Pergunta husi lee-naʼin

Iha 2 Korinto 6:14, apóstolu Paulo refere ba sé kuandu nia hatete “ema neʼebé laʼós fiar-naʼin”?

2 Korinto 6:14 hatete: “Keta sai ida deʼit ho ema neʼebé laʼós fiar-naʼin.” Se ita haree kontestu ba eskritura neʼe, neʼe hatudu ho klaru katak Paulo koʼalia kona-ba ema neʼebé laʼós parte ba kongregasaun Kristaun. Dalan neʼebé Paulo uza liafuan “ema neʼebé laʼós fiar-naʼin” ka “ema fiar-laek sira” iha eskritura seluk iha Bíblia mós apoia ida-neʼe.

Porezemplu, Paulo korrije ema Kristaun tanba lori malu ba tribunál no “ema fiar-laek sira mak tesi-lia”. (1 Korinto 6:6) Iha eskritura neʼe, “ema fiar-laek sira” mak juís sira neʼebé serbisu iha tribunál iha Korinto. Iha Paulo nia karta segundu ba ema Kristaun iha Korinto, Paulo hatete katak Satanás “taka netik” ema fiar-laek sira-nia neon. Neʼe hanesan hena ida mak taka netik ema fiar-laek sira-nia matan atu sira labele haree liafuan diʼak. Ema fiar-laek sira-neʼe lakohi atu serbí Jeová, tanba Paulo esplika: “Kuandu ema ida fila fali ba Jeová, hena neʼe sei hasai tiha.”​—2 Korinto 3:16; 4:4.

Ema balu neʼebé laʼós fiar-naʼin halo hahalok aat ka adora estátua. (2 Korinto 6:15, 16) Maibé laʼós sira hotu mak kontra Jeová nia atan sira. Sira balu hatudu interese ba lia-loos. Sira barak nia kaben mak ema Kristaun no sira prontu atu nafatin hamutuk ho sira-nia kaben. (1 Korinto 7:12-14; 10:27; 14:22-25; 1 Pedro 3:1, 2) Paulo sempre uza fraze “ema neʼebé laʼós fiar-naʼin” ka “ema fiar-laek” atu refere ba ema neʼebé laʼós parte ba kongregasaun Kristaun. Ema neʼebé sai parte ba kongregasaun Kristaun “hatudu fiar ba Naʼi”.​—Apóstolu 2:41; 5:14; 8:12, 13.

Prinsípiu neʼebé hakerek iha 2 Korinto 6:14 bele ajuda ema Kristaun iha dalan oioin. Dala barak eskritura neʼe mak konsellu neʼebé matenek ba ema Kristaun neʼebé buka pár. (Mateus 19:4-6) Ema Kristaun neʼebé dedika ona sira-nia moris ba Jeová no hetan batizmu sei la buka pár husi ema neʼebé laʼós fiar-naʼin. Tanba ema sira-neʼe nia morál, planu no fiar la hanesan duni ho ema Kristaun loos.

Maibé oinsá ho ema neʼebé estuda Bíblia no ransu ho kongregasaun Kristaun? Oinsá ho ema neʼebé sai ona haklaken-naʼin neʼebé seidauk batizmu? Sira mós “ema neʼebé laʼós fiar-naʼin” ka lae? Lae. Ita labele bolu ema neʼebé simu ona lia-loos no laʼo ba oioin daudaun atu hetan batizmu nuʼudar ema neʼebé laʼós fiar-naʼin. (Roma 10:10; 2 Korinto 4:13) Antes Cornélio hetan batizmu, Bíblia dehan katak nia “hamtaʼuk Maromak no adora Maromak”.​—Apóstolu 10:2.

Apóstolu Paulo nia konsellu iha 2 Korinto 6:14 la inklui haklaken-naʼin neʼebé seidauk batizmu, entaun matenek ka lae ba ema Kristaun neʼebé batizmu ona atu namora no kaben ho haklaken-naʼin neʼebé seidauk hetan batizmu? Lae, neʼe la matenek. Tanbasá? Ita bele hetan razaun iha konsellu neʼebé Paulo fó ba ema Kristaun neʼebé faluk ona. Paulo hakerek: “Nia livre atu kaben fali ho ema neʼebé nia hakarak, naran katak iha Naʼi.” (1 Korinto 7:39) Tuir konsellu neʼe, Bíblia anima ema Kristaun neʼebé batizmu ona atu buka pár entre ema neʼebé “iha Naʼi”.

