¿Tiʼ jaku bʼant tuʼna tuʼn ya miʼn txi tkʼaʼna qʼeʼn?

BʼALO jakutoq tzalaja Tony toj tanqʼibʼil, aju ma qo yolin tiʼj toj tnejel xnaqʼtzbʼil, noqwit el tnikʼ tiʼj qa nim qʼeʼn in bʼajtoq tuʼn. Pero tuʼnju mintiʼ el kynikʼ txqantl tiʼj qa otoq bʼaj nim qʼeʼn tuʼn, kubʼ t-ximen qa mlaytoq tzaj nya bʼaʼn tiʼj. ¿Tiquʼn kubʼ tsbʼun tibʼ Tony?

Tuʼnju naj t-ximbʼetz tuʼn qʼeʼn. Maske el tnikʼ Tony tiʼj moqa mintiʼ, ya mintiʼ onin tcerebro tiʼj tuʼn tel tnikʼ tzeʼn taʼ t-xmilal, t-ximbʼetz ex aju in tnaʼn. Ax ikx, mas kwest el tnikʼ tiʼjju bʼaʼn tej t-xi tkʼaʼn nim qʼeʼn.

Ax ikx, bʼaj tkyaqil jlu tuʼnju nya tajtoq Tony tuʼn tkyaj tqʼoʼn vicio. Ax jlu bʼaj tiʼj Alberto. In tzaj tqʼamaʼn jlu: «In chin kʼantoqe toj ewaj ex ajtoq tbʼaj nim qʼeʼn wuʼne, in xi nqʼamaʼne qa nya nim otoq bʼaj wuʼne ex qa nya jun il. Oʼkx wajtoqe tuʼn nkʼane». Maske xi kyqʼamaʼn txqantl te Tony ex Alberto qa nim qʼeʼn in bʼaj kyuʼn, kubʼ kyximen qa aqe in che mandarin tibʼaj qʼeʼn. Noqtzun tuʼnj, atoq qʼeʼn in mandarin kyibʼaj. ¿Tiʼ jaku bʼant kyuʼn qeju ax jlu in bʼaj kyiʼj?

Bʼaʼn tuʼn tkubʼ t-ximana tiʼ tuʼn tbʼant tuʼna

Nim kyxol qeju o kyaj kytzaqpiʼn vicio lu o txi kybʼiʼn consej tqʼama Jesús: « Qa tuʼn tlaj tbʼaqʼ twitza tuj bʼanqʼabʼaj kbʼel tzʼaqa tuj il, qʼiʼmetza ex xoʼmixa; ex mas bʼaʼn tuʼn tnaj jun tbʼaqʼ twitza ex mya tuʼn t-xi qʼot tkyaqil t-ximlala tuj infierni [moqa Gehena, TNM]» (Mateo 5:29).

Tzalu ajbʼen jun techel tuʼn Jesús tuʼn tel qnikʼ tiʼj qa il tiʼj tuʼn tel qikʼun tkyaqilju jaku tzaj tiʼn nya bʼaʼn tiʼj qamiwbʼel tukʼil Dios. Maske jaku tzʼok jlu ik tzeʼn aj tel qʼiʼn jun plaj qxmilal, pero kʼonil qiʼj tuʼn miʼn qkubʼ tzʼaq toj qʼeʼn. Tuʼntzunju, qa o txi tqʼamaʼn jun xjal teya qa in bʼaj nim qʼeʼn tuʼna, maslo bʼaʼn tuʼn ya miʼn t-xi tkʼaʼna nim. * Qatzun ma tzʼel tnikʼa tiʼj qa mlay bʼant jlu tuʼna, ya miʼn txi tprobarina. Maske kwest kʼelel jlu teya, mas bʼaʼn twitzju tuʼn tnaj tanqʼibʼila.

¿Yajtzun qa naʼmx tkubʼ tzʼaq jun xjal toj vicio pero in bʼaj nim qʼeʼn tuʼn aj tkʼaʼn? Qa ikju, ¿tiʼ jaku bʼant tuʼn tuʼn miʼn tmandarin qʼeʼn tiʼj?

