Bíblia ta muda vida di algen

“Es trata-m ku ruspetu.” — GUADALUPE VILLARREAL

ANU KI EL NASE: 1964

PAÍS KI EL NASE: MÉXIKU

SE VIDA NA PASADU: UN STILU DI VIDA MARIADU

MODI KI ÉRA NHA VIDA ANTIS: N kriadu na un família di 7 fidju na sidadi di Hermosillo, na Sonora, na Méxiku, un lugar txeu póbri. Nha pai móre kantu ki N staba pikinoti. Nton nha mai tevi ki trabadja pa pode kuida di nos. N ta andaba pé na txon pamodi nu ka tinha dinheru pa kunpra sapatu. N kumesa ta trabadja sédu, asi pa N pode djuda ku dispéza na família. Sima txeu família, nos kaza éra pikinoti i txeu pertadu.

Normalmenti di dia, nos mai ka ta staba djuntu ku nos pa proteje-nu. Ku 6 anu, N kumesa ta sufri abuzu seksual di un rapás ki tinha 15 anu. Kel-li dura txeu ténpu. I pamodi kel-li, N fika konfuzu si N ta gostaba di ómi ô di mudjer. I pamodi kel-li N fika ta xinti ma é normal gosta di ómi. Kantu N djobe ajuda na alguns dotor i pastor, es fla-m ma N ka tinha ninhun prubléma i ma kel sentimentu ki N staba ta xinti éra normal.

Kantu N tinha 14 anu, N disidi fla tudu algen ma mi éra omoseksual. N kontinua ta vive si duránti 11 anu i duránti kel ténpu N ranja ku txeu ómi i N vive ku es. N faze un formason pa N prende konpo kabélu i N abri un salon. Má simé, N ka staba ta xinti filís. Nha vida éra xeiu di sufrimentu i N ta xintiba traídu. N xinti ma kel kuza ki N staba ta faze ka éra dretu. N kumesa ta pergunta nha kabésa: “Ta izisti algen dretu i ki nu pode kunfia?”

N pensa na nha irman. El kumesa ta studa Bíblia ku Tistimunhas di Jeová i el batiza. Dja el flaba mi kuzê ki el staba ta prende ma N ka ta ligaba. Má simé, N ta fikaba dimiradu ku se manera di vive i ku se kazamentu. N ta odjaba ma el ku se maridu ta amaba i ta ruspetaba kunpanheru. Es ta trataba kunpanheru ku bondadi. Ku ténpu, un Tistimunha di Jeová kumesa ta studa Bíblia ku mi. Na komésu, N ka mostra txeu interesi. Ma dipôs kuzas muda.

MODI KI BÍBLIA MUDA NHA VIDA: Tistimunhas di Jeová konvida-m pa un di ses runion i N bai. Foi un kuza novu pa mi. Normalmenti, pesoas ta fazeba mi trósa, má Tistimunhas di Jeová nau. Es trata-m ku ruspetu i es da-m valor. Kel-la mexe ku mi.

N gostaba di Tistimunhas di Jeová, má N pasa ta gosta inda más txeu di es kantu N sisti un asenbleia. N odja ma sikrê na grupu más grandi, es éra sima nha irman, verdaderu i sinseru. N pergunta nha kabésa si es éra kel grupu di algen dretu i ki ta da pa kunfia ki dja ten txeu ténpu ki N staba ta djobe. Ses amor i union pô-m ta fika dimiradu, i tanbê modi ki es ta uza Bíblia pa responde tudu pergunta. N da kónta ma es éra bon algen pamodi es ta sigiba kel ki Bíblia ta inxina. N da kónta tanbê ma N tinha ki faze txeu mudansa pa N fika sima es.

N tinha ki mudaba nha vida konpletamenti, pamodi N staba ta vive sima un mudjer. N tinha ki mudaba nha manera di pâpia, nha manera di konporta, di bisti, di pentia i nhas amizadi. Kes amigu ki N tinha kumesa ta faze-m trósa i ta fla: “Pamodi ki bu sta faze kel-li? Bu staba dretu sima ki bu staba. Ka bu studa Bíblia. Bu ten tudu kuza ki bu meste.” Mudansa más difísil ki N tevi ki faze foi muda nha stilu di vida mariadu ki N tinha.

Má N sabia ma N podia fazeba kes mudansa grandi la, pamodi kuzê ki Bíblia ta fla na 1 Coríntios 6:9-11 toka nha korason: ‘Ô nhos ka sabe ma kes injustu ka ta erda Reinu di Deus? Ka nhos dexa nada ngana nhos. Kes ki ta faze konportamentu seksual mariadu, kes ki ta faze idolatria, kes ki ta faze adultériu, kes ki ta seta séksu ómi ku ómi, kes ki ta faze séksu ómi ku ómi. . . ka ta erda Reinu di Deus. Má, alguns di nhos éra asi. Má nhos labadu.’ Jeová djuda pesoas na kel ténpu faze mudansas i el djuda-m tanbê. Leba txeu anu pa N muda i N pasa pa txeu difikuldadi. Má, amor ku orientason di Tistimunhas di Jeová djuda-m txeu.

BENSONS KI N RESEBE: Oji N ta leba un vida normal. N kaza, i mi ku nha mudjer nu ta djuda nos fidju vive di akordu ku prinsípius di Bíblia. Vida ki N ta lebaba antis, fika pa tras i oji N ten txeu bensons i priviléjius spritual. Ami é ansion na kongregason i N sta ta konsigi djuda otus algen prende verdadis ki sta na Bíblia. Mudansas ki N faze na nha vida dexa nha mai txeu kontenti. El seta un studu di Bíblia i gósi el é nos irman. Nha irman más nova ki tanbê ta lebaba un stilu di vida mariadu, bira un Tistimunha di Jeová.

Ti kes algen ki sabia ma N ta lebaba un vida mariadu, ta rekonhese ma N midjora. I N sabe pamodi ki N midjora. Antis N ta djobeba ajuda di dotor, má N resebe sô maus konsedju. Má Jeová djuda-m di verdadi. Nbóra N ta xinti ma N ka merese, el repara na mi i el trata-m ku amor i paxénxa. Sabe ma un Deus rei di bon, intilijenti i amorozu repara na mi i krê pa N midjora nha vida da-m forsa pa N faze mudansas.