SI Jesus manada beses ya enseña acerca na rezo. Na de suyu tiempo, el maga Judio religioso lider ta reza “na maga canto del camino.” Porque? “Para puede canila mira el maga gente.” Claro lang que quierre sila que man bilib kanila el maga gente. El manada ta reza largo y bira-bira que dol necesita hace “maga largo rezo” para oi kanila. (Mateo 6:5-8) Ya revela si Jesus que no vale nada ese maga practica y ya ayuda le con el maga sincero gente para sabe si cosa sila evita si ta reza. Pero, nuay lang le enseña kanila si cosa no hace si ta reza.

Ya enseña kanaton si Jesus que reza que hay santifica con el nombre del Dios, hay llega el De Suyu Reino y hay hace con el De Suyu voluntad. Ya enseña tambien si Jesus que puede kita pidi con Dios que ayuda kanaton na diaton maga personal cosas. (Mateo 6:9-13; Lucas 11:2-4) Usando el maga ilustracion, ya dale mira si Jesus que necesita kita continua reza y tene fe y humildad para oi con el diaton maga rezo. (Lucas 11:5-13; 18:1-14) Y ya enseña tambien le por medio na de suyu mismo ejemplo.—Mateo 14:23; Marcos 1:35.

Asigurao que ya ayuda este con el maga dicipulo de Jesus para queda mas aceptable el diila maga rezo. Pero na ultimo noche de Jesus aqui na tierra, ya enseña le con el de suyu maga dicipulo el de con todo importante leccion acerca na rezo.

Na ultimo noche de Jesus, ya usa le con el mayoria del de suyu tiempo para anima con el de suyu maga fiel apostoles. Un justo tiempo quel para revela un nuevo cosa acerca na rezo. “Yo amo el Camino, el Verdad y el Vida,” ya habla si Jesus. “Noay quien ay puede anda con el Tata si gendeh por medio dimio.” Despues, ya dale le kanila este bonito promesa: “Maskin cosa ustedes ay pidi na mi Nombre ay hace yo, para el Tata ay recibi el gloria por medio del Anak. Si ay pidi ustedes conmigo maskin cosa na dimio Nombre ay hace yo se.” Na uliji, ya habla le: “Hasta ahora noay pa ustedes pidi maskin cosa con Ele na mi Nombre. Pidi y ay recibi ustedes, y ansina el de ustedes alegria ay queda completo.”—Juan 14:6, 13, 14; 16:24.

Bien importante quel maga palabra. El un referencia ya habla que este amo “un importante cambio si paquemodo kita ta reza.” Gendeh intencion de Jesus que con ele reza en vez con Dios. Sino, ya enseña le kanila un nuevo manera para atraca con Dios Jehova.

Sabe kita que pirmi ta oi el Dios con el maga rezo del de suyu maga fiel siervo. (1 Samuel 1:9-19; Salmo 65:2) Pero desde el tiempo que el maga Israelita ya queda el especial siervo del Dios, aquellos quien quierre que oi con el diila maga rezo debe acepta que el Israel amo el iscujido nacion del Dios. Y desde na tiempo de Solomon, debe sila mira con el templo como el iscujido lugar del Dios donde hace maga sacrificio. (Deuteronomio 9:29; 2 Cronicas 6:32, 33) Pero, temporario lang este manera de adoranza. Como cosa ya escribi si apostol Pablo, el Ley que ya dale na Israel y el maga sacrificio que ya ofrece na templo amo “el sombra del maga cosa-cosa bueno que ta vene y gendeh el deverasan maga forma de ese maga realidad.” (Maga Hebreo 10:1, 2) El realidad hay cambia con el sombra. (Colosa 2:17) Desde 33 C.E., el relacion del un persona con Jehova gendeh mas ta depende si ta sigui ele na Ley de Moises. Sino, base este na de suyu obediencia con Cristo Jesus.—Juan 15:14-16; Galacia 3:24, 25.