¿Jatumel jaku kanet onbʼil tuʼna?

1. Kukx naʼna Dios. In tzaj tqʼamaʼn Biblia jlu kye kykyaqil qeju in nok qeʼ kykʼuʼj tiʼj Dios ex kyaj tuʼn ttzalaj kyuʼn: «Mi jun tuʼn tbʼaj kykʼuʼje tiʼj; tkyaqil kymanxe te Dios tuj kynaʼj Diose; kyqaninxe te, ax ikx kyqʼonxe chjonte te. Kyjaʼtzun kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze, tuʼnju at kymojbʼabʼl kyibʼe tukʼil Jesucrist» (Filipenses 4:6, 7). Pero ¿tiʼ jaku t-xi tqʼamaʼna toj tnaʼj Diosa tuʼntzun ttzaj tqʼoʼn Dios mujbʼabʼil toj tanmiya?

Jaku txi tqʼamaʼna te Dios qa o naqʼeta tiʼj qʼeʼn ex qa o tzʼel tnikʼa tiʼj qa jaku tzaj nya bʼaʼn tiʼja tuʼn. Ax ikx, jaku txi tqʼamaʼna te tiʼ kbʼantel tuʼna tuʼn tkyaj tqʼoʼna vicio lu tuʼntzun miʼn ttzaj mas nya bʼaʼn tiʼja. In tzaj tqʼamaʼn Proverbios 28:13 jlu: «Aju xjal in che kubʼ tewan qe til, mlay tzʼel bʼaʼn te te; atzunju xjal in jatz tmaʼn til ex bʼiʼx nneʼl tpaʼn tibʼ tiʼj, kbʼel najsaʼn til». Ax ikx kyaj tqʼamaʼn Jesús tuʼn t-xi qqanin jlu toj qnaʼj Dios: «Ex miʼn taqʼa ambʼil tuʼn qoke tuj joybʼil qiʼje, noq oʼkx qo tkloma teju mya bʼaʼn» (Mateo 6:13). ¿Tiʼ jaku bʼant tuʼna tuʼn tkubʼ tyekʼina qa ax tok aju in xi tqʼamaʼna toj tnaʼj Diosa? ¿Jatumel jaku kanet tzaqʼwebʼil tuʼna tiʼjju in xi tqanina?

2. Jaku tzʼonin Tyol Dios tiʼja tuʼn tten tipumala. Bʼaʼn tuʼn ttzaj tnaʼna qa «aju tyol Dios itzʼte ex at tipumal, [...] ex in pon xuyl max tujxi qanmi, [...] ex nneʼl tnikʼ tiʼj qximbʼetz ex aju qaj tuʼn qbʼinchante» (Hebreos 4:12). Jun tiʼ o tzʼonin tuʼn tkyaj kytzaqpiʼn xjal vicio lu, aju tuʼn kyuʼjin tkyaqil qʼij tiʼj junjun taqikʼ Tyol Dios ex tuʼn kyximen tiʼj. Axju in kubʼ kynaʼn ik tzeʼn te salmista tej tqʼama jlu: «At tzalajbʼil teju xjal mintiʼ in xi tbʼiʼn kyconsej qe bʼinchal mya bʼaʼn, [...] noq oʼkx in tzalaj tiʼj tley Qman Dios, ex kukx in ximan tiʼj qʼijl ex qonikʼan». Ax ikx, tqʼama salmista tiʼ jaku tzaj tuʼn jlu, tqʼama: «Tkyaqilju in tbʼinchaʼn bʼaʼn nneʼla» (Salmo 1:1-3).

