Библия чуртасты алыстырча

ХАЙДИ туюх панк кізілерге хынарға паза полызарға ӱгреніп алған? Мексикадағы ир кізіні сайбах чуртазын артыс саларға ниме кӧӧктірген? Ноға Япониядағы иң чахсы велогонщиктернің пірсі, Худайға нымысчыланар ӱчӱн, улуғ спорттаң парыбысхан? Пу кізілер постарынаңар ниме чоохтапчалар?

«Мин чабал, кӧдірілҷек паза хазыр кізі полғам» (ДЕННИС О’БЭРН).

ТӦРЕЕН ЧЫЛЫ: 1958

ТӦРЕЕН ХАЗНА: АНГЛИЯ

ХАҶАН-ДА: ПАНК

МЫНЫҢ АЛНЫНДА. Минің пабам Ирландияда тӧреен, аннаңар мин кічігдең сығара Ирландиядағы католиктернің тигірибінің кізізі полғам. Мин тигірибзер чӧрерге хынмазам даа, кӧбізін чалғысхан чӧрҷем. Духовнай нимелер мағаа хынығ полғаннар. Удаа «Отче наш» тіп пазырысты хатап-хатап чоохтанҷам. Хайди хараазын тӧзегімде ол пазырыстаңар сағынчатханымны ам даа сағысха кирчем. Мин аны нинҷе-де чардыхха чарҷам паза полған на чардых нимені таныхтапчатханын піліп аларға кӱстенҷем.

Саарбах туста мин растафарианскай движениенің кӧрістерінең айғас сыххам. Антинацистскай лиганың кӧрістері мағаа ідӧк чағын полғаннар. Че соонаң мин панк-рок движениезіне хозыл парғам. Олар тоғырланыс кӧңніліг полғаннар. Мин наркотиктернің холына кір парғам. Марихуана чох пол полбаҷам. «Ниме дее полчатсын, кирегім чоғыл» — минің девизім андағ полған. Аннаңар мин араға иртіре ісчем, чуртазымны хорғысха кирҷем паза пір дее кізее хайбаҷам. Мин чоохтаспас, туюх кізі полғам, мағаа хынығ ла кізілернең чоохтасчам. Ідӧк мин сомға суурынарға хынмаҷам. Позымны сағысха кирзем, мин чабал, кӧдірілҷек паза хазыр кізі полғам. Чағын на кізілерге паарсах паза сыйҷы полғам.

Мағаа 20-ҷе час полғанда, мин Библияа тартыл сыххам. Наркотиктер сатхан арғызым, харибде одырчатханда, Библия хығыр сыххан. Піс религиядаңар, тигірибдеңер паза Сайтан чир-чалбахнаң ниме итчеткеннеңер нинҷе-нинҷе час чоохтазып одырҷаң полғабыс. Библиядаң хайдағ-да кизекті хығырып алып, піс арғызымнаң хада ол кизекті ӱзӱрҷең полғабыс. Аны ӱзӱріп, хайдағ-да сағысха килҷең полғабыс. Іди нинҷе-де ай ирт парған.

Піс піліп алғабыс: пу чир-чалбахтың тӱгенҷі кӱннерінде чуртапчабыс; христианнар Худайның Хан-ӱлгӱзінеңер чахсы хабарны искірерге киректер; олар пу чир-чалбахтың чардығы полбасха паза политикаа ара кірбеске киректер; Библияда нравственнай нормалар пар. Піс ікінҷілебеебіс: Библия сын паза сын религия пар поларға кирек. Че религияларның аразында хайдағ религия сын? Піс пай кибірліг паза политикада араласчатхан религиялардаңар сағынғабыста, олар Иисустың кӧңніне кірбинчеткенін піліп алғабыс. Худай оларда чоғыл тіп сағысха килгебіс, аннаңар пасха таныс нимес религияларнаң паза оларның ӱгредіглерінең танызып аларға пӧгін алғабыс.

Піс аймах-пасха религияның кізілерінең тоғазып, оларға нинҷе-де сурығ турғысчаң полғабыс. Хайди Библия ол сурығларға нандырчатханын піс пілгебіс, аннаңар ол кізілернің нандырығлары Худай Сӧзіне килістіре бе, чох па піліп аларға оой полған. Ол кізілернең чоохтасхан соонда, мин Худайға пазырҷам: «Пу кізілер сын религияның кізілері полза, оларға хатап тоғазарға кӧңнім ползын». Нинҷе-де ай ирт парған, че минің сурығларыма Библия пастыра нандыр полар кізі таап полбаам. Аның алнында чоохтасхан кізілернең хатап тоғазарым килбеен.

