Ita Ne Thup göi 14 OKOTROPA

Nyima 19 me 5 Qene Drehu

Loi e Tro La Itre Keme Me Thine a Hiane La Itre Nekönatr Cememine La Ihnim

”Kuca jë la nöjei ewekë asë i nyipunie ngöne la ihnim.”—1 KORINITO 16:14.

1. Nemene la itre mekune ka eje thene la itre keme me thin ngöne la ijine kola mala la nekönatr?

 NYIMUTRE la itre keme me thin ka kapa la mekun, laka, ketre drai ne madrin atraqatr ngöne la mele i angatr, la kola malane la ketre nekönatr. Öni Alea, ketre thine ka hape: “Ame la eni a goëene la pane neköng jajinyi hna nyipi malan, tre, kola elitrauje la hninge hnene la madrin. Hnenge hna mekune laka, pëkö nekönatre ka mingöming hui nyën.” Ngo, ijije mina fe troa seseu hnene la itre keme me thin ngöne la ijine cili. Önine la föi Alia ka hape: “Ame la hnenge hna hnehengazon, tre, ene la troa hnëkëne hnyawa la neköng jajinyi matre tro nyën a hane cile kowe la itre itupath ka troa traqa ngöne la mele i nyën.” Nyimutre la itre keme me thin ka hane hnehengazo tune me wangatremekune la enyipiewekëne la troa hetrune la itre nekö i angatr cememine la ihnim. Ngo, ame la itre keme me thine Keresiano ka ajane troa hetrune la itre nekö i angatr ngöne la ihnim, tre, angatre lai a troa cile qëmekene la itre itupath. Nemene jë la itre itupathi cili?

2. Nemene la itre jol hnene la itre keme me thine hna cile kow?

² Easa melëne enehila la pune la itre drai hnapin ne la fene hnengödrai celë. Tune la hna ahnithe hë, kola haöthe enehila la fene hnengödrai hnene la itre atr ka pëko ihnim. Ame fe kowe la itre atrene la fami, easa öhne laka angatr a “tha hnimi sinen,” nge “tha ole kö, me tha metöte kö, me tha’teine xome hnöth, me ka cate hmek.” (2 Timoteo 3:1-5) Maine hna majemine hnene la itre atrene la hnepe lapa troa ce memine la itre atr ka xome la itre thiina cili, eje hi lai laka, tro ha hane ixomithiina hnei angatr nge troa hetre thangane ka ngazo ngöne la itre aqane imelekeu e hnine la fami. Ketre, itre keme me thine pala hi a catr cile kowe la itre aja ka ngazo ka eje ekuhu itre hni angatr, matre troa atreine xomihni, me xomehnöthe la aqane troa ithanata, me atreine waiewekë hnyawa ngöne la itre xaa götrane la mel.—Roma 3:23; Iakobo 3:2, 8, 9.

3. Tune kaa la aqane tro la itre keme me thin a hiane la itre nekö i angatr ka madrin?

³ Ngacama hetrenyi la itre jole cili, ngo ijije hi kowe la itre keme me thin troa hetrune la itre nekönatre ka madrin, nge ka hnimi Akötresie. Tune kaa la aqane troa traqa kowe lai hnene la itre keme me thin? Hnene hi la hna trongëne la eamo qa hnine la Tusi Hmitrötr, hna hape: “Kuca jë la nöjei ewekë asë i nyipunie ngöne la ihnim.” (1 Korinito 16:14) Nyipici laka ihnimi hi la “otene ka nyipi loi.” (Kolose 3:14) Tro sa ce wange la köni götranene la ihnim hna qeje pengöne hnei Paulo ngöne la pane tusi angeic koi angetre korinito, nge tro sa ce ithanatane la itre xaa aqane tro la itre keme me thin a eëne la thiina celë ngöne la angatr a hiane la itre neköi angatr.—1 Korinito 13:4-8.

