Nyitipu Iesu Jë Ngöne La Aqane Inine Nyidrë La Itre Atr
Ita Ne Thup göi 6 JANUARE
Nyima 4 me 18 Qene Drehu
Nyitipu Iesu Jë Ngöne La Aqane Inine Nyidrë La Itre Atr
“Wange hnyawa nyipunie la aqane deng.”—LUKA 8:18.
1, 2. Pine nemene matre loi e tro sa wanga atrune hnyawa la aqane ujë Iesu kowe la itre atr ngöne la nyidrëti a cainöje trootro?
HNEI Iesu Keriso hna eatrëne la hnëqa i nyidrë, ene la Atre Ini Ka Tru, me Atre inine la itre atr matre tro angatr a itretre dreng, lo nyidrëti a qaja koi angatre ka hape: “Wange hnyawa nyipunie la aqane deng.” (Luka 8:16-18) Ketre ini la, nyine tro la itre Keresiano, easë isa ala caas a trongëne ngöne la huliwa ne cainöje së. Maine tro epuni a wanga atrune hnyawa la ini ngöne la ua, tro hë epuni a melëne itre ej, nge tro hë epuni a maca troa tro fë la maca ne Baselaia. Nyipici laka, thatreine kö tro epuni a drenge la nine ithanata i Iesu enehila, ngo ijije hi tro epuni a e la itre hnei nyidrë hna qaja me kuca, tune la aqane amamane ngöne la Itre Hna Cinyihan. Nemene la aqane mama itre ej, lo Iesu a cainöj kowe la itre atr?
2 Iesu hi lo atr ka maca troa cainöjëne la maca ka loi, nge ka atreine nyidrëti inine la nyipici qa hnine la Itre Hna Cinyihan. (Luka 8:1; Ioane 8:28) Ame la huliwa ne troa inine la itretre dreng, tre, ene la troa cainöj, me hamë ini, ngo ame itre xaa ka atreine cainöj, ka maca angatre troa cainöj, ngo jole pë hë koi angatre troa hane inine la itre atr. Maine eje hi laka ame la cainöj, tre, ene la troa qaja la maca, me troa inine la itre atr la pengöi Iehova memine la itre trepene mekune i Nyidrë, ngo nyipi ewekë fe troa eköthe la aqane imelekeu ne la ka hamë ini memine la hnainin. (Mataio 28:19, 20) Ijije hi troa eatrëne lai e troa nyitipu Iesu Keriso, lo Atre Ini Ka Tru, nge Tulu ka sisitria e kola inine la itre atr matre tro angatre a itretre dreng.—Ioane 13:13.
3. Maine tro epuni a nyitipu Iesu, nemene la thangane lai kowe la aqane catre epuni troa inine la itre atr?
3 Maine tro epuni a nyitipune la itre aqane hamë ini hnei Iesu, epuni hi lai a trongëne la ithuemacanyi qaathei Paulo kola hape: “Loi e tro inamacane pala hi thei angat’ e kuhu, kola anyipi ewekëne la nöjei ijin. Loi e ewekë pala hi nyipunie memine la ihnimi, hna aloine hnei alase, mate ate jë nyipunie la aqane troa isa sa kowe la nöjei ate.” (Kolose 4:5, 6) Eje hi lai laka maine hne së hna catre nyitipu Iesu me inine la itre atr, haawe, tro ha hetre thangane ka lolo la aqane inine së la itre atr, ke, atreine së “sa kowe la nöjei ate” thenge la itre hnei angatre hna hnyingëne thel.
Hnei Iesu Hna Xatuane La Itre Xaa Atr Troa Ithanata
4. Pine nemen matre ijije tro sa qaja ka hape, Iesu la ketre atre hnangenyëne hnyawa?
4 Qaane la kola co, hnei Iesu hna majemine drenge la itre atr, me xatua angatre troa ketre fe amamane la itre mekune i angatr. Drei la ketre ceitun, ame la kola 12 lao macatre i nyidrë, hna öhnyi nyidrë hnene la keme me thine i nyidrë e nyipine la itre ka hamë ini hnine la ēnē, me “dei angate me hnyingë angat.” (Luka 2:46) Thaa hnei Iesu kö hna traqa fë la atrehmekune i nyidrë kowe la ēnē matre troa ahmahmane kowe la itre ka hamë ini. Nyidrëti pe a traqa e cili göi troa dreng, nge hnei nyidrëti mina fe hna hane hnying. Qa ngöne la aja ka eje thei nyidrë troa drenge hnyawa, ene pe, kola kepe nyidrë hnei Akötresie me hnene la itre atr.—Luka 2:52.
