“Cada un el portarà la so pròpia responsabilità”

“Cada un de noantri el ga de risponder a Dio par quel che el fà.” — ROMANI 14:12.

1. Che responsabilità i tre ebrei i ga infrontà con coraio?

 I TRE gióveni ebrei i era de star in Babilónia. Lori i ga fato una dessision che la podea risultar in vita o morte. La lege la disea che lori i gavea de indenociarse davanti de una granda imàgine. Sarà che lori i ndaria indenociarse? Se no i adoresse ala imàgine i saria metesti nte un forno che brusa. Sadrache, Mesache e Abednego i ga pensà svelto sora cossa i gavea de far e no i ga domandà che nissuni i ghe disesse cossa far. Suito lori i ga parlà: “Sàpia, ò rè, che noantri no ndaremo servir ai to dèi gnanca adorar ala imàgine de oro che te ghè fato.” (Daniel 3:1-18) I tre ebrei i ga portà la so pròpia responsabilità.

2. (a) Quando che i ga copà Gesù, chi che ga fato la dessision nel posto de Pilato? (b) Sarà che Pilato l’è stà liberà dela so responsabilità?

² Seissento ani dopo, un governador de nome Pilato, el ga scoltà acusassion che le ze state fate contra un omo. Quando el governador el ga scoltà le acusassion, lu no’l ga credesto. Ma el pòpolo el volea che el acusà el fusse copà. El governador no l’era de acordo cola morte de quel omo. Pilato no’l ga portà la so responsabilità e el ga fato quel che el pòpolo el volea. Intanto che el lavea le so man, Pilato el ga dito che lu no’l gavea la colpa dela morte de quel omo. Dopo, el acusà l’è stà inciodà nte un pal. Invesse de portar la so pròpia responsabilità de dessider cossa far con Gesù Cristo, Pilato el ga assà che i altri i fesse la dessision nel so posto. Ancora che lu el gavesse lavà le so man, lu no l’è stà lìbero dela so responsabilità parché lu el ga assà che i copesse Gesù de maniera ingiusta. — Mateo 27:11-26; Luca 23:13-25.

3. Parché no ghemo de assar che i altri i fae dessision par noantri?

³ E ti? Quando te ghè de far una dessision, te fè compagno ai tre ebrei o te assi che i altri i fae la dessision nel to posto? Far dessision no l’è mia fàcile. Par far bone scòlie ghe ocore saver quel che Dio el vol. Par esémpio, ghe ocore a un pare e una mare far dessision par el so picinin. Quando la situassion la ze fadiga e ghen’è tante robe par pensarghe sora, pol esser ancora pi difìcile far dessision. Ma no vol dir che sia tanto fadiga al punto de assar che i ansiani i la fae par noantri. (Gàlati 6:1, 2) In verità, ‘cada un de noantri el ga de risponder a Dio par quel che el fà’ parché la ze nostra la responsabilità. (Romani 14:12) La Bìblia la dise che “cada un el portarà la so pròpia responsabilità”. (Gàlati 6:5) Alora, come far bone dessision ntela nostra vita? In primo posto, ne ocore saver che semo imperfeti e che ghemo aiuto par far bone dessision.

Una roba importante

4. Cossa imparemo sora far dessision cola desobediensa de Adon e Eva?

⁴ Quando i era ntel Giardin del Eden, Adon e Eva i ga fato una dessision che ga portà problemi a tuti. Lori i ga dessidio magnar del fruto dela pianta dela cognossensa del ben e del mal. (Génesi 2:16, 17) Parché che i ga dessidio far cossita? La Bìblia la dise: “La dona la ga visto che el fruto dela pianta l’era bon de magnar e l’era bel, si, la pianta la era bela de vardar. Cossita ela la ga ciapà el fruto e la ga scominsià a magnarlo. Dopo ela la ga dato del fruto anca al so sposo, quando lu l’era insieme con ela, e el ga scominsià a magnarlo.” (Génesi 3:6) Eva la ga mostrà che la era una persona che pensea sol in sì stessa par via de quel che ela la ga scoliesto far. E quel che Eva la ga fato ga menà el so omo a far compagno. E come risultà, el pecato e la morte i se ga spalià a tuti. (Romani 5:12) La desobediensa de Adon e Eva ga mostrà che noantri ghemo un limite: sensa la orientassion de Dio, i umani no i ze boni de far dessision giuste.

