Nue Nyipunieti Pi Matre Aköja Gojenyin Hnene La Wesi Ula I Akötresie
Ita Ne Thup göi 10 JUUN
Nyima 21 me 46 Qene Drehu
Nue Nyipunieti Pi Matre Aköja Gojenyin Hnene La Wesi Ula I Akötresie
“Lamepa ne la lue cange la wesi ula i cilie, me lai ne la jëng.” —SALAMO 119:105.
1, 2. Pine nemene matre thatreine kö troa eje thene la itre xaa atr la tingeting memine la nyipi manathith?
MEKUNE hi epuni lo ketre ijine epuni a hnyingëne kowe la ketre atr la itre sane jea nyine troa xom? Epuni ha troa traqa, ngo ma thaa nyipi xecie hnyawa kö koi epuni la itre hna ijejea tixenuë. Maine jë epuni pena ha a imenune la itre sane jea, matre patre hë epun, nge epuni hë enehila a thele lo nyipi gojeny. Haawe, kola mama hnyawa ngöne la lue götrane celë, laka, ka lolo catr e troa xötrethenge la itre ithuemacanyi hna hamëne hnene la ketre atr ka atre hnyawa la itre hmene gojenyi ngöne la nöj. Ijije hi tro la atr cili a xatua nyipunie troa traqa kowe la götrane hna mekune troa tro kow, maine hna ie pena.
2 Nyimutre catre hë la itre macatre ne ketre sipu mele la atr, nge thaa hane kö angeice wanga atrune la musi Akötresie. Ngo, eje hi lai laka, e pëkö ixatua qaathei Akötresie, nyipi thatreine kö kowe la itre atr ka thaa pexeje kö troa öhne la gojenyi angatr; ka tro angatre lai a luuz. Thatreine jë kö angatre troa sipu öhne la gojenyi ne tro kowe la tingetinge memine la madrin. Pine nemene matre thatreine kö angatre troa traqa kowe la lue götrane cili? Hna qaja ha ekö hnei Ieremia perofeta, 2 500 hë lao macatre nge sin, ka hape: “Tha qai ate kö la jë i angeic ; tha qai ate troa amekötine la ite hna feke ca hnei angeic.” (Ieremia 10:23) Ame la atr ka thele troa amekötine la itre hnei angeic hna feke ca ngo thipetrije pe la ixatua ne la ketre atr ka atrein me ka inamacan, haawe, ka tro angeice lai a luuz. Nyipici laka, nyipi ewekë catre kowe la nöjei atr asë troa hetre ka eatrongë angatr me xomiujine la mele i angatr!
3. Pine nemene matre Iehova Akötresieti hmekuje hi la ka atreine troa eatrongëne hnyawa la nöjei atr asëjëihë, nge nemene la hnei Nyidrëti hna thingehnaean?
3 Iehova hmekuje hi la ka ijije troa eatrongëne la atr. Pine nemen? Pine laka atrepengöne hnyawa kö Nyidrëti la aqane xupe la itre atr. Nge ketre atrepengöne hnyawa hi Nyidrëti la kepin matre nanyi pi angatre qa ngöne lo lai gojenyi ka lolo, ene pe luuzi pi hi angatr. Nge atre hi Nyidrëti la nyine tro angatr a kuca matre troa bëeke hmaca qa ngöne la gojenyi ka menu. Ketre, pine laka Nyidrëti la Atre Ixup, atrehmekune pala hi Iehova la ka sisitria koi së. (Isaia 48:17) Haawe, ijije hi tro sa mejiune kowe la hnei Nyidrëti hna perofetan hnine la tusi Salamo 32:8: “Tro ni a ini’ö me köjane koi’ö la jëne qa i’ ö troa trongën ; tro ni a haji’ö me alamekë eö.” Thaa sihngödri kö koi së laka, Iehova hmekuje hi la ka ijije troa eatrongë së hnyawa. Ngo tune kaa la aqane eatrongë së hnei Nyidrë?
4, 5. Tune kaa la aqane troa eatrongë së hnene la itre trenge ewekë i Akötresie?