Nyipi Ewekë Tro La Itre Keme Me Thin a Xomihni Ahoeany

4. Pine nemene matre nyipi ewekë tro la itre kem me thin a xomihni ahoeany?

⁴ Hnei Paulo hna cinyihane ka hape: “Ihnimi la ate xome ahoeane.” (1 Korinito 13:4) Ame la qene Heleni ne la hnëewekë hna hape “xome ahoeane”, tre, kola hape mina fe troa atreine treqen, me troa hmitre elëhni. Pine nemene matre nyipi ewekë tro la itre keme me thine a xomihni ahoean? Ma tru catr la itre keme me thin ka mekune laka nyimutre la itre kepin. Hanawang la itre xaa hnepe ceitun. Thaa hna majemine kö hnene la itre nekönatr tro hi a acaa sipone la itre ewekë hnei angatr hna ajan. Nge maine thaa hna nangëne kö hnei nyidro, tro la nekönatr a catre fë la mekune i angeic, ke, ame la hnei angeic hna ajan, tre, troa kapa la aja i angeic. Maine jë tro la itre thöth a qaja la itre kepine ka aijijë angatr troa kuca la ketre ewekë hnene la itre kem me thine hna mekune laka ka ngazo. (Ite Edomë 22:15) Ceitui easë hi memine la itre nekönatr, laka, canga nyimenyime hi angatr kuca hmaca lo itre ngazo hna kuca ha.—Salamo 130:3.

5. Nemene la ka troa xatuane la itre kem me thin troa xomihni ahoean?

⁵ Hapeu, nemene la ka xatuane la itre kem me thin troa xomihni ahoeane me xomihnine la itre nekö i angatr? Hna cinyihane hnei Solomona, ka hape: “Ame la inamacane ne la ate, te, ate ahmitene la elëhni angeic.” (Ite Edomë 19:11) Atreine hi troa  trotrohnine hnene la itre keme me thin la itre aqane ujë ne la itre nekö i angatr, qa ngöne laka, hnei angatre fe hi hna hane cili thenge me hane “ewekë qene nekönat, [me] trotrohnine qene nekönat, [me] mekune qene nekönat.” (1 Korinito 13:11) Hapeu, itre kem me thin, hane kö nyipunieti mekune hmaca lo aqane sipone ielene epuni ekö lo keme me thine i epun, matre tro nyidroti a hane kapa lo itre sipo i epuni ka thaa nyipi loi kö? Ame fe lo epuni a thöth, tre, ma hnei epuni hna hane mekune laka thaa trotrohnine kö angatr la itre mekuna i epun me itre jol hnei epuni hna cile kow? Maine eje hi lai, haawe trotrohnine hi epuni la kepine matre kola ujë tune lai la itre nekö i epun, nge nyipi ewekë tro pala hi epuni a amekunë angatr la itre mekune hnei epuni hna axeciën, me xomihni angatr. (Kolose 4:6) Hnei Iehova hna upe la itre kem me thin ne isaraela troa “inine” la itre wathebo i Nyidrë kowe la itre nekö i angatr. (Deuteronomi 6:6, 7) Ame la qene heberu ne la hnëewekë hna hape, “inin”, tre, kola hape “troa qaja lapaan,” “troa qaja me qaja hmaca,” “troa fejaan.” Kolo hi lai a hape, maine jë tro la itre kem me thine a anyimua amexeje la itre ini nge tro hë la nekönatr a trongëne la itre hna amekötine hnei Akötresie. Haawe, nyipi ewekë catre troa amexeje pala hi la itre ewekë matre troa inine la itre nekönatr ngöne la itre xaa götranene la mele i nyudren.

6. Pine nemene matre kola qaja ka hape ame la itre keme me thine a xomihni ahoeany, tre, thaa kolo kö lai a hape ka nuenue angatr la itre neköi angatr?

⁶ Ngo, eje hi lai laka, ame la kola qaja ka hape ka xomihniahoeanyi la itre keme me thin, tre, thaa kolo kö lai a hape, ka nue angatre la itre nekö i angatr troa isa kuci ajan. Kola hmekë së hnene la Wesi Ula i Akötresieti ka hape: “Ame la nekönate hna nue, te, troa ahmahmane la thine i nyën.” Kola neë së fe matre thaa tro kö a traqa kowe la pune cili; öni Ite Edomë fe ka hape: “Ame la wameuce memine la ihaji, te, luete ainamacanën.” (Ite Edomë 29:15) Ame ngöne la itre xaa ijin, kola isenyine hnene la itre nekönatr la hnëqa ne la itre keme me thin, la troa haji angatr. Ngo ame la itre fami keresiano, tre, thaa tro kö a aceitunëne me ketre mus, laka itre atr la ka troa axecië mekun; ohea, hna amekötine kowe la itre keme me thin troa acile la itre wathebo nyine troa trongën, nge thaa kolo kö a nue kowe la itre nekönatr troa kapa maine thaa kapa pena itre ej. Hnei Iehova lo Hene ka tru ne la fami, hna nue kowe la itre keme me thin troa musi me hetrune me hajine la itre nekönatr cememine pala hi la ihnim. (1 Korinito 11:3; Efeso 3:15; 6:1-4) Nyipici laka ame la ihaji, tre, ka ce tro memine lai ketre hatrene la ihnim, ene la xomihni ahoean, lo hna qaja hnei Paulo.