Піс арғызымнаң хада Иегованың киречілерінең танызып алғабыс. Піс оларға олох сурығлар турғысхабыс. Олар піске Библия хоостыра нандыр пиргеннер. Олар пістің пілістерібіске килістіре нандырғаннар. Андада піс Худай тамкы тартханына паза наркотиктерге хайди кӧрче тіп сурғабыс. Піс ол сурыға Библияда нандырығ таппаабыс. Олар пу сурыға ідӧк Библия хоостыра нандырғаннар! Піс Иегованың киречілерінің залындағы чыылығларға парарға идібіскебіс.

Мағаа анда аар полған. Мин кізінең чоохтаспас кізі полғам. Миннең паарсах паза иптіг тонаных кізілер чоохтассалар, хынмаҷаң полғам. Оларның піреезі прай чӱрекнең чоохтасханнарында ікінҷілеем паза ол чыылығларға чӧрерге хынмаам. Мин, мының алнындағох чіли, Худайға пазырып алғам. Ол кізілер сын религиядаң ползалар, оларнаң хатап тоғазарым килзін тіп сурынғам. Анаң Иегованың киречілерінең Библия ӱгренерім килібіскен.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Наркотиктерні тастирға кирек полчатханын мин пілгем. Наркотиктерні оой ла тастабысхам, тамкы тастирға, тізең, сидік полған. Мин нинҷе-де хати тастирға кӱстенгем, че пір дее ниме киліспеен. Сигареталарын тастабызып, паза тамкы тартпаан кізілердеңер ис салзам, мин олардаңар Иеговаа чоохтаҷаң полғам. Пола-пола Иегованың полызиинаң мин тамкы тастабысхам. Андада мин Худайға, прай чӱрек азып, пазырарға кирек полчатханын піліп алғам.

Ағаа хоза, мағаа тастындағы кӧрімімні алыстырарға киліскен. Иегованың киречілерінің залынзар пастағызын килгемде, састарым чіке турғаннар, пазымның ортазында кӧк полоска полған. Анаң мин састарымны хызыл-сарығ сырнаң сырлабысхам. Мин джинсы паза сӧстер пазыл парған тууп куртка кисчеңзім. Иегованың киречілері тастындағы кӧрімімні алыстырарға чоохтааннар, че мин пір дее ниме алыстырарға хынмаам. Пірсінде мин 1 Иоанның 2:15—17-гі сӧстердеңер сағынғам. Анда чоохталча: «Сірер пу Худайы чох чир-чалбахха паза андағы нимелерге хынмаңар. Оларға хынчатхан кізінің Худайға хынызы чоғыл». Мин мындағ сағысха килгем: минің тастындағы кӧрімімде пу чир-чалбахха хыныс кӧрінген. Худайға хыныс кӧзідер ӱчӱн, мағаа алызарға кирек полған. Мин алыс сыххам.

Пола-пола Иегованың киречілері ле нимес, че Худай, мині чыылығларға чӧрзін тіп, хынчатханын піліп алғам. Анзын піліп аларға Еврейлерге 10:24, 25-гі сӧстер полыс пиргеннер. Прай чыылығларға чӧр сыххамда, ӧмедегі кізілернең чахсы арах танызып алғам. Анаң Иеговаа пазырыста чуртазымны пирібізіп, кіреске тӱскем.

ЧУРТАЗЫМА ХАЙДАҒ ТУЗА АҒЫЛҒАН. Иегова піске аның нанҷызы поларға оңдай пирчеткені минің чӱрееме уғаа тың теңен. Аның піске сағыссырааны паза айааны ағаа кӧӧгерге паза аның Оолғының, Иисус Христостың, соонҷа парарға кӧӧктірген (1 Петрның 2:21). Мин піліп алғам: христианин пол парзам даа, олох позым халам. Мин кізілерге хынызымны кӧзідерге паза оларға хайығ саларға кӱстенгем. Ам даа ипчімнең паза оолғымнаң, Христос чіли, тудынарға паза ӧмедегі харындас-пиҷелерге полызарға кӱстенчем. Христостың соонҷа парып, мин позымны улуғлап сыххам паза пасха кізілерге хынарға ӱгреніп алғам.

«Олар миннең улуғласнаң тудынғаннар» (ГВАДАЛУПЕ ВИЛЬЯРРЕАЛЬ).