4 Hna thithi hnene la atre cinyihane la Salamo koi Iehova, ka hape: “Lamepa la ne la lue cange la wesi ula i cilie, me lai ne la jëng.” (Salamo 119:105) Eje e hnine la Tusi Hmitrötr la itre ithuemacanyi me itre nyine amekunëne i Akötresie; ijije hi tro itre ej a xatua së matre tro sa atreine cile kowe la itre jole hne së hna qëmeke kow ngöne la mele së. Eje hi laka, ame la easa e la Tusi Hmitrötr me nue ej troa nyi trepene la mele së, easë fe hi a isa öhne e cili la enyipicine la hna cinyihane ngöne Isaia 30:21: “Nge tro la lue hnangenyë i’ö a denge la aqane ewekë hutrö i’ö, kola hape, Dei la gojeny, tro nyipunie a trongën’ ej.”
5 Kola qaja ngöne la tusi Salamo 119:105 la lue hna kuca hnene la Wesi Ula i Akötresie. Ame la hnapan, tre, ej a nyi lamepa kowe la lue ca së. Ame la easa cile kowe la itre itupathi ne la nöjei drai, kola köja gojenyi së hnene la itre trepene meköti ne la Tusi Hmitrötr matre tro sa inamacane ngöne la itre aqane axecië mekune së, nge atreine së troa neëne la itre hnö memine la itre ethanyine la fen. Ame la hnaaluen tre, kola thinane hnene la itre nyine amekunëne i Akötresie la gojenyi së, me xatua së troa axecië mekun thenge la hne së hna mejiune kow, ene la mele ka epine palua hnine la paradaiso hnei Akötresieti hna thingehnaeane koi së. Pine laka hna thinane hnyawa la gojenyi së, haawe, atreine hi tro sa canga hmekëne me atrehmekune la itre thangan—ka loi maine ka ngazo—ne la aqane mele së. (Roma 14:21; 1 Timoteo 6:9; Hna Amamane 22:12) Tro sa pane ce wange la aliene la kola hape, lamepa la itre trenge ewekë i Akötresie e hnine la Tusi Hmitrötre kowe la lue ca së, nge celë fe la lai ne la itre jë së.
“Lamepa ne la lue cang”
6. Nemene lo itre ijine kola mama laka, lamepa la itre trenge ewekë i Akötresie kowe la lue ca së?
6 Easa axeciën me xome e nöjei drai la itre mekun. Ame itre xaa mekun, tre, maine jë thaa ka jole menu kö troa xom; ngo ame itre xaa ijin, tre, maine jë tro sa qëmeke kowe la itre itupathi ka tru; maine jë troa tupathe la thiina së, me enyipicine la hni së, maine tro pena a uku së troa hane ce sine memine la fen. Maine easa ajane troa cile huti kowe la itre itupathi cili, nyipi ewekë tro sa “majemine huliwane la hni troa wangate hmekune la loi me ngazo.” (Heberu 5:14) Maine tro sa thele troa kapa la atrehmekune qa hnine la Wesi Ula i Akötresie me trotrohnine hnyawa la itre trepene meköti e hnin ej, haawe, easë hi lai a inine trongëne la mekuthetheue së matre atreine së troa xome la itre mekun ka amadri Iehova Akötresie.—Ite Edomë 3:21.
7. Pane qeje pengöne jë la aqane troa hule la ketre keresiano matre pune ce tro pala hi memine la itre sine huliwa i angeic ka tha hmi kö.
7 Tro sa ce xome la ketre ceitun. Maine jë nyipunieti la ketre thupëtresiji maine föe hmae pena ka catre thele troa amadrinë Iehova. (Ite Edomë 27:11) Maine eje hi, ijije troa qaja aloinyi nyipunie. Ngo, pane mekune jë la ewekë celë: hna itö trikitre i epuni hnene la itre xaa sine huliwa i epuni matre troa ce wai elo me angatr. Madrine catr angatre la aqane ce huliwai epun, matre aja i angatr tro pena epuni a pane itronyi me ce madrin e tröne la hna huliwa i maseta. Maine jë tro epuni a mekune laka, thaa ngazo kö la thiina i angatr. Ketre ka loi fe hi la aqane mele i angatr. Haawe, nemene la hnei epuni hna troa kuca? Hapeu, tro kö a hetre ethanyine koi epun, e kapa jë epuni la hna ihë cili? Tune kaa la aqane tro la Wesi Ula i Akötresie a xatua epuni troa axeciëne la itre nyipi mekune ngöne la götrane cili?
