Chuqui miʼ mejlel a mel chaʼan maʼañic maʼ ñumel ti pʼis ti jap lembal

JUNTIQUIL wiñic i cʼabaʼ Tony, tsiʼ wen taja wocol come wen yujil japol lembal. Pero tsiʼ ñaʼta chaʼan maʼañic mi caj i taj wocol anquese cʌlʌxix miʼ jap come mach yujilic yʌcʼan. ¿Bajcheʼ tsaʼ mejli i bajñel lotin i bʌ?

Come jiñi lembal tsaʼix i wen asibe i jol, maʼañix miʼ ñaʼtan chuqui miʼ mel yicʼot bajcheʼ yilal an. I cheʼ bʌ ñumento miʼ jap, utsi maʼañix miʼ ñaʼtan chuqui miʼ mel.

Maʼañic tsaʼ mejli i ticʼ i bʌ come miʼ wen mulan i jap. Cheʼʌch tsaʼ ujti jaʼel tiʼ tojlel Alberto, ti ñaxan maʼañic tsiʼ ñopo chaʼan miʼ wen mulan i jap. Miʼ yʌl: «Mucul jach mic jap, cheʼ wolix c ñumel ti pʼis mi cubin, maʼañic mi cʌcʼ ti ñuc. Com jach c bej jap». Anquese Tony yicʼot Alberto mucʼʌch i lon tijqʼuelob chaʼan miʼ cʌyob jiñi lembal, maʼañic tsiʼ chʼʌmʌyob ti ñuc come miʼ ñaʼtañob chaʼan maʼañic i wocolel, pero iliyi mach i sujmic. ¿Chuqui miʼ mejlel i coltañob jiñi wocol bʌ miʼ yubiñob chaʼan miʼ cʌyob jiñi lembal?

Wen ñaʼtan chuqui yom maʼ mel

An cabʌlob tsaʼ bʌ i cʌyʌyob jiñi jap lembal come tsiʼ chʼʌmʌyob ti ñuc i ticʼojel Jesús: «Mi jiñi a wut am bʌ ti a ñoj woliʼ yʌqʼuet ti yajlel, locʼsan i choco ti ñajt. Ñumen wen cheʼ maʼ sʌt jumpʼejl a wut i mach tiʼ pejtelelic a bʌcʼtal miʼ chojquel ochel ti Gehena» (Mateo 5:29).

Jesús mach yomic i yʌl chaʼan yom mi lac junyajl low lac bʌ. Yom bʌ i yʌl jiñʌch cheʼ mi laj cʌy lac mel muʼ bʌ i ñajtʼesañonla ti Dios. Tajol wen wocolʌch mi la cubin, pero mi caj i coltañonla chaʼan mi laj cʌntan lac pensar yicʼot chaʼan maʼañic mi lac chaʼ yajlel tiʼ japol lembal. Mi añix majqui tiʼ subeyet chaʼan cʌlʌxix woli a jap, bej cʌyʌx. * I mi maʼañic maʼ mejlel maʼ wubin, junyajl cʌyʌ. Tajol wocolʌch maʼ wubin, pero ñumen wocol bʌ jiñʌch cheʼ maʼ sʌt a cuxtʌlel.

Ixcu mi mach xyʌcʼʌjelic pero cʌlʌxix miʼ jap, ¿chuqui miʼ mejlel i mel?

Baqui mi lac taj laj coltʌntel

1. Chʌn mele oración. Pejtelel añoʼ bʌ i ñopoñel ti Dios yicʼot yomoʼ bʌ i mel chuqui wen, jiñi Biblia miʼ subeñob: «Mach yʌlʌyic chuqui mi laʼ ñusan, aqʼuenla i ñaʼtan Dios ti oración, pejcanla ti wocol tʼan ti jumpʼejl laʼ pusicʼal yicʼot aqʼuenla wocolix i yʌlʌ, i jiñi i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl, mi caj i cʌntan laʼ pusicʼal yicʼot laʼ ñaʼtʌbal tiʼ tojlel Cristo Jesús» (Filipenses 4:6, 7). Pero ¿chuqui yom maʼ wʌl ti a woración chaʼan Dios miʼ yʌqʼueñet a ñʌchʼtʌlel?