Nim onin tiʼj Alberto tuʼn tkyaj ttzaqpiʼn qʼeʼn tej t-xnaqʼtzan tiʼj Tyol Dios kyukʼil testigos de Jehová. In tzaj tqʼamaʼn jlu: «Noqwit mintiʼ in nxnaqʼtzane kyiʼj nabʼil ateʼkux toj Tyol Dios, mintiʼwtlo kyaj nqʼoʼne qʼeʼn ex jaʼlo owtlo chin kyime».

3. Bʼaʼn tuʼn tbʼant tjakʼunte tibʼa. In tzaj tqʼamaʼn Biblia qa ateʼ junjun okslal e kʼan qʼeʼn tej naʼmxtoq kyok te okslal, pero e bʼaj txʼajoʼn «tuʼn T-xew Qdios» (1 Corintios 6:9-11). ¿Alkye tten bʼant jlu? Onin xewbʼaj xjan kyiʼj tuʼn kyjakʼunte kyibʼ, tuʼn tkyaj kytzaqpiʼn qʼeʼn ex qe fiesta. Tuʼntzunju, in tzaj tqʼamaʼn Tyol Dios jlu: «Miʼn che kʼane qʼeʼn; [...] noq oʼkx tuʼn tnoj tuj kyanmiye tuʼn Xewbʼaj Xjan» (Efesios 5:18; Gálatas 5:​21-23). Ax ikx, kyaj ttziyen Jesús qa in tzaj tqʼoʼn Jehová «Xewbʼaj Xjan kye qeju in che qanin» te. Tuʼntzunju, tqʼamatl jlu: «Kyqaninxe, ex ktzajel tqʼoʼn Dios kyeye» (Lucas 11:9, 13).

Tuʼn ttzalaj Dios tiʼj jun xjal, il tiʼj tuʼn tjakʼunte tibʼ tiʼj qʼeʼn. Tuʼn tbʼant jlu tuʼn, nim toklen tuʼn tuʼjin ex tuʼn t-xnaqʼtzan tiʼj Biblia ex tuʼn kukx tnaʼn Dios tuʼn tkyaqil tanmi. Qa ma qo kubʼ numj, bʼaʼn tuʼn ttzaj qnaʼn jlu: «Aju xjal in tbʼinchaʼn tajbʼil tchibʼjal, knajel tuʼn tajbʼil tchibʼjal. Atzunju in tbʼinchaʼn tajbʼil Xewbʼaj Xjan, ktel tchwinqlal te jumajx tuʼn Xewbʼaj Xjan; ik tten jlu ik tzaʼn jun awal in kuʼx awet ex in jaw chmet twitz.  Kyjaʼtzun miʼn qo sikt tuʼn qbʼinchante aju bʼaʼn; porke ok qkʼmaʼ t-xel ok tpon tqʼijlalil, qa mintiʼ ma qo kubʼ numj» (Gálatas 6:8, 9).

4. Ximana tiʼj alkyeqe tamiwa che tel. In tzaj tqʼamaʼn Proverbios 13:20 jlu: «Qa ma tzʼok tjunin tibʼa kyukʼil qe xjal at kynabʼl, ktel tnabʼla, qatzun ma tzʼok tjunin tibʼa kyukʼil qe xjal mintiʼ kynabʼl, knajela». Qa ikju, bʼaʼn tuʼn t-xi tqʼamaʼn kye tamiwa qa ma kubʼ t-ximana tuʼn ya miʼn txi tkʼaʼna qʼeʼn. Ex miʼn jaw labʼina tiʼj qa ateʼ junjun che okel ten yolil nya bʼaʼn tiʼja ex kʼokel tilil kyuʼn tuʼn tkubʼ juntl maj tkʼuʼja kyuʼn. Atxix ojtxe ttzajlen tqʼamaʼn Biblia qa ateʼ xjal «in che labʼin» ex in che yolin «mya bʼaʼn» kyiʼj qeju in nok tilil kyuʼn tuʼn tkyaj kytzaqpiʼn «kʼaj qʼeʼn» ex qe achbʼil «tuj ninqʼij» (1 Pedro 4:​3, 4). Qa in bʼaj jlu tiʼja, maslo bʼaʼn tuʼn ya miʼn tok tjunin tibʼa kyukʼil xjal lu.

