«Һәр Кәсе Хӧрща Хԝә Һьлгьрә»
«Һәр Кәсе Хӧрща Хԝә Һьлгьрә»
«Аԝа жь мә һәр кәсе бона хԝә щабе ль бәр Хԝәде бьдә» (РʹОМАЙИ 14:12).
1. Се хортед Ибрани гәрәке чь сафи кьрана?
СЕ ХОРТЕД Ибрани, кӧ Бабилонеда дьжитьн, бәр пьрса мьрьн у жийине сәкьнибун. Ԝана гәрәке сафи кьра гӧрʹа ԛануна дәԝләте бькьн у сәре хԝә бәр һʹәйкәл дайньн, йан ве йәке инкʹар кьн. Ԝанарʹа готьбун, кӧ һәрге әԝана сәре хԝә бәр һʹәйкәл данәйньн, ԝана ԝе бавежьнә фьрʹна гӧрʹ. Ԝәʹде Шәдрак, Мәшак у Абәднәго тʹӧнә бу ԝәки жь кәсәки ширәте бьхԝазьн у әԝ йәк ԝанарʹа нә жи лазьм бу. Ԝана бь мерхаси гот: «Тӧ бьзаньбә кӧ йа пʹадшаһ, әме жь илаһед [хӧданед] тәрʹа хӧламтийе нәкьн у нәпʹәрьзьн пәйкәре [һʹәйкәле] зерʹин йе кӧ тә данийә» (Данийел 3:1-18, ИМ). Ԝана фәʹм дькьр, ԝәки әԝана ԝе хԝәха бона кьред хԝә щабдар бьн.
2. Бь рʹасти кʹи дәԝса Пилато шьхӧле Иса сафи кьр, у гәло Пилато бона ԝе сафикьрьне щабдар нибу?
2 Жь ве сәрһатийе ԝәкә шәш ԛьрʹнә шунда, мәрьвәк гӧнәкʹар һʹәсаб кьрьн у бәр сәрԝерәки данә сәкьнандьне. Әԝи сәрԝери шьхӧле ԝи мәрьви леколин кьр у фәʹм кьр, ԝәки әԝ нәһәԛ нинә. Ле щьмәʹта кӧ тʹоп бьбу, дәʹԝа дькьр, ԝәки әԝ мәрьв бе кӧштьне. Рʹаст ә серида сәрԝер хԝәст ԝи бьпарезә, ле диса жи кʹәтә бәр байе щьмәʹте у нәхԝәст хӧрща хԝә һьлгьрә, демәк борще хԝә бинә сери. Әԝи дәстед хԝә шуштьн у гот: «Әз жь хуна ви бесущ ьм». Паше әԝи әԝ мәрьв тʹәсмили дьжмьнед ԝи кьр, кʹижана кӧ әԝ стунева мьх кьрьн. Бәле, Пилато Понтийо дәԝса кӧ борще хԝә бьанийа сери у һьндава шьхӧле ԝи мәрьви, демәк Иса Мәсиһ, хԝәха сафикьрьн бькьра, изьн да кӧ щьмәʹт дәԝса ԝи сафи кә. Әԝи пе чьԛас ав жи дәсте хԝә бьшушта, йәкә аве нькарьбу әв гӧне ԝи тʹәмьз кьра (Мәтта 27:11-26; Луԛа 23:13-25).
3. Чьрʹа әм гәрәке изьне нәдьн, кӧ кәсәк дәԝса мә сафикьрьна бькә?