ТӦРЕЕН ЧЫЛЫ: 1964

ТӦРЕЕН ХАЗНА: МЕКСИКА

ХАҶАН-ДА: САЙБАХ ЧУРТАС АПАРҒАН

МЫНЫҢ АЛНЫНДА. Мин Эрмосильо (штат Сонора, Мексика) тіп саарда тӧреем. Анда кӧбізі хызылып чуртаан. Пабам, мин кічіг полғамдох, ӱреен, аннаңар іҷебіс пісті, читі паланы, чалғысхан ӧскірген. Пістің ӧдік аларға ахча чох полған, аннаңар мин кӧбізін чалаас азах чӧргем. Іҷеме полызар ӱчӱн, кічігдең сығара тоғынғам. Піс кічиҷек турада чуртаабыс, кӧп сӧбірелер іди чуртааннар.

Іҷем ибде удаа чох полҷаң, аннаңар пісті арачылаҷаң кізі чох полған. Мағаа 6 час полғанда, 15 частығ оолах мағаа кӱл салған. Ол мині нинҷе-нинҷе хати іди иткен. Пола-пола минің секске саба кӧріс пол парған. Ир кізілернең оралысханын хомай нимее санабин сыххам. Андағ даа полза, мин имҷілерзер паза абыстарзар, полызығ сурынып, айланҷам. Че олар мағаа синнең прай ниме чахсы паза кізілернің андағ чувстволар полчалар тіҷеңнер.

Мағаа 14 час полғанда, гомосексуалист чіли, тудын сыххам, оларох чіли, тонан сыххам. 11 чыл андағ чуртас апарғам, нинҷе-де ир кізінең чуртаам. Мин парикмахерге ӱгреніп алғам паза салон красоты азып алғам. Минің чуртазыма ачырғаныс, ирее паза киртістіг нимес кізілер толдыра полғаннар. Саба чуртас апарчатханымны пілінгем, аннаңар позымнаң сурҷам: «Чир ӱстӱнде чахсы паза арығ чуртас апарчатхан кізілер пар ба?»

Андада минің улуғ пиҷем сағызыма кірген. Ол Иегованың киречілерінең Библия ӱгренген паза кіреске тӱскен. Ол алған пілістерінең миннең ӱлескен, че мағаа анзы хынығ полбаан. Андағ даа полза, аның сӧбірезі минің кӧңніме кірген. Олар ирінең удур-тӧдір хыныснаң, паарсаснаң паза улуғласнаң тудынғаннар. Соонаң мин Иегованың киречілерінең Библия ӱгрен сыххам. Пастап мағаа ӱгренерге хынығ полбаан, анаң прай ниме алыс парған.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Иегованың киречілері мині чыылыға хығырғанда, мин парғам. Кізілер кӧбізін мағаа кӱлҷеңнер, че Иегованың киречілері іди итпееннер. Олар мині уғаа чылығ удурлааннар. Оларның минзер улуғласнаң хайғаны минің чӱрееме тың тееп парған.

Конгресске килгемде, Иегованың киречілеріне улам хайхап парғам. Минің пиҷем осхас сизіктіг паза арығ чӱректіг кізілер кӧп кӧр салғам. Мин сағын салғам: «Мин ӱр тілеен арығ тудыныстығ кізілерні таап алдым, арса?» Оларның хыныстығ, пір чӧптіг тудынғаннары паза прай сурығларға Библия хоостыра нандырғаннары минің кӧңніме уғаа тың кірген. Мин піліп алғам: паарсах поларға оларны Библия кӧӧктірче. Ідӧк оларның пірсі полып алар ӱчӱн, чуртазымны саңай алыстырыбызарға кирек полчатханын піліп алғам.

Мин ипчі кізі чіли, тудынған полғам, аннаңар мағаа чооғымны, тудынызымны, кип-азаамны паза нанҷыларымны прай алыстырыбызарға киліскен. Нанҷыларым, мағаа кӱліп, тіҷеңнер: «Анзы сағаа ноо кирек? Мындағ даа ползаң, піс сағаа хынчабыс. Тастабыс пу Библияны!» Иргі чуртазымны тастабызарға уғаа аар полған.