8. Nemene la itre trepene meköt ka troa xatua së troa ketre thele mekun matre troa hmekëne la aqane tro sa pune ce tro memine la itre ka thaa ce hmi kö me easë?
8 Tro sa pane ce wange la itre xaa trepene meköti qa hnine la Tusi Hmitrötr. Ame la pane xötre ka canga mama koi së e celë, tre, 1 Korinito 15:33, lo ka hape: “ithanata ka ngazo la ate angazone la thina ka loi.” Hapeu, ame la easa xötrethenge la trepene meköti celë, tre, kolo lai a hape, tro sa kötrene pala hi la itre ka thaa ce hmi kö me easë? Tusi Hmitrötr a sa ka hape, ohea. Hapeu, thaa hnei Paulo aposetolo kö lo hna amaman la aqane wanga atrune nyidrë la “nöjei ate asë,” ene fe lo itre kaa thaa hane ce hmi kö me nyidrë? (1 Korinito 9:22) Nge ame hi la aliene la nyipi Keresiano, tre, ene la tro sa amamane la ihnimi së kowe la itre atr, a kola hane qaja mina fe lo itre ka thaa ce kapa kö me easë la itre ini hne së hna mejiune kow. (Roma 10:13-15) Nyipici, tro sa xötrethenge tune kaa la eamo celë, ene la troa “kuca la loi kowe la nöjei ate asëjëihë”, nge easë pe a kötre angatr? Nge ue angatre ju pena a treqene la ixatua qa the së?—Galatia 6:10.
9. Nemene la eamo qa hnine la Tusi Hmitrötr ka troa xatua së matre thaa tro kö sa sasaithi tulu ngöne la aqane tro sa imelekeu memine la itre sine ce huliwa së.
9 Loi pe, isa pengöne kö la troa thiina ka loi kowe la ketre sine huliwa së, memine la troa catre thele troa ce sinee me angeic. Loi e troa hane wanga atrune mina fe la ketre trepene meköti ne la Tusi Hmitrötr. Hnei Paulo aposetolo hna hmekën la itre Keresiano, ka hape: “The isile menune keu nyipunieti kö me angete tha lapaun.” (2 Korinito 6:14) Kola hapeue la hna ewekë hna hape, “the isile menunekeu nyipunieti kö”? Hnei itre xaa Tusi Hmitrötre hna ujëne ka hape, “the ce tro kö me angatr,” “the thele sinatro ka ngazo kö,” maine “hmaca ju ma isile menunekeu nyipunie memine la itre ka thaa hmi kö, thaa hmekui nyipunieti kö angatr.” Eue la ijine kola mama laka, sasaithi tulu hë la aqane thiina ka loi maine aqane imelekeu së memine la sine huliwa së? Eue la hmekun la kola sasaithe la itre ifego matre kösë kolo ha isilekeu së menu pena ha memine lai itre ka thaa ce hmi kö me easë? Ijije hi tro la Wesi Ula i Akötresie, ene la Tusi Hmitrötr, a amamai gojenyi ngöne la götrane cili.
10. (a) Tune kaa la aqane iëne Iesu la itretre drei nyidrë? (b) Nemene la itre hnyinge ka troa xatua së troa iëne inamacanëne la itre hne së hna troa ce sinee memin, maine troa enehmu së pena?