Fraze “iha Naʼi” no “iha Kristu” katak sá? Iha Roma 16:8-10 no Koloso 4:7 Paulo koʼalia kona-ba ema neʼebé “iha Kristu” ka “iha Naʼi”. Se Ita lee eskritura sira-neʼe, Ita sei haree katak ema sira-neʼe mak “maluk serbisu-naʼin”, ema neʼebé “laran-metin iha Kristu”, “maluk doben”, “serbisu-naʼin neʼebé laran-metin”, no “maluk atan”.

Bainhira mak ema ida sai “atan iha Naʼi”? Neʼe akontese bainhira nia prontu atu halo buat neʼebé atan ida tenke halo no nega ninia an rasik. Jesus esplika: “Se ema ruma hakarak tuir haʼu, nia tenke nega ninia an rasik no lori ninia ai-riin terus nian no kontinua laʼo tuir haʼu.” (Mateus 16:24) Ema ida komesa laʼo tuir Kristu no halo tuir Maromak nia hakarak iha dalan neʼebé kompletu bainhira nia dedika ninia an ba Maromak. Tuirmai, nia hetan batizmu no sai Maromak Jeová nia atan ida neʼebé nia simu. * Entaun, ‘kaben iha Naʼi’ katak kaben ho ema ida neʼebé hatudu sai ona katak nia fiar duni ba Jeová no Jesus, no dedika an ona nuʼudar “Maromak nia atan no mós Naʼi Jesus Kristu nia atan”.​—Tiago 1:1.

Ita presiza gaba ema neʼebé estuda Bíblia ho Testemuña ba Jeová no kontinua hakbesik liután ba Jeová. Maibé ema neʼe seidauk dedika an ba Jeová no nia seidauk halo desizaun metin atu uza ninia moris tomak hodi serbí Jeová. Nia nafatin presiza halo mudansa sira. No ikusmai dedika ninia an ba Jeová no hetan batizmu, depois neʼe mak nia bele hanoin kona-ba kaben.

Diʼak atu ema Kristaun ida namora ho estudante Bíblia ida neʼebé haree hanesan laʼo ba oin ona no karik hein toʼo estudante neʼe hetan batizmu mak foin kaben ka lae? Lae. Se estudante Bíblia ida hatene katak ema Kristaun ida hakarak kaben ho nia só deʼit kuandu hetan ona batizmu, karik neʼe bele book estudante Bíblia atu hetan batizmu tanba razaun neʼebé la loos.

Baibain la presiza templu kleur ba haklaken-naʼin neʼebé seidauk hetan batizmu atu laʼo ba oin no hetan batizmu. Entaun Paulo nia konsellu kona-ba kaben deʼit iha Naʼi la todan demais. Maibé oinsá ho ema ida neʼebé sai boot iha família Testemuña no ninia tinan toʼo atu kaben, no nia sai nuʼudar haklaken-naʼin neʼebé seidauk batizmu durante tinan barak ona? Se nuneʼe, saida mak hanetik nia atu dedika ninia moris ba Jeová? Tanbasá nia dada an atu halo dedikasaun? Nia duvida ka lae? Maski nia laʼós ema neʼebé fiar-laek, maibé ita mós labele bolu nia nuʼudar ema neʼebé “iha Naʼi”.

Paulo nia konsellu kona-ba kaben mak ba ita-nia diʼak. (Isaias 48:17) Bainhira ema naʼin-rua neʼebé hanoin atu kaben dedika ona sira-nia an ba Jeová, sira-nia moris kaben nian sei iha hun neʼebé metin. Sira iha morál no planu neʼebé hanesan. Neʼe sei ajuda sira atu iha moris kaben nian neʼebé kontente. No mós hodi ‘kaben iha Naʼi’, ita hatudu laran-metin ba Jeová, no neʼe sei lori bensaun barak tanba ‘Jeová hatudu laran-metin ba ema neʼebé laran-metin’.​—Salmo 18:25.

[Nota-rodapé]

[Dezeñu]

‘Jeová hatudu laran-metin ba ema neʼebé laran-metin’