Bayibolu Lisintha Ŵanthu

NTCHINTHU wuli cho chinguwovya munthu munyaki yo wakhumbanga cha kuchita vinthu ndi ŵanthu kweniso yo wambanga sumu zaviwawa, kuti wasinthi ndi kwamba kwanja ŵanthu ndipuso kuŵawovya? Ntchinthu wuli chinguchitiska munthu munyaki waku kuti Mexico kuti waleki kuchita ureŵi? Nanga ntchifukwa wuli munthu munyaki wakutchuka yo wachitanga masaza ngakutchova njinga ku Japan wanguleka ndi kwamba kuteŵete Chiuta? Wonani vo ŵanthu yaŵa angukamba.

“Ndenga munthu wamtafu, wambwinya kweniso mukali.”—DENNIS O’BEIRNE

NDIKUWA MU: 1958

CHARU CHO NDIKUWIYA: ENGLAND

MBIRI YANGU: NDACHITANGA VINTHU NDI MUNTHU CHA KWENISO NDAMBANGA SUMU ZAVIWAWA

UMOYU WANGU WAKALI: Ada mba ku Ireland ndipu ndingukuliya mubanja la chikatolika. Kanandi ndakanga ndija kutchalitchi chinanga kuti ndayanjangaku cha. Ndakhumbisiskanga kumuziŵa umampha Chiuta. Ndapempheranga kaŵikaŵi Pempheru la Ambuya, ndipu ndikumbuka kuti nyengu zinyaki ndagonanga pabedi ndichiŵanaŵaniya vo pempheru lenili ling’anamuwa. Ndaligaŵanga mu tiviganizu timanatimana, ndipu ndaŵanaŵaniyanga vo chiganizu chechosi ching’anamuwa.

Nde ndi vyaka va m’ma 15, ndingusere chisopa cha marasi. Ndingwamba so kwanja vandali mwakuti ndakhumbanga kusere gulu linyaki lakulimbana ndi ulamuliru wa Nazi. Kweniso ndingwamba kwanja ukongwa gulu linyaki lamijalidu yakugaruka lo lambanga sumu zaviwawa ukongwa. Ndagwiriskiyanga ntchitu munkhwala wakutimbanyizga wongu, ukongwa chamba cho ndakweŵanga pafufupi zuŵa lelosi. Ndayendiyanga vangu, va munthu cha ndipuso ndamwanga ukongwa moŵa. Ndachitanga vinthu vakuŵika umoyu wangu pangozi ndipuso ndawonanga boyi cha. Ndakhumbanga cha kuchita vinthu ndi ŵanthu ndipu ndakambiskananga cha bwekabweka ndi munthu pijapija asani ndawona kuti nkhani yo njakukhumbika nadi. Ndakananga ndi kundijambula viyo. Kweni asani sonu ndikumbuka vosi venivi, ndiwona kuti ndenga munthu wamtafu, wambwinya kweniso mukali. Ŵanthu wo ndakoliyananga nawu pe ndiwu ndachitanga nawu vinthu mwalisungu.

Ndati ndakwanisa vyaka 20, ndingwamba kwanja Bayibolu. Munyangu yo wagulisanga munkhwala wakutimbanyizga wongu, wangwamba kuŵerenga Bayibolu we mujeri. Sonu ndi munyangu mwenuyu tingukambiskanapu kwa nyengu yitali vakukwaskana ndi visopa, tchalitchi la Katolika ndipuso vo Satana wachita panu pacharu chapasi. Chifukwa cha venivi, ndingugula Bayibolu ndipu ndingwamba kulisambira pakundija. Nyengu zinyaki, ini ndi munyangu mwenuyu taŵerengiyanga limoza mavesi nganyaki ndipu takambiskananga ndi kulemba vo tasambirapu. Tinguchita venivi kwa myezi yinandi.

