncaro la scomìnsia perder sangue (hemorragia) e ghe vien fora anemia, e visto che el tratamento par el càncaro (quimioterapia) fà deventar ancora pedo la anemia, i dotori fà far trasfusion de sangue. Intanto, a ocio, me parea che le trasfusion fea spaiar el càncaro dapartuto. Ancoi, savemo che le trasfusion de sangue fà sbassar le difese del corpo (imunosupressão) e fà pi granda la possibilità che vegna fora de novo càncari e de viver manco. b

Quela stòria che ve go contà al scomìnsio ga sucedesto nel ano 1975. El professor responsàbile quel di l’era un che studiea el sangue, un ematòlogo, cossita no me ga fato tanto strànio che el se ga inrabià quando go dito che una trasfusion gavea copà quel malà. Anca cossita, go seità col me discorso e lu pian pianeto el se ga calmà.

Gnente malatie e morte

In quel ano, una signora Testimònia de Geovà ga visità me sposa. Drio parlar con questa signora, la ga scoltà la parola “Geovà”. Alora me sposa ghe ga domandà cossa che volea dir, e la dona ghe ga dito che l’è el nome del vero Dio. Anca se me sposa gavea ledesto la Bìblia fin de picinina, nela soa sol ghen’era scrito “SIGNOR”. De colpo, la se gavea nicorta che Dio el ga un nome!

Masuko la ga acetà suito de studiar la Bìblia con quela Testimònia de Geovà. Quando son tornà del me laoro, fursi zera la 1 dela matina, me sposa fea i salti de contenta e la me ga dito: “La Bìblia dise che le malatie e la morte ndarà finirse!” E ghe go dito: “Ma saria una maraveia!” La ga seità: “El novo mondo l’è drio rivar, alora no stà perder tempo.” Go capio che la volea che mi assesse la medissina e me ga dà fastìdio, alora ghemo scominsià gaver problemi nel nostro matrimònio.

Me sposa no se ga mia rendesto, la ga pregà Dio parché la giutesse a catar boni testi bìblichi che i podesse giutarme, e me li fea leder. Le parole de Eclesiasti 2:22, 23 ga smissià fora i me sentimenti: “Cossa che el omo el guadagna del bon con tuto el so laoro duro e col sforso che el fà par laorar tanto soto el sol? . . . Gnanca de note el so cuor el resta calmo. Anca questo no serve par gnente.” Questo l’era pròpio quel che mi era drio far, doperar tuto el me tempo e forsa sensa catar vera felicità.

Una doménega matina, in lùlio del 1975, dopo che me sposa la era ndata nel Salon del Regno dele Testimònie de Geovà, de colpo go dessidio de ndar anca mi. La ze restada sensa parole de vederme là, e tuti i ze stati cari con mi. De quel giorno, son sempre ndato ale riunion dela doménega, e un mese dopo go scominsià studiar la Bìblia con un fradel. Me sposa, tre mesi dopo de gaver ricevesto la prima vìsita dele Testimònie de Geovà, la se ga batesà.

Come go acetà quel che Dio el pensa sora el sangue

Drioman me so nicorto che la Bìblia dise ai cristiani ‘che no i acete el sangue’. (Ati 15:28, 29; Génesi 9:4) Come belche gavea dubi se le trasfusion fesse ben o nò, no go fato fadiga acetar quel che Dio el pensa sora el sangue. c Go pensà: ‘Se ghen’è un Creador e el dise cossita, alora ga de esser giusto.’

Go anca imparà che el motivo dele malatie e la morte l’è el pecato de Adon. (Romani 5:12) In quel tempo, mi era drio studiar sora la arteriosclerose. Intanto che se vien veci, le vene le resta pi dure e le se strende, par quela vien fora malatie nel cuor, nel servel e nei rognoni. Saver che el motivo de tuto l’è la imperfession che ghemo ricevesto me ga sciarà fora tuto. Dopo, go scominsià perder la voia de imparar sempre de pi sora la medissina, parché sol Geovà pol finir fora le malatie e la morte!

In marso de 1976, fea sete mesi che gavea scominsià studiar la Bìblia, e go assà i me studi nel ospedal dela università. Gavea paura che mai gavaria catà laoro come dotor, invesse lo go catà in nantro ospedal. Dopo che me son batesà in maio de 1976, go dessidio che la meio maniera de doperar el me tempo l’era far el pioniero, che vol dir doperar tanto del me tempo par insegnar la Bìblia ale persone, e go scominsià in lùlio de 1977.