5, 6. Pine nemene matre atre jë së laka, hnei Iesu hna hnangenyëne la itre mekune hna fe amamane hnene la itre hnei nyidrëti hna inin?
5 Thupene la kola bapataiso Iesu, me sië nyidrë troa Mesia, hnei nyidrëti pala hi hna wanga atrune la itre atr me drei angatr. Thaa hnei nyidrëti kö hna mekune menune pala ha la aliene la itre ini hnei nyidrëti hna hamën, ene pe nge sihngödre ju pë hë la itre atr ka traqa troa drei nyidrë. Hnei nyidrëti pe e itre xaa ijin hna pune mano, me hnyingë angatre la mekuna i angatr, me drenge la angatre a sa. (Mataio 16:13-15) Drei la ketre ceitun, thupene la kola meci hnei Lazaro, xa i Maretha, hnei Iesu hna qaja koi nyiidro ka hape: “Ame la ate mele me lapaune koi ni, te, tha tro kö angeic’ a meci epine palua.” Öni nyidrëti jë e hnyinge koi nyiidro: “Hape u, nyipoti a kapa lai?” Nge Iesu a ketre hnangenyëne hnyawa ju la kola sa hnei Maretha ka hape: “Ejëti hi Joxu; ini a kapa, cilieti la Keriso, la Hupuna i Akötesie.” (Ioane 11:26, 27) Drei la madrine ka tru e troa drenge la kola qaja amamane hnei Maretha la lapaune i nyiidro hnene la itre trenge ithanata celë!
6 Ame la kola trotriji Iesu hnene la itretre drenge ka ala nyim, nyidrëti a ajane troa atre la mekuna i angatr, lapa ju pe hi lo ange aposetolo i nyidrë me nyidrë. Haawe, nyidrëti a hnyinge jë ka hape: “Aja i nyipunieti fe troa hmaca?” Simona Peteru a sa ju me hape: “Joxu, ithuëti nyihunieti koi deti (A tro huni ië)? Thawai cilieti la nöjei wesi ula ne shewengönie ka tha ase palua kö (Thei cilie la itre trenge ewekë ne mel). Nyihunieti a lapaun, me wangate hmekune laka cilieti la Keriso la Hupuna i Akötesie ka shewengönie (ka mel).” (Ioane 6:66-69) Drei jë kö la kola amadrinë Iesu hnene la itre trenge ewekë celë! Ketre tune mina fe, tro la aqane ithanata ne la ketre hnainin a amadrinë epun, ke, eje a amamane la lapaune i angeic.
Hnei Iesu Hna Drenge Cememine La Metrötr
7. Pine nemene matre lapaune jë koi Iesu hnene la angetre Samaria ka ala nyim?
7 Ame la ketre kepine matre hetre thangane la hnei Iesu hna inine la itre atr troa itretre dreng, tre, qa ngöne la hnei nyidrëti hna hnehengazo angatr, me drei angatr cememine la metrötr. Pane mekune maca jë së lo ijine Iesu a cainöje kowe lo föe ne Samaria ezine la tim i Iakobo ngöne la traon ne Sikara. Thaa Iesu hmekuje kö la ka ithanata, nyidrëti fe a drenge la hnei eahlo hna hane qaja. Ame ngöne la nyidrëti a drei eahlo, hnei nyidrëti hna wanga atrehmekune la mekuna i eahlo göi hmi, ene pe qaja jë nyidrë koi eahlo ka hape, Akötresie hi a thele la itre ka tui eahlo, ka thili koi Nyidrë ngöne la ua me nyipici. Hnei Iesu hna metrötrëne la föe me hnehengazo eahlo, ene pe hnei eahlo hna qeje nyidrë kowe la itre xaa atr, nge ”ala nyimu la angete Samaria hna lapaune koi nyidëti ngöne la lapa cili jëne la hnepe ewekë hnei föe hna qaja.”—Ioane 4:5-29, 39-42.