Vinyaki mwa vinthu vo tingusambira ndi ivi: tija mu mazuŵa ngakumaliya nga charu ichi; Akhristu atenere kupharazga uthenga wamampha wa Ufumu waku Chiuta; yiwu akhumbika cha kuja a charu, vo visazgapu kuchitaku ndali; tinguwona so kuti mu Bayibolu musanirika fundu za mijalidu yamampha. Venivi vingutiwovya kuti tiligomezgengi ukongwa Bayibolu ndipuso kuziŵa kuti kwe chisopa chauneneska. Kweni taziŵanga cha kuti ndi nichi. Tinguŵanaŵaniya visopa vakutchuka, kweni tinguwona kuti vo achita kusazgapu kusere mu ndali, vikoliyana cha ndi vo Yesu wachitanga. Mwaviyo, tinguwona kuti ndivu cha vo Chiuta wativigwiriskiya ntchitu. Sonu tinguŵanaŵana kuti tifufuzi visopa vo viwoneka kuti vimanavimana.

Takumananga ndi ŵanthu a muvisopa vakupambanapambana ndipu taŵafumbanga mafumbu. Isi taziŵanga vo Bayibolu likamba pa fumbu lelosi lo tafumbanga, so tasuzgikanga cha kuziŵa asani amuka vakupambana ndi vo ve mu Mazu ngaku Chiuta. Pavuli pakukumana ndi ŵanthu ŵenaŵa, ndapempheranga kwaku Chiuta ndipu ndamukambiyanga kuti, ‘Asani ŵanthu wo takumana nawu msanawale ŵe nadi muchisopa chauneneska, chondi Ada, tizikumani nawu so.’ Kweni pavuli pa myezi yinandi, pengavi gulu lo lingumuka mafumbu ngidu mwakugwiriskiya ntchitu Bayibolu. So mbwe ndinguchita mphwayi, ndipu ndakhumbanga so cha kukumana ndi anyaki.

Pakumaliya, ini ndi munyangu tingukumana ndi Akaboni aku Yehova. Tinguŵafumba mafumbu ngo tafumbanga ŵanthu wosi, kweni yiwu angutimuka mwakugwiriskiya ntchitu Bayibolu. Vo yiwu atimukanga vakoliyananga ndi vo isi tingusambira pakutija. Sonu tingukuskiyaku, tinguŵafumba so mafumbu ngo isi tenga techendasaniyi kwamuka kwaki mu Bayibolu. Mwakuyeruzgiyapu, tinguŵafumba mo Chiuta wawone kukweŵa ndipuso kugwiriskiya ntchitu munkhwala wakutimbanyizga wongu. Yiwu angutimuka so mwakugwiriskiya ntchitu Mazu ngaku Chiuta. Ŵati atipempha kuti tiluti ku maunganu ku Nyumba ya Ufumu, tinguzomera.

Kwaku ini, kuluta ku maunganu chenga chinthu chakusuzga ukongwa. Veviyo chifukwa ndakhumbanga cha kuchitiya vinthu limoza ndi ŵanthu anyaki. Chinanga kuti Akaboni aku Yehova anguvwala umampha ndipuso atitawuzanga mwaulemu, kweni chifukwa cha jalidu langu lenili, anyaki ndaŵawonanga kuti ŵenga ndi vilatu viheni ndipu ndakhumbanga so cha kuweriyaku ku maunganu. Kweni nge mo ndachitiyanga nyengu zosi, ndingupemphera kwaku Chiuta kuti wandipaski mtima wakukhumbisiska kuzikumana so ndi ŵanthu yaŵa asani chisopa chawu ntchauneneska nadi. Mtima wangu ungwamba kundichichizga mwanthazi kuti ndiyambi kusambira Bayibolu ndi Akaboni aku Yehova.