Troa Ihaji Tune Kaa Cememine La Ihnim

7. Pine nemene matre tro la itre kem me thin ka ihnim a hajine la itre nekö i angatr, nge nemene jë la aliene la ihaji cili?

⁷ Öni Paulo e cinyihane ka hape: “Ihnimi la ate . . . ka menyik.” (1 Korinito 13:4) Ame la itre kem me thine ka ihnim, tre, angatr a hajin la itre nekö i angatr, thaa isazikeu kö la itre hnei angatr hna qaja memine la hnei angatr hna kuca. Angatre hi lai a xötrethenge la tulu i Iehova. Hnei Paulo hna cinyihane ka hape: “ame la hna hnime hnei Iehova, te, kola hajine hnei nyidë.” Kolo fe a amexej laka ame la pengöne lai ihaji cili ngöne Tusi Hmitrötr, tre, thaa kolo hmekuje kö a hape troa nyithupen la ngazo hna kuca. Ngo kolo fe a hape, troa hiane me inin. Nemene la hna thele troa traqa kow ngöne la kola trotrohnine la aqane ihaji cili? Öni Paulo ka hape: “thupene lai ame hna cia la wene tingetinge ene la thina ka meköti koi angat’ange hna inine hnene lai.” (Heberu 12:6, 11) Ame la itre kem me thine ka ihnimi me hni ka menyik ngöne la angatr a hiane la itre neköi angatr thenge la aja i Akötresie, tre, angatre hi lai a aijijë nyudreni troa itre atr ka atreine xomi hnëqa elany, me lapa tingeting, me thiina ka meköt. Maine tro la itre nekönatr a kapa “la eamo i Iehova,” ke, tro hë angatr a hetrenyi la inamacan, memine la atrehmekun, memine la atreine waiewekë, ene lo itre thiina ka sisitria catre kö hune la sileva maine gool.—Ite Edomë 3:11-18.

8. Nemene la ewekë ka traqa ngöne la kola cipane hnene la itre keme me thine troa hajine me wameucëne la itre neköi angatr?

⁸ Ame ngöne ketre götran, tre, thaa easë kö a hnim me hni ka menyik, la easa hnöthe troa hajine la itre nekö së. Hnei Iehova, hna upi Solomona jëne la uati hmitrötr, troa cinyihane ka hape: “Ame la ate cipane la wameuc, te, kola methinëne la nekö i angeic ; ngo ame la ate hnimi kuku, te, kola thele ihaji thatraqai nyën.” (Ite Edomë 13:24) Ame la itre nekönatr thaa hna hane kö hajine hnyawa, tre, nyudreni a isa meku nyudreni kö me isa kuci aja, nge thaa madrine kö nyudren. Ngo kola mama hnyawa, laka, lolo catre la itre thangane hna kapa hnene la itre nekönatr hna hnim hnene la itre keme me thin ka utipin, nge kola amë fe la itre trenge ifego thatraqai nyudren; lolo la itre hatre i nyudren ngöne la hna ini, nge atreine catre nyudreni ce mele memine la itre xan, nge madrine nyudreni ngöne la mele i nyudren. Eje hi laka, ame la itre kem me thin ka hajine la itre nekö i angatr, tre, angatre hi lai a amamane ka hape, angatr a hni ka menyik me hnime la itre nekö i angatr.

9. Nemene la hna inine hna inine hnene la itre keme me thine Keresiano kowe la itre neköi angatr, nge tune kaa la aqane tro nyudreni a trotrohnine la itre hna amekötine cili?

⁹ Nemene la aqane troa hajine la itre nekönatr cememine  la ihnim me hni ka menyik? Nyipi ewekë tro la itre kem me thine a qeje pengöne hnyawa kowe la itre nekönatr la itre hnei angatr hna thele thei nyudren. Hanawang la ketre ceitun, ame la itre neköne la itre Keresiano, tre, hna ini angatr petre kö qaane lo angatr a co, la itre hna amekötine hnei Tusi Hmitrötr memine fe la enyipiewekëne la troa trongëne itr’ej ngöne la nöjei götrane ne la nyipi hmi. (Esodo 20:12-17; Mataio 22:37-40; 28:19; Heberu 10:24, 25) Nyipi ewekë tro la itre nekönatr a atre laka ame la itre hna amekötine cili, tre, itre eje hë lai, thatreine kö troa thele troa ithanatane matre troa saze itre ej.