Difendo quel che Dio el pensa sora el sangue

In novembre de 1979, se ghemo cambià par la cità de Chiba, nte una congregassion che gavea bisogno de predicadori. Là go catà laoro de mesa giornada nte un ospedal. El primo di de laoro, un grupo de dotori che fea operassion i se ga metesto tuti intorno de mi e i ga tacà domandarme: “Come te sì Testimònia de Geovà, cossa te farissi se riva una persona che ghe ocore una trasfusion de sangue?”

Con creansa, ghe go dito che obediria a quel che Dio el dise sora el sangue. Ghe go fato veder che se pol tratar i maladi anca sensa trasfusion de sangue e che gavaria fato tuto el possìbile par giutarli. Dopo de discorer una ora, el paron del departamento de operassion el ga dito: “Va ben, ma se riva qualchedun che l’è drio perder una mùcia de sangue, lo tenderemo noantri.” Lu l’era cognossesto come un testardo, ma dopo de discorer quela volta se ghemo catà ben e el ga sempre rispetà quel che mi credea.

El me rispeto par el sangue vien metesto ala prova

Intanto che èrino in Chiba, i era drio far su el novo Betel del Giapon, nela cità de Ebina. Mi e me sposa ndeino una volta par stimana par tender dela salute de quei che i laorea li. Mesi dopo semo stati convidadi par laorar in Betel e in marso de 1981 se ghemo cambià par dei predi ndove restea pi de 500 volontari che laorea là. De matina dea una man netar bagneri e dopo mesdì laorea come dotor.

Intrà quei che tendea ghen’era Ilma Iszlaub, una missionària australiana che la era rivada in Giapon nel ano1949. La gavea la leucemia e i dotori ghe gavea dito che ghe restea pochi mesi de vita. Ilma no la ga mia acetà trasfusion de sangue par slongar la vita e la ga dessidio passar i giorni che ghe restea là in Betel. In quela època, no ghen’era tratamenti par giutar la produssion de glòbuli rossi, come la eritropoetina, e so emoglobina sbassea fin 3 o 4 grami (el normal saria 12 a 15 grami), ma la go tendesta meio che go podesto. La ga dimostrà sempre una forte fede nela Parola de Dio fin el giorno dela so morte, in genaro de 1988, sete ani dopo!

Coi ani, arquanti volontari del Betel dele Testimònie de Geovà del Giapon ghe ga tocà far operassion. I dotori dei ospedai là darente i ga fato operassion sensa doperar sangue, e questa ze una roba de darghe mèrito. Tante volte i me ga convidà a veder le operassion che i fea e dele volte li go anca giutadi. Ringràssio tanto questi dotori che ga rispeto par le nostre dessision sora el sangue. Laorar con lori me ga dà tante oportunità de spiegarghe cossa credo. Infati, un de lori fà poco che se ga batesà come Testimònia de Geovà.

L’è de dir che i sforsi dei dotori par no doperar sangue par tender le Testimònie de Geovà ga fato ndar avanti la medissina. Se ga visto che l’è meio operar sensa trasfusion, parché drio i studi, le persone torna sane in manco tempo e ga manco problemi dopo la operassion.

Seito imparar del meio dotor

Proo seitar imparar cole robe nove dela medissina, ma al medèsimo tempo seito imparar de Geovà, el meio dotor. Lu no’l vede sol quel che semo par fora, ma anca quel che ghemo nel cuor. (1 Samuel 16:7) Mi, come dotor, proo vardar no sol la malatia de quei che tendo, ma capir tuta la situassion par tènderli dela meio maniera possìbile.

Al di de ancoi seito laorar in Betel, e una dele robe che me fà pi contento l’è continuar a giutar el me pròssimo a cognosser Geovà e quel che lu el pensa sora el sangue. Nele me orassion, ghe domando al meio dotor, Geovà Dio, che presto el finissa fora con tute le malatie e la morte. — La stòria de Yasushi Aizawa.

[Nota]

[Comentàrio]

“Ghe go fato veder che se pol tratar i maladi anca sensa trasfusion de sangue e che gavaria fato tuto el possìbile par giutarli”

[Comentàrio]

“L’è meio operar sensa trasfusion”