10 Pane ce xome jë së la tulu i Iesu, laka hnei nyidrëit hna hnime pala hi la itre atr, qaane lo kola xötrei xupi angatr. (Ite Edomë 8:31) Ame lo nyidrëti e celë fen, hnei nyidrëti hna acatrene pala hi la aqane imelekeu i nyidrëti memine la itretre dreng. (Ioane 13:1) Hnei nyidrëti fe hna “hnim” lo atre trenamo, ketre atre hna amenun hnene la hmi. (Mareko 10:17-22) Ngo hnei Iesu fe hna amamane hnyawa la etrune la ihnimi nyidrë kowe la itre nyipi enehmu i nyidrë. Thaa hnei nyidrëti kö hna iothekeu nyidrë memine la itre atr ka thaa nyipine kö la aja ne la Keme i nyidrë. Öni nyidrëti ngöne la ketre ijin: “Maine tro nyipunie a kuca la nöjei ewekë hnenge hna ahnith koi nyipunie, ite sinenge nyipunie.” (Ioane 15:14) Nyipici, ijije troa enehmu i epuni la ketre ce sine huliwa i epun. Ngo pane isa hnyingëne ju kö epuni ka hape: ‘Hapeu, ajane kö la sine huliwange celë troa kuca la itre hna amekötin hnei Iesu? Ajane kö angeic troa atrepengöi Iehova, lo hnei Iesu hna ini së troa thili kow? Angeice kö a melëne la itre trepene meköti ka eje thene la itre Keresiano, nge itre hnenge hna mejiune kow?’ (Mataio 4:10) Maine tro epuni a ce ithanatane memine la itre sine huliwa i epun la enyipiewekëne la troa trongëne la itre trepene meköti qa hnine la Tusi Hmitrötr, haawe, tro ha nyipi mama e cili la sipu mekuna i angatr ngöne la itre hnyinge celë.
11. Qaja jë la itre xaa jole hna cile kow, nge kola mama hnyawa, laka, loi e troa eatrongë së hnene la itre trenge ewekë i Akötresie.
11 Lamepa ne la lue ca së fe la itre trenge ewekë i Akötresie, ngöne la itre xaa hnepe ijine jol. Hane la ketre ceitun: hna öhnyi huliwa hnene la ketre Keresiano, nge nyipi ewekë catre koi angeic la huliwa cili. Ngo isazikeu pe la itre hawa ne huliwa me itre ijine icasikeu, nge maine tro angeic a kapa lai huliwa, tro hë angeic a triane la itre icasikeu ne la itre Keresiano me thaa hane sine la itre xaa huliwa ne la nyipi hmi. (Salamo 37:25) Maine jë troa catre la ajane la ketre keresiano troa goeëne la ketre film, ngo ka icilekeu pe memine la itre trepene meköti ne Tusi Hmitrötr. (Efeso 4:17-19) Maine jë troa canga elëhni hnene la ketre trejine pine la engazone la aqane ujë ne la itre sine hmi angeic. (Kolose 3:13) Ngöne la nöjei jole cili, loi e tro sa nue la Wesi ula i Akötresie troa lamepa ne la lue ca së. Nyipici, maine tro pala hi së a xötrethenge la itre trepene meköti ne la Tusi Hmitrötr, ijije hi tro sa cile kowe la nöjei jole asë. Ame la Wesi Ula i Akötresie, tre, “nyipi ewekë troa inin, me nyine amekötin, me nyine eamo,me nyine ihajine ngöne la thina ka meköt.”—2 Timoteo 3:16.
“Lai ne la jëng”
12. Tune kaa la aqane alaine la itre jë së hnene la itre trenge ewekë i Akötresie?
12 Tusi Salamo 119:105 a qaja fe ka hape tro la itre trenge ewekë i Akötresie a alaine la jë së me thinane la gojenyi qëmeke së. Thaa sihngödre kö koi së la itre ewekë ka troa traqa elany, ke Tusi Hmitrötr a qejepengöne la aliene la nöjei pengöne jole ka ahleuhleune enehila la fene hnengödrai, nge kolo mina fe a amamane koi së la pune kowe ej. Trotrohnine hnyawa ha së laka, easa mele enehila ngöne la “itre drai hnapin” ne la fene ka ngazo celë. (2 Timoteo 3:1-5) Qa ngöne laka atre hi së la itre ewekë ka troa traqa ngöne la itre drai ka calemi, haawe, hetre thangane catre lai ngöne la aqane mele së enehila. Hna cinyihane hnei Peteru aposetolo, ka hape: “Ngöne hi la troa pate la nöjei ewekë asëjëihë cili, ijije tro nyipunie a nöjei ate ka nyipici ngöne la thina ka hmitöte me thina ka ijiji Akötesie, kola teqene me ajane troa traqa la drai Akötesie, lo ka troa manithe la hnengödrai ame hna ahmun, nge troa cici hnei ideuthi la nöjei ewekë!”—2 Peteru 3:11, 12.