10, 11. Pine nemene la itre keme me thine a hane wanga atrune e itre xaa ijine la mekunane la itre neköi angatr, ngöne lo kola athipe la itre wathebo e hnine la hnalapa?

¹⁰ Ame itre xaa ijin, tre, maine jë tro la itre keme me thin a ce ithanatane memine la itre nekö i angatr la itre hna amekötine me itre wathebo thatraqane la hnalapa. Maine troa nue la itre thöth troa hane ce ithanatane la itre hna amekötine cili, eje hi lai laka, tha jole kö koi angatr e troa xötrethenge itre ej elany. Hanawang la ketre ceitun, maine kola ajane hnene la itre keme me thine troa sa hawa ne lö kowe la hnalapa hnene la itre nekönatr, haawe, ijije hi tro angatr a axeciëne la hawa thatraqai nyudren. Maine pena, troa nue la itre nekönatr troa athipe la ketre hawa, me qaja la itre kepine la angatr a iëne me sa lai hawa cili. Thupene lai itre keme me thine pena a qaja la hawa hnei angatr hna ajan, me qeje pengöne la kepine matre angatr a mekune laka ka loi la hawa cili. Eje hi lai laka, troa isazikeu la lue mekun; matre nemene la nyine troa kuca? Ame ngöne la itre xaa ijin, tre, maine jë troa kapa hnene la itre keme me thine la mekunane la itre neköi angatr, maine thaa ka icilekeu kö memine la itre trepene meköti ne la Tusi Hmitrötr. Hapeu, kolo lai a hape itre kem me thine a nuetrije la hnëqa i angatr, ene laka angatre la ka mus?

¹¹ Tro së a sa la hnyinge celë me ce wange la ihnimi Iehova ngöne la aqane musi Nyidrë hui Lota me fami angeic. Thupene la hna eatrongë Lota, me föe i angeic, memine la lue nekö i angeic jajinyi e tröne Sodoma, önine jë hi la lue angela koi angatr, ka hape: “Kotejë kowe la wet, wanga mecipi eö!” Ngo, öni Lota e sa ka hape: “Joxu fe, epi the tune kö lai!” Angeic a qaja hmaca jë ka hape: “Hana pe cahu lapa eashenyi troa köte kow, nge co hi ej. Epi köte ni kowe lai?” Nemene hë la hnei Iehova hna sa? Öni Nyidrëti e ulatine ka hape: “Hana wang, hnenge hna kepe eö fë la ewekë celë mina.” (Genese 19:17-22) Hapeu, Iehova lai a nuetrije la musi Nyidrë, ngöne laka hnei Nyidrëti hna kapa la sipo i Lota? Ohea! Hnei Nyidrëti pe hna trotrohnine la sipo i Lota, me mekune troa amamane hnyawa la etrune la ihnimi Nyidrë koi angeic. Hapeu nyipunie itre keme me thin, ijije kö e itre xaa ijine troa hane wanga atrune la mekunane la itre neköi nyipunie, ngöne la epuni a athipe la itre wathebo me itre hna amekötine e hnine la hnalapa?

