PARATING nagtutukdo si Jesus manungod sa pamibi. Kan panahon niya, an mga Judiong lider nin relihiyon namimibi “sa mga kanto kan mayor na mga tinampo.” Taano? “Tanganing mahiling kan mga tawo.” Malinaw na gusto nindang hangaan sinda sa pagigin relihiyoso ninda. Dakul an nagtataram nin haralaba asin pauruutrong mga pamibi, na garo baga kaipuhan an paggamit nin kadakul na tataramon para dangugon an pamibi. (Mateo 6:5-8) Ibinuyagyag ni Jesus na an siring na mga gibo daing saysay. Dahil diyan, natabangan an sinserong mga indibidwal na maaraman kun ano an mga dapat nindang likayan pag namimibi. Pero, an itinukdo niya bako lang kun ano an dapat likayan pag namimibi.

Itinukdo ni Jesus na dapat na mahiling sa satong mga pamibi an pagmawot tang mapakangbanal an pangaran nin Diyos, dumatong an Saiyang Kahadian, asin na mautob an Saiyang kabutan. Itinukdo man ni Jesus na angay sana na hagadon sa Diyos na tabangan kita sa mga bagay na may koneksiyon sa satong personal na buhay. (Mateo 6:9-13; Lucas 11:2-4) Paagi sa mga ilustrasyon, ipinahiling ni Jesus na kaipuhan tang magin pursigido saka magpahiling nin pagtubod asin kapakumbabaan tanganing dangugon an satong mga pamibi. (Lucas 11:5-13; 18:1-14) Asin para lalong magin epektibo an pagtutukdo niya, ipinahiling niya mismo iyan paagi sa halimbawa.—Mateo 14:23; Marcos 1:35.

An pagtutukdong ini siguradong nakatabang sa mga disipulo ni Jesus na magin mas makahulugan an mga pamibi ninda. Pero, an pinakamahalagang leksiyon manungod sa pamibi itinao ni Jesus sa mga disipulo niya kaidtong huring banggi niya digdi sa daga.

Ginamit ni Jesus an haros bilog na huring banggi niya para pakusugon an saiyang maimbod na mga apostol. Angay na panahon idto para ihayag niya an sarong bagay na kaidto pa lang ninda maaaraman. “Ako an dalan asin an katotoohan asin an buhay,” an sabi ni Jesus. “Mayo nin makakadulok sa Ama kun bakong paagi sa sako.” Pagkatapos, itinao niya sainda an nakakapakusog na panuga: “Ano man na hagadon nindo sa ngaran ko, gigibuhon ko iyan, tanganing an Ama mapamuraway paagi sa Aki. Kun may hagadon kamong ano man sa ngaran ko, gigibuhon ko iyan.” Sa pagtatapos kan pakikipag-ulay niya, sinabi niya: “Sagkod ngunyan, dai pa kamo naghahagad nin maski sarong bagay sa ngaran ko. Maghagad kamo asin mag-aako kamo, tanganing magin lubos an saindong kaugmahan.”—Juan 14:6, 13, 14; 16:24.

Mahalagang marhay an mga tataramon na iyan. Sinabi nin sarong libro na saro iyan na “dakulang pagbabago sa kasaysayan nin pamibi.” Dai man buot sabihon ni Jesus na saiya na dapat mamibi imbes na sa Diyos. Imbes, binubuksan niya an sarong bagong paagi nin pagdulok sa Diyos na Jehova.

Totoo, pirming dinadangog nin Diyos an mga pamibi kan saiyang maimbod na mga lingkod. (1 Samuel 1:9-19; Salmo 65:2) Pero, puon kan an Israel magin an banwaan na katipan nin Diyos, kaipuhan na midbidon kan mga nagmamawot na dangugon an saindang pamibi na an Israel an piniling nasyon nin Diyos. Asin kan huri, puon kan panahon ni Solomon, kaipuhan nindang midbidon na an templo an pinili nin Diyos na lugar para sa pag-atang. (Deuteronomio 9:29; 2 Cronica 6:32, 33) Pero, temporaryo sana an paaging ini nin pagsamba. Arog kan isinurat ni apostol Pablo, an Katugunan na itinao sa Israel asin an mga atang na idinudulot sa templo “anino kan marahay na mga bagay na maabot, pero bako an mismong katunayan kan mga bagay na iyan.” (Hebreo 10:1, 2) An anino kaipuhan na ribayan kan tunay. (Colosas 2:17) Puon kan 33 C.E., an relasyon nin sarong indibidwal ki Jehova dai na nakadepende sa pagsunod sa Katugunan ni Moises. Imbes, nakabasar iyan sa pagsunod sa saro na itinutukdo kan Katugunan—si Cristo Jesus.—Juan 15:14-16; Galacia 3:24, 25.

Nag-establisar si Jesus nin sarong nangungurog na basehan sa pagdulok ki Jehova, na ipinapamidbid an sadiri niya bilang sarong makapangyarihan na amigo, an saro na nagbubukas kan dalan para dangugon asin simbagon nin Diyos an satong mga pamibi. Paano nagin posible na magibo iyan ni Jesus alang-alang sa sato?