Ti ñaxan, mach a wʌl chaʼan mach a wujilic japol cheʼ bʌ mucʼʌch a jap, i yomʌch maʼ chaʼlen wersa chaʼan maʼ cʌy. Cheʼ jaʼel, suben Dios chuqui maʼ ñaʼtan a mel chaʼan maʼ cʌy jiñi lembal, i mi caj i coltañet. Proverbios 28:13 miʼ yʌl chaʼan «maʼanic miʼ taj i wenlel jini muʼ bʌ i muc i mul. Jini muʼ bʌ i sub i mul, muʼ bʌ i cʌy i mul, mi caj i pʼuntʌntel». Jesús tiʼ subeyonla chaʼan mi laj cʼajtiben Dios: «Mach a wʌcʼon lon ti yajlel cheʼ bʌ mij qʼuelbentel lon c pusicʼal, locʼsañon lojon tiʼ cʼʌb jiñi Satanás» (Mateo 6:13). ¿Bajcheʼ miʼ mejlel a pʌs chaʼan loqʼuemʌch ti a pusicʼal jiñi a woración? ¿I baqui miʼ mejlel a tajben i jacʼbal?

2. Pejcan jiñi Biblia chaʼan maʼ taj a pʼʌtʌlel. Cʼajtesan chaʼan «jiñi i tʼan Dios cuxulʌch i wen pʼʌtʌl. [...] Muʼto i mejlel i pʌs chuqui mi lac ñaʼtan yicʼot chuqui yom lac pusicʼal» (Hebreos 4:12). Cheʼ maʼ pejcan jiñi Biblia i maʼ wen ñaʼtan chuqui miʼ yʌl, mi caj i coltañet, cabʌlob an i coltayob. Juntiquil tsaʼ bʌ i tsʼijbu jiñi Salmo tsiʼ yʌlʌ: «Tijicña jini winic mach bʌ anic miʼ piʼlen ti xʌmbal jontol bʌ winicob chaʼan miʼ jacʼbeñob i tʼan,  [...] Ili winic miʼ taj i tijicñʌyel tiʼ mandar lac Yum, miʼ chʌn ñaʼtan chuqui yom lac Yum ti qʼuinil yicʼot ti acʼʌlel». I miʼ yʌl chucoch: «Pejtel chuqui miʼ mel jini winic utsʼat miʼ yujtel» (Salmo 1:1-3).

Alberto tsiʼ taja i pʼʌtʌlel chaʼan miʼ cʌy i jap lembal come tsaʼ caji ti estudio yicʼot i testigojob Jehová. miʼ yʌl: «Machicax tsaʼ j cʌñʌ jiñi i tʼan Dios maʼañic tsaʼ mejli j cʌy jiñi lembal, i mi cʌl mach cuxuloñix».

3. Tiqʼui a bʌ. Jiñi Biblia miʼ yʌl chaʼan ti wajali an xñoptʼañob xyʌcʼʌjeloʼ bʌ ti ñaxan, pero tsaʼ sʌqʼuesʌntiyob tiʼ «yespíritu lac Dios» (1 Corintios 6:9-11). ¿Bajcheʼ? Jiñi chʼujul bʌ espíritu tsiʼ coltayob chaʼan miʼ mejlel i ticʼob i bʌ chaʼan maʼañix miʼ wen japob. Jin chaʼan jiñi i Tʼan Dios miʼ yʌl: «Mach laʼ yʌqʼuesan laʼ bʌ ti vino [...] yom bej butʼuletla ti espíritu» (Efesios 5:18; Gálatas 5:21-23). Jesús tsiʼ yʌcʼʌ i tʼan: «Jiñi Tatʌl am bʌ ti panchan ñumento mi caj i yʌqʼuen chʼujul bʌ espíritu jiñi muʼ bʌ i cʼajtibeñob». Jin chaʼan tsiʼ yʌlʌ: «Chʌn cʼajtinla i mi caj laʼ wʌqʼuentel» (Lucas 11:9, 13).

