YESUUSI woosaabaa darotoo tamaarissiis. I saˈan deˈiyo wode, Ayhuda haymaanootiyaa tamaarissiyaageeti “ogetu doonan eqqidi” woossoosona. Aybissi? “Banttana asai beˈana mala” koyiyo gishshataassa. Eti asan nashettanawu koyidoogee qoncce. Daroti bantta woosay siyettanaadan darobaa ‘biddana’ koshshiyoobadan coo mela biddoosona. (Maatiyoosa 6:5-8) Yesuusi wozanappe woossiya asay aybippe haakkana koshshiyaakko eranaadan maaddanawu, hegaadan woossiyoogawu waagi baynnaagaa yootiis. SHin I woossana bessennabaa xallaa tamaarissibeenna.

Yesuusi nuuni Xoossaa sunttay geeyin, A Kawotettay yin, qassi A shenee polettin beˈanawu koyiyoogaa nu woosan qonccissanaadan tamaarissiis. Yesuusi nu deˈuwaara gayttidaagan Xoossay maaddanaadan woossiyoogeekka bessiyaaba gidiyoogaa tamaarissiis. (Maatiyoosa 6:9-13; Luqaasa 11:2-4) Nu woosay siyettana mala nuuni genccan, ammanuwaaninne nu huuphiyaa ziqqi oottiyoogan woossana koshshiyoogaa Yesuusi leemisuwan tamaarissiis. (Luqaasa 11:5-13; 18:1-14) Qassi I yootidoba xallan gidennan oottiyoobankka mintti tamaarissiis.—Maatiyoosa 14:23; Marqqoosa 1:35.

Yesuusi tamaarissidobay I erissiyo ashkkarati loˈˈo woosaa woossanaadan maaddidoogee qoncce. SHin Yesuusi woosaara gayttidaagan ba erissiyo ashkkarata keehi koshshiyaabaa tamaarissanawu I saˈan deˈido wurssetta qammi gakkanaashin naagiis.

Yesuusi saˈan deˈido wurssetta qammaappe dariya baggaa ba kiittido ammanettidaageeta minttettiiddi takkiis. Hegee kase erennabaa etawu yootana bessiya wode. Yesuusi, “Ogee, tumainne de7oi tana; ta baggaarappe attin, ooninne ta aawaakko baanau danddayenna” yaagiis. Takkidi, eta minttettanawu hagaadan giidi qaalaa geliis: “Aawai Na7aa baggaara, ta baggaara bonchchettana mala, ta sunttan intte woossiyo ubbabaa taani intteyyo polana. Intte ta sunttan tana ai oichchikkokka, taani polana.” I haasayaa wurssana haniiddi hagaadan giis: “Ha77i gakkanaassikka ta sunttan ainne woossibeekketa; intte ufaissai polettana mala, Xoossaa woossite; intte ekkana.”—Yohaannisa 14:6, 13, 14; 16:24.

I yootidobay keehi gitaba. Issi xuufee ha qofaa “woosaara gayttidaagan laamettida gitabaa” yaagiis. Yesuusi asay Xoossaa woossiyoogaa aggidi, A woossanaadan yootibeenna. SHin, hegan I Xoossaa Yihoowa haasayissiyo ooratta ogiyaa doomissiis.

Xoossay ammanettida A ashkkarati woossiyo woosaa ubba wodekka siyiis. (1 Sameela 1:9-19; Mazamure 65:2) Giddoppe attin, Xoossay Israaˈeelatuura maacettido wode, asay ba woosay siyettanaadan, Israaˈeela deree Xoossay dooridoogaa gidiyoogaa ammanana koshshiis. Qassi takkidi, Solomona wode, eti beeta maqidasee Xoossay bawu yarshshoy shiiqanaadan doorido soho gidiyoogaa ammanana koshshiis. (Zaarettido Wogaa 9:29; 2 Odiya 6:32, 33) SHin he ogiyan goynniyoogee laamettennaba gidenna. Kiitettida PHawuloosi yootidoogaadan, Higgee imettidoy Israaˈeelatussa, qassi beeta maqidasiyan yarshshiyo yarshshoy ‘yaana loˈˈobawu eeshoppe’ attin, he tumubaa gidenna. (Ibraawe 10:1, 2) Eeshoy tumu yohuwan laamettana bessees. (Qolasiyaasa 2:17) Issi asi Yihoowaara dabbotanawu, 33 M.Lppe simmin, Muuse Higgiyaa azazettana koshshenna. SHin issi uri Higgee abaa qonccissiyo Yesuus Kiristtoosawu azazettiyoogan Yihoowaara dabbotees.—Yohaannisa 15:14-16; Galaatiyaa 3:24, 25.