5. Che orientassion Geovà el ne dà e cossa che ghemo de far par esser boni de meterla in pràtica?

⁵ Restemo contenti parché Geovà el ne dà orientassion. La Bìblia la dise: “Le vostre récie le va scoltar queste parole par de drio de valtri: ‘Questa la ze la strada. Ndé par ela.’ (Isaia 30:21) Geovà el parla con noantri par meso dela so Parola, la Bìblia. Ghemo de cognosserla e studiarla de maniera profonda par far bone dessision. Far questo ne giutarà a gaver ‘le capacità de dissernimento trenade par meso dela pràtica par saver la difarensa tanto del giusto come del sbalià’. (Ebrei 5:14) Se te meti in pràtica quel che te impari dela Parola de Dio, te sarè bon de trenar la to capacità de saver quel che l’è giusto e quel che l’è sbalià.

6. Cossa che ghemo de far par che la nostra cossiensa la ne giute dela maniera giusta?

⁶ La nostra cossiensa la ne giuta tanto quando ghemo de far dessision. Ela la ne dà la capacità de giulgar, o sia, la ne giuta a saver se quel che semo drio far l’è giusto o sbalià. (Romani 2:14, 15) L’è sol se gavemo la cognossensa giusta dela Parola de Dio che la nostra cossiensa sarà bona de giutarne, cossita ela la ndarà avisarne con base in quel che ghemo imparà. Una cossiensa che no la ze trenada la pol esser influensada par el posto ndove la persona la ze de star e la opinion dei altri. Cossa sucede cola nostra cossiensa quando no la scoltemo e assemo de obedir a Dio? Col tempo la resta come che “marcada con un fero caldo”, come se fusse una pel che no la ze pi sensìbile, parché la ga una sicatris. (1 Timòteo 4:2) Par nantra banda, se te ghè una cossiensa che la ze trenada par la Bìblia, te sarè pi sicuro de cossa far.

7. Che robe importante ne giuta a far bone dessision?

⁷ Una roba importante par gaver la responsabilità de far bone dessision l’è imparar quel che Dio el vol e meter in pràtica. Invesse de far una dessision sensa pensar, ghemo de doperar tempo par imparar i consili dela Bìblia e pensarghe sora in come meterli in pràtica. Cossita come Sadrache, Mesache e Abednego, noantri saremo boni de far suito una dessision se savemo quel che la Bìblia la dise e se gavemo la nostra cossiensa trenada. Quando semo persone maure l’è pi fàcile far bone dessision. Ndaremo veder come far bone dessision in due robe dela nostra vita.

Chi che ndarà esser i nostri amighi?

8, 9. (a) Che consili ne giuta a no gaver brute amicìssie? (b) Sarà che sol le persone che no le obedisse a Dio le ze brute amicìssie? Spiega.

⁸ Paolo el ga dito: “No assé inganarve. Le brute compagnie le rovina i boni comportamenti.” (1 Corinti 15:33) Gesù Cristo el ga dito ai so dissìpoli: “Valtri no sì come le persone del mondo.” (Gioani 15:19) Quando imparemo i consili dela Bìblia, vedemo che no ghemo de esser insieme con quei che i fà imoralità sessual, coi adùlteri, coi ladroni, con quei che i beve massa e che le fà robe come queste. (1 Corinti 6:9, 10) Quanto de pi imparemo le verità dela Bìblia, vedemo che le brute compagnie pol esser i filmi, la television, el computador e i libri. Anca le brute compagnie le ze “quei che no i mostra quel che i ze” nela internet. — Salmo 26:4.

⁹ E cossa dir de esser amighi de persone che no le fà gnente de sbalià, ma che no le obedisse a Dio? La Bìblia la dise: “Tuto el mondo l’è soto el poder del Perverso.” (1 Gioani 5:19) Alora, podemo capir che no l’è sol le persone che no le obedisse a Dio che le ze brute amicìssie. Par quela, i nostri amighi i ga de esser sol quei che i ama a Geovà.