Jin chaʼan, mi a wom a tijicñesan Dios yom maʼ ticʼ a bʌ. Chaʼan miʼ mejlel a mel, pejcan jiñi Biblia yicʼot wen ñaʼtan, i chʌn mele oración ti jumpʼejl a pusicʼal. Mi tsaʼ wubi chaʼan maʼañic maʼ mejlel, cʼajtesan ili tʼan: «Jiñi muʼ bʌ i ñaʼtan jiñi espíritu cheʼ bʌ miʼ chaʼlen pacʼ mi caj i taj i cuxtʌlel mach bʌ añic i jilibal tilem bʌ ti jiñi espíritu. Jin chaʼan, mach laj cʌy lac mel chuqui wen, come cheʼ tiʼ yorajlelix mi caj lac lotben i wut mi maʼañic mi lac lujbʼan» (Gálatas 6:8, 9).

4. Sʌclan wem bʌ a wamigojob. Proverbios 13:20 miʼ yʌl: «Jini muʼ bʌ i piʼleñob majlel jini weñoʼ bʌ i pusicʼal mucʼʌch i tajob i ñaʼtʌbal. Jini muʼ bʌ i piʼleñob majlel jini mach bʌ weñobic i pusicʼal miʼ yutsi pʼojlel i mul». Suben a wamigojob chaʼan maʼañix mi caj a wen jap. Pero yom maʼ ñaʼtan chaʼan tajol mi caj i wajleñetob o mi caj i wersa xiqʼuetob. Jiñi Biblia tsiʼ wʌn alʌ chaʼan an muʼ bʌ caj i «toj sajtelob i pusicʼal» yicʼot «ñumeñix ti pʼis chuqui miʼ yʌlob» tiʼ tojlelob jiñi muʼ bʌ i cʌyob i cʌlʌx jap lembal, jiñi qʼuiñijel tac ñumeñix bʌ ti pʼis yicʼot jiñi qʼuiñijel tac chaʼan bʌ jap lembal (1 Pedro 4:3, 4). Yom bʌ maʼ mel, yom maʼ cʌy a tsajcañob cheʼ bʌ miʼ melob bajcheʼ jiñi.

5. Wen ñaʼtan bajcheʼ cʼamel mi caj a jap. Romanos 12:2 miʼ yʌl: «Cʌyʌ laʼ tsajcʌben i melbal jiñi quixtañujob ti ili pañimil, tsijibtesan laʼ ñaʼtʌbal chaʼan mi laʼ qʼuextan laʼ bʌ, chaʼan jatetla mi laʼ qʼuel chuqui jiñi wem bʌ, utsʼat bʌ yicʼot jiñi toj bʌ muʼ bʌ i mulan Dios». Chaʼan maʼ ñaʼtan bajcheʼ cʼamel yom maʼ jap, ñaʼtan muʼ bʌ i yʌl jiñi Biblia, mach jiñic muʼ bʌ i yʌl yambʌlob. Mi cheʼʌch maʼ mel, tijicña mi caj i yubin Jehová. Pero ¿bajcheʼ maʼ ñaʼtan mi wolix a ñumel ti pʼis?

Mach wocolic, mi jʌmʌcñayix pañimil maʼ wubin, wolix a ñumel ti pʼis. Mi mucʼʌch caj a jap, wʌn ñaʼtan bajcheʼ jach cʼamel mi caj a jap, i maʼañic maʼ ñumel ti pʼis.