MO BAYIBOLO LINGUSINTHIYA UMOYU WANGU: Ndinguziŵa kuti ndikhumbika kuleka kugwiriskiya ntchitu munkhwala wakutimbanyizga wongu, ndipu ndinguleka nyengu yeniyo. Kweni po penga ntchitu, nkhuleka kukweŵa foja. Ndinguyesesa maulendu nganandi waka kuti ndileki kukweŵa, kweni vingunditonda. Ndati ndavwa kuti ŵanthu anyaki akufiska kuleka kukweŵa, ndingupempha Yehova kuti nani wandiwovyi. Ndipu nadi, Yehova wangundiwovya kuti ndileki. Venivi vingundiwovya kuziŵa kuti pempheru ndakukhumbika ukongwa.

Chinthu chinyaki so chikulu ukongwa cho ndakhumbikanga kusintha, chenga kavwaliru ndi kawonekeru. Pa nyengu yo ndingulutiya ku Nyumba ya Ufumu kakwamba, ndingumeta sitayelu yinyaki ndipuso ndingusiya chisumbalumba pachanya cho ndinguchidaya mtundu wa bulu. Pavuli paki, ndinguchidaya mtundu wa ntchetintcheti. Ndavwalanga majinzi ndipuso vimajeketi vavimalembu. Ndawonanga kuti palivi chifukwa chakusinthiya vinthu venivi chinanga kuti Akaboni angundiwovyapu. Pakumaliya, ndinguŵanaŵaniya lemba la 1 Yohane 2:15-17 lo likamba kuti: “Mungayanjanga charu cha pamwenga vinthu va mucharu. Asani munyaki watanja charu ndikuti watanja Ada cha.” Ndinguwamu kuti kawonekeru kangu kalongonga kuti nditanja charu. So ndakhumbikanga kusintha kuti ndilongo kuti nditanja Chiuta. Mwaviyo, ndinguchita nadi venivi.

Pakumaliya, ndinguwamu kuti Mbakaboni pe cha wo akhumbanga kuti ndisanirikengi pa maunganu. Chifukwa lemba la Aheberi 10:24, 25, lingundilongo kuti Chiuta nayu wakhumba kuti ndichitengi venivi. Ndati ndayamba kuluta ku maunganu ngosi kweniso ndati ndayamba kuŵaziŵa umampha ŵanthu, ndingusankha kuti ndibatiziki kuti ndilongo pakweru kuti ndikujipereka kwaku Yehova.

MO NDAYANDULIYA: Yehova wachita nasi vinthu mwalisungu ukongwa ndipu wakhumba kuti tijengi nayu pa ubwezi. Lisungu laki ndipuso chanju cho wandilongo, vandichitiska kuti ndimuyezgengi kweniso kuti ndilondongi chakuwoniyapu cha Mwana waki Yesu Khristu. (1 Peturo 2:21) Ndasambira kuti ndingaja ndi jalidu lamampha lo ndingaziŵika nalu chinanga kuti ndingaŵa Mkhristu. Mwaviyo, ndayesesa kusintha ndipu sonu nditiŵachitiya vinthu mwalisungu ŵanthu ndipuso mwachanju. Nditesesa kuchita vinthu umampha ndi muwolu wangu kweniso mwana widu munthulumi. Nditiŵayanja ukongwa abali ndi azichi. Kulondo Khristu kwandiwovya kuti ndije munthu wakutumbikika muchigaŵa ndipuso kuti ndiyanjengi anyangu.

“Angundilondere umampha ukongwa.”—GUADALUPE VILLARREAL

NDIKUWA MU: 1964

CHARU CHO NDIKUWIYA: MEXICO

MBIRI YANGU: NDACHITANGA UREŴI

UMOYU WANGU WAKALI: Mu banja lidu tengamu ŵana 7 ndipu tikukuliya ku Hermosillo, Sonora, ku Mexico. Kwenuku ŵanthu anandi mbakavu ukongwa. Ada angufwa ini ndeche mwana, sonu ama angwamba kugwira ntchitu kuti atiphweriyengi. Kanandi ndayendanga nyawu chifukwa tengavi ndalama zakuguliya sapatu. Ndingwamba kugwira ntchitu ndeche munamana kuti nani ndiwovyengeku banja lidu. Mwakuyanana ndi mabanja nganandi, tajanga mukanyumba kamana ukongwa.

