JESUS koʼalia beibeik kona-ba orasaun. Iha tempu neʼebá, ulun-naʼin relijiaun Judeu halo orasaun “iha dalan boot nia sikun”. Tanbasá? “Atu nuneʼe ema bele haree sira.” Klaru katak sira hakarak ema atu admira sira tanba dalan neʼebé sira adora Maromak. Sira barak hatoʼo orasaun neʼebé naruk no repete beibeik liafuan neʼebé hanesan, tanba sira hanoin katak sira presiza “uza liafuan barabarak” atu Maromak rona sira-nia orasaun. (Mateus 6:​5-8) Jesus fó sai katak sira-nia toman mak folin-laek, neʼe ajuda ema laran-loos atu hatene katak sira la presiza halo orasaun hanesan neʼe. Maibé Jesus laʼós deʼit hanorin buat neʼebé ita labele halo kuandu halo orasaun.

Jesus hanorin katak bainhira ita halo orasaun, ita presiza fó sai katak ita hakarak Maromak nia naran sai santu, Ninia Ukun toʼo mai rai no Ninia hakarak sai loos. Jesus mós hanorin katak ita bele husu Maromak atu ajuda ita bainhira hasoru problema. (Mateus 6:​9-13; Lucas 11:​2-4) Liuhusi ai-knanoik ida, Jesus hatudu katak se ita hakarak Maromak atu rona ita-nia orasaun, ita presiza halo orasaun beibeik, iha fiar no hatudu haraik an. (Lucas 11:​5-​13; 18:​1-​14) No nia hatudu ida-neʼe liuhusi ninia ezemplu rasik bainhira nia halo orasaun.​—Mateus 14:23; Marcos 1:​35.

Ita bele fiar katak matadalan sira-neʼe ajuda Jesus nia dixípulu atu halo orasaun. Maski nuneʼe, Jesus hein toʼo ninia kalan ikus iha rai atu hanorin ninia dixípulu sira lisaun importante kona-ba orasaun.

Iha Jesus nia kalan ikus iha rai, nia uza tempu barak atu anima ninia apóstolu sira neʼebé laran-metin ba nia. No neʼe mak tempu diʼak atu fó sai buat ruma neʼebé foun ba sira. Jesus hatete: “Haʼu mak dalan no lia-loos no moris. Ema ida labele hakbesik ba Aman se la liu husi haʼu.” Tuirmai nia mós promete ba sira: “Buat naran deʼit neʼebé imi husu hodi haʼu-nia naran, haʼu sei kumpre, atu nuneʼe Aman bele hetan glória liuhusi Oan-Mane. Se imi husu buat naran deʼit hodi haʼu-nia naran, haʼu sei kumpre.” No bainhira nia besik atu koʼalia hotu ho sira, nia hatete: “Toʼo agora imi seidauk husu buat ida hodi haʼu-nia naran. Husu bá no imi sei simu, atu nuneʼe imi-nia ksolok bele sai kompletu.”​—João 14:​6, 13, 14; 16:24.

Liafuan sira-neʼe mak importante tebes. Livru ida kona-ba Bíblia hatete katak neʼe mak “mudansa boot tebes kona-ba dalan atu halo orasaun”. Kuandu Jesus koʼalia sai liafuan sira-neʼe, neʼe la dehan katak nia hakarak ema atu halo orasaun ba nia duké Maromak. Maibé tuir loloos, nia loke dalan foun ba ema atu halo orasaun ba Maromak.

Maromak sempre rona ba ninia atan sira-nia orasaun bainhira sira hatudu laran-metin ba nia. (1 Samuel 1:9-19; Salmo 65:2) Maibé, husi tempu neʼebé Maromak halo aliansa ho ema Izraél atu sai ninia povu, sira presiza rekoñese katak Izraél mak povu neʼebé Maromak hili atu nuneʼe Maromak bele rona sira-nia orasaun. Depois neʼe, iha Salomão nia tempu, sira tenke rekoñese katak Maromak nia templu mak fatin neʼebé Maromak hili ba ema atu hasaʼe sakrifísiu sira atu nuneʼe Maromak bele rona sira-nia orasaun. (Deuteronómio 9:29; 2 Krónikas 6:32, 33) Maski nuneʼe, arranju neʼe mak temporáriu deʼit. Hanesan apóstolu Paulo hakerek, Maromak nia Ukun-Fuan ba nasaun Izraél no sakrifísiu sira neʼebé sira hasaʼe iha templu mak “lalatak ba buat diʼak neʼebé atu mai, maibé lalatak neʼe laʼós realidade ba buat diʼak neʼe”. (Ebreu 10:1, 2) Lalatak neʼe tenke sai fali realidade. (Koloso 2:17) Husi tinan 33 EC, atu ema ida bele iha relasaun diʼak ho Maromak, nia la presiza tan halo tuir Moisés nia Ukun-Fuan, maibé nia presiza halo tuir fali Jesus Kristu neʼebé kumpre Ukun-Fuan.​—João 15:14-16; Galásia 3:24, 25.