10. Cossa ne giutarà a dessider quanto tempo ndaremo guastar con persone che no le adora a Geovà?

¹⁰ No semo boni de esser distante del tuto dele persone che no le serve a Geovà. (Gioani 17:15) Quando predichemo, ndemo nela scola o nel laoro, semo insieme de persone che no le adora a Geovà. Se un servo de Dio l’è maridà con una persona che no la ze Testimònia de Geovà, el gavarà ancora de pi queste compagnie. Quando ghemo la capacità de saver quel che l’è giusto o sbalià, capimo che ghen’è una difarensa intrà esser insieme sol quando ghe ocore e esser pròpio amighe dele persone che no le obedisse a Dio. (Tiago 4:4) Saver de questo ne giutarà a far bone dessision sora ndar nele atività fora dela scola, come competission de sporte, feste dela scola e anca feste e cose cossita nel laoro.

Scòlia de laoro

11. Che tipo de laori quei che i serve a Dio no i ga de scòlier?

¹¹ Meter in pràtica i consili dela Bìblia ne giuta a far bone dessision sora come dar ala nostra fameia quel che la ghe ocore. (1 Timòteo 5:8) In primo posto, ghemo de saver che tipo de laoro che ndemo far. Scòlier un laoro che va contra quel che la Bìblia la dise l’è sbalià. Quei che i serve a Dio no i va laorar ndove ghen’è idolatria, ndove ghe ocore ciavar, ndove i dopera el sangue de maniera sbaliada e altre cose che la Bìblia la dise che le ze sbaliade. No ghemo de dir busie e gnanca imbroiar i altri, ancora che el nostro paron el ne dise de far cossita. — Ati 15:29; Apocalisse 21:8.

12, 13. Che altre robe importante ghemo de pensar vanti de scòlier un laoro?

¹² E quando el nostro laoro no’l va contra una lege de Dio? Quanto de pi imparemo dela Bìblia e ghe demo trenamento ala nostra cossiensa, pi boni saremo de pensar in altre robe quando ndemo scòlier un laoro. E se el laoro el fà che el servo de Dio el fae cose che le ze contra la Bìblia? Par esémpio, se el so laoro l’è tender del telèfono nte una casa de giughi? Lu el pol pensar de ndove che vien i soldi del so salàrio e come che l’è el posto del so laoro. Se un servo de Dio l’è el so pròpio paron, sarà che ndaria acetar un laoro come pintar una ciesa? Sarà che questo ndaria far con che lu el ghe desse apoio ala adorassion falsa? — 2 Corinti 6:14-16.

¹³ Nantra situassion: Se un paron de un servo de Dio el aceta un laoro par pintar un posto dela religion falsa? Quel che pol giutar a saver cossa far l’è domandarse: Qual che sarà el laoro che me toca far? Son drio dar apoio ala adorassion falsa? Cossa dir de un laoro che no’l va contra i consili dela Bìblia, come esser un cartero? Lu el porta le carte in tuti i posti, anca in posti ndove le persone le fà cose sbaliade. Quel che l’è scrito in Mateo 5:45 pol giutar. Una roba che no podemo desmentegarse l’è saver se quel laoro che ndemo far tuti i di ndarà intrigar o nò la nostra cossiensa. (Ebrei 13:18) Quando trenemo la cossiensa che Dio el ne ga dato, semo boni de gaver la responsabilità de far bone dessision sora el laoro.

“Ricòrdate de Dio in tuto quel che te fè”

14. Cossa che ghemo de pensar vanti de far una dessision?

¹⁴ Cossa dir de altre dessision che ghemo de far? Come la educassion o tratamenti de salute? Vanti de far una dessision, ghemo de saver cossa che i consili dela Bìblia i parla del assunto e dopo ne ocore pensar in come meterli in pràtica. Un rè sàbio, de nome Salomon, el ga dito: “Fìdate in Geovà de tuto el to cuor, no stà fidarte nel to pròpio saver. Ricòrdate de Dio in tuto quel che te fè e lu el ndarà mostrarte quala che la ze la strada giusta.” — Proverbi 3:5, 6.