Kanandi, tajangapu tija panyumba chifukwa ama akanga kuchigwira ntchitu. Nde ndi vyaka 6, mnyamata munyaki wa vyaka 15 wangwamba kundigona mwakundichichizga. Venivi vingulutiriya kuchitika kwa nyengu yitali. Ivi vingunditimbanyizga ukongwa pa nkhani yakugonana. Ndingwamba kuwona kuti kukopana ndi anthulumi anyangu nkhuheni cha. Ndati ndapempha chovyu kwa madokotala ndipuso aliska, yiwu angundikambiya kuti palivi suzgu lelosi.

Ndati ndakwanisa vyaka 14, ndingusankha kuti ndiyambi waka kuchita vinthu vakulongo pakweru kuti ndigonana ndi anthulumi anyangu. Ndinguchita venivi kwa vyaka 11, ndipu pa nyengu yosi iyi ndajanga ndi anthulumi akupambanapambana. Pavuli paki, ndingusankha kuti ndinozengi sisi ŵanthu ndipu ndingujula saluni ndipuso sitolu yakugulisiyamu mafuta. Kweni ndakondwanga cha. Ndakumananga ndi masuzgu ndipuso ndajivwanga kuti nde wakujowoleka. Ndinguwona kuti vo ndachitanga viheni. Ndingwamba kujifumba kuti, ‘Kumbi ŵanthu amampha ŵeche kusanirika panu pacharu?’

Pa nyengu iyi ndingukumbuka mzichi wangu. Iyu wangwamba kusambira Bayibolu ndi Akaboni aku Yehova ndipu pavuli paki wangubatizika. Iyu wandikambiyanga vo wasambiranga, kweni ndasulangaku waka. Kweni ndamukhumbiranga chifukwa wajanga umoyu wakukondwesa ndipuso banja laki lakondwanga. Vachitanga kuwoneke limu kuti atanjana kweniso atumbikana. Pati pajumpha nyengu Kaboni waku Yehova munyaki wangwamba kusambira nani Bayibolu. Pakwamba, ndasambiranga kuti ndifiski waka dangu. Pavuli paki, ndingwamba kuŵikiyapu mtima.

MO BAYIBOLO LINGUSINTHIYA UMOYU WANGU: Zuŵa linyaki Akaboni angundidaniya ku maunganu ngawu, ndipu ndinguluta. Vo ndinguchiwona venga vachilendu. Ŵanthu anyaki wosi andisekanga chifukwa cha jalidu langu, kweni Akaboni andisekanga cha. Yiwu angundilondere umampha ukongwa kweniso achitanga nani vinthu mwaulemu. Ndingukwaskika ukongwa.

Ndingwamba kwanja so ukongwa Akaboni aku Yehova ndati ndaluta ku unganu wawu ukulu. Ndinguwona kuti chinanga kuti ŵengapu ŵanthu anandi, kweni wosi achitanga vinthu mwauneneska nge mzichi wangu. Ndinguŵanaŵana kuti panyaki ŵenaŵa ndiwu angaŵa ŵanthu amampha wo ndaja ndichipenjapenja. Ndinguzizwa ukongwa ndi chanju ndipuso kukoliyana kwawu. Yiwu agwiriskiyanga ntchitu Bayibolu pakumuka fumbu lelosi. Ndinguwamu kuti Bayibolu ndilu laŵawovyanga kuti aje ndi umoyu wamampha. Ndinguwona kuti nani ndikhumbika kusintha kuti ndije nge yiwu.