5. Bʼaʼn tuʼn tbʼaj t-ximana tiʼ kbʼantel tuʼna ex tiʼ miʼn bʼant tuʼna. In tzaj tqʼoʼn Romanos 12:2 nabʼil lu: «Miʼn che ok lpeʼye tiʼj kynabʼl xjal mya bʼaʼn, noq oʼkx kychʼexpum kynabʼle tuʼn kyoke te akʼaj, tuʼntzun kyojtzqinteye alkye tajbʼil Dios, tuʼn tel kynikʼe tiʼj alkye bʼaʼn, ex alkye in tzalaj Dios tiʼj ex alkye ju tzʼaqlxix». ¿Taja tuʼn ttzalaj Dios tiʼja? Qa ikju, bʼaʼn tuʼn t-ximana tiʼjju in tzaj tqʼamaʼn Tyol Dios ex nya tiʼjju in tzaj kyqʼamaʼn xjal. Pero ¿tzeʼn kʼelel tnikʼa tiʼj tiʼ kbʼantel tuʼna?

Qa ya ma naj tnabʼila tuʼn qʼeʼn ex in xi tqʼamaʼn junjun tiʼ nya toj ttxolil, in tzaj tyekʼin jlu qa otoq bʼaj nim qʼeʼn tuʼna. Tuʼntzunju, qa ma kubʼ t-ximana tuʼn tkʼana qʼeʼn, il tiʼj tuʼn tbʼajxix t-ximana jniʼ kbʼajel tuʼna tuʼntzun miʼn tnaj tnabʼila tuʼn. Miʼn kubʼ tsbʼuʼn tibʼa aj tkubʼ t-ximana jatumel ktela ex alqukʼil. Naʼntza jlu: mas bʼaʼn qa ma tzʼok qxqʼuqin qibʼ twitzju tuʼn qkubʼ tzʼaq toj il.

6. Bʼaʼn tuʼn t-xi tqʼamaʼna qa miʼn. Toj juntl yol, tuʼn tbʼant jlu tuʼna: «Noq oʼkx tuʼn t-xi kymaʼne ok ex qa miʼn» (Mateo 5:37). Qa in nok tilil tuʼn jun xjal tuʼn ttzaj tqʼamaʼn teya tuʼn t-xi tkʼaʼna chʼin qʼeʼn, maske nya taj tuʼn ttzaj nya bʼaʼn tiʼja, qʼamanxa te qa miʼn. Pero miʼn tzikʼ tnaʼl tuʼna tuʼn t-xi tqʼamaʼna toj tumel, ik tzeʼn in tzaj tqʼamaʼn Colosenses 4:6: «Chebʼa che yoline tkyaqil maj, atwit tchyaʼl kyyole, tuʼntzun tel kynikʼe tiʼj tzaʼn tten tuʼn t-xi kytzaqʼweʼne teyle junjun xjal».

7. Jyonxa onbʼil. Bʼaʼn tuʼn kyxi tjyoʼna tamiwa aqeju jaku tzʼel kynikʼ tiʼja, jaku che onin tiʼja tuʼn tbʼiʼna te Dios ex tuʼn tkyaj ttzaqpiʼna qʼeʼn. In tzaj tqʼamaʼn Biblia jlu: «Mas bʼaʼn kabʼe xjal twitzju noq junx xjal, ex kyjaʼtzun bʼaʼn kʼelel aju aqʼuntl in bʼant kyuʼn. Ex qa ma kubʼ tzʼaq jun, jaku jaw wabʼan tuʼn juntl» (Eclesiastés 4:​9, 10; Santiago 5:​14, 16). Ax consej lu in tzaj tqʼoʼn Instituto Nacional sobre el Abuso del Alcohol y el Al­coholismo te Estados Unidos. Tqʼamaʼn jlu: «Kyoj ambʼil jatumel kwest in nela teya tuʼn ya miʼn txi tkʼana qʼeʼn, qaninxa onbʼil kye toj tjaya ex kye tamiwa».

