SELEN savve kamap wanfala samting wea savve mekem olketa hasband and waef for raoa. Iumi no sapraes hao selen nao main samting wea staka wea marit raoa abaotem.

Olketa wea marit wea no garem gudfala tingting abaotem selen, maet safa from olketa wari, raoa and spoelem tu olketa seleva saed long feeling and wei wea olketa fren witim Jehovah. (1 Timothy 6:9, 10) Olketa mami and dadi wea no savve story gud tugeta abaotem selen savve mekem olketa seleva waka hard and no garem taem for tufala seleva and for helpem pikinini and for duim olketa spiritual samting. Olketa lanem pikinini tu for no iusim gud selen.

Bible sei “selen tu savve protectim man.” (Ecclesiastes 7:12) Bat selen bae protectim marit and famili bilong iu, no sapos iu kontrolem nomoa bat sapos iu story gud abaotem witim hasband or waef bilong iu. * For tok stret, winim wei for raoa, wei for story gud abaotem selen bae strongim marit bilong iu.

Why nao selen savve mekem staka problem kamap insaed marit? Wanem nao iu savve duim for mekem wei for story abaotem selen savve stretem problem winim wei for mekem raoa kamap?

Plande taem, wei for raoa abaotem selen savve kamap no bikos selen hem short bat bikos hasband or waef no trustim narawan or olketa fraet. Tingim, sapos wanfala hasband laek for savve evri selen wea waef iusim, datwan maet showimaot hem no trustim wei wea waef iusim selen bilong famili. And waef wea evritaem komplen hao hasband bilong hem no savve keepim selen, maet showimaot hao hem fraet nogud eni samting wea maet happen bae spoelem famili saed long selen.

Olketa wea marit savve kasem nara hard taem tu, from tufala garem difren living. Matthew wea marit for eitfala year finis sei: “Waef bilong mi kam from famili wea olketa keepim gud selen. Hem no savve wari abaotem olketa samting wea mekem mi fraet. Dadi bilong mi hem wanfala man wea drink and smoke olowe and staka taem hem no garem eni waka. Staka taem mifala  no savve garem wanem mifala needim, so mi fraet nogud mi garem kaon. Samfala taem wei for fraet mekem mi no agree witim waef bilong mi abaotem selen.” Nomata sapos raoa kamap, wanem nao iu savve duim for selen helpem marit bilong iu and no spoelem?

Bible hem no buk for showim iumi hao for lukaftarem selen. Bat hem garem olketa gudfala advaes wea savve helpem hasband and waef for no garem problem saed long selen. Iu savve ting raonem and trae for followim olketa advaes wea stap long daon.

1. Lane for story gud abaotem selen.

“Olketa wea story tugeta olketa wise.” (Proverbs 13:10) From iumi evriwan kam from difren famili, maet hem no isi for story abaotem selen long hasband or waef bilong iu. Nomata olsem, hem gud for lane for story abaotem olketa important samting olsem. Tingim diswan, iu savve talem long hasband or waef bilong iu abaotem wei wea dadi and mami bilong iu affectim tingting bilong iu abaotem selen. Hem gud tu for trae for minim living bilong hasband or waef wea affectim tingting bilong hem.

Iu no need for weit go kasem taem problem kamap bifor iu story abaotem selen. Bible hem sei: “Hard for tufala wakabaot tugeta sapos tufala no firstaem markem taem for meet.” (Amos 3:3) Hao nao disfala advaes savve helpem iumi? Sapos iu markem wanfala taem for storyim wei wea iutufala bae iusim selen, datwan savve helpem iutufala for no mekem raoa kamap taem iutufala no minim narawan.

2. Agree long hao iutufala bae tingim selen.

“Iufala nao mas firstaem showimaot respect long nara man.” (Romans 12:10) Sapos iu nao waka for selen, iu savve showimaot respect long marit partner bilong iu long wei for tingim selen wea iu waka for hem olsem selen, no bilong iu bat bilong famili bilong iu.—1 Timothy 5:8.

Sapos iutufala evriwan waka for selen, iutufala savve showimaot respect long wei for talem long narawan haomas selen iu kasem and olketa big samting wea iu peim. Sapos iu haedem selen or samting wea iu peim from hasband or waef bilong iu, datwan savve mekem wei for no trust kamap and savve spoelem wei wea iutufala fren gud tugeta. Iu no need for storyim evri smol samting iu peim. Bat sapos iu storyim long partner bilong iu olketa big samting wea iu ting for peim, datwan showimaot iu tinghae long tingting bilong hem.

3. Raetem plan bilong iutufala.

“Man wea plan gud firstaem bae kasem gudfala samting.” (Proverbs 21:5) For planim and raetem wei for iusim gud selen hem savve help for no weistim selen wea iu waka hard for hem. Nina, wea marit finis for faevfala year hem sei: “For raetem long pepa selen wea iu waka for hem and wea iu iusim hem bae mekem iu sapraes. Taem iu raetem olketa samting long pepa, datwan savve helpem iu for luksavve haomas selen nao iu iusim.”

For raetem wanfala plan for keepim selen, hem no minim iu mas duim wanfala hard samting. Darren wea marit finis for 26 year wea garem tufala boy talem olsem: “Firstaem mifala iusim olketa envelope for putim selen bilong mifala insaed. Mifala putim selen wea bae mifala iusim long datfala week long olketa didifren envelope. Mifala garem envelope for peim  kaikai, hapitaem, and for kat hair tu. Sapos eni envelope no garem selen insaed, mifala savve iusim selen from nara envelope, bat mifala mas changem bak taem mifala garem.” Hem important for iu plan gud and keepim record long haomas selen nao iu iusim.

4. Markem hu nao bae duim wanem waka.

Bible sei: “Tufala nao gud winim wanfala, bikos tufala bae kasem gud samting from hard waka bilong tufala.” (Ecclesiastes 4:9, 10) Long samfala famili olketa dadi nao lukaftarem selen. Bat long samfala olketa mami nao fit for duim datwan. (Proverbs 31:10-28) Bat staka hasband and waef sharem datfala waka. Mario, wea marit finis for 21 year hem sei: “Waef bilong mi nao lukaftarem selen for peim olketa samting wea no kost tumas. Mi lukaftarem selen for peim tax, kaon, and rent. Mitufala story gud and waka tugeta.” Nomata wanem wei iu followim, important samting nao for waka tugeta.

Wei for story abaotem selen hem mas no spoelem love wea iutufala garem. Leah wea marit finis for faevfala year savve hao datwan hem tru. Hem sei: “Mi and hasband bilong mi lane for story gud evritaem abaotem selen. Gud samting nao, hem wei wea mitufala waka gud tugeta and fren gud go moa distaem.”

Taem olketa wea marit story gud tugeta abaotem hao for iusim selen, datwan showimaot olketa garem wan mind and tinghae long marit bilong tufala. Taem tufala story gud tugeta bifor olketa peim eni samting wea kostim big selen, datwan showimaot tufala respectim tingting and feeling bilong narawan. Taem tufala no need for story long narawan abaotem olketa smol samting olketa peim, datwan showimaot tufala trustim narawan. Datwan showimaot tufala garem love and fren gud tugeta. Wei for fren gud tugeta olsem hem important winim selen, so hem gud for no raoa abaotem.