Yesuusi nu woosaa Xoossay siyidi zaaranaadan ogiyaa dooyidaagee, qassi Xoossawu mata dabboy bana gidiyoogaa qonccissiyoogan, Yihoowakko shiiqiyo gita ogiyaa erissiis. Yesuusi nu gishshaa hegaadan oottana danddayiyoy aybiinee?

Nuuni ubbay nagaraa laattidi yelettido gishshawu, nu oottiyo woy yarshshiyo aybikka, he qitaa geeshshanawu woykko nu geeshsha Xoossaa Yihoowaara nu dabbotanaadan maaddanawu danddayenna. (Roome 3:20, 24; Ibraawe 1:3, 4) SHin nagaraappe wozettana danddayiya asaa gishshaa Yesuusi wottiyoobi baynna ba deˈuwaa yarshshiis. (Roome 5:12, 18, 19) Bantta nagaraappe geeyana koyiya ubbay Xoossaa sinttan geeshshadan qoodettanawunne “ainne yayyennan” Xoossaara haasayiyo maataa demmana danddayees; shin eti he maataa demmanawu Yesuusa yarshshuwan ammanananne A sunttan woossana bessees.—Efisoona 3:11, 12.

Nuuni Yesuusa sunttan woossiyo wode, Xoossaa halchchoy polettanaadan I oottiyobaara gayttidaagan baa giishin heezzubaa ammaniyoogaa bessoos: (1) I yarshsho gididi nagaraa atto giissiya ‘Xoossaa Dorssaa.’ (2) Yihooway hayquwaappe A denttin, asay wozuwaappe goˈettanaadan ‘qeese ubbatu halaqa’ gididi oottiiddi deˈees. (3) Asay Yihoowakko woosan shiiqiyo “ogee” A xalaala.—Yohaannisa 1:29; 14:6; Ibraawe 4:14, 15.

Yesuusa sunttan woossiyoogee A bonchchiyoogaa bessees. Qassi hegee bessiyaaba; Yihoowa sheneekka asay ‘ubbay Yesuusa sunttaa bonchchanawu gulbbatanaadaananne Yesuus Kirittoosa Godaa yaagidi, Xoossaa Aawaa bonchchanawu markkattanaadaana.’ (Piliphphisiyuusa 2:10, 11) Ubbaappe aaruwan, Yesuusa sunttan woossiyoogee nuuni goˈettanaadan ba Naˈaa immida Yihoowa bonchchissees.—Yohaannisa 3:16.

Nuuni Yesuusawu ay keena maatay deˈiyaakko akeekanaadan, Geeshsha Maxaafay A qonccissanawu daro bonchcho sunttatanne I xeegettiyo ogeta goˈettees. He sunttati Yesuusi nu gishshawu oottidobaappe, oottiiddi deˈiyoobaappenne sinttappe oottanabaappe demmana daro goˈˈaa nuuni akeekanaadan maaddoosona. (“ Yesuusi Oottiyo Gitabaa” .) Tumukka, Yesuusawu “suntta ubbaappekka aadhdhiya xoqqa” sunttay imettiis. * Saluwaaninne saˈan deˈiya maata ubbay awu imettiis.—Piliphphisiyuusa 2:9; Maatiyoosa 28:18.

Yihooway nu woosaa siyanaadan koyikko, nuuni Yesuusa sunttan woossana bessiyoogee tuma. (Yohaannisa 14:13, 14) SHin nuuni coo meeze oottidi, “Yesuusa sunttan” giidi mule woossana bessenna. Aybissi?

Issi leemisuwaa beˈa. Issi zalˈˈanchchaappe neessi kiitettida dabddaabbiya wurssettan “saroy neeyyo gido” giya meeze qaalay xaafettees. Hegaa he zalˈˈanchchay wozanappe giidabadan qoppayiyye woy dabddaabbiyaa xaafiyo meeze gidiyo gishshawu giidabadan qoppay? Nuuni woossiyo wode Yesuusa sunttan giyoy dabddaabbiyaa wurssettan meeze oottidi xaafiyoogaappe dummatana bessiyoogee erettidaagaa. Nuuni “ubba wode” woossana koshshikkokka, coo meezedan gidennan, “kumetta wozanaappe” woossana koshshees.—1 Tasalonqqe 5:17; Mazamure 119:145.

Coo meezedan “Yesuusa sunttan” geennaadan waatana danddayay? Keehi ufayssiya Yesuusa eeshshata ayssi wotta denttada qoppikkii? I neessi oottidobatanne oottanawu koyiyoobata qoppa. Yihooway ba Naˈaa baggaara oottido maalaaliyaabaa gishshawu, woosan A galatanne sabba. Neeni yaatiyaaba gidikko, Yesuusi, “Intte ta sunttan woossiyoobaa ubbaa Aawai intteyyo immana” giidi qaalaa gelidobay polettanaagaa wozanappe ammanettana.—Yohaannisa 16:23.