¿Tleka melak noneki matiknotsakan toTajtsin itechkopa itoka Jesús?
IJKUAK Jesús temachtiaya miyekpa tlajtouaya itech teoyotl. Ipan itonaluan, on teopixkej judíos kuelitayaj notelketsaskej para kichiuaskej oración “ne ijtik on sinagogas niman ipan esquinas, san para on tlakamej ma kintakan tlen kichiuaj”. Kuajli nesi ika yejuamej san kinekiyaj ika oksekimej makitakan ika yejuamej melak tlaneltokayaj. Miyekej de yejuamej melak uejkauiyaj ijkuak kichiuayaj oración niman san no yejua ompa kijtojtoyaj, kentla tla nonekiskia miyek makijtokan para toTajtsin kinkakis (Mateo 6:5-8). Jesús kuajli okiteititi ika tlen kichiuayaj on teopixkej xtlaj ika tepaleuiaya, niman ijkon okinpaleui akin melauak tlaneltokayaj makitakan tlenon xnonekiya kichiuaskej ijkuak kinotsaskiaj toTajtsin. Jesús xsan otechmachti kenon xnonekiya nochiuas se oración.
Jesús noijki otechmachti ika noneki tiktlajtlaniliskej toTajtsin manoyekteneua itoka, mauajla iTekiuajyo niman manochiua tlen yejua kineki. Noijki otechmachti ika uelis tiktlajtlaniliskej toTajtsin nochi tlen techpoloua (Mateo 6:9-13; Lucas 11:2-4). Niman noijki okintekitilti seki neskayomej niman ijkon techititis ika tla tiknekij ika Jehová makinkaki toteoyouan, noneki titlaneltokaskej, tiyolyemankej yeskej niman xnimantsin tosiaujkauaskej (Lucas 11:5-13; 18:1-14). Yejua xsan temachtiaya, yejua noijki kichiuaya tlen temachtiaya (Mateo 14:23; Marcos 1:35).
Kuajli tikmatstokej ika yejuin tlen okiteneuj Jesús melak okinpaleui inomachtijkauan más kuajli makinchiuakan inoraciones. San ika, Jesús xnimantsin nochi okimijli itech teoyotl. Yejua okichiak hasta ijkuak sa achijtsin poliuiya para kimiktiskej niman ijkon kimijlis on tlen más ueyi kijtosnekiya itech teoyotl.
Onomat itlaj tlen xnomatiya itech oración
Jesús nochi yeuajli kinyolchikaujtoya iapóstoles. Ijkuakon okimijli itlaj tlen yejuamej xkimatiyaj. Yejua ijkin okimijli: “Nejua niojtli, nitlin melauak, niman ninemilistli. Tej, san nejua notechkopa uelis ajsiskej itech noTajtsin”. Niman noijki okimijli: “Niman nochi tlen nemejuamej nentlajtlaniskej ikan notoka, nejua nikchiuas para noTajtsin kiselis ueyilistli notechkopa yejuan niiKoneu. San tlinon yejuan nemejuamej nentlajtlaniskej ikan notoka, nikchiuas”. Niman sa ika tlami okimijli: “Hasta aman nemejuamej xe itlaj nenkitlajtlanij ikan notokatsin. Xtlajtlanikan tlen nenkinekiskej niman nenkiseliskej para ajsitias nemopakilis” (Juan 14:6, 13, 14; 16:24).
Yejuin melak ueyi okijtosnek. Se diccionario bíblico kijtoua ika yejuin okichiuj manomati itlaj tlen xnomatiya itech oración. San ika, Jesús xkijtosnekiya ika aman nonekiya yejua kichiuiliskej oración niman xtoTajtsin. Yejua yej kimijlitoya inomachtijkauan tlenon más ueliskia kichiuaskej para más nonisiuiskej itech toTajtsin.
ToTajtsin nochipa kinkaki akin itech melajkanemij (1 Samuel 1:9-19; Salmo 65:2). San ika, desde ijkuak toTajtsin okichiuj se pacto iuan israelitas, nochimej akin kinekiyaj makinkaki, nonekiya kasikamatiskej ika yejua yokintlapejpenijka israelitas ken ikalpan. Niman akin nemiyaj ipan itonaluan Salomón nonekiya kasikamatiskej ika toTajtsin yokitlapejpenijka on teopan tlen onkatka para ompa makiuentlalilikan (Deuteronomio 9:29; 2 Crónicas 6:32, 33). San ika, xnochipa ijkon noueyichiuaskia toTajtsin. Ijkon ken okijkuilo apóstol Pablo, on tlanauatijli tlen okinmakakaj israelitas niman on uentli tlen kitemakayaj ipan teopan, “san kixneskayotia on tlen kuajli tlajtlamach onyas, pero xejua on yejuan melauak yes” (Hebreos 10:1, 2). San ika, sakin onopatlak ken noueyichiua toTajtsin (Colosenses 2:17). Yeuejkaui, tla yakaj kinekiya kuajli nouikas iuan toTajtsin, melak nonekiyaj kintlakamatis tlanauatiltin tlen okinmakakaj Moisés, san ika, ipan xiuitl 33 yejon onopatlak. Niman desde ijkuakon, más noneki matiktlakamatikan Jesucristo (Juan 15:14-16; Gálatas 3:24, 25).