12. Nemene la ka troa xatuane la ketre nekönatr matre troa tingetinge la mekue i nyën?

¹² Ejehi laka, thaa tro hmekuje kö la itre nekönatr a atre la itre hna amekötin, ngo nyipi ewekë mina fe tro nyudreni a atre la itre pun koi nyudren e thaa trongëne kö nyudreni la itre wathebo cili. E ase hë qaja amamane hnyawa la itre pun la hna thaa idrei, nge trotrohnine hnyawa ha la itre nekönatr, haawe, thaa tro pi kö a saze mekune me triane lai itre hna mekun hna ce axeciën. Maine tro la itre keme me thin a qaja lapaane kowe la itre neköi angatr ka hape kola troa nyithupene la thaa idrei angatr, ngo thaa kuca pe, tre, angatre hi lai a amamane ka hape, pëkö ihnimi angatr kowe la itre neköi angatr. Kola qaja hnei Tusi Hmitrötr, ka hape: “Ngöne laka tha hna canga nyi thupene la huliwa ka ngazo, qa ngöne lai cate la ite hni ne la ite ate troa kuca la ngazo.” (Ate Cainöj 8:11) Eje hi laka, thaa ka loi kö troa wameucëne la nekönatr hnene la itre keme me thin, ngöne la itre gaa tru atr maine qëmekene pena la itre sine ce elo i angeic, wanga tro angeic a hmahma. Ngo troa tingetinge la mekunane la nekönatr, me kökötre la metrötr me ihnimi nyëne kowe la keme me thine i nyën, e atre hi nyëne ka hape ame la kola hape, “eje hi” hnei keme me thin, tre, kolo lai ka hape “eje hi”, nge ame la angatr a hape “pëkö”, tre, kolo lai ka hape, “pëkö”.—Mataio 5:37.

13, 14. Tune kaa la aqane tro la itre kem me thine a xötrethenge la tulu i Iehova, ngöne la troa hiane la itre nekö i angatr?

¹³ Kolo mina fe a ihnimi la keme me thin ngöne la nyidroti a thupën la pengöne wameuc memine la aqane troa wameucëne la nekönatr, matre tro kö a hmeku i nyën. Kola amexej hnei Pam, ka hape: “Pine laka isapengöne kö la lue neköi nyio jajiny, haawe, ketre isapengöne kö la ihaji hna troa isa hamëne koi nyidro. Ame la ka ijiji koi ketre, tre, thaa ka loi kö koi ketre.” Kola qeje pengöne hnene la föi eahlo ka hape: “Ame la nekö i nyio jajiny, tre, ka nango catre që, nge kösë kola idrei e hna nango acatrene la aqane troa wameucën. Ngo, ame pena ha lo neköi nyio ka co, tre, canga idrei hi ngöne la kola qaja hnei nyio la itre hnepe hnëewekë ka catr, maine pena, tre, tro hi a goeë angeic.” Eje hi lai laka, ame la itre kem me thine ka ihnim, tre, angatr a atrehmekune la ihaji ka ijij me ka ihmeku memine la itre nekönatr, nyudren isa alacaas.

¹⁴ Hnei Iehova hna hamëne la tulu kowe la itre kem me thine ngöne la aqane troa hajine la itre nekönatr; atre hnyawa kö Nyidrëti la itre trenge catr  me itre aja ka ngazo ne la itre hlue i Nyidrë, angatr isa ala caas. (Heberu 4:13) Ketre, ame la Nyidrëti a nyi thupene kowe la atre kuca la ngazo, tre, hna tuluthe pala hi; thaa ka catrehnine menu kö, nge ketre thaa ka puje menu pena kö. Hnei Nyidrëti pe hna majemine nyi thupene kowe la itre hlue i Nyidrë “thenge la meköt.” (Ieremia 30:11) Hapeu itre kem me thin, atre kö nyipunieti la itre hna atreine kuca hnene la itre neköi nyipunie, memine la itre ewekë ka jole koi angeice troa xomihnin? Ijije kö troa hiane hnyawa cememine la hni ka ihnim la itre neköi nyipunie, thenge la itre hnei nyipinieti hna atre hë göi nyudren? Maine eje hi, haawe, hatrene hi lai ka hape, nyipunieti a hnimi nyudren.

Loi E Troa Thue Catre Koi Angatr Troa Hane Fe La Itre Hni Angatr

15, 16. Tune kaa la aqane tro la itre kem me thine a xatuane la itre nekö i angatr troa fe hnyawa la hni angatr, nge nemene la itre aqane kuca ka loi hna xome hnene la itre xaa keme me thin Keresiano thatraqane lai?

¹⁵ Ame la ketre hnepe götranene la ihnim, tre, ene laka “tha ate madine kö la thina ka tha meköti kö, ngo ate madine la nyipici.” (1 Korinito 13:6) Tune kaa la aqane tro la itre kem me thine a inine la itre nekö i angatr, troa ajane la thiina ka meköt me ka nyipici? Ame la pane ewekë ka sisitria nyine troa kuca, tre, ene la troa xatua angatr troa hane fe amamane hnyawa la itre aliene hni angatr, ngacama ame la hnei angatr hna troa qaja, tre, ka nango jole koi së troa kapa. Eje hi laka, madrine catre la itre keme me thin, ngöne la kola qaja amamane hnene la itre nekönatr la itre mekuna i angatr me itre aliene hni angatr, a ka ihmeku memine la itre trepene meköt. Ngo eje hi lai laka, ame ngöne la itre xaa ijin, tre, canga nyimenyime ithanata la nekönatr, matre mama mina pi hi lo ajane troa kuca la thiina ka thaa meköti kö. (Genese 8:21) Tro la itre kem me thine a ujë tune kaa ngöne la itre ijine cili? Ame la pane hnei angatr hna kuca, tre, maine jë troa canga hajine la nekönatr pine qaja la itre mekune cili. Ngo maine troa ujë tune lai, canga tro hi la nekönatr a qaja hmekuje kowe la keme me thine nyën, la hnei nyidroti hna ajane troa dreng. Eje hi laka, loi e troa canga wenë la itre trenge ewekë ka ngazo; ngo isapengöne kö la easa inine la nekönatr troa ithanata cememine la thiina ka menyik, memine la troa qaja koi angeic la nyine tro angeic a kuca.

¹⁶ Tro la itre keme me thin a aijijëne tune kaa matre troa iqajakeune hnyawa la nyipici ngöne la kola ifekeune la itre mekun? Öni Alea ka hape: “Hnei nyio hna nue troa isa qeje mekun me thele troa xomihnine la itre aliene hni nyio ngöne la kola qaja hnene la itre neköi nyio la itre ewekë hnei nyio hna hnehengazon.” Önine la ketre kem, Tomë la ëje i nyidrë, ka hape: “Hnei nyio hna ithuecatre kowe la nekö i nyio jajiny, troa fe la hni angeic, ngacama ka isazikeu la mekuna i angeic memine la aqane mekune i nyio. Wangatre mekune hi nyio laka, maine hnei nyio ju hna canga sawa la aja i angeic me pi hune fë la aqane mekune i nyio, tro hë angeic a wesitr, nge tro pë hë angeic a majemine troa cipane la itre mekune ka eje ekuhu hni angeic. Ngo qa ngöne laka nyio a thele troa drei angeic, ene pe angeice fe a hane drei nyio.” Nyipici laka, loi e tro la itre nekönatr a drengethenge la itre kem me thine i nyudren. (Itre Edömë 6:20) Ngo, maine tro la itre keme me thine a inyipicikeu me ifekeune hnyawa la itre mekune i angatr memine la itre neköi angatr, haawe, tro hë angatr a xatuane la itre neköi angatr troa inine troa iemane la itre ewekë. Öni Vësa, keme ne la ala foa lao nekönatr jajiny, ka hape: “Ame ngöne la itre xaa ijin, hne huni hna ifekeune hnyawa la itre mekun, ka amamane la itre thangane ka loi me itre thangane ka ngazo ne la ketre aqane mel; göne hi matre tro la itre nekönatr a isa öhne la nyin ka sisitria koi angatr. Celë hi ka aijijë angatre lai troa hetrenyi la atreine troa waipengöne la itre ewekë.”—Ite Edomë 1:1-4.

17. Nemene la ka troa xecie hnyawa kowe la itre kem me thin?

¹⁷ Eje hi lai laka, pëkö keme me thine ka atreine troa eatrëne hnyawa la itre eamo hna qatrenge hnei Tusi Hmitrötr göi troa hiane la itre nekönatr. Ngo, loi e troa xecie hnyawa koi nyipunieti laka, troa olene hnyawa elanyi hnene la itre nekönatr, la hnei nyipunieti hna thele troa hia angatr cememine la xomihniahoeany, me hni ka menyik, me ihnim. Ketre, tro Iehova elanyi a amanathithine la itre trengecatre hnei nyipunieti hna kuca. (Ite Edomë 3:33) Nyipici, ajane asë hi la itre keme me thine Keresiano tro la itre neköi angatr a hnimi Iehova tui angatr. Ngo, tune kaa la aqane tro la itre kem me thine a eatrëne la aja cili? Tro sa ce wange ngöne ini hnapine la itre xaa aqane ini ka sisitria.

Mekune Hi Nyipunie?

• Tro la atreine waiewekë a xatuane tune kaa la itre kem me thine troa xomihni ahoean?

• Nemene la aqane ce tro la ihnim memine la ihaji?

• Pine nemene matre nyipi ewekë catr la tro la itre kem me thine a majemine ifekeune hnyawa la itre mekune memine la itre neköi angatr?

[Thying]