Imikarisomraro KaJesu Ungafundani Kiyo?

KUNGAKURARA ukwazi ukuthi iBhayibheli nalikhuluma ngepilo kaJesu asephasini alisebenzisi igama lesiGirigi sekadeni elithi “imikarisomraro.” Igama lesiGirigi elithi (dyʹna·mis) ngezinye iinkhathi elitjhugululwa ngokuthi “imikarisomraro” lingatjho ukuthi “amandla.” (Lukasi 8:46) Lingatjhugululwa nangokuthi ‘likghono’ namkha “iimangaliso ezinengi.” (Matewu 11:20; 25:15) Isazi esithileko sithi igameli lesiGirigi “ligandelela umsebenzi wamandla owenziweko namkha amandla asetjenziselwe ukwenza okuthileko. Isenzakalweso sihlathulula amandla kaZimu asebenzako.”

Elinye igama lesiGirigi elithi (teʹras) kanengi litjhugululwa ngokuthi “iimangaliso.” (Jwanisi 4:48; IzEnzo 2:19) Igameli liveza indlela abantu ababukeleko abathinteka ngayo. Esikhathini esinengi, isiqubuthu nabalandeli bakaJesu bebakareka namkha bamangale ngemisebenzi kaJesu enamandla.​—Markosi 2:12; 4:41; 6:51; Lukasi 9:43.

Igama lesithathu lesiGirigi elithi (se·meiʹon) elitjho imikarisomraro kaJesu, lijamela “itshwayo.” Isazi u-Robert Deffinbaugh sithi “igameli lidzimelele ehlathululweni engeneleleko yemikarisomraro.” Ungezelela uthi: “Itshwayo yikarisomraro eveza iqiniso ngeKosethu uJesu.”

Mlingo Namkha Mamandla Avela KuZimu?

IBhayibheli alihlathululi imikarisomraro uJesu ayenzako njengemilingo eyenzelwe ukukara abantu. Bekuziimbonakaliso ‘zobukhulu bamandla kaZimu’ njengendabeni yomsana uJesu amkhupha idimoni. (Lukasi 9:37-43) Inga-kghani uZimu uMninimandla Woke, ohlathululwa ngokuthi ‘unamandla amakhulu’ angekhe akghone ukwenza imisebenzi ekarisako le? (Isaya 40:26) Iye angakghona.

AmaVangeli akhuluma ngemikarisomraro engaba ma-35 uJesu ayenzako. Nanyana kunjalo, imikarisomraro ayenzako ayikavezwa ukuthi ingangani nasele iyoke. Ngokwesibonelo, uMatewu 14:14 uthi: “[UJesu] wabona isiqubuthu esikhulu, wasirhawukela, walapha abagulako kiso.” IBhayibheli alitjho ukuthi walapha abantu abangangani esiqubuthwinesi.

Imisebenzi yamandla le beyifakazela ukuthi uJesu bekayiNdodana kaZimu, uMesiya othenjisiweko. ImiTlolo iveza ukuthi uJesu wasebenzisa amandla avela kuZimu ukwenza imikarisomraro le. Umpostoli uPitrosi wathi ngoJesu, “bekamumuntu uZimu anibonise yena tjhatjhalazi ngemisebenzi yamandla neemangaliso ngeembonakaliso uZimu azenza ngaye phakathi kwenu, njengombana nani nazi.” (IzEnzo 2:22) Kwesinye isenzakalo uPitrosi wathi, ‘uZimu wazesa [uJesu] ngommoya ocwengileko namandla, wakhamba inarha yoke enza okuhle, alapha boke ebebagandelelwe nguDeveli ngombana uZimu bekanaye.’—IzEnzo 10:37, 38.