8. Kukx bʼinchama aju o bʼaj t-ximana. In tzaj tqʼoʼn Santiago 1:22 ex 25 nabʼil lu: «Kynimanxe ju yol, ex mya noq oʼkx tuʼn kybʼinteye, porke qa oʼkx in xi kybʼiʼne ex mintiʼ in japun kyuʼne, in kysbʼun kyibʼe. Atzun teju in kuʼx tkeʼyinxix tuj ley tzʼaqlxix, aju ley at tzoqpibʼl tuʼn, ex kukx in kuʼx tkeʼyin, ex mintiʼ nnikʼ tnaʼl tuʼn aju in tbʼiʼn, noq oʼkx in japun tuʼn, atzunte jlu at tzalajbʼil te tiʼj ju in tbʼinchaʼn».

Jaku kyaj ttzaqpiʼna vicio

Ax tok, nya kykyaqil qeju in xi kykʼaʼn chʼiʼn qʼeʼn in che naqʼet tiʼj jlu. Pero aqeju in xi kykʼaʼn nim qʼeʼn moqa nim maj in xi kykʼaʼn, in naqʼet kyxmilal ex kyximbʼetz tuʼn. Qa ikju, aju xjal taj tuʼn tkyaj ttzaqpiʼn vicio, nya oʼkx kbʼajel t-ximen tuʼn tkyaj tqʼoʼn ex nya oʼkx kxnaqʼtzal tiʼj Tyol Dios, sino taj mas onbʼil. In tzaj tnaʼn Alberto jlu: «Nim kʼixkʼoj kubʼ nnaʼne tej t-xi tzyet tuʼn tkyaj qʼoʼne qʼeʼn. Toj ambʼil lu el nnikʼe tiʼj qa nya oʼkx tuʼn ntzaj onine tuʼn tel nnikʼe tiʼj Dios, sino ax ikx iltoq tiʼj tuʼn nxiʼye tukʼil jun doctor».

Ax jlu in tzaj kyqʼamaʼn xjal otoq che naqʼet tiʼj qʼeʼn. * Tuʼn tel qʼeʼn kyiʼj junjun xjal ex tuʼn ttzalaj Dios kyiʼj, o cheʼx toj jun spital moqa tukʼil jun doctor tuʼn ttzaj qʼoʼn jun qʼanbʼil kye tuʼntzun ya miʼn ttzaj tqanin kykʼuʼj qʼeʼn. Ax ikx tqʼama Jesús jlu, aju tkʼwal Dios e bʼant milagr tuʼn: «Qe xjal bʼaʼn, mya il tiʼj jun qʼanal kye, noq oʼkx qe xjal yabʼ» (Marcos 2:17).

Aju tbʼanel jaku tzaj qa ma txi qbʼiʼn Dios

Atz in che tzaj kykyaqil nabʼil ateʼ toj Biblia tukʼil Dios. Taj Dios tuʼn qten toj tbʼanel, nya oʼkx toj chʼin ambʼil, sino te jumajx. Kukx in tzalaj Alberto aju ma tzikʼ 24 abʼqʼi tkyajlen ttzaqpiʼn qʼeʼn, aj ttzaj tnaʼn aju ikʼ tiʼj. Chʼixtoq tjaw oqʼ tej ttzaj tqʼamaʼn jlu: «Kuʼpin toj wanmiye tej tel nnikʼe tiʼj qa tajtoq Jehová tuʼn tonin wiʼje, qa... qa in nel tnikʼ wiʼje, qa in ximen wiʼje ex qa in chin tzaj onine tuʼn toj ambʼil mas at tajbʼen weye. Mlayx bʼant tchjet wuʼne tkyaqilju o bʼant tuʼn Jehová wiʼje».