1 Коринфтегілерге 6:9—11-де чоохталча: «Алай киртініс чохтарға Худай хан-чирі пирілбезін пілбинчезер бе? Пос посты алаахтырбаңар. Сайбахтарға даа, кізі холынаң иділгенге пазырчатханнарға даа, чӧреечі кізілерге дее, ир ирнең хонысчатханнарға даа... Худай хан-чирі пирілбес. Сірернің аразында андағлар полғаннар. Че арығланып алғаннар, ах-арығ пол парғаннар, Хан-пигібіс Иисус Христос паза Худайыбыс Худының пастыра ахтанып алғаннар». Аннаңар мин пілгем: алызып аларға оңдай пар. Иегова мының алнында кізілерге полысчаң, мағаа даа алызып аларға полыс пирген. Нинҷе-де чыл мағаа уғаа аар полған, че Иегованың киречілері мағаа чӧптер пиргеннер паза полысханнар. Анзы мағаа кӱс кирген.

ЧУРТАЗЫМА ХАЙДАҒ ТУЗА АҒЫЛҒАН. Мин чуртазымны оңдайлап алғам. Ипчі ал салғам. Ам ипчімнең хада оолғыбысты Библияның принциптеріне ӱгретчебіс. Мин иргі чуртазымны саңай артыс салғам. Ам, тізең, минің духовнай алғастар уғаа кӧп. Мин ах сағал полчам паза нинҷе-де кізее Худайның сынын піліп аларға полыс пиргем. Минің алысханымны кӧр салып, іҷем уғаа часкалығ полған. Ол Библия ӱгрен сыххан паза кіреске тӱскен. Минің кічіг хыс туңмам ідӧк сайбах чуртазын артыс салып, Иегованың киречізі полып алған.

Мының алнындағы чуртазымны хомай чуртасха санабаан кізілер дее чахсы саринзар алыс парғазың тіпчелер. Ноға андағ алызығлар ит полғанымны мин пілчем. Мин профессиональнай полызығ тілеем, че анда мағаа хомай ла чӧптер пирҷеңнер. Иегова, тізең, мағаа сынап полыс пирген. Мин позымны нимее чарабас кізее санаам, че Иегова минзер хыныснаң паза тыстаныснаң хайған. Илбек, хыйға паза хыныстығ Худай мағаа хайығ салғаны чуртазымны саңай алыстырыбызарға полыс пирген.

«Мин часкалығ кізі полбаам, істімде ниме-де читпинчеткен паза кізее кирек чоғылзым тіп пілдірген» (КАДЗУХИРО КУНИМОТИ).

ТӦРЕЕН ЧЫЛЫ: 1951

ТӦРЕЕН ХАЗНА: ЯПОНИЯ

ХАҶАН-ДА: ВЕЛОГОНЩИК

МЫНЫҢ АЛНЫНДА. Мин Сидзуока префектурада талай хыриндағы саарда ӧскем. Пістің сӧбіреде сигіс кізі полған, піс улуғ нимес турада чуртаабыс. Пабам велосипедтер сатхан. Ол мині кічігдең ала велосипед марығларына ал чӧрген. Іди мин ол спортха хыныбысхам. Пабам мині велогонщик пол парзын тіп хынған. Мин школада ӱгренчеткенде, ол мині матап тренировать пол сыххан. Улуғ класстарда мин ӱс хати чыл сай иртчеткен национальнай велогонкаларны утып алғам. Мин спортивнай школазар парарға хынғам, аннаңар мині университетсер ӱгренерге хығырғаннарында, отказ сапхам. 19 частығда мин профессиональнай велогонщик полып алғам.

Ол туста минің пір ле кӧстег полған: Японияның иң чахсы велогонщигі полып аларға. Сӧбіреме полыс пирер ӱчӱн, мин кӧп ахча тоғынып аларға хынғам. Мин тренировкаларға пӱкӱлее кір парғам. Чоо майыхханҷа, тренироваться полған соонда, мин позыма тіҷеңзім: «Син велогонщик поларға тӧреезің! Холың тӱзірбе!» Іди кӱс салғаным тик ле полбаан. Улуғ спортта наа кізілер аразында мин иң чахсы спортсмен полғам. Соңа чылда мағаа Японияның чемпионадында аралазарға чаратханнар. Мин ол марығларда алты хати ікінҷі орын алғам.

Мин иң кӱстіг гонщиктернің пірсі полғам. Мині «Токайның кӱстіг азахтары» тіп адаҷаңнар (Токай — ол Японияның аймағы). Мин ӧкпеленҷік паза марығларда хатығ тудынҷаң кізі полғам, аннаңар миннең хорыхчаңнар. Мин пайып парғам. Ниме хынғам, аны алып алҷаңмын. Спортзаллығ тура алып алғам. Ол спортзалда прай современнай тренажерлар полғаннар. Ідӧк тура син турчатхан иномарка алып алғам. Ахчам чідір салбас ӱчӱн, мин недвижимость паза аарлығ чаҷыннар алып алҷаңзым.