Imikarisomraro ebeyenziwa nguJesu beyikhambelana nomlayezwakhe. UMarkosi 1:21-27 uveza indlela isiqubuthu esazizwa ngayo ngefundiso kaJesu nemikarisomraro ayenzako. UMarkosi 1:22 uthi, isiqubuthu ‘sararwa yindlelakhe yokufundisa’ begodu ivesi 27 liveza ukuthi abantu “barareka khulu” nakakhupha idimoni. Imisebenzi kaJesu enamandla nomlayezwakhe kwaba bufakazi bokuthi bekanguMesiya othenjisiweko.

UJesu akhange athi unguMesiya kwaphela kodwana amezwakhe, lokho akwenzako kuhlanganise namandla awafumene kuZimu ebewabonakala ngemikarisomraro ayenzako, bekubufakazi bokuthi unguMesiya. Lokha nakuba nemibuzo malungana nendimakhe nokuthi ungubani, uJesu waphendula ngesibindi wathi: “Nginobufakazi obukhulu kunebakaJwanisi [umBhabhadisi], ngombana imisebenzi uBaba angabele yona bona ngiyenze, okumisebenzi engiyenzako le, ngiyo efakazela ukuthi uBaba ungithumile.”—Jwanisi 5:36.

Ubufakazi Bokuthi Imikarisomraro KaJesu Beyiliqiniso

Kubayini singaqiniseka ukuthi imikarisomraro kaJesu bekungeyamambala begodu iliqiniso? Cabanga ngobufakazi obulandelako obutjengisa ukuthi beyiliqiniso.

Nakenza imisebenzakhe yamandla, uJesu akhange azidosele amehlo. Bekenza isiqinisekiso sokuthi kinanyana ngiyiphi ikarisomraro ayenzako, unikela uZimu idumo nephazimulo. Ngaphambi kokobana alaphe indoda esiphofu, uJesu wagandelela iphuzu lokuthi izokuphola bona “imisebenzi kaZimu ibonakaliswe ngaye.”—Jwanisi 9:1-3; 11:1-4.

Ngokungafani nabantu abenza imilingo nalabo abalapha ngokwekolo nangomthandazo, uJesu akhange asebenzise amaqhinga, iindlela ezivala abanye ingqondo, izinto ezikara abantu, amagama wemilingo namkha amasiko. Akhange asebenzise iimfundiso ezimamala namkha izinto abantu abanengi abaziqala njengezicwengileko. Tjheja indlela ethobekileko uJesu alapha ngayo amadoda amabili aziimphofu. IBhayibheli lithi: “UJesu wawarhawukela, wathinta amehlwawo, khonokho abona begodu amlandela.” (Matewu 20:29-34) Akhange asebenzise amasiko, enze iminyanya namkha izinto ezikara abantu. UJesu wenza imikarisomraro ebaleni, phambi kwabantu abanengi. Njengombana abantu abanengi abathi bayalapha nalabo abenza imilingo basebenzisa izinto ezihlukahlukeneko ezihlanganisa amalerhe, izambatho ezithileko nokhunye okubasiza bakghone ukwenza imilingo begodu bafuna ukusebenzela endaweni ethileko, ngokuhlukileko uJesu bekangakwenzi lokho.​—Markosi 5:24-29; Lukasi 7:11-15.

Njengombana uJesu bekenza imikarisomraro, ngezinye iinkhathi bekathaba ngebanga lokukholwa kwalabo ebebazuza kiyo. Kodwana ukungabi nokukholwa komuntu othileko bekungakhandeli uJesu bona enze ikarisomraro. NakaseKapernawumi eGalile, “kwalethwa kuye abantu abanengi abanamadimoni; wakhupha imimoya emimbi ngelizwi, walapha nabo boke abagulako.”—Matewu 8:16.

UJesu bekenza imikarisomraro bona asize abantu, ingasi ukuthabisa labo ababukeleko. (Markosi 10:46-52; Lukasi 23:8) UJesu bekangenzi imikarisomraro ukuthi azizuzise yena.—Matewu 4:2-4; 10:8.

Kghani Singakuthemba Lokho Okutjhiwo EmaVangelini?

Amaqiniso malungana nemikarisomraro kaJesu afumaneka emaVangelini amane. Inga-kghani akhona amabanga wokuthi sithembele kilokho okutjhiwo emaVangelini la njengombana sihlolisisa amaqiniso wemikarisomraro uJesu ayenzako? Iye akhona.

Njengombana sibonile, uJesu bekenza imikarisomraro ebaleni, phambi kwabantu abanengi. AmaVangeli afumaneka ekuthomeni atlolwa ngesikhathi abantu ababona imikarisomraro le basaphila. Malungana nokuthembeka kwabatloli bamaVangeli, incwadi i-The Miracles and the Resurrection ithi: “Ukusola abatloli bamavangeli ngokuhlanganisa amaqiniso wekadeni neendaba ezinengi ezikhulunywako ngemikarisomraro bona bathuthukise zekolo, lokho kungaba kukwenza ngokungabi nabulungiswa. . . . Abatlolaba bebahlose ukutlola lokho okuliqiniso.”

AmaJuda aphikisana nobuKrestu akhange asole imisebenzi yamandla etlolwe emaVangelini. Into ebewazibuza yona kukuthi amandla wokwenza imikarisomraro le avela kubani. (Markosi 3:22-26) Nabaphikisi abavela ngokukhamba kwesikhathi akhange bakghone ukuphikisa imikarisomraro ebeyenziwa nguJesu. Ngokuhlukileko, hlangana nekhulu lokuthoma nelesibili C.E., bekunobufakazi bemikarisomraro eyenziwa nguJesu. Yeke, kusebaleni ukuthi sinamabanga amanengi wokuqala amaVangeli akhuluma ngemikarisomraro kaJesu njengaliqiniso.

Ngubani Obekenza Imikarisomraro?

Akukaneli ukuhlolisisa lokho okucatjangwa babantu malungana nokuba liqiniso kwemikarisomraro ebeyenziwa nguJesu. Nawahlathulula imisebenzi yamandla ebeyenziwa nguJesu, amaVangeli aveza ukuthi uyindoda enezwela, enesirhawu nenendaba nabantu.

Cabanga ngendaba yendoda enobulepheru eyarabhela uJesu yathi: “Nangabe uyathanda, ungangihlambulula.” “UJesu wayirhawukela,” walula isandla sakhe wayithinta, wathi kiyo: “Ngiyathanda! Hlambuluka.” Indoda le yahlambuluka khonokho. (Markosi 1:40-42) Ngendlela le, uJesu watjengisa ukuthi unezwela ekungilo elamenza wasebenzisa amandla avela kuZimu wokwenza imikarisomraro.

Khuyini eyenzekako lokha uJesu nakahlangana nomgcwabo ebewuphuma edorobheni leNayini? Isokana ebelihlongakeleko beliyindodana ebelethwe yodwa kunina omhlolokazi. UJesu ‘wamrhawukela’ umfazi lo, wathi kuye: “Lisa ukulila.” Bese wavusa indodanakhe.​—Lukasi 7:11-15.

Isifundo esisifumanako emikariswenimiraro kaJesu kukuthi ‘bekarhawukela’ begodu enza izinto bona asize abantu. Imikarisomraro le beyingasizizinto ebezenzeka ekadeni kwaphela. AmaHebheru 13:8 athi, “uJesu Krestu akakatjhuguluki kusukela izolo nanamhlanjesi bekube nini nanini.” Nje, ubusa njengeKosi yezulwini begodu ukulungele ukusebenzisa amandla kaZimu ayikarisomraro ukudlula ngendlela ebekawasebenzisa ngayo nakasephasini. Kungasikade, uJesu uzowasebenzisa ukulapha abantu abalalelako. AboFakazi bakaJehova bangakuthabela ukukusiza ufunde okungeziweko ngengomuso elihleli.

[Iinthombe]

Imikarisomraro ebeyenziwa nguJesu beyiziimbonakaliso ‘zobukhulu bamandla kaZimu’

[Isithombe]

UJesu bekayindoda enezwela