Se tokayotl tlen melak ueyi kijtosneki
Jesús okichiuj itlaj niman ijkon ueliskia touikaskej iuan Jehová. Uelis tikijtoskej ika yejua yeskia ken se amigo akin kitlaposkia ojtli niman ijkon toTajtsin makinkaki niman makinnankili toteoyouan. ¿Tleka Jesús uelis kichiuas yejon topampa?
Xonka itlaj tlen uelis tikchiuaskej noso uentli tlen uelis tiktemakaskej para mapopoliui on tlajtlakojli tlen tikuajkui desde ijkuak tiuajnemij niman matechpaleui kuajli matouikakan iuan Jehová akin melak chipauak (Romanos 3:20, 24; Hebreos 1:3, 4). San ika, Jesús okitemakak inemilis topampa niman ijkon tejuamej ueliskia touikaskej iuan Jehová maski titlajtlakolejkej (Romanos 5:12, 18, 19). Aman tinochimej uelis touikaskej iuan Jehová niman tikijliskej nochi tlen tikmachiliaj, san ika, melak noneki tikneltokaskej ika Jesús okitemakak inemilis topampa niman tikchiuaskej oración itechkopa itoka (Efesios 3:11, 12).
Ijkuak tikchiuaj teoyotl ika itoka Jesús, tikteititiaj ika melauak titlaneltokaj itech yeyi tlemach tlen kichiua Jesús niman ijkon tlapaleuis manochiua tlen kineki toTajtsin: 1) Ika kuajli tikneltokaj ika Jesús yejua on borreguito akin onouentlali para ijkon matechintlapopoluilikan totlajtlakoluan. 2) Ika kuajli tikneltokaj ika Jehová yejua akin okiyoliti niman ika aman nemi ken se ueyi teopixki akin tekititika para ijkon tejuamej uelis tikseliskej on tlen Jehová yotechijli techmakas. 3) San itechkopa Jesús uelis tiknisiuiskej Jehová ipan teoyotl (Juan 1:29; 14:6; Hebreos 4:14, 15).
Ijkuak tikchiuaj oración ika itoka Jesús tikititiaj ika tiktlakaitaj. Niman yejon melak kuajli pampa Jehová ijkon kineki. Yejua kineki “ma notlakuantelketsakan ixpan [Jesús]. Ijkon [...] nochimej ma kixmatikan niman ma kijtokan ika yejua toTEKO, niman ijkon Dios toTajtsin kiselis ueyilistli” (Filipenses 2:10, 11). Niman tlen más ueyi kijtosneki, ijkuak ijkon tikchiuaj tikueyichiuaj Jehová akin okitemakak iKoneuj topampa (Juan 3:16).
Noneki tikchiuaskej oración ika nochi toyojlo niman xsan tikijtoskej tlen nochipa tikijtouaj
Para uelis tikasikamatiskej tekitl tlen kipiya Jesús, Biblia tlatlamantik ken kitokayotia. Nochi yejuin tokayomej techpaleuiyaj matikitakan tlen tlateochiualistin tikseliskej ipampa tlen Jesús yokichiuj, tlen kichiujtika niman tlen kichiuas topampa (xkita recuadro “ Ueyi tekitl tlen kipiya Jesús”). Kema, Jesús itokatsin “yejua más ueyi kijtosneki xken yakaj okse kipiya itoka”. a Yejuin kijtosneki ika yokimakakej ueyilistli ne iluikak niman ipan tlaltikpaktli (Filipenses 2:9; Mateo 28:18).
Xsan pampa ijkon yotomatkej
Ken yotikitakej, tla tiknekij ika Jehová matechkaki, noneki tiknotsaskej itechkopa itoka Jesús (Juan 14:13, 14). San ika, xtikuelitaskiaj tikijtoskej “itechkopa Jesús” san pampa ijkon yotomatkej. ¿Tleka?
San xkonnemili yejuin, ijkuak tejua tikselia se carta itech yakaj akin tlanemaka, nochipa ijkuak ontlami yejon carta kijtoua “nikchia ika kuajli xnemi”. ¿Tikijtoskia ika yejon tlajtoltin kisa ipan iyojlo akin tlanemaka, noso san pampa nochipa ijkon kitlaliani? Tejuamej xnoneki tikuiskej itoka Jesús san pampa ijkon yotomatkej, ijkon ken tlen noijkuiloua ipan se carta. Maski noneki nochipa matikchiuakan oración, noneki tikchiuaskej ika nochi toyojlo niman xsan tikijtoskej tlen nochipa tikijtouaj (1 Tesalonicenses 5:17; Salmo 119:145).
¿Tlenon uelis tikchiuaskej niman ijkon makisa itech toyojlo tlajtoltin “itechkopa Jesús”? ¿Tleka xtitlanemiliaj itech nochi tlen okichiuj Jesús? Matitlanemilikan itech tlen Jesús yokichiuj niman tlen kinektika kichiuas topampa. Ijkuak tikchiuaskej oración matiktlasojkamachilikan Jehová niman matikueyichiuakan ipampa tlen yokichiuj itechkopa iKoneuj. Tla ijkon tikchiuaj, más tikneltokaskej tlen Jesús okijto: “NoTajtsin mechmakas nochi tlen nenkitlajtlaniliskej ikan notokatsin” (Juan 16:23).
a Diccionario expositivo de palabras del Antiguo y del Nuevo Testamento exhaustivo de W. E. Vine, kijtoua ika tlajtojli griego tlen notlajtolkuepa “tokayotl“ uelis kijtosnekis nochi tlen kipiya yakaj akin kipiya itoka, ken ueyilistli, kenon yejua, kojtilistli niman okseki tlemach.