Bibel Mambahen Denggan Ngolukku

“Burju do Nasida tu Au.”​—GUADALUPE VILLARREAL

TUBU TAON: 1964

NEGERI ASAL: MEKSIKO

RIWAYAT HIDUP: DANG HASEA PANGALAHONA

NGOLUKKU NA UJU I: Tikki gelleng tinggal di Hermosillo na di Sonora, Meksiko do au. Daerah na kotor do i jala godang do disi halak na pogos. Pitu ma hami tubu ni omak. Nungnga mate bapak tikki gelleng dope au. Jadi, omak ma na massari lao memenuhi kebutuhannami. Dang hea au marsolop manang marsipatu, alana dang adong hepeng ni omak. Mulai sian na gelleng, nungnga massari au lao mangurupi omak. Jala marsoppit-soppit ma hami tinggal di jabu na gelleng, sarupa ma songon keluarga na asing na disi.

Sadari manipat, dang hea omak di jabu manjaga hami. Jadi tikki marumur onom taon, adong ma sahalak bawa na marumur 15 taon memperkosa au. Sering do i diulahon ibana tu au. Akibatna, gabe dang normal be au. Gabe lomo ma rohakku tu bawa. Lao do au tu dokter dohot tu pastor mangido asa diurupi. Alai didok nasida, dang pola boha molo songon i au.

Tikki marumur 14, barani ma au patuduhon tu halak na homoseksual au. Songon i ma ngolukku sappe 11 taon dukkon i. Tikki i, adong do piga-piga bawa na gabe hallettu jala olo do au rap tinggal dohot halletti. Ujungna, dohot ma au kursus salon jala gabe karejo ma au di sada salon. Alai dang hea las rohakku. Sering do au merasa putus asa jala merasa dihianati. Huhilala ma, dang denggan molo torus songon i ngolukku. Jadi mulai ma sukkun-sukkun rohakku, ‘Adong do halak na burju jala denggan pangalahona?’

Gabe huingot ma kakakku. Marsiajar Bibel do ibana dohot Saksi Jahowa jala tardidi. Sering do diceritahon ibana tu au taringot na diparsiajari ibana, alai dang hea huparrohahon i. Nang pe songon i, salut do au mangida nasida sekeluarga. Marsihaholongan do ibana dohot suamina, masipasangapan, jala burju do nasida. Di pudian ni ari, gabe dohot ma au marsiajar Bibel dohot Saksi Jahowa. Mulana dang pola semangat au marsiajar, alai dukkon i muba ma sikaphu.

SONGON DIA BIBEL PAUBAHON NGOLUKKU: Diajak akka Saksi i ma au tu parpunguan ni nasida. Jadi huoloi ma. Pengalaman na baru do i di au. Biasana, direhei akka halak do au. Alai molo Saksi Jahowa dang songon i. Burju do nasida tu au jala diargai nasida do au, sappe naeng tangis ma au.

Huhilala ma muse haburjuon ni Saksi Jahowa tikki ro au tu kebaktian. Nang pe godang nasida tikki i, alai kompak do nasida sude. Songon kakakku do nasida huhilala, jujur jala tulus. Jadi hudok ma di rohakku, on do ra akka halak na hulului saleleng on. Akka halak na burju jala na denggan pangalahona. Salut do au mangida nasida, alana marsihaholongan do nasida jala marsada. Asing ni i, boi do dialusi nasida sude sukkun-sukkunku sian Bibel. Gabe sadar ma au, pasti Bibel do na mangurupi nasida makana boi nasida gabe songon i. Jala huboto ma muse, ikkon muba do au asa boi gabe songon nasida.

Alai ikkon godang do perubahan na hubahen. Alana saleleng on hira boru-boru do au. Ikkon hupauba do carakku makkatai, pardalanku, pakkeanku, gaya ni obukku, dohot akka donganku. Direhei akka donganku najolo ma au, “Boasa pola muba ho? Ai normal do ho. Unang pola marsiajar Bibel ho. Ai nga sonang ngolum.” Alai hamubaon na paling maol huulahon, i ma maninggalhon pangalahokku najolo.

Nang pe songon i, huboto do pasti boi au muba. Pos do rohakku tu hata na disurat di 1 Korint 6:9-11 na mandok, “Na so diboto hamu do dang adong parbagianan ni halak na so mangulahon na sittong di Harajaon ni Debata? Unang hamu lilu. Halak na mangulahon seks na so patut, na manomba patung, na mangalakkup, bawa na olo ditogihon mangulahon seks dohot bawa, bawa na mangulahon seks dohot bawa . . . dang adong parbagiananna di Harajaon ni Debata. Adong do deba sian hamu na songon i pangalahona najolo. Alai nungnga dipaias be hamu saonari.” Najolo, diurupi Jahowa do halak na olo muba. Jadi pasti diurupi Jahowa do au. Memang ikkon berjuang do au saleleng piga-piga taon asa boi muba. Alai ala diurupi Saksi Jahowa au jala boi huhilala holong ni nasida, gabe boi ma au muba.

LABA NA HUDAPOT: Saonari nungnga normal be ngolukku. Nungnga adong be istrikku jala huajari hami do gellengnami asa mangihutton prinsip ni Debata na adong di Bibel. Nungnga boi be hutinggalhon ngolukku na uju i. Saonari, boi ma huhilala pasu-pasu ni Jahowa jala dilehon do tanggung jawab tambahan tu au gabe sintua di hurianami. Jala boi do huurupi akka halak marsiajar Bibel. Las do roha ni omakku mangida hamubaon di ngolukku. Gabe olo ma ibana marsiajar Bibel jala tardidi. Ibotokku pe nungnga gabe Saksi Jahowa, nang pe dang denggan pangalahona najolo.

Akka halak na mananda au najolo pe mangakkui, nungnga muba ngolukku gabe lam denggan. Jala huboto do aha na mambahen au muba. Hea do au lao tu dokter mangido asa diurupi, alai dang denggan saran na dilehon nasida. Jadi, Jahowa do sebenarna na mangurupi au. Nang pe huhilala dang mararga dirikku, diparrohahon jala dihaholongi Ibana do au. Jala sabar do Ibana tu au. Olo do Debata na marbisuk jala na parholong i mamparrohahon au jala lomo do rohana asa lam denggan ngolukku. On ma na mambahen au muba.