Ndakhumbikanga kusintha ukongwa chifukwa ndachitanga vinthu nge munthukazi. Ndakhumbikanga kusintha mo ndalongoloriyanga, vo ndachitanga, vakuvwala vangu, masitayelu ngangu nga sisi kweniso mabwezi. Anyangu wo ndachitanga nawu vinthu angwamba kundiseka ndipu akambanga kuti: “Sonu wachitiyanji venivi? Venga umampha penipa we nge. Ungasambiranga Bayibolu cha. We ndi chechosi pa umoyu, so upenjanji?” Kweni chinthu cho ndingusuzgika ukongwa kusintha, lenga jalidu langu la ureŵi.

Kweni lemba la 1 Akorinto 6:9-11, lingundiwovya kusimikiza kuti ndingafiska kusintha. Lemba ili likamba kuti: “Pamwenga kumbi muziŵa cha kuti ŵanthu ambula urunji azamuhara cha Ufumu waku Chiuta? Mungalandizgikanga cha. Ŵanthu wosi wo achita ureŵi, wo asopa angoza, achigololu, anthulumi wo atijipereka kuti anthulumi anyawu agonanengi nawu, anthulumi wo agonana ndi anthulumi anyawu, . . . azamuhara cha Ufumu waku Chiuta. Ndipu mwanyaki aku yimwi mwenga aviyo. Kweni mwatoweseka.” Yehova wanguwovya ŵanthu munyengu yakali kuti asinthi, ndipu nani so wangundiwovya. Chinanga kuti pangujumpha vyaka vinandi ndeche kusuzgika kuti ndisinthi, kweni ulongozgi ndipuso chanju cho Akaboni andilongonga ndivu vingundiwovya ukongwa.

MO NDAYANDULIYA: Mazuŵa nganu, ndija umoyu wamamphamampha. Ndikuto, ndipu limoza ndi muwolu wangu tisambiza mwana widu kuti walondongi fundu za mu Bayibolu. Vinthu vo ndachitanga kali, ndikuvitaya kuvuli ndipu sonu ndikondwa ndi vitumbiku vauzimu. Nditeŵete nge mura mumpingu kweniso ndawovyapu ŵanthu anyaki kuti asambiri uneneska wa mu Mazu ngaku Chiuta. Ama ŵati awona mo ndingusinthiya, angukondwa ukongwa mwakuti anguzomera kwamba kusambira Bayibolu ndipu sonu akubatizika. Mzichi wangu munyaki yo nayu wenga muyaya, sonu ndi Kaboni waku Yehova.

Ŵanthu anyaki wo aziŵanga vo ndachitanga kali, nawu sonu akamba kuti ndikusintha ndipu nde munthu wamampha ukongwa. Ndiziŵa vo vandiwovya kuti ndisinthi viyo. Mu vyaka vakuvuli, ndinguyesapu kuluta ku madokotala ndi aliska kuti andiwovyi, kweni andipaskanga ulongozgi uheni. Kweni Yehova ndiyu wandiwovya. Chinanga kuti ndajiwonanga kuti nde wambula kwenere, kweni iyu wangundilongo chanju kweniso wanguchita nani vinthu mwakuzikira. Kuziŵa kuti Chiuta yo ngwapachanya ukongwa, wazeru kweniso wachanju watinditoliyaku kanthu, ndiku kwandiwovya kusintha.

“Ndakhorwanga cha, ndachitanga phukwa ndipuso ndakondwanga cha.”—KAZUHIRO KUNIMOCHI