3 Чь әм дькарьн дәрһәԛа хԝә бежьн? Чахе лазьм ә сафикьрьне бькьн, әм мина се хортед Ибрани хԝәха сафикьрьне дькьн, йан мина Пилато изьне дьдьнә кәсед дьн, ԝәки дәԝса мә сафи кьн? Һеса нинә сафикьрьна бькьн. Лазьм ә мәрьвнә гьһишти бьн, сәва кӧ сафикьрьна рʹаст бькьн. Мәсәлә, дәԝса зарʹа де-бав сафикьрьна дькьн. Илаһи зор ә сафикьрьна бькьн гава рʹасти чәтьнайа тен у лазьм ә гәләк тьшт һьлдьн һʹәсаб. Ле диса жи әв йәк баре ӧса гьран нинә, кӧ дәԝса мә әԝ хушк-бьра «һьлдьн», йед кӧ жь мә зедәтьр «рʹӧһʹани нә» (Галати 6:1, 2). Сафикьрьн әв борщдари йә, бона кʹижани «жь мә һәр кәсе бона хԝә щабе ль бәр Хԝәде бьдә» (Рʹомайи 14:12). Кʹьтеба Пирозда те готьне: «Һәр кәсе хӧрща хԝә һьлгьрә» (Галати 6:5). Ча әм дькарьн һин бьн кӧ сафикьрьнед билани бькьн? Йа әʹԝльн, ԝәрә дина хԝә бьдьнә кемасийед хԝә, сәр кʹижани кӧ әм гәрәке бьхәбьтьн кӧ рʹаст кьн.
Дәʹԝакьрьна Сәрәкә
4. Әм жь нәгӧһдарибуна жьн-мере пешьн кʹижан дәрса фәрз һин дьбьн?
4 Дәстпека инсанәтеда жьн-мерәки сафикьрьнәкә ӧса кьрьн, кӧ пәй хԝә ахьрийа хьраб ани. Ԝана сафи кьр, ԝәки жь дара ԛәнщи у хьраби наскьрьне бьхԝьн (Дәстпебун 2:16, 17). Чь ԝан мәрьвед пешьн һелан кьр, кӧ сафикьрьна ӧса кьрьн? Кʹьтеба Пирозда те готьне: «Кʹӧлфәте дина хԝә дайе ԝәки бәре даре баш бу бона хԝарьне, бәрбьчʹәʹвә һʹәԝаскʹар у дьлһавьжи бу бона занәбуне, дәст авитә бәре ԝе хԝар у да мере тʹәви хԝә, әԝи жи хԝар» (Дәстпебун 3:6). Бь рʹасти хԝәһʹьзи бу мәʹнийа сафикьрьна Һеԝайе. Адәм жи чʹәʹв да ԝе. Ахьрийа сафикьрьна ԝан әԝ бу, кӧ «гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу» (Рʹомайи 5:12). Жь нәгӧһдарибуна Адәм у Һеԝайе әм дәрсәкә фәрз һин дьбьн. Демәк, бе рʹебәрийа Хԝәде, мәрьв ԝе тʹьме сафикьрьнед нәрʹаст бькьн.
5. Йаһоԝа Хԝәде бь сайа чь рʹебәрийе мә дькә у әм гәрәке чь бькьн, ԝәки жь рʹебәрийа ԝи кʹаре бьстиньн?
5 Әм чьԛас бәхтәԝар ьн, ԝәки Йаһоԝа Хԝәде әм бей рʹебәри нәһиштьнә! Кʹьтеба Пирозда те готьне: «Гава тӧ бь алийе рʹасте йан бь алийе чʹәпева авәрʹе дьби, ԝе гӧһед тә жь пашва, ве готьне бьбьһизьн: ‹Рʹе әв ә, дь ве рʹийерʹа һәрʹьн!›» (Ишайа 30:21, ИМ). Йаһоԝа Хԝәде бь сайа Хәбәра хԝә рʹебәрийе мә дькә. Әм гәрәке Ньвисаред Пироз леколин бькьн у занәбуна рʹастийе бьстиньн. Сәва кӧ сафикьрьнед рʹаст бькьн, әм гәрәке «хԝарьна гьран», демәк хԝарьна рʹӧһʹани бьстиньн, йа кӧ «бона мәрьвед гьһишти йә». Бь сайа ԝе хԝарьна рʹӧһʹани, әм «сәԝдайе хԝәда кʹәти-рʹабуйи нә, ԛәнщи у хьрабийе жь һәв дәрдьхьн» (Ибрани 5:14). Әм нав хԝәда әви фәрәсәти кӧ «ԛәнщи у хьрабийе» жь һәв дәрхьн пешда тиньн бь ԝе йәке, кӧ занәбуна жь Кʹьтеба Пироз әʹмьре хԝәда дьдьнә хәбате.