8. Maine hna majemine la itre atr troa qaja la itre mekuna i angatr, tro lai a xatua epuni tune kaa göi troa nyiqaane porotrike ngöne la hna cainöje trootro?
8 Ka madrine pala hi la itre atr troa hane fe amamane la itre mekune i angatr. Drei la ketre ceitun, ame angetre Athenia ekö, tre, hetre madrine i angatr troa qeje mekun, me drenge la itre xaa mekune ka hnyipixe. Hnene la hna majemine cili hna aijijë Paulo troa tro fë la ketre cainöj ka hetre thangane catr ngöne la traone cili. (Ite Huliwa 17:18-34) Ame enehila, ngöne la easa nyiqaane la porotrike memine la ketre atr ngöne la easa cainöj, qaja jë ka hape, “Eni a wai epuni pine laka eni a pi atre la mekuna i epun ngöne la [tane mekun].” Drenge ju la mekuna ne lai atr, nge hamë mekune jë maine amejëne jë la ketre hnyinge ngöne la aqane mekune ne la atr. Thupene lai, cememine la menyik, qaja jë la hna mekune hnei Tusi Hmitrötr göne lai tane mekune cili.
Atre Hnyawa Hi Iesu La Aqane Tro Nyidrëti a Nyiqaane La Porotrik
9. Nemene la hnei Iesu hna kuca qëmekene la kola “shenge koi [Kaleopa me sine tronge i angeic] la ite hna cinyihan?”
9 Hetre nyine tro pala hi Iesu a qaja. Thaa hnene caasi kö laka ka atreine nyidrë troa drenge hnyawa la itre xan, ngo nyidrëti mina fe a thele troa atre la mekuna ne la itre atr, nge atre hnyawa hi nyidrë la hnei nyidrë hna troa qaja. (Mataio 9:4; 12:22-30; Luka 9:46, 47) Hanawange la ketre ceitun: Thaa hmiitre ju kö thupene lo hna amele Iesu hmaca, hna tro hnene la lue atre drei nyidrë qaa Ierusalema a tro Emao. Kola qaja hnene la evangelia i Luka ka hape: “Nyidroti pete kö a ithanatan, me eman, ame hnei Iesu hna easheng, me ce tro me nyidro. Nge hna thinge la lue meke i nyido, mate tha ate hmekunyi nyidëti kö. Nge nyidëti a ulatine koi nyidoti, ka hape, Nemene la ite ewekë cili hnei nyipoti hna ithanatane trongën? Nge nyidoti a cile iëzi. Ame hnei kete e nyido, Kaleopa la ëjen, hna sa koi nyidëti, ka hape, Ma nyipëti hmekuje pe hi la tehnyiwa e Ierusalema, ka tha ’te la ite ewekë hna traqa ngöne la nöjei drai celë? Nge nyidëti a ulatine koi nyidoti, ka hape, Ite ewekë ka u?” Hnene la Atre Ini Ka Tru hna drenge la nyidroti a qeje pengöne laka, hnei Iesu lo atre Nazareta hna inine la itre atr, me kuca la itre iamamanyikeu, nge hna humuthi nyidrë. Ame enehila, kola qaja hnei itre xan ka hape, mejë hmaca qa hna mec. Hnei Iesu hna nue Kaleopa, memine la sine tronge i angeic troa ketre sipu fe la mekuna i nyidro. Thupene jë hi lai, nyidrëti a qeje pengöne la nyine tro nyidroti a atre, me ’shenge koi nyidroti la ite hna cinyihan?’—Luka 24:13-27, 32.
10. Tune kaa la aqane tro epuni a atre la hmi ne la ketre atr me aqane waiewekë i angeic ngöne la epuni a cainöje trootro?