13. Maine atrehmekune hnyawa hi së laka easa mele ngöne la ketre hneijine ka nyipi ewekë catre kowe la mele së, nemene hë la thangane lai ngöne la aqane mekune së me aqane mele së?
13 Tro la aqane mekune së me aqane mele së a amamane la etrune la mejiune së laka, tro ha “pate la fene hnengödrai memine la hna aja kow.” (1 Ioane 2:17) Qa ngöne laka, easë a xötrethenge la itre eamo qa hnine la Tusi Hmitrötr, ene pe tro ha xatua së troa inamacane ngöne la aqane tro sa axeciëne la itre hne së hna mekune me ajane troa kuca ngöne la itre drai ka troa traqa. Drei la ketre ceitun, öni Iesu: “Ngo, pane thele jë nyipunie la baselaia i Akötesie, me thina ka meköti anganyidë nge troa hamëne fe koi nyipunie la nöjei ewekë cili.” (Mataio 6:33) Kola keukawa la itre hni së ngöne la easa öhne la itre thöthi ka nyimutre, kola amamane la lapaune i angatr kowe la eamo i Iesu celë, hnene la hna catre xome la huliwa ne cainöj me hane pionie. Ame pena itre xan, ame itre xaa ijin, tre, itre fami ka pexej, tre, angatre a tro kowe la itre nöje ka aja ixatua troa cainöjëne la maca ne la Baselaia.
14. Tune kaa la aqane akökötrene hnene la ketre fami keresiano, la huliwa ne cainöje i angatr?
14 Tro sa pane ce ithanatane la lue trefën me lue nekö i nyidro. Hnei angatre hna tro qaa Etazini kowe la nöje Republique dominicaine, matre troa ixatua me ce huliwa memine la ketre ekalesia ne la ketre traon; 50 000 la etrune la itre atr ka mele e cili. Ala 130 lao atr ka cainöjëne la maca ne Baselaia ngöne la ekalesia. Ame lo drai 12 Eiperem 2006, kola e la 1 300 lao atr ka hane sine la Drai ne Amekunëne la meci Keriso! Ame la itre hlapa ngöne la götrane cili, tre, “elehmedë hë e troa menu;” kola mama ngöne la 30 lao etid hna kuca hnei angatr asë ala foa, ngo faifi petre hi lao treu ne angatr e cili. (Ioane 4:35) Hna qeje pengöne hnene la kem, ka hape: “Hetrenyi hnine la ekalesia la ala 30 lao trejine trahmanyi me föe ka traqa qaa cailo troa ixatua. Ala 20 qaa Etazini nge ame pë hë la munën, tre, qaa Bahamas, Kanada, Italy, Nuzilan me Sepania. Hnene laka itre ka catre angatr cainöjëne la maca ka loi, haawe, kolo mina fe a hane aciane la madrine thene la itre trejine ne la nöj.”
15. Nemene la itre manathith hne së hna kapa qa ngöne la hne së hna amë panëne la itre aja ne la Baselaia ngöne la mele së?
15 Trotrohnine hi së laka, thaa ijiji së asë kö troa feke më iwa kowe la ketre götran gaa aja ixatua troa cainöj. Ngo ame koi itre ka ijij, maine ka saze pena la aqane mele i angatr matre troa hane ixatua, tre, tro hë angatre a kapa la itre manathith. Ngacama isa nöje ju hë hne së hna tro kow, ngo ame la ka nyipi ewekë, tre, ene la troa catre nyihluei Iehova, ke celë hi jëne madrine lai. Hnei Iehova hna thingehnaeane ka hape, maine tro sa amë panëne la itre aja ne Baselaia ngöne la mele së, haawe, tro hë Nyidrëti a “fe pi koi [së] la itre thingene la hnengödrai me nenge hu [së] la manathith uti hë atraqate cat.”—Malaki 3:10.