NDIKUWA MU: 1951

CHARU CHO NDIKUWIYA: JAPAN

MBIRI YANGU: NDACHITANGA MAPHARA NGAKUTCHOVA NJINGA

UMOYU WANGU WAKALI: Ndikukuliya mutawuni yinyaki yambula chiwawa muchigaŵa cha Shizuoka, ku Japan. Mu banja lidu tengamu ŵanthu 8 ndipu tajanga mukanyumba kamana. Ada ŵenga ndi sitolu yo agulisangamu njinga. Kutuwa ndeche mwana, yiwu anditonga kuti tikawonere maphara nga njinga, ndipu ndingwamba kungayanja ukongwa masaza ngenanga. Ada ŵati awona venivi, angwamba kunozga kuti nani ndichitengeku maphara ngenanga. Ndeche ku pulayimale, yiwu andisambizanga mo ndingachitiya maphara yanga. Nde ku sekondale, ndinguwina katatu mwakundondoloskana maphara ngo ngachitikanga chaka ndi chaka. Ndingupaskika mwaŵi wakuti ndiluti ku yunivesite, kweni ndinguŵanaŵana kuti ndiluti kusukulu yo asambiza maphara ngakutchova njinga. Ndati ndakwanisa vyaka 19, ndingwamba kuchitaku maphara yanga mucharu chosi cha Japan.

Pa nyengu iyi, chilatu changu chenga chakuti ndije kaswiri mucharu chosi cha Japan. Ndakhumbanga kuti ndisaniyi ndalama zinandi kuti banja lidu lijengi umoyu walikondwa. Sonu ndafwiyangapu pakuyesere maphara ngenanga. Asani ndakumana ndi suzgu linyaki pa nkhani ya kutchova njinga, ndajikambiyanga kuti kutchova njinga ndiku umoyu wangu, so ndifiskengi mbwenu! Ndipu ndivu ndachitanga nadi. Phamphu langu lingwamba kubala vipasu. Mu chaka chakwamba, ndinguwina maphara ngo ngachitika pakati pa ŵanthu wo atamba waka sonu. Mu chaka chachiŵi, nani ndenga wakwenere kusere maphara ngo ngachitika kuti asaniyi kaswiri mucharu chosi cha Japan. Pa maphara yanga, ndingujapu wachiŵi maulendu 6 ngakupambanapambana.

Pakuti ndenga mugulu la ŵanthu akutchuka pa nkhani yakutchova njinga, ndingwamba kuziŵika kuti nde kaswiri wa ku Tokai, cho ntchigaŵa chinyaki cho chisanirika ku Japan. Ndaŵikiyangapu ukongwa mtima pa maphara yanga. Pechendajumphi nyengu, ŵanthu angwamba kunditayiya kamiti. Ndingusaniya ndalama zinandi, ndipu ndafiskanga kugula chechosi cho ndakhumba. Ndingugula nyumba yo mwenga chipinda chakupangiyamu masaza cho mwenga chipangizu chechosi. Ndingugula so galimotu kucharu chinyaki yo yenga yakudula ukongwa kuphara nyumba yeniyi. Chifukwa chakopa vakunthazi, ndingwamba so bizinesi yakugulisa nyumba kweniso ndingugula masheya mumakampani.

Chinanga kuti ndenga ndi vosi ivi, kweni ndakhorwanga cha, ndachitanga phukwa ndipuso ndakondwanga cha. Pa nyengu iyi, ndipu ndato kweniso ndipu nde ndi ŵana, kweni wosi ndachitanga nawu vinthu mwakuzikira cha. Ndaŵakwiyiyanga chinanga mpha tinthu timanatimana viyo. Mwakuti alereskanga dankha chisku asani apenja kulongoro nani kuti awoni asani andisaniya pa nyengu yakwenere.

Pati pajumpha nyengu, muwolu wangu wangwamba kusambira Bayibolu ndi Akaboni aku Yehova. Venivi vinguchitiska kuti vinthu vinandi visinthi. Iyu wangukamba kuti wapenja kwamba kuwungana ndi Akaboni. Sonu ini ndingukamba kuti asani ndi viyo, mbwenu tikengi banja losi. Nditilikumbuka mbwenu zuŵa lo mura mumpingu wanguza kunyumba kwangu kuti waziyambi kusambira nani Bayibolu. Vo ndingusambira vingundifika pamtima.

MO BAYIBOLO LINGUSINTHIYA UMOYU WANGU: Ndiluwa cha mo ndingukