ỌKE buebun yen Jesu vwo yono ihwo kpahen ẹrhovwo. Ihwo ri Ju re herọ vwẹ ọke rọyen da nẹrhovwo, ayen “vwẹ oma nẹ vwẹ” ọsuere. Diesorọ? “Rere ihwo vwọ mrẹ ayen.” Aphro herọ-ọ, ayen guọnọre nẹ ihwo jiri ayen fikirẹ oruru rẹ ẹga rẹ ayen vwori. Ihwo buebun vwariẹn eta evo abọ buebun vwẹ ẹrhovwo rayen kidie ayen roro nẹ siẹrẹ ayen da vwẹ eta buebun vwọ nẹrhovwo, ọyen cha nẹrhẹ Ọghẹnẹ nyo. (Matiu 6:5-8) Jesu djerephia nẹ iruemu tiọyena ofefe, rere ọ sa vwọ chọn ihwo ri vwo owenvwe uko vwọ riẹn oborẹ ayen kẹnoma kẹ siẹrẹ ayen da nẹrhovwo. Ẹkẹvuọvo, ọ dia o di yono ihwo kpahen obo ra kẹnoma kẹ siẹrẹ a da nẹrhovwo ọvo-o.

Jesu yonori nẹ e jẹ ẹrhovwo rẹ avwanre dje owenvwe rẹ avwanre phia kpahen orufon rẹ odẹ rẹ Ọghẹnẹ, ẹcha rẹ Uvie Rọyen kugbe eruo rẹ ọhọre Rọyen. Jesu ji yono nẹ o shephiyọ ra vwọ yare ukẹcha ri Jihova kpahen ọdavwẹ romobọ rẹ avwanre. (Matiu 6:9-13; Luk 11:2-4) Womarẹ idje, Jesu djerephia nẹ avwanre da guọnọ nẹ Ọghẹnẹ nyo ẹrhovwo rẹ avwanre, kẹ avwanre muomaphiyọ ẹrhovwo ẹnẹ ọkieje, ji dje esegbuyota kugbe omaevwokpotọ phia. (Luk 11:5-13; 18:1-14) Vwọ vrẹ iyono rọyen na, ọ je womarẹ udje romobọ rọyen vwo djephia.—Matiu 14:23; Mak 1:35.

Aphro herọ-ọ nẹ uyono nana chọn idibo ri Jesu uko vwọ nẹrhovwo vwẹ idjerhe ro fori. Dedena, Jesu hẹrhẹ te ason rọ koba rẹ akpeyeren rọyen vwẹ otọrakpọ na tavwen o ki yono idibo rọyen orọnvwọn rọ ma ghanre kparobọ vwẹ ẹrhovwo.

Jesu ghwọrọ ọke ogrongron vwo phiuduphiyọ idibo rọyen ri fuevun awọ vwẹ ason rọ koba rọyen vwẹ otọrakpọ na. Ọyen ọke ro fori dẹn rọ vwọ vuẹ idibo rọyen kpahen ewene kpokpọ ọvo. Jesu da ta: “Mẹvwẹ hẹ idjerhe na, kugbe uyota na, kugbe arhọ na; ohwo ọvuọvo se bru Ọsẹ na rhe-e, ẹkẹvuọvo yẹ oma mẹ.” Ọ da je kẹ ayen imuẹro ro vwo ve kẹ ayen nẹ, “Emu kemu rẹ ovwan nọre vwẹ odẹ mẹ, mi se ruo, rere a vwọ vwẹ urinrin kẹ Ọsẹ na vwẹ oma rẹ Ọmọ na; ovwan da nọ kemu kemu vwẹ odẹ mẹ, mi se ruo.” O vwo kuẹ ota rọyen na phiyọ, ọ da ta: “Rhi te ọke nana ovwan je nọ emuọvo vwẹ odẹ mẹ-ẹ; nọ, kẹ ovwan mrẹ reyọ, rere aghọghọ rẹ ovwan vwọ vọn.”—Jọn 14:6, 13, 14; 16:24.

Eta nana pha ghanghanre mamọ. Ọbe ọvo rọ ta ota kpahen Baibol na dje eta nana kerẹ “ewene kpokpọ ro shekpahen ẹrhovwo ẹnẹ vwẹ ikuegbe.” Ọ dia Jesu tanẹ a nẹrhovwo rhe ọyen ukperẹ Ọghẹnẹ rẹ. Ukperẹ ọtiọyen, idjerhe kpokpọ ra sa wan bru Jihova Ọghẹnẹ ra yen rhiephiyọ.

Vwọrẹ uyota, ọkieje yen Ọghẹnẹ vwọ kerhọ rẹ ẹrhovwo rẹ idibo rọyen ri fuevun. (1 Samuẹl 1:9-19; Une Rẹ Ejiro 65:2) Ẹkẹvuọvo, rhanvwẹ ọke rẹ Ọghẹnẹ vẹ ihwo rẹ Izrẹl vwọ re ọphọ nu, ihwo re guọnọre nẹ Ọghẹnẹ kerhọ rẹ ẹrhovwo rayen ke mrẹvughe nẹ Izrẹl ọyen ẹgborho rẹ Ọghẹnẹ jẹreyọ. Ukuko na, vwo nẹ ọke ri Solomọn yanran, ko fori nẹ ayen mrẹvughe nẹ uwevwin rẹ ẹga na yen asan rẹ Ọghẹnẹ jẹreyọ nẹ e de ze izobo. (Urhi Rivẹ 9:29; 2 Ikun Rivie 6:32, 33) Jẹ ona rẹ ẹga nana dia ọ ri bẹdẹ-ẹ. Kirobo rẹ Ọyinkọn Pọl siri, urhi ra vwọ kẹ ihwo rẹ Izrẹl kugbe izobo re ze vwẹ uwevwin rẹ ẹga na ghwa hẹ “uhoho rẹ emu esiri rọ cha na yọ dia okpuyovwi rẹ emu na dẹn na-a.” (Hibru 10:1, 2) Ọ rẹ uhoho na che no vwọ kẹ emu na dẹn. (Kọlose 2:17) Ghwe vwo nẹ Ukpe ri 33 C.E rhe, e rhe muẹ oyerinkugbe rẹ ihworakpọ vẹ Jihova kpahen enene rẹ Urhi ri Mosis na-a. Ukperẹ ọtiọyen, e muro kpahen ẹmienyo rẹ ohwo rẹ Urhi na rionbọ ra rọ dia Kristi Jesu.— Jọn 15:14-16; Galesha 3:24, 25.

Jesu rhie idjerhe ro me yovwin ra wan bru Jihova ra phiyọ ro vwo dje oma rọyen phia kerẹ ugbeyan ro vwo ẹgba, ohwo ro rhie idjerhe phiyọ kẹ avwanre rere Ọghẹnẹ se vwo nyo je kpahenphiyọ ẹrhovwo rẹ avwanre. Die yen mu Jesu vwo ru ọnana kẹ avwanre?

Ọ vwọ dianẹ e vwiẹ avwanre phiyọ umwemwu na, o vwo izobo yẹrẹ owian vuọvọ rẹ avwanre che ru ro se si inuhu na no yẹrẹ kẹ avwanre uphẹn a vẹ Jihova Ọghẹnẹ rẹ avwanre rọ pha fuanfon na se vwo vwo oyerinkugbe-e. (Rom 3:20, 24; Hibru 1:3, 4) Ẹkẹvuọvo, Jesu vwẹ arhọ ọgbagba rọyen vwọ hwa osa rẹ imwuemwu rẹ avwanre rere avwanre vẹ Ọghẹnẹ sa vwọ rhuẹrẹ kugbe. (Rom 5:12, 18, 19) Enẹna, kohwo kohwo rọ guọnọ vwo omamọ rẹ oyerinkugbe vẹ Jihova ko se vwo je riavwerhen rẹ uphẹn ra vwọ ta ota kẹ Ọghẹnẹ, ẹkẹvuọvo kẹ ayen vwo esegbuyota kpahen izobo ri Jesu je nẹrhovwo vwẹ odẹ rọyen tavwen.—Ẹfesọs 3:11, 12.

Avwanre da nẹrhovwo vwẹ odẹ ri Jesu, jẹ avwanre dje esegbuyota phia kpahen ẹdia ri Jesu kare vwẹ eruo rẹ ọhọre rẹ Ọghẹnẹ: (1) Ọyehẹ “Omogegede rẹ Ọghẹnẹ” rẹ izobo rọyen nẹrhẹ avwanre se vwo evwoghovwo rẹ imwemwu. (2) Jihova rhọnvwerọ nushi, enẹna ọ ga kerẹ “orherẹn rode” rọ vwẹ erere rẹ ọtanhirhe na vwọphia. (3) Ọyen ọvo yen “idjerhe” re se vwo bru Jihova ra womarẹ ẹrhovwo.—Jọn 1:29; 14:6; Hibru 4:14, 15.

A vwọ nẹrhovwo vwẹ odẹ ri Jesu brọghọ phiyọ Jesu oma. Oka rẹ ọghọ tiọyena fori dẹn kidie ọyen ọhọre ri Jihova, “nẹ kohwo kohwo ejobi ki she diguẹ kẹ odẹ ri Jesu . . . , nẹ unu kunu ejobi ke cha rhọvwe nẹ Jesu Kristi hẹ Ọrovwohwo, fiki rẹ urinrin rẹ Ọghẹnẹ Ọsẹ na.” (Filipae 2:10, 11) Ma rho, ra vwọ nẹrhovwo vwẹ odẹ ri Jesu vwẹ urinrin kẹ Jihova, rọ vwẹ Ọmọ rọyen vwọ kpahotọ vwọ kẹ erhuvwu rẹ avwanre.—Jọn 3:16.

Baibol na vwẹ edova vẹ edẹ sansan vwo se Jesu rere e se vwo vwo ẹruọ rẹ ẹdia rode ri Jesu kare. Enana chọn avwanre uko vwo vwo ẹruọ rẹ erere buebun ri te avwanre obọ fikirẹ obo ri Jesu ru re, obo ro ruẹ enẹna, kugbe obo ro che ru kẹ avwanre vwẹ obaro na. (Ni ekpeti na “ Ẹdia Ọghanghanre ri Jesu Kare” .) Vwọrẹ uyota, a kẹ Jesu “odẹ ro kpenu nọ odẹ kodẹ.” * A vwẹ ogangan rẹ odjuvwu kugbe akpọ vwọ kẹ Jesu re.—Filipae 2:9; Matiu 28:18.

Vwọrẹ uyota, avwanre da guọnọ nẹ Jihova kpahenphiyọ ẹrhovwo rẹ avwanre, ko fori nẹ a nẹ vwẹ odẹ ri Jesu. (Jọn 14:13, 14) Ẹkẹvuọvo, ofori a vwọ vwariẹn eta na, “vwẹ odẹ ri Jesu” kerẹ ẹkuruemu ghevweghe-e. Diesorọ?

Roro kpahen udje nana. Ọneki rode de si ileta rhe we, ileta na se kuphiyọ vẹ eta nana, “ohwo wọ sa vwẹroso.” Wo rori nẹ enana eta ri nẹ ubiudu rẹ ọneki na rhe, gbanẹ o di sio nene obo re siẹ oka rẹ ileta tiọyena wan? Vwọrẹ uyota, ofori nẹ obo ra vwẹ odẹ ri Jesu vwo ruiruo wan vwẹ ẹrhovwo fẹnẹ ona re vwo kuẹ ileta re siẹ rhe ohwo re vugheri jovwo-o phiyọ. Ofori ra vwọ “nẹ ẹrhovwo kẹdẹ kẹdẹ” vwo nẹ “udu” avwanre ejobi rhe, ukperẹ ọ vwọ dia ẹkuruemu ghevweghe.—1 Tẹsalonaika 5:17; Une Rẹ Ejiro 119:145.

Mavọ yen a sa vwọ kẹnoma kẹ ra vwọ vwanriẹn eta na “vwẹ odẹ ri Jesu” kerẹ ẹkuruemu ghevweghe? Diesorọ wo gbi roro kpahen omamọ rẹ iruemu ri rhe Jesu-u? Nabọ roro kpahen obo ro ru re kugbe ọ ro muegbe ro che ru kẹ wẹ vwẹ obaro na. Gba kpẹvwẹ Jihova ji jiro fikirẹ iruo esiri rọ vwẹ Ọmọ rọyen vwo ru re. Wo vwo ruẹ ọtiọyen na, imuẹro wẹn kọ cha ganphiyọ kpahen ive ri Jesu nẹ, “ovwan da nọ kemu kemu vwẹ obọ rẹ Ọsẹ na, kọ vwọ kẹ ovwan vwẹ odẹ mẹ.”—Jọn 16:23.