15. Cossa imparemo dei servi de Dio del primo sècolo sora far dessision?

¹⁵ Tante volte, quando noantri femo le nostre scòlie, ghemo de pensar nele persone intorno de noantri. I servi de Dio del primo sècolo no ghe ocorea pi obedir ala lege de Moisè sora magnar. Invesse, lori i podea scòlier se ndea magnar o nò cose che vanti la lege la disea che le era sbaliade. El apòstolo Paolo el ga scrito sora magnar la carne de una bèstia che la era doperada nela adorassion de un ìdolo. Lu el ga scrito: “Se el magnar el pol far strabucar el me fradel, no magnarò mai pi carne, cossita no farò strabucar el me fradel.” (1 Corinti 8:11-13) Quei servi de Dio i ga ricevesto el consìlio de pensar nela cossiensa dei altri par no farli strabucar. Anca le nostre dessision no le ga de far i altri strabucar. — 1 Corinti 10:29, 32.

Va in serca dela sabedoria de Dio

16. Come che le orassion le ne giuta a far dessision?

¹⁶ Un aiuto tanto importante che ne giuta a far dessision l’è pregar a Dio. El dissìpolo Tiago el ga dito: “Se ghe manca sabedoria a qualchedun de valtri, el ga de seitar a domandarla a Dio, parché lu la ghe dà a tuti de maniera generosa e con bontà.” (Tiago 1:5) Podemo fidarse in Dio quando femo orassion a lu, anca podemo domandar sabedoria par far bone dessision. Quando preghemo al vero Dio sora i nostri pensieri e proemo ndar in serca dele so orientassion nela Bìblia, el spìrito santo el ne giutarà a ricordarse de versìcoli che semo drio studiar e fin dei versìcoli che ghemo desmentegà.

17. Come i altri i pol giutarne a far bone dessision?

¹⁷ Sarà che i altri i pol giutarne a far bone dessision? Si, Geovà el dopera fradei che i ga speriensa nela congregassion. (Efesi 4:11, 12) Podemo domandarghe consili, ancora de pi se la dessision che ghemo de far l’è importante. Persone che le ga una forte amicìssia con Dio e che ga de pi speriensa le pol giutarne. I fradei i pol farne ricordar de consili dela Bìblia che pol giutarne a far bone dessision e esser ‘sicuri de quale che le ze le robe pi importante’. (Filipensi 1:9, 10) Ma ghemo de ricordarse: la responsabilità de far dessision la ze nostra, par quela ghemo de tender parché nissuni la fae par noantri.

El risultà el sarà sempre bon?

18. Cossa podemo dir del risultà de far una bona dessision?

¹⁸ Sarà che gavaremo boni risultadi se sempre femo le nostre dessision de acordo coi consili dela Bìblia? Dele volte pol esser che pena dopo che te ghè fato una dessision, ela no la gàpia un bon risultà. Ma col tempo la gavarà boni risultadi. Sadrache, Mesache e Abednego i savea che el risultà de no adorar ala imàgine de oro podea esser la morte. (Daniel 3:16-19) Anca i apòstoli i ga dito al Sinèdrio che i ndaria obedir a Dio come governante vanti dei òmini. Come risultà, i ga dato scuriade nei apòstoli e dopo li ga moladi. (Ati 5:27-29, 40) Anca, “a tuti i pol suceder qualcossa rugna o che no i speta mia”, e questo pol intrigar qualche dessision. (Eclesiasti 9:11) Alora, stesso che ghemo problemi quando femo una dessision, podemo fidarse che Geovà el ndarà giutarne e benedirne. — 2 Corinti 4:7.

19. Come esser coraiosi nela nostra responsabilità de far dessision?

¹⁹ Par far bone dessision ghemo de ndar in serca dei consili dela Bìblia e pensar in come meterli in pràtica. Ghemo de ringrassiar a Geovà parché lu el ne giuta par meso del so spìrito santo e dei fradei che i ga speriensa nela congregassion. L’è par meso de questi aiuti che noantri semo boni de esser coraiosi nela responsabilità de far bone dessision.

Cossa che te ghè imparà?

• Che robe importante ghe ocore par far bone dessision?

• Come saver quel che Dio el vol ne giuta a scòlier ben le nostre amicìssie?

• Che robe importante ghemo de pensar quando ndemo scòlier un laoro?

• Che aiuti ghemo par far bone dessision?

[Domande del Stùdio]

[Stampa]

Imparemo una importante lession dela desobediensa de Adon e Eva

[Stampa]

Vanti de far una dessision importante va in serca dei consili dela Bìblia