6. Чь лазьм ә бькьн, сәва кӧ исафа мә рʹаст бьхәбьтә?
6 Гәләк фәрз ә гӧһ бьдьнә исафа хԝә гава сафикьрьна дькьн. Исаф али мә дькә, ԝәки тедәрхьн һәла мә фьлан тьшт рʹаст сафи кьрийә йан на. Әԝ щарна мә «нәһәԛ» дькә, щарна жи һәԛ дәрдьхә (Рʹомайи 2:14, 15). Сәва кӧ исафа мә рʹаст рʹебәрийе мә бькә, әм гәрәке ве пе занәбуна Хәбәра Хԝәде һин кьн у әԝе занәбуне әʹмьре хԝәда биньн сери. Һәрге әм ӧса нәкьн, исафа мә ԝе һеса бькʹәвә бәр байе әʹйд-ԛәйдед мьһала мә. Һәрге әм гӧһ нәдьнә исафа хԝә у нормед Хԝәде бьтʹәрʹьбиньн, гәло чь ԝе бе сәре исафа мә? Ԝәʹдә шунда исафа мә ԝе «кʹьзьри» бә, демәк тʹӧ тьшти тʹәхмин нәкә, чаԝа кӧ чʹәрме шәԝьти у һʹьшкбуйи (1 Тимотʹейо 4:2). Ле исафа кӧ сәр һʹиме Хәбәра Хԝәде һинкьри йә, ԝе сәва мә ширәткʹаре баш бә.
7. Чь лазьм ә, сәва кӧ сафикьрьнед рʹаст бькьн?
7 Ча әм ида пеһʹәсийан, сәва кӧ сафикьрьнед билани бькьн, лазьм ә занәбуна рʹастийа жь Кʹьтеба Пироз бьстиньн у әʹмьре хԝәда бьдьнә хәбате. Гава лазьм ә бьжартьне бькьн, фәрз ә ләз нәкʹәвьн. Лазьм ә ԝәʹдә вәԛәтиньн, ԝәки принсипед ӧса Кʹьтеба Пирозда бьвиньн, кʹижан кӧ бона дәрәща мә нә. Ле чахе гәрәке зу пьрсәке сафи кьн, ча мәсәлә дәрәща Шәдрак, Мәшак у Абәднәгода бу, әме бона ԝе йәке һазьр бьн, һәрге мә ида исафа хԝә сәр һʹиме Кʹьтеба Пироз һин кьрийә. Ԝәрә ньһа дӧ дәрәща шеԝьр кьн у бьвиньн, ԝәки ча рʹӧһʹанийа мә дькарә али мә бькә, кӧ сафикьрьна рʹаст бькьн.
Тʹәви Кʹе Әм Һәвалтийе Дькьн?
8, 9. (а) Кʹижан принсипед Кʹьтеба Пироз али мә дькьн кӧ хԝә жь һәвалед хьраб дур бьгьрьн? (б) Гәло ль гора Кʹьтеба Пироз һәвалтийа хьраб те һʹәсабе тʹәне һәвалтийа тʹәви бенамуса? Шьровәкьн.