Dahil gabos kita ipinangaki na may kasalan, mayo kitang ano man na magigibo o maidudulot na atang na makakalinig sato kan digtang ini o na magpapagin posible na magkaigwa kita kan deretso na magin dayupot sa satong banal na Diyos, si Jehova. (Roma 3:20, 24; Hebreo 1:3, 4) Alagad, iinatang ni Jesus an saiyang perpektong buhay bilang tawo asin binayadan an mga kasalan kan katawuhan na puwedeng tubuson. (Roma 5:12, 18, 19) Ngunyan an gabos na gustong gibuhon iyan igwa kan oportunidad na magkaigwa nin malinig na kamugtakan sa atubangan ni Jehova asin na magin “libreng magtaram” pag nagdudulok sa Diyos—pero magigin posible sana iyan kun matubod sinda sa atang ni Jesus asin mamimibi paagi sa saiyang pangaran.—Efeso 3:11, 12.

Pag namimibi kita paagi sa pangaran ni Jesus, ipinapahiling niyato na nagtutubod kita sa kisiyera tulong aspekto kan papel niya sa pagsagibo kan katuyuhan nin Diyos: (1) Siya “an Kordero nin Diyos”; an saiyang atang nagtatao nin basehan para sa kapatawadan nin kasalan. (2) Binuhay siya liwat ni Jehova asin naglilingkod na ngunyan bilang “halangkaw na saserdote” na nagtatao kan mga pakinabang kan pantubos. (3) Siya sana “an dalan” para makadulok ki Jehova sa pamibi.—Juan 1:29; 14:6; Hebreo 4:14, 15.

An pagpamibi paagi sa pangaran ni Jesus nagtataong onra ki Jesus. An onrang iyan angay sana, dahil an kabutan ni Jehova iyo na “magluhod sa pangaran ni Jesus an gabos na tuhod . . . asin an gabos na dila hayag na magmidbid na si Jesu-Cristo Kagurangnan para sa kamurawayan nin Diyos na Ama.” (Filipos 2:10, 11) Alagad an mas mahalaga, an pagpamibi paagi sa pangaran ni Jesus nagpapamuraway ki Jehova, an saro na nagtao kan Saiyang aki alang-alang sa sato.—Juan 3:16.

Tanganing masabutan ta an kadakulaan kan papel ni Jesus, naggamit an Bibliya nin manlain-lain na titulo asin pangaran para iladawan siya. Nakakatabang an mga ini para masabutan niyato an dakul na pakinabang na nakakamtan ta basado sa ginibo, ginigibo, saka gigibuhon pa ni Jesus alang-alang sa sato. (Hilingon an kahon na “ An Mahalagang Marhay na Papel ni Jesus”.) Iyo, itinao ki Jesus “an pangaran na mas urog kisa sa gabos na iba pang pangaran.” * An gabos na awtoridad sa langit asin sa daga itinao sa saiya.—Filipos 2:9; Mateo 28:18.

Iyo, dapat kitang mamibi paagi sa pangaran ni Jesus para dangugon ni Jehova an satong mga pamibi. (Juan 14:13, 14) Pero dai ta nanggad gugustuhon na uruutruhon an mga tataramon na “paagi sa pangaran ni Jesus” dahil sana ta iyan an kinatudan ta. Taano?

Pag-isipan an sarong ilustrasyon. Pag makaresibi ka nin surat hali sa sarong negosyante, posibleng magtapos an surat paagi sa kinatudan nang mga tataramon na “lubos na minagalang.” Sa hiling mo, iyan daw an tunay na namamatian kan negosyante, o isinurat niya lang iyan dahil sinusunod niya an format sa paggibo nin surat? An totoo, an paggamit kan pangaran ni Jesus sa satong mga pamibi bako lang arog kan paggamit nin pantapos na mga tataramon sa sarong business letter. Urog pa diyan an kahulugan kaiyan! Iyo, dapat na ‘pirmi kitang mamibi,’ pero dapat tang gibuhon iyan nin “bilog na puso,” bako bilang basta rutina sana.—1 Tesalonica 5:17; Salmo 119:145.

Paano mo malilikayan na gamiton an mga tataramon na “paagi sa pangaran ni Jesus” na garo baga rutina lang iyan? Hurop-hurupon an marahayon na mga kuwalidad ni Jesus. Pag-isipan an mga ginibo niya saka an mga andam niyang gibuhon para saimo. Sa saimong pamibi, pasalamatan si Jehova asin umawon siya dahil sa pambihirang paagi na ginamit niya an saiyang Aki. Mantang ginigibo mo iyan, magigin mas makusog an pagtitiwala mo sa panuga ni Jesus: “Kun maghagad kamo nin ano man sa Ama, itatao niya iyan sa saindo sa ngaran ko.”—Juan 16:23.