Tuʼntzunju, qa in bʼaj nim qʼeʼn tuʼna moqa in kubʼ tnaʼna qa ya mlay kyaj ttzaqpiʼna vicio lu, miʼn tzaj bʼaj tkʼuʼja. Otoq naqʼet Alberto ex junjuntl xjal tiʼj qʼeʼn, pero o bʼant tuʼn kyjakʼunte kyibʼ tiʼj qʼeʼn moqa ya mintiʼ in xi kykʼaʼn. Mintiʼ in tzaj kybʼis tuʼnju o tzʼok tilil kyuʼn tuʼn tkyaj kytzaqpiʼn qʼeʼn, ax ikx teya mlay tzaj tbʼisa qa ma bʼant jlu tuʼna.

Qa ma kubʼ t-ximana tuʼn txi tkʼaʼna chʼin qʼeʼn moqa ma kubʼ t-ximana tuʼn miʼn t-xi tkʼaʼna nix jun txut, bʼaʼn tuʼn kukx ttzaj tnaʼna qe tyol Qman Jehová lu: «Noqwit xi kynimane aju xi nmaʼne kyeye, mawtlo che tene tuj txubʼtxaj nimxix ik tzaʼn jun nima nojni tuʼn aʼ, ex aju in kybʼinchaʼne, bʼaʼnwtlo ma tzʼel kyeye ik tzaʼn ju aʼ in jaw xtulqʼin tibʼaj mar» (Isaías 48:18).

[Qe tqanil]

[Aʼyeju recuadro ex qe tilbʼilal]

 «¿Ape qʼeʼn in mandarin weye?»

Ximana kyiʼj xjel lu:

• «¿Maspe nim qʼeʼn in bʼaj wuʼne jaʼlo twitzju ojtxe?»

• «¿Tkyaqilpe maj in xi nkʼane qʼeʼn?»

• «¿Maspe nim qʼeʼn in xi nkʼane?»

• «¿In xipe nkʼane qʼeʼn qa otoq chin sikte moqa tuʼn miʼn ttzaj nnaʼne jun nya bʼaʼn?»

• «¿Ope tzaj tqʼamaʼn jun toj njaye weye moqa jun wamiwe qa nim qʼeʼn in bʼaj wuʼne?»

• «¿Ope tzaj tiʼn qʼeʼn jun nya bʼaʼn wiʼje kyukʼil toj njaye, toj aqʼuntl moqa tej nxiʼye pasialil?»

• «¿Kwestpe tuʼn tex jun seman wuʼne qa ma mintiʼ ma chin kʼane qʼeʼn?»

• «¿In kubʼpe nnaʼne nya bʼaʼn qa mintiʼ ma txi kykʼaʼn junjuntl xjal qʼeʼn?»

• «¿In kubʼpe wewine jniʼ qʼeʼn in bʼaj wuʼne?»

Qa ma txi ttzaqʼweʼna qa ikju tiʼj jun xjel moqa tiʼj mas te jun, nimlo toklen tuʼn tjakʼunte tibʼa tiʼj qʼeʼn.

[Aʼyeju recuadro ex qe tilbʼilal]

¿Tiʼ jaku bʼant tuʼna tuʼn miʼn ttzaj tbʼisa yajxitl?

Naʼmxtoq t-xi tkʼaʼna qʼeʼn, ximana tiʼj jlu:

• «¿Bʼaʼnpe tuʼn t-xi nkʼaʼne qʼeʼn moqa miʼn?»

Aju nabʼil: Qa ojtzqiʼn tuʼna qa kwest tuʼn tel tnikʼa tiʼj jniʼ tuʼn t-xi tkʼaʼna, mas bʼaʼn tuʼn miʼn t-xi tkʼaʼna nix chʼin.

• «¿Jteʼ copa jaku txi nkʼaʼne?»

Aju nabʼil: Bʼaʼn tuʼn tbʼaj t-ximana jniʼ qʼeʼn kxel tkʼaʼna naʼmxtoq tnaj tnabʼila.

• «¿Toj alkye ambʼil bʼaʼn tuʼn nkʼane qʼeʼn?»

Qe nabʼil: Mintiʼ tuʼn tkʼana qʼeʼn qa kmanejarila moqa ilxix tiʼj tuʼn tok tqʼoʼna twiʼya tiʼj jun tiʼ, nix qa kbʼantel jun aqʼuntl tuʼna toj tokslabʼila. Ax ikx, nya bʼaʼn tuʼn t-xi tkʼaʼna qa o tzʼok ten tala moqa in xi tkʼaʼna junjun qʼanbʼil.

• «¿Jatumel bʼaʼn tuʼn nkʼane qʼeʼn?»

Qe nabʼil: Nya bʼaʼn tuʼn tkʼana qʼeʼn kyoj lugar nya bʼaʼn, nix toj ewaj, nix kywitz xjal in kubʼ kyximen qa nya bʼaʼn tuʼn qkʼaʼn qʼeʼn.

• «¿Alqukʼil bʼaʼn tuʼn nkʼane qʼeʼn?»

Qe nabʼil: Kyukʼil tbʼanel tamiwa ex qe toj tjaya; pero nya kyukʼil qeju o che naqʼet tiʼj qʼeʼn.

[Aʼyeju recuadro ex qe tilbʼilal]

Aju ikʼ tiʼj juntl xjal

In nanqʼin Supot atz Tailandia, ex otoq naqʼet tuʼn tkʼan tiʼj qʼeʼn. Tej t-xi tzyet tuʼn, oʼkx kʼan te qonikʼen ex chebʼe chebʼe ok ten kʼal te prim ex yajxitl, ax ikx te tmij qʼij. Oʼkxtoq in kʼan tuʼn tok te bol moqa tuʼn ttxʼujti. Noqtzun tuʼnj, xi tzyet tuʼn t-xnaqʼtzan tiʼj Biblia kyukʼil testigo de Jehová ex el tnikʼ tiʼj qa nya tgan Dios qe xjal in che kʼan nim qʼeʼn. Tuʼntzunju, kyaj ttzaqpiʼn qʼeʼn, pero noq chʼin ambʼil. Tzaj nimxix kybʼis toj tja tej tkubʼ tzʼaq juntl maj toj vicio lu.

Maske bʼaj jlu, otoq chʼiy tkʼujlabʼil Supot tiʼj Jehová ex tajtoq tuʼn tajbʼen te toj tumel. Kukx e onin erman tiʼj, ax ikx xi kyqʼamaʼn kye toj tja tuʼn miʼn tkubʼ kyximen qa mlayx tzʼel qʼeʼn tiʼj ex tuʼn tel kypaʼn mas ambʼil tuʼn kyten tukʼil. Toj ambʼil aju el tnikʼ tiʼjju in tzaj tqʼamaʼn 1 Corintios 6:10, jatumel in tzaj tqʼamaʼn qa mintiʼ kyoklen kʼal qʼeʼn tiʼj Tkawbʼil Dios, tuʼn jlu el tnikʼ tiʼj qa jun il aju in bʼant tuʼn. Iktzun tten onin jlu tiʼj tuʼn tkyaj tqʼoʼn vicio lu.

Toj ambʼil aju otoq kubʼ t-ximen tuʼn ya miʼn tkʼan qʼeʼn. Tuʼn tonbʼil xewbʼaj xjan, Tyol Dios, qe toj tja ex qe erman, ten tipumal tuʼn tkyaj ttzaqpiʼn vicio lu. Nimxix e tzalaj toj tja tej tok kyqʼoʼn kywitz tiʼj tej tbautisarin ik tzeʼn testigo de Jehová. Toj ambʼil jaʼlo, at jun tbʼanel tamiwbʼil Supot tukʼil Dios ik tzeʼn kubʼ t-ximen ex in nonin kyiʼj txqantl tuʼn tok kyojtzqiʼn Dios.