Jesus fó sai dalan diʼak liu atu hakbesik ba Jeová. Jesus fó sai katak nia mak belun neʼebé kbiit boot neʼebé loke dalan ba ita atu nuneʼe Maromak bele rona no hatán ita-nia orasaun. Saida mak ajuda Jesus atu halo nuneʼe ba ita?

Ita hotu moris-mai nuʼudar ema sala-naʼin, tan neʼe ita labele halo buat ida ka hasaʼe sakrifísiu ida neʼebé bele hamoos ita-nia sala ka loke dalan ba ita atu iha relasaun diʼak ho Maromak Jeová neʼebé santu. (Roma 3:20, 24; Ebreu 1:3, 4) Maibé Jesus fó ninia moris nuʼudar sakrifísiu atu sosa fali ita husi sala. (Roma 5:12, 18, 19) Agora, ema hotu neʼebé hakarak bele sai moos iha Jeová nia oin no bele “koʼalia nakloke” ba Maromak. Maibé sira tenke hatudu fiar ba Jesus nia sakrifísiu no halo orasaun liuhusi ninia naran.​—Éfeso 3:11, 12.

Bainhira ita halo orasaun liuhusi Jesus nia naran, ita hatudu fiar katak nia hola parte iha dalan tolu atu ajuda Maromak nia hakarak sai loos: (1) Nia mak “Maromak nia Bibi-Oan”, no ninia sakrifísiu loke dalan ba ita atu hetan perdua ba ita-nia sala. (2) Jeová fó moris-hiʼas ba nia no agora nia serbí nuʼudar “amlulik boot” no nia uza folin husi ninia sakrifísiu atu fó benefísiu ba ita. (3) Nia mesak deʼit mak “dalan” ba ita atu hakbesik ba Jeová liuhusi orasaun.​—João 1:29; 14:6; Ebreu 4:14, 15.

Bainhira ita halo orasaun liuhusi Jesus nia naran, ita hatudu respeitu ba nia. Jesus merese simu respeitu neʼe, tanba Jeová nia hakarak mak atu ema hotu hatudu respeitu ba Jesus nia naran hodi ‘hakneʼak no fó sai iha ema nia oin katak Jesus Kristu mak Naʼi neʼebé lori glória ba Aman Maromak’. (Filipe 2:10, 11) Maibé buat neʼebé importante liu mak ita fó glória ba Jeová bainhira ita halo orasaun liuhusi Jesus nia naran, tanba Jeová fó ninia Oan-Mane ba ita-nia diʼak.​—João 3:16.

Atu ita bele komprende didiʼak Jesus nia pozisaun neʼebé importante, Bíblia temi kona-ba Jesus nia títulu no naran oioin. Ida-neʼe ajuda ita atu komprende benefísiu oioin neʼebé ita hetan tanba buat neʼebé uluk Jesus halo, buat neʼebé nia halo daudaun no buat neʼebé nia sei halo iha futuru. (Haree kaixa “ Jesus nia knaar importante”.) Loos duni, Jesus simu “naran ida neʼebé boot liu naran sira seluk”. * Maromak fó ba nia kbiit tomak iha lalehan no rai.​—Filipe 2:9; Mateus 28:18.

Se ita hakarak Jeová atu rona ita-nia orasaun, ita tenke halo orasaun liuhusi Jesus nia naran. (João 14:13, 14) Maibé ita lakohi temi deʼit fraze “liuhusi Jesus nia naran” tan deʼit ita toman ona. Tanbasá?

Hanoin toʼok kona-ba ai-knanoik tuirmai neʼe. Bainhira ita simu karta ofisiál husi negósiu-naʼin ruma, baibain liafuan ikus mak “kumprimentus husi”. Ita sente katak negósiu-naʼin neʼe hakerek liafuan sira-neʼe ho sentimentu, ka nia hakerek tan deʼit neʼe mak dalan neʼebé baibain ema remata karta? Nuneʼe mós bainhira ita uza Jesus nia naran iha ita-nia orasaun ita hakarak halo ida-neʼe ho laran, laʼós temi deʼit hanesan liafuan atu taka karta ofisiál. Maski ita presiza “halo orasaun beibeik”, maibé ita presiza halo orasaun ho laran tomak, laʼós deʼit tanba neʼe mak toman ida.​—1 Tesalónika 5:17; Salmo 119:145.

Ita bele halo saida atu ita la uza fraze “liuhusi Jesus nia naran” nuʼudar toman deʼit? Ita bele medita kona-ba Jesus nia hahalok furak oioin. Hanoin toʼok kona-ba buat neʼebé nia halo ona no buat neʼebé nia sei halo ba ita iha futuru. Bainhira ita halo orasaun, fó obrigadu no hahiʼi ba Jeová tanba nia uza ninia Oan-Mane iha dalan neʼebé furak. Se ita halo nuneʼe, ita sei fiar metin liután ba Jesus nia promesa neʼebé dehan: “Se imi husu buat naran deʼit ba Aman, nia sei fó ba imi hodi haʼu-nia naran.”​—João 16:23.