Андағ даа полза, мин часкалығ кізі полбаам, істімде ниме-де читпинчеткен паза кізее кирек чоғылзым тіп пілдірген. Ол тусха ипчі ал салғам, пістің палалар полғаннар. Че мин удаа оларға тарынҷаң полғам. Полар-полбас нименің ӱчӱн аахтап салыбысчаңзым. Олар минзер хорығып кӧрҷеңнер. Ідӧк тарынчам ма, чох па сырайымнаң піліп аларға кӱстенҷеңнер.

Минің ипчім Иегованың киречілерінең Библия ӱгрен сыххан. Анзы улуғ алызығларға ағылған. Ол Иегованың киречілерінің чыылығларына чӧрерге хынчам теен. Мин ол чыылыға прай сӧбіремнең хада парарға пӧгін алғам. Пірсінде иирде, піссер ах сағал киліп, миннең Библия ӱгрен сыххан, анзын ам даа ундутпинчам. Ол ӱгредіглерде алған пілістер мині тың алыстырыбысханнар.

ХАЙДИ БИБЛИЯ ЧУРТАЗЫМНЫ АЛЫСТЫРЫБЫСХАН. Ефестегілерге 5:5-гі сӧстер хайди мағаа теңенін хаҷан даа ундут полбассым. Анда пазылча: «Мынзын піліңер: оралысхахтарға, кізі уйадыстығ хылынчатханнарға алай харам кізілерге Христостың паза Худайның хан-чирінде орын чоғыл». Мин піліп алғам: велогонкалар азартнай ойыннарнаң палғалыстығлар паза кізіні харам поларға кӧӧктірчелер. Мині совезім иреелеп сыххан. Мин піліп алғам: Иегова Худайның кӧңніне кірер ӱчӱн, велогонкаларны артыс саларға кирек. Андағ пӧгін аларға мағаа уғаа аар полған.

Че Библияны ӱгреніп, мин ӧкпеленмес, амыр кізі пол сыхханымны сизін салғам. Андағ хылыхтығ кізі гонканы ут полбас. Библия ӱгренген соонда, мин гонкаларда ӱс ле хати араласхам. Че гонкаларны саңай артыс саларға мағаа аар полған. Хайди поларға пілбеем, сӧберемні хайди азырирбын тіп сағыссыраам. Мин спортты тастап таа полбинчатхам, аннаң айғас таа полбинчатхам. Ағаа хоза, туғаннарым минің наа киртінізімнең саңай тоғыр турыбысханнар. Пабам мағаа уғаа ачырған парған. Прай ол сағыссырастарның ӱчӱн минің язва двенадцатиперстной кишки азыл парған.

Ол аар тустарда мағаа Библия ӱгренгені паза Иегованың киречілерінің чыылығларына чӧргені полыс пирген. Кӧместең киртінізім тыып одырған. Мин Иеговадаң, пазырыстарымны иссін тіп паза оларны исчеткенін кӧзіт пирзін тіп, сурынғам. Ипчім, ағаа часкалығ полар ӱчӱн, улуғ тура кирек чоғыл теенде, мағаа хай-хай ниик пол парған. Мин духовнай саринаң ӧс сыххам.

ЧУРТАЗЫМА ХАЙДАҒ ТУЗА АҒЫЛҒАН. Иисустың Матфей 6:33-гі сӧстер орта полчатханын позымның чуртазымда кӧргем. Анда пазылча: «Сірер, тізең, аның орнына Худай хан-ӱлгӱзін паза Худайның кӧңні толарын тілеңер, пасхазы, тізең, сірерге хоза пирілер». Піс хаҷан даа хызылбаабыс. Пӱӱн тоғынып алчатхан ахчам велогонщик полған туста алған ахчадаң 30 хати асхынах полза даа, халғанҷы 20 чыл пістің сӧбіребіске прай ниме читкіҷе полған.

Ағаа хоза, харындас-пиҷелернең хада нымысчыланып, уғаа тың ӧрінчем. Хаҷан даа андағ ӧрініс кӧрбеем. Аннаңар тус табырах парча. Ідӧк піс ипчімнең ынағ чуртап сыххабыс паза минің ӱс оолғым ипчілерінең хада Иеговаа киртістіг нымысчыланчалар.