Manathith qa ngöne la hna eatrongë së hnei Iehova
16. Nemene la itre manathith hne së hna kapa e hne së hna nue la itre trenge ewekë i Akötresieti troa eatrongë së?
16 Tune la hne së hna ce wang, itre trenge ewekë i Iehova a eatrongë së ngöne la lue götrane ka isa pengön. Ame la hnapan, itre ej a nyine lamepa kowe la lue ca së. Kola xatua së troa xome pala hi la nyipi gojeny, nge itre eje fe a eatrongë së ngöne la easa axecië mekun. Ame la hnaaluen, tre, Wesi Ula i Akötresie a alaine la jë së, me aijijë së troa canga atrehmekune la itre ewekë ka calemi. Nge itre eje fe a xatua së troa xötrethenge la hna ahnithe xönëne hnei Peteru, kola hape: “Qa ngöne lai, sile ju la otene la ite hni nyipunie, me hmekëne ju, me mejiune uti hë la pune la ihnimi gufa la hna troa traqa fë koi nyipunie e mama pi Iesu Keriso.”—1 Peteru 1:13.
17. Tro la ini Tusi hmitrötr a xatua së tune kaa, matre troa xötrethenge la hna e së kow hnei Akötresie?
17 Thaa sihngödre kö koi së laka, Iehova a eatrongëne la atr. Ame pe la nyine tro sa isa hnyingëne thel, tre, hapeu, easë kö a drengethenge? Maine easa ajane troa trotrohnine la aqane eatrongë së hnei Iehova, tre, loi e tro sa catre e pala hi ngöne la nöjei drai la itre xaa xötr ne la Tusi Hmitrötr. Loi e tro sa mekune thele hnyawa la itre hne së hna e, me tupathe troa trotrohnin la aja i Iehova, me mekune la aqane tro sa trongëne la ini ngöne la mele së. (1 Timoteo 4:15) Thupene lai, easë a axeciëne la itre mekune thenge la hne së hna ‘atreine trotrohnin’.—Roma 12:1.
18. maine tro sa nue la Wesi Ula i Akötresie troa eatrongë së, nemene la itre manathithi hne së hna troa kapa?
18 Maine tro sa nyitrepene la mele së hnene la itre trepene meköti ne la Wesi Ula i Akötresie, haawe, tro hë itre ej a thinane la gojenyi së me eatrongë së ngöne la easa axecië mekune me thele la ketre aqane troa ujë. Thaa luelue kö së laka, ame la itre trenge ewekë i Iehova hna cinyihan, tre, itre ej a “ainamacanëne la itre wangadrapa.” (Salamo 19:7) Ame la easa nue la Tusi Hmitrötr troa eatrongë së, tro sa hetrenyi la mekuthetheu ka wië me madrine qa ngöne laka, easa amadrinë Iehova. (1 Timoteo 1:18, 19) Maine tro sa nue la itre trenge ewekë i Iehova troa eatrongë së me thinane la lue ca së e nöjei drai, haawe, tro hë Anganyidrëti a nyi thupene koi së hnene la manathithi atraqatr, ene la mele ka thaa ase palua kö.—Ioane 17:3.
Tha thëthëhmine kö nyipunie?
• Pine nemene matre nyipi ewekë catre tro sa nue Iehova troa eatrongë së?
• Nemene la aliene la kola hape nyine lamepa ne la lue ca së la itre trenge ewekë i Iehova?
• Tune kaa la aqane tro la itre trenge ewekë i Iehova a alaine la jë së?
• Tro la ini Tusi hmitrötr a xatua së tune kaa matre tro sa xötrethenge la hna e së kow hnei Akötresie?
[Thying]