6. Alʌ chaʼan maʼañic. Jiñi Biblia miʼ yʌl: «Cheʼ mi laʼ wʌl chaʼan an chuqui mi caj laʼ mel, melela, cheʼ mi laʼ wʌl chaʼan an chuqui maʼañic mi caj laʼ mel, mach laʼ mel» (Mateo 5:37). Mi tsaʼix a tsʼitaʼ japʌ i miʼ subeñetob chaʼan maʼ bej jap, subeñob ti wen jach bʌ tʼan chaʼan maʼañic. Colosenses 4:6 miʼ yʌcʼ ili ticʼojel: «Yom utsʼat laʼ tʼan tiʼ pejtelel ora, lajal bajcheʼ an i yʌtsʼʌmlel, chaʼan mi laʼ ñaʼtan bajcheʼ yom mi laʼ jacʼben jujuntiquil lac piʼʌl».

7. Cʼajtin a coltʌntel. Cʼajtiben jiñi a wamigojob muʼ bʌ i cʼuxbiñob Jehová chaʼan miʼ coltañetob chaʼan pʼisbil jach maʼ jap jiñi lembal. Jiñi Biblia miʼ yʌl: «Cheʼ ti lac bajñel, tsʼitaʼ jach miʼ mejlel lac mel. Cheʼ chaʼtiquilonla cabʌl miʼ mejlel. Mi tsaʼ yajli juntiquil miʼ tech letsel i piʼʌl» (Eclesiastés 4:9, 10; Santiago 5:14, 16). Jiñi Instituto Nacional sobre el Abuso del Alcohol y el Al­coholismo, am bʌ ti Estados Unidos, miʼ yʌcʼ jaʼel ili ticʼojel: «Cheʼ bʌ wen wocol maʼ wubin chaʼan maʼ ticʼ a bʌ chaʼan maʼañic maʼ cʌlʌx jap lembal, cʼajtiben i coltaya jiñi a familia yicʼot a wamigojob».

8. Mele bajcheʼ maʼ wʌl. Santiago 1:22, 25 miʼ yʌcʼ ili ticʼojel: «Jacʼʌla jiñi tʼan i mach yomic jach mi laʼ ñʌchʼtan, i mi laʼ bajñel lotin laʼ bʌ ti muʼ bʌ laʼ ñaʼtan mach bʌ i sujmic. Pero jiñi muʼ bʌ i wen qʼuel jiñi toj bʌ mandar muʼ bʌ i yʌcʼ librejlel i maʼañic miʼ cʌy, mach muqʼuic jach i ñʌchʼtan i miʼ ñajʌyel i chaʼan, mucʼʌch i jacʼ jiñi tʼan, i tijicña mi caj i yubin ti chuqui miʼ mel».

Chaʼan maʼ cʌy jiñi lembal

Mach tiʼ pejtelelic jiñi muʼ bʌ i wen japob lembal miʼ sujtelob ti xyʌcʼʌjel. Pero an yaʼ jach bʌ cʌyʌlob ti lembal i ti bele ora miʼ japob. Tiʼ bajñelilob maʼañic miʼ mejlel i cʌyob yom miʼ cʼajtiñob i coltʌntel ti doctor. Alberto miʼ yʌl: «Tsaʼ cʼoti j qʼuel chaʼan jiñi estudio woli c chʼʌm loqʼuem bʌ ti Biblia mach jasʌlic jach chaʼan miʼ coltañon j cʌy jiñi lembal, yomʌch mic majlel ti doctor».

Cabʌlob xyʌcʼʌjeloʼ bʌ ti ñaxan tsaʼ cʼoti i qʼuelob chaʼan i cʼʌjñibalʌch lac chaʼan jiñi doctorob. * Chaʼan miʼ cʌyob i jap yicʼot chaʼan miʼ melob chuqui yom Dios tsajñobʌch ti doctor, an i cʼʌjñibal bʌ i chaʼañob tsʼac chaʼan miʼ mejlel i cʌyob jiñi lembal i an i cʼʌjñibal bʌ i chaʼañob come miʼ cʼamʼañob cheʼ miʼ cʌyob. Jinto jiñi i Yalobil Dios muʼ bʌ i mejlel i mel milagro, tsiʼ yʌlʌ: «Jiñi cʼocʼoʼ bʌ mach i cʼʌjñibalic i chaʼañob doctor, pero jiñi cʼamoʼ bʌ i cʼʌjñibalʌch i chaʼañob» (Marcos 2:17).