8 Паԝлосе шанди ньвиси: «Нәхапьн! ‹Һәвалтийа хьраб мәрьве хԝәйипʹәргал хьраб дькә›» (1 Корьнтʹи 15:33). Иса Мәсиһ шагьртед хԝәрʹа гот: «Һун нә пʹара дьнйайе нә, ләма дьнйа дьжәнә ԝә» (Йуһʹәнна 15:19). Ль гора ԝан принсипа, әм фәʹм дькьн ԝәки лазьм ә һәвалтийа незик нәкьн тʹәви бенамуса, зьнәкʹара, дьза, сәрхԝәша, у йед мина ԝан (1 Корьнтʹи 6:9, 10). Чьԛас занәбуна мәйә рʹастийед Кʹьтеба Пироз зедә дьбә, һаԛас дьһа баш әм фәʹм дькьн, ԝәки лазьм ә хԝә дур бьгьрьн нә кӧ тʹәне жь мәрьвед ӧса ле ӧса жи жь синәм, бәрнамед телевизийоне, компотәре у кʹьтебед ӧса. Ԝе йәке әм дькарьн бежьн дәрһәԛа ԝәʹдәдәрбазкьрьне малпәред сосийалида, кʹидәре кӧ мәрьв тʹәви һәв дьбьнә нас (Зәбур 26:4).
9 Ле гәло һежа йә тʹәви мәрьвед ӧса һәвалтийе бькьн, кʹижан кӧ нав-намус ьн, ле баԝәрийа хԝә Хԝәде найньн? Кʹьтеба Пирозда те готьне: «Тʹәмамийа дьнйайе бьн һʹӧкӧме Йе Хьрабда йә» (1 Йуһʹәнна 5:19). Әм фәʹм дькьн, ԝәки һәвалед хьраб тʹәне әԝ ниньн, йед кӧ бенамус ьн. Ләма жи ԝе бь билани бә, һәрге әм тʹәне тʹәви ԝан мәрьва һәвалтийа незик бькьн, кʹижан кӧ Йаһоԝа Хԝәде һʹьз дькьн.
10. Чь ԝе али мә бькә кӧ сафикьрьнед билани бькьн һьндава һәләԛәтийа тʹәви мәрьвед ве дьнйайе?
10 Әм нькарьн бь тʹәмами хԝә жь мәрьвед ԝе дьнйайе дур бьгьрьн, әв йәк нә жи те дәʹԝакьрьне (Йуһʹәнна 17:15). Мәрьвед ӧса һʹәму щийа рʹасти мә тен, мәсәлә ԝәʹде хьзмәткьрьне, мәкʹтәбеда, сәр хәбате. Хушк йан бьра, кӧ һәвалзәԝаще ԝан баԝәрмәнд нинә, мәщбур ьн һе зедә ԝәʹдә тʹәви йед ԝе дьнйайе дәрбаз кьн, нә кӧ Мәсиһийед дьн. Ле мәрьве рʹӧһʹанида гьһишти фәʹм дькә, ԝәки фьрԛи һәйә ортʹа ԝе йәкеда кӧ чахе тӧ мәщбур и тʹәви мәрьве ве дьнйайе ԝәʹдә дәрбаз ки у ԝе йәке кӧ һәвалтийа незик тʹәви ԝан бьки (Аԛуб 4:4). Һәрге әм ԝе йәке һьлдьн һʹәсаб, әме бькарьбьн сафикьрьнед бь аԛьлайи бькьн, мәсәлә пьрсед ӧсада: Һежа йә әз тʹәви һәвалдәрсханед хԝә бькʹәвьмә нава ԝәʹдәдәрбазкьрьнед мәкʹтәбе, мәсәлә ча спорт у рʹәԛас? Йан жи, һежа йә тʹәви һәвалхәбатчийед хԝә һәрʹьм ресторане йан жи сәр нанхԝарьне?
Бьжартьна Хәбате
11. Гава әм хәбате хԝәрʹа дьжберьн, бәри әʹԝльн чь гәрәке һьлдьн һʹәсаб?