Ya introduci si Jesus un mas buen manera para atraca con Jehova. Ya manda le conoce con el de suyu mismo cuerpo como un poderoso amigo quien ya abri el camino para oi y contesta el Dios con el diaton maga rezo. Paquemodo se puede hace si Jesus para kanaton?

Ciendo todo kita ya nace que tiene pecado, nuay maskin cosa trabajo o sacrificio que dale kita el puede quita con ese mancha o hace posible que tene un relacion con el diaton sagrao Dios, si Jehova. (Roma 3:20, 24; Maga Hebreo 1:3, 4) Pero, ya dale si Jesus con el de suyu perfecto vida como gente y ya paga para na pecado del maga gente con quien puede rescata. (Roma 5:12, 18, 19) Ahora, el todo quien quierre con ese tiene el oportunidad que tene un personal relacion con Jehova y “atraca con Dios con confianza.” Pero, hay queda lang se posible si demonstra sila fe na sacrificio de Jesus y reza na de suyu nombre.—Efeso 3:11, 12.

Si ta reza kita na nombre de Jesus, ta demonstra kita fe na tres del de suyu papel na proposito del Dios: (1) Ele “el Cordero del Dios,” de quien sacrificio ya hace posible para perdona con el diaton maga pecado. (2) Ya resucita con ele si Jehova y ahora ta actua como “Sumo Padre” o alto sacerdote y ta asigura que todo hay beneficia na rescate. (3) Ele solamente “el Camino” para puede atraca con Jehova na rezo.—Juan 1:29; 14:6; Maga Hebreo 4:14, 15.

Si ta reza kita na nombre de Jesus, ta honra kita con ele. Justo lang se honor ciendo voluntad de Jehova que “todo . . . ay hinca na Nombre de Jesus; y para todo el maga gente ay proclama que si Jesucristo amo el Señor para el gloria del Dios Tata.” (Filipo 2:10, 11) Pero el mas importante, si ta reza kita na nombre de Jesus, ta dale kita gloria con Jehova, el quien ya dale con el de suyu Anak para na diaton bien.—Juan 3:16.

Para puede kita entende si paquemodo de importante el papel de Jesus, el Biblia ya usa diferente titulo y nombre para refiri con ele. Hay ayuda este kanaton para entende con el maga buen cosas que ya hace si Jesus de antes, ahora y na futuro para kanaton. (Mira con el cajon “ El Importante Papel de Jesus.” ) Deverasan gayot que ya dale con Jesus “el Nombre que amo el mas importante de con todo el maga Nombre.” * Ya dale con ele el todo autoridad na cielo y na tierra.—Filipo 2:9; Mateo 28:18.

Debe kita reza na nombre de Jesus si quierre kita que oi kanaton si Jehova. (Juan 14:13, 14) Pero, gendeh kita debe repiti con el frase “na nombre de Jesus” por causa lang cay yan anad kita habla con ese. Porque?

Considera un ilustracion. Si ya ricibi tu un carta estaba na un negociante, posible na fin de este puede tu le con el maga palabra “con sinceridad.” Para contigo, ese ba gayot el cosa ta sinti el negociante o ta sigui lang le con el manera si paquemodo ta escribi carta? Na igual manera, si ta usa kita con el nombre de Jesus na diaton maga rezo, gendeh lang se debe igual na un negociante quien ya escribi carta. Maskin pa ‘ta reza kita pirmi,’ debe kita hace con ese “con todo corazon” y gendeh basta cay rutina lang.—1 Tesalonica 5:17; Salmo 119:145.

Paquemodo tu puede evita usa con el frase “na nombre de Jesus” como rutina lang? Porque gendeh medita con el maga bonito calidad de Jesus? Pensa con el maga cosas que ya hace ya le y preparao hace para contigo. Na rezo, rindi gracias con Jehova y alaba con ele na bonito manera que ya usa le con el de suyu Anak. Si hace tu se, hay tene tu mas confianza na promesa de Jesus: “Maskin cosa ay pidi ustedes con el Tata na dimio Nombre ay dale Le con ustedes.”—Juan 16:23.