¿Chucoch yomʌch mi lac ñʌchʼtan Dios?

Jiñi wen tac bʌ ticʼojel am bʌ ti Biblia tilemʌch tiʼ sujm bʌ Dios. Yom chaʼan wen mi la cajñel tiʼ pejtelel ora i mach jumucʼ jach. Alberto, añix bʌ veinticuatro jab tsiʼ cʌyʌ i jap jiñi lembal muʼto i bej ñijcʌyel i pusicʼal cheʼ miʼ cʼajtesan tsaʼ bʌ i ñusa. Miʼ yʌl: «Cheʼ bʌ tsaʼ j cʌñʌ chaʼan mucʼʌch mejlel j qʼuextan c melbal yicʼot chaʼan Jehová yom i coltañon tsiʼ wen ñijca c pusicʼal». I miʼ bej al yicʼot i yaʼlel i wut: «I chaʼan, chaʼan Jehová miʼ chʼʌmbeñon i sujm, miʼ ñaʼtañon i miʼ coltañon cheʼ i cʼʌjñibal c chaʼan. Maʼañic baʼ ora mi caj c mejlel c tojben chuqui an i mele tic tojlel».

Jin chaʼan miʼ maʼ cʌlʌx jap lembal o yaʼ jach cʌyʌleti, chaʼlen wersa chaʼ maʼ ticʼ a bʌ. Alberto yicʼot yambʌlob tsaʼ mejli i ticʼob i bʌ chaʼan pʼisbil jach miʼ japob o miʼ junyajl cʌyob. Tijicñayob cheʼ tsiʼ meleyob bajcheʼ jiñi, i cheʼʌch mi caj a ubin a bʌ jaʼel mi tsaʼ mele.

Mi tsaʼ ñaʼta chaʼan pʼisbil jach mi caj a jap o maʼañix mi caj a jap, cʼajtesan ili i tʼan Jehová: «[Muqʼuic a jacʼ] c mandar, cabʌlix i ñʌchʼtilel a pusicʼal cheʼ bajcheʼ colem jaʼ woli bʌ ti ajñel. Añʌch toj bʌ a pusicʼal yicʼot cabʌl a pʼʌtʌlel cheʼ bajcheʼ wetsʼecña bʌ jaʼ» (Isaías 48:18).

[Nota tac]

[Recuadro yicʼot foto]

 «¿Wolix ba c ñumel ti pʼis?»

Cʼajtiben a bʌ:

• «¿Wolix ba c ñumen jap lembal cheʼ bajcheʼ ti ñaxan?»

• «¿Ti bele ora ba mic jap?»

• «¿Muqʼuix ba c mulan c jap ñumen pʼʌtʌl tac bʌ?»

• «¿Muʼ ba c jap chaʼan c lujbel o chaʼan mic ñajʌtesan c wocol tac?»

• «¿Am ba i subeyon juntiquil camigo o juntiquil c familia chaʼan cʌlʌxix mic jap?»

• «¿Am ba c taja wocol ti cotot, ti queʼtel o baqui añon ñumel ti caj jiñi lembal?»

• «¿Wocol ba mi cubin cheʼ maʼañic mic jap ti jumpʼejl semana?»

• «¿Wocol ba mi cubin cheʼ jiñi yambʌlob maʼañic miʼ japob?»

• «¿Mach ba añic mic sub bajcheʼ cʼamel tsaʼ c japʌ?»

Mi an baqui tsaʼ wʌlʌ chaʼan cheʼʌchi, yom maʼ chaʼlen wersa chaʼ pʼisbil jach maʼ jap jiñi lembal.

[Recuadro yicʼot foto]

Chaʼan maʼañic maʼ chaʼ ñaʼtan a bʌ

Cheʼ bʌ muʼto caj a jap lembal, ñaʼtan:

• «¿Yomʌch ba mic jap o maʼañic?»

Yom bʌ maʼ ñaʼtan: Mach a jap mi a wujil chaʼan wocol maʼ wubin chaʼan maʼ cʌy a jap.

• «¿Bajcheʼ cʼamel mi caj c jap?»

Yom bʌ maʼ ñaʼtan: Cheʼ bʌ muʼto caj a jap wʌn ñaʼtan bajcheʼ cʼamel mi caj a jap chaʼan mach wocolic maʼ wubin ti wiʼil.

• «¿Jala yom mic jap?»

Yom bʌ maʼ ñaʼtan: Mach a jap cheʼ mi caj a ñijcan carro o cheʼ an chuqui mi caj a mel, yom wen yʌxʌl a wo, mi jiñic cheʼ an chuqui mi caj a mel i chaʼan bʌ Dios. Yicʼot jaʼel mach yomic maʼ jap mi embarazadajet o mi woli a jap tsʼac.

• «¿Baqui yom mic jap?»

Yom bʌ maʼ ñaʼtan: Mach majlic a jap baqui mach weñic miʼ qʼuejlel, mach a jap ti mucul o baqui an cabʌl lac piʼʌlob mach bʌ weñic miʼ qʼuelob cheʼ mi lac jap.

• «¿Majqui mi caj jap yicʼotob?»

Yom bʌ maʼ ñaʼtan: A wicʼot a wamigojob o a familia pʼisbil jach bʌ bajcheʼ miʼ japob, mach a jap yicʼotob muʼ bʌ i wen mulañob lembal.

[Recuadro yicʼot foto]

Yambʌ tsaʼ bʌ mejli i cʌy jiñi lembal

Supot, chumul bʌ ti Tailandia, tsiʼ wen mulaj i jap lembal. Ti ñaxan cojaxto miʼ jap ti acʼʌlel, pero cʼunteʼ cʼunteʼ tsaʼ caji i jap ti sʌcʼan yicʼot ti xinqʼuiñil chaʼan jach yom miʼ yʌcʼan. Pero tsaʼ caji ti estudio yicʼot i testigojob Jehová i tsiʼ cʌñʌ chaʼan Dios mach weñic miʼ qʼuel jiñi xyʌcʼʌjelob. Jin chaʼan tsiʼ cʌyʌ i jap, pero mach jalic. Tsaʼ caji i chaʼ jap i jiñi i familia wen chʼijyem tsiʼ yubiyob.

Pero tsaʼʌch cʼoti i cʼuxbin Jehová i tsiʼ mulaj i chʼujutesan cheʼ bajcheʼ yom. Jiñi i yamigojob muʼ bʌ i cʼuxbiñob Jehová tsaʼʌch caji i coltañob, tiʼ subeyob jiñi i familia Supot chaʼan mach yomic miʼ ñaʼtañob chaʼan maʼañix i tsʼʌcal, yomʌch miʼ yajñel yicʼotob. Ti jimbʌ ora tsaʼ cʼoti i ñaʼtan muʼ bʌ i yʌl 1 Corintios 6:10, chaʼan jiñi xyʌcʼʌjelob maʼañic mi caj i yʌqʼuentelob jiñi i Yumʌntel Dios, tsiʼ chʼʌmbe i sujm chaʼan wocolʌch an. Tsaʼ cʼoti i ñaʼtan chaʼan yom miʼ cʌy jiñi yʌcʼʌjel mach yʌlʌlic chuqui yom miʼ mel.

Maʼañix mi caj i chʌn jap jiñi lembal. Wocolix i yʌlʌ jiñi yespíritu Dios, jiñi Biblia, i familia yicʼot jiñi congregación, tsiʼ taja i pʼʌtʌlel i tsaʼ mejli i cʌy. Jiñi i familia tsiʼ wen ubiyob i tijicñʌyel cheʼ bʌ tsiʼ qʼuelob tsiʼ chʼʌmʌ jaʼ bajcheʼ Testigo. Ili ora, Supot i yamigo Dios i miʼ coltan yambʌlob chaʼan miʼ cʌñob jaʼel.