10 Maine jë thatre kö epuni la hmi ne la ketre atr, me aqane waiewekë i angeic. Maine epuni a ajane troa atre, haawe, qaja jë ka hape, epuni a ajane troa drenge la mekuna ne la itre atr ngöne la thith. Thupene lai, epuni a hnyinge ju me hape, “Hapeue la mekuna i epun, hetre atr kö ka hnangenyëne hnyawa la itre thith?” Troa mama hnyawa la aqane waiewekë ne lai atr memine la hmi i angeic hnene la aqane sa i angeic. Maine hetre hni ne ajane i angeic kowe la itre ewekë ngöne la götrane la ua, eje hi lai laka, ma tro hë angeice lai a fe la hni angeic me hnyinge tune la, me hape, “Hapeu, Akötresieti kö a drenge la nöjei thithi asë, maine hetre xaa thithi pena hnei nyidrëti hna thaa kapa?” Thaa tro kö a jole troa porotrike jëne la itre hnyinge celë. Maine ijije hi troa amamane la caa mekune qa hnine la Tusi Hmitrötr, loi e eje thei epuni la ajane troa eatrëne lai cememine la hni ka menyik, ngo thaa tro kö a canga lepetrij la itre ini hnene lai atr hna mejiune kow. Maine madrine hi angeice troa drei epun, thaa tro jë kö angeice a qeje ejolene matre tro epuni a bëeke hmaca. Ngo hapeu e hnyinge jë angeic, nge thatreine kö së troa sa. Ijije hi tro epuni a sine thele la itre xaa mekun, me hnëkë hnyawa matre troa ‘sa koi angatr asë angete hnyingë nyipunie la pengöne la mejiune i nyipunie fë la menyike me qou.’—1 Peteru 3:15.
Hnei Iesu Hna Inine La Itre Atr Ka Ijij
11. Nemene la ka troa xatua epuni troa öhne la itre atr ka ijije matre hamë ini kow?
11 Ka pexeje Iesu, nge hetrenyi thei nyidrë la wangatrehmekun, canga mama hi koi nyidrë la itre atr ka ijije troa inin. Ngo ame koi së jole catre troa öhne la itre atr ka “lapaune . . . lo hna hnëkëne kowe la mele ka tha ase palua kö.” (Ite Huliwa 13:48) Nge ketre hna tune fe ekö kowe lo itre aposetolo lo hnei Iesu hna hape kow: “Ame la nöjei lapa memine la nöjei hnalapa hnei nyipunie hna troa xulu kow, te, hnyingënejë, ka hape Dei la ate loi thina e cili.” (Mataio 10:11) Nyipi ewekë tro fe sa tune la itre aposetolo i Iesu, ene la troa thele la itre atr ka ajane troa dreng, me ini angatre la nyipici qa hnine la Tusi Hmitrötr. Ijije hi tro epuni a öhne la itre atr ka ijij e hnei epuni hna hnangenyëne hnyawa la nöjei atr hnei epuni hna ithanata memin, me wai hatrene hnyawa la isa aqane xemine hnei angatr isa ala caas la nyipici.
12. Tune kaa la aqane tro epuni a catre troa xatuane la ketre atr ka hetre hni ne ajan?
12 Ame la epuni a tro qaathene la ketre atr ka hetre hni ne ajan kowe la maca ne la Baselaia, loi e tro epuni a mekune lapaane la itre aja i angeic ngöne la götrane la ua. Maine thupene la hnei epuni hna porotrike memine la ketre atr göne la maca ka loi, nge epuni a cinyihane la itre ithuemacanyi hnei epuni hna kapa qa ngön, tro ha xatua epuni troa catre xatuane lai atr ngöne la ua. Ame ngöne la itre ijine iwaihmaca, nyipi ewekë troa drenge hnyawa matre troa kapa la itre xaa ithuemacanyi ngöne la itre ini hnei angeice hna mejiune kow, me aqane waiewekë i angeic, maine aqane mele i angeice pena.
13. Nemene la ka troa xatua epuni troa atrehmekune la hna mekune hnene la ketre atr göne la Tusi Hmitrötr?
13 Tro epuni a xatuane tune kaa la itre atr troa qaja la hnei angatre hna mekune ngöne la Wesi Ula i Akötresie? Ame ngöne la itre xaa götran, hetre thangane catre la troa hnyinge ka hape, “Tune kaa la epuni a e la Tusi Hmitrötr, jole kö e troa trotrohnine ej?” Tro la aqane sa lai atr a amamane la aqane goeëne angeic la itre ewekë ngöne la ua. Ame la ketre jën, tre troa e la ketre xötre ne la tus, nge hnyinge ju ka hape, “Hapeue la mekuna i epun, ka meköti kö la?” Tui Iesu, ijije hi tro epuni a catre cainöje hnyawa, e tro epuni a nyipiewekëne la itre hnyinge matre troa ce ithanatan. Ngo thupëne kö së la aqane troa hnying.
Hnei Iesu Hna Iëne Hnyawa La Itre Hnying
14. Maine nyipici laka thaa easë kö a troa hnyinge menu kowe la itre atr atr, ngo nemene kö la aqane troa sa amamane laka, easa wanga atrune la aqane waiewekë i angatr?
14 Loi tro sa wanga atrune la aqane waiewekëne la itre atr, ngo thaa tro kö a ahmahmanyi angatr. Xötrethenge jë la aqane kuca i Iesu. Thaa hnei nyidrëti kö hna hnyinge menu, ngo nyidrëti pe a xome la itre hnyinge ka upe la atr troa thele mekun. Lolo catre fe la aqane drenge Iesu, ke, nyidrëti a thuecatrene la itre atr ka hni ka menyik, nge madrine angatr troa ce me nyidrë (Mataio 11:28). Kola easenyi nyidrë hnene la nöjei pengöne atr, troa ketre sipu qaja koi nyidrë la itre hnei angatre hna hnehengazon (Mareko 1:40 ; 5:36,37 ; 10:13,17,46,47). Maine ajane nyipunie matre thaa tro kö a xou la itre atr troa qaja la itre hnei angatre hna mekune göne la Tusi Hmitrötr memine la itre ini qa hnin, nyipi ewekë tro epuni a hmekën la aqane tro epuni a hnying, wanga tro pena angatr a mekune ka hape epuni a mekuhni angatr.
15, 16. Tro epuni a xatuane tune kaa la itre atr matre troa qeje hmi?
15 Maine epuni a xome hnyawa la itre hnying, eköthe jë la porotrike hnene la hna qaja la ketre ewekë ka lolo, nge thupene lai goeëne ju la aqane sa hnene lai atr. Drei la ketre ceitun, Iesu a qaja koi Nikodemo ka hape: “Maine tha hna hnahone hmaca kö la ate, tha ’teine kö angeice troa goeëne la baselaia i Akötesie.” (Ioane 3:3) Hna ahlëne la aja i Nikodemo hnene la trenge ithanata celë, ene pe angeic a thele troa pi atre, me drei Iesu. Ketre tune mina fe, ijije hi tro epuni a xatuane la itre atr troa hane lö hnine la porotrik.
16 Ame enehila, kola fetra la itre hmi ka hnyipixe ka nyimutre, nge kola hnehengazone lai ngöne la itre nöje gaa nanyi tune Afrique, me götrane ahië ne Europe, me Amerique Latine. Ame ngöne la itre nöje cili, loi e troa nyiqaane porotrike tune la: “Eni a haine la etrune la itre hmi enehila. Ngo, eni a mejiune laka, easenyi hë troa caasi ngöne la nyipi hmi hnene la itre atr ne la nöjei nöje asë. Hapeue la mekuna i nyipunie, ka loi e troa traqa kowe lai?” Maine tro epuni a qaja la ketre götranene la mejiune i epun hnei angatr hna troa hain, maine jë tro ha upi angatre troa hane fe la mekuna i angatr. Nge ka hmaloi lo itre hnying, laka lue mekune hi hna hamën matre troa sa. (Mataio 17:25) Thupene la hna hamë mekune hnene la atr ngöne lo lai hnyinge i epun, hamëne jë pena ha epuni la mekune ka sa lai hnyinge jëne la caas maine lue xötr. (Isaia 11:0; Zefania 3:9) Maine hnei epuni hna drenge hnyawa lai atr, me goeëne la aqane sa la mekune hnei angeic, ijije hi tro epuni a atrehmekune la nyine troa ithanatan, e traqa hmaca pi epuni troa iwaihmaca.
Hnei Iesu Hna Drenge La Itre Nekönatr
17. Nemene la ka amamane laka, hnei Iesu hna hane thele la mekuna ne la itre nekönatr?
17 Nyipici, hnei Iesu hna thele troa atre la mekuna ne la itre ka tru, ngo hnei nyidrëti fe hna hane pi atre la mekuna ne la itre nekönatr. Atre hnyawa hi nyidrë la itre elo ne la itre nekönatr, memine la itre ewekë hnei angatre hna porotrikën. Ame itre xaa ijin, nyidrëti a könëne la itre nekönatre troa ceme nyidrë. (Luka 7:31,32; 18:15-17) Nyimutre la itre nekönatre thene la itre atr ka ala nyimu ka drei Iesu. Ame la kola sue me atrune la Mesia hnene la itre nekönatre trahmany, kola wanga atrehmekune hnei Iesu me qaja ka hape, ase hë ahnithe lai hnine la Itre Hna Cihnyihan. Ame enehila, nyimutre la itre nekönatre a itretre drei Iesu hë nyudren. Haawe, tro sa xatua nyudreni tune kaa?