11 Принсипед Кʹьтеба Пироз али мә дькьн, кӧ борщдарийа хԝә биньн сери, демәк хәбатәкә щайиз хԝәрʹа бьжберьн, ԝәки әʹбура нәфәред хԝә бькьн (1 Тимотʹейо 5:8). Йа пешьн, әм гәрәке һьлдьн һʹәсаб кӧ чь дькʹәвә нава ве хәбате, демәк әме чь бькьн. Һәмьки, әме хәбатәкә ӧса нәжберьн, кʹидәре кӧ лазьм бә ԝе йәке бькьн, чь кӧ Хԝәде ԛәдәхә дькә. Мәсиһийед рʹаст инкʹар дькьн хәбатед ӧса, кӧ пʹутпʹарьсти, дьзи, хәбьтандьна хунейә нәрʹаст у тьштед мина ԝанва гьредайи нә. Хенщи ԝе йәке әме ӧса жи нәхапиньн у ԛәлпийе нәкьн, һәрге жи мәзьне хәбате ԝе йәке жь мә дәʹԝа кә (Кʹаред Шандийа 15:29; Әʹйанти 21:8).
12, 13. Әм гәрәке диса кʹижан тьштед дьн һьлдьн һʹәсаб, чахе хәбате дьжберьн?
12 Һәрге жи хәбат мьԛабьли принсипед Хԝәде нинә, диса жи һәнә тьшт, кӧ гәрәке һьлдьн һʹәсаб. Чьԛас әм рʹӧһʹанида пешда дьчьн, һаԛас әм дьһа баш фәʹм дькьн кӧ кʹижан тьшта һьлдьн һʹәсаб. Дьԛәԝьмә хәбата мә нә кӧ рʹастә-рʹаст ле бь щурʹәки дьн тьштәки ӧсава гьредайи йә, чь кӧ бәр чʹәʹве Хԝәде рʹәш ә, мәсәлә лазьм ә казинода щаба тʹеле бьдьн? Хенщи ԝе йәке бона мә гәләк фәрз ә, кӧ һәԛе хәбате жь кʹӧ те у щийе хәбате чь щи йә. Мәсәлә, гәло Мәсиһи ԝе ԛайил бә кӧ дереда диԝара рʹәнг кә, нә бь ԝе йәке әԝ пьштгьрийа религийа ԛәлп дькә? (2 Корьнтʹи 6:14-16)
13 Әме чь бькьн һәрге мәзьне хәбата мә тʹәви религийәке пәймане гьредә кӧ щийе һʹәбандьна ԝан тʹәзә кә? Дәрәща ӧсада лазьм ә һьлдьн һʹәсаб, һәла әм дькарьн бь щурʹәки дәрәще бьгӧһезьн у әме чь шьхӧли бькьн? Ле чь әм дькарьн бежьн дәрһәԛа хәбата ӧса кӧ нормед Кʹьтеба Пироз натʹәрʹьбиньн? Мәсәлә нәʹмәван гәрәке нәʹма бьвә щурʹә-щурʹә щийа, ӧса жи щийед ӧса кʹидәре кӧ мәрьв тьштед хьрабва мьжул дьбьн. Дьԛәԝьмә әм дькарьн бона ԝе дәрәще принсипа жь Мәтта 5:45 бьдьнә хәбате? Ле ӧса жи фәрз ә һьлдьн һʹәсаб кӧ исафа мә ԝе ча хԝә бьдә кʹьфше, һәрге әм әԝе хәбате һәр рʹож бькьн (Ибрани 13:18). Бь рʹасти жи, сәва кӧ бь билани хәбате бьжберьн, лазьм ә исафа хԝә һин кьн у фәʹмкʹарийеда пешда һәрʹьн.
«Һʹәму Рʹийед Хԝәда Тӧ Хԝәде Нас кә»
14. Әм чь гава гәрәке бавежьн, сәва сафикьрьнед билани бькьн?
14 Ле чь әм дькарьн бежьн дәрһәԛа дәрәщед жийинейә дьн, мәсәлә бьжартьна хԝәндьне у методед ԛәнщкьрьне? Сәва кӧ сафикьрьнед рʹаст бькьн, лазьм ә бьфькьрьн һәла кʹижан принсипед Кʹьтеба Пироз әм дькарьн бона дәрәща хԝә һьлдьн һʹәсаб у бьфькьрьн ча әм дькарьн ԝана бьдьнә хәбате. Сьлеман Пʹадша ӧса гот: «Бь тʹәмамийа дьле хԝә хԝә бьсперә Хӧдан, гӧмана хԝә нәдә ль сәр һʹьше хԝә. Һʹәму рʹийед хԝәда тӧ Хԝәде нас кә у Әԝе һʹәму шьвәрʹийед тә рʹаст-дуз кә» (Мәтʹәлок 3:5, 6).
15. Жь мәсәла Мәсиһийед ԛьрʹна йәке әм чь һин дьбьн дәрһәԛа сафикьрьна?
15 Гәләк щар сафикьрьнед мә сәр мәрьвед дьн жи һʹӧкӧм дьбьн, ләма жи мәрʹа лазьм ә әԝе йәке жи һьлдьн һʹәсаб. Мәсәлә, Мәсиһийед ԛьрʹна йәкерʹа ида нәлазьм бу һьндава нанхԝарьнеда хԝә ль Ԛануна Муса бьгьрьн. Әԝана ида дькарьбун хԝарьна кӧ ԛануна Муса ԛәдәхә дькьр, бьхԝарана, һәрге мәʹникә дьн тʹӧнә бу кӧ нәхԝьн. Паԝлосе шанди дәрһәԛа хԝарьна гошт, йа кӧ ԛӧрбан пʹутарʹа дьдан, ӧса гот: «Һәгәр хԝарьн дьбә кәвьре ль бәр пʹийе бьре мьн, гәрәке иди тʹӧ щар әз гошт нәхԝьм, ԝәки бьре хԝә пʹьшк нәкьм» (1 Корьнтʹи 8:11-13). Паԝлосе шанди Мәсиһийед ԛьрʹна йәке һелан дькьр, ԝәки исафа мәрьва һьлдьн һʹәсаб у ԝана нәлькʹӧминьн. Сафикьрьнед кӧ әм дькьн гәрәке нәбьнә кәвьре лькʹӧмандьне бона кәсед дьн (1 Корьнтʹи 10:29, 32).
Биланийа Хԝәде Бьгәрʹә
16. Дӧакьрьн ча али мә дькә кӧ сафикьрьнед рʹаст бькьн?
16 Дӧакьрьн гәләк али мә дькә, ԝәки сафикьрьна бькьн. Аԛуб ӧса ньвиси: «Һәгәр сәрԝахтийа йәки жь ԝә тʹера ԝи накә, бьра һиви жь Хԝәде бькә у ԝе жь ԝирʹа бе дайине. Әԝ бь мәрʹдани дьдә һʹәмуйа у тʹӧ кәси беԛәдьр накә» (Аԛуб 1:5). Әм дькарьн бей дӧдьлибуне дӧакьрьнеда жь Йаһоԝа биланийе һиви кьн, ԝәки зена мә зедә кә сәва сафикьрьнед рʹаст бькьн. Ԝе баш бә, ԝәки әм Хԝәдайе тайе-тʹәнерʹа гьли кьн, кӧ әм бона чь бәрхԝә дькʹәвьн у лавайа ԝи бькьн кӧ рʹебәрийе мә бькә. Ԝи чахи рʹӧһʹе пироз ԝе али мә бькә кӧ рʹьнд фәʹм бькьн рʹезед кӧ бона дәрәща мә лайиԛ ьн, у ԝе бинә бира мә ԝан рʹеза жи, кʹижан кӧ дьԛәԝьмә ԝе ләʹзе найе бира мә.
17. Ча кәсед дьн дькарьн али мә бькьн, ԝәки сафикьрьнед рʹаст бькьн?
17 Гәло мәрьв дькарьн али мә бькьн? Әре, бона ԝе йәке Йаһоԝа Хԝәде хушк-бьред щерʹьбанди дайә мә (Әфәси 4:11, 12). Әм дькарьн жь ԝан һиви кьн кӧ ширәта бьдьнә мә, илаһи һәрге әм гәрәке сафикьрьнәкә фәрз бькьн. Мәсиһийед рʹӧһʹанида гьһишти у щерʹьбанди дькарьн рʹезед ӧса жь Кʹьтеба Пироз нишани мә бькьн, йед кӧ бона дәрәща мә керһати нә у али мә бькьн, «ԝәки кʹижан һәрә ԛәнщ ә, . . . ԝе бьбьжерьн» (Филипи 1:9, 10). Ле диса жи әм гәрәке бир нәкьн, ԝәки тʹӧ кәс гәрәке дәԝса мә сафикьрьне нәкә, чьмки әв йәк борще мә йә.
Гәло Ахьри Тʹьме Ԝе Баш Бә?
18. Ахьрийа сафикьрьна баш дькарә чь щурʹәйи бә у чьма?
18 Гәло сафикьрьнед, кӧ сәр һʹиме принсипед Кʹьтеба Пироз ьн у ль гора исафа мә нә, ԝе тʹьме ахьрийа баш биньн? Һәмьки әре, ле дьԛәԝьмә серида әм жь бо сафикьрьна хԝә рʹасти чәтьнайа жи бен. Мәсәлә, Шәдрак, Мәшак у Абәднәго заньбун, ԝәки гәрәке бьһатана кӧштьне жь бо ԝе йәке кӧ инкʹар дькьрьн сәре хԝә бәр һʹәйкәл дайньн (Данийел 3:16-19). Шагьртед Иса жи дәрәщәкә ӧсада бун. Чахе әԝана щьвина Гьрәгьрарʹа готьн, ԝәки гәрәке гӧрʹа Хԝәдеда бьн, нә кӧ гӧрʹа мәрьвада, әԝан мәрьва пешийе әԝ кʹӧтан у паше бәрдан (Кʹаред Шандийа 5:27-29, 40). Хенщи ԝе йәке, чахе әм сафикьрьнәкә рʹаст дькьн, пәйрʹа дьԛәԝьмә әм жь бо «ԝәхт у рәԝш [ԛәԝьмандьн]» бькʹәвьнә чәтьнайе (Ԝаиз 9:11). Ле һәрге әм жь бо сафикьрьна хԝәйә баш рʹасти чәтьнайа бен, әм дькарьн бь тʹәмами баԝәр бьн, ԝәки Йаһоԝа ԝе али мә бькә кӧ һәр тьшти тәйах кьн, у ахьрийеда жи ԝе бь мәрʹдани мә кʹәрәм кә (2 Корьнтʹи 4:7).
19. Чьма әм дькарьн бе тьрс сафикьрьна бькьн?
19 Чахе әм гәрәке тьштәки сафи кьн, мәрʹа лазьм ә принсипед кӧ бона дәрәща мә лайиԛ ьн, бьвиньн у бьфькьрьн, ԝәки ча биньн сери. Әм гәләк жь Йаһоԝа рʹази нә, ԝәки әԝ бь аликʹарийа рʹӧһʹе хԝәйи пироз у хушк-бьред щерʹьбанди али мә дькә! Бь сайа пьштгьри у рʹебәрийа ԝи щурʹәйи, әме бькарьбьн бе тьрс ԝи борще хԝә һьлдьн сәр хԝә у сафикьрьнед билани бькьн.
Һун Чь Пеһʹәсийан?
• Чь лазьм ә, сәва кӧ сафикьрьнед рʹаст бькьн?
• Чаԝа гьһиштибуна рʹӧһʹанийа мә һʹӧкӧм дьбә сәр ԝе йәке, кӧ әм кʹе ча һәвал хԝәрʹа дьжберьн?
• Әм чь гәрәке һьлдьн һʹәсаб чахе сафикьрьнед бона хәбате дькьн?
• Жь кʹидәре әм дькарьн аликʹарийе бьстиньн, сәва кӧ сафикьрьнед билани бькьн?
[Пьрсед бона Һинбуне]
[Шькьл]
Әм жь нәгӧһдарибуна Адәм у Һеԝайе дәрсәкә фәрз хԝәрʹа һьлдьдьн
[Шькьл]
Пешийа кӧ сафикьрьнәкә фәрз бькьн, принсипед Кʹьтеба Пироз леколин кьн