18, 19. Tro epuni a xatuane tune kaa la itre nekö i epuni troa kökötre ngöne la götrane la ua?
18 Maine epuni a ajane tro la itre nekönatre a itretre drenge elany, nyipi ewekë tro epuni a drei angatr. Nyipi ewekë tro epuni a trotrohnine la itre mekune ka eje thei angatr, maine jë thaa ihmeku kö itre ej memine la aqane waiewekë i Iehova. Haawe, aqane ujë ka inamacane la troa pane qaja aloinyi nyën. Thupene lai, xome jë la itre xaa xötr ka lolo, nge thele jë tro angeic a trotrohnine la aqane waiewekë i Iehova ngöne la tane mekun hnei epuni hna ajane troa ithanatan.
19 Nyipi ewekë catre troa xome la itre hnying. Pëkö ka ajane easë, itre ka tru ju hë maine itre ka co, troa hnyinge menu pala ha koi së Thaa tro kö a upe ielene la neköi epuni troa sa la itre hnyinge ka nyimutre, ngo ma tro pe a pane qaja la ketre hnepe mekune göi epuni kö? Maine jë tro epuni a qaja ka hape, ame ekö la epuni a tui angeic, hnei epuni hna majemine xome la aqane waiewekë celë nge qeje pengöne jë la kepin. Thupene lai, hnyinge jë ka hape, “Epuni fe kö a hane mekune tune lai?” Maine jë tro hë epuni a porotrikëne me angeic la ketre mekune ka lolo nge ka ithuecatr qa hnine la Tusi Hmitrötr.
Catre Jë Troa Nyitipune La Atre Inine La Itre Atr Matre Tro Angatre a Itretre Dreng
20, 21. Pine nemene matre loi e tro epuni a hnangenyëne hnyawane la itre atr ngöne la kola hamë ini koi angatre matre tro angatre a itretre dreng?
20 Maine epuni a thele troa xatuane la ketre nekönatr, maine ketre atr pena troa ketre atre drei Iesu Keriso, nyipi ewekë catre troa hnangenyëne hnyawa. Eje hi, ketre hatrene hi la ihnimi epun. Maine tro epuni a hnangenyëne hnyawa la nekönatre maine ketre atr, epuni hi lai a amamane la hni ka ipië thei epun, nge kola metrötrëne lai ka ithanata, me wanga atrunyi angeic. Nge thaa tro pi kö sa thëthëhmine laka ame la easa dreng, tre, easë fe a wanga atrune la aqane enij me goeëne hnyawa la lue meke ne la ka ithanata koi së.
21 Ame la epuni a cainöje trootro, loi e troa catre drenge la hna qaja hnene la atr. Maine epuni a hnangenyëne hnyawa la itre hnei angeic hna qaja, tro hë epuni a atrehmekune la itre mekune qa hnine la Tusi Hmitrötr ka troa ketri angeic. Thupene lai, loi e troa catre xatua angeic hnene la troa xome la itre aqane hamë ini ka nyimutre ka eje thei Iesu. Maine tro epuni a kuca tune lai, tro hë epuni a öhnyi thangan me madrine qa ngön, pine laka epuni a nyitipune la Atre inine la itre atr matre tro angatr a itretre dreng.
Tro Epuni a Sa Tune Kaa?
• Hnei Iesu hna xatuane tune kaa la itre xan troa fe amamane la mekune i angatr?
• Pine nemene matre hnei Iesu hna drenge la itre hnei nyidrë hna inin?
• Tune kaa la aqane tro sa xome la itre hnyinge ngöne la huliwa ne cainöje së?
• Nemene la nyine tro epuni a kuca matre troa xatuane la itre nekö i epuni troa kökötre ngöne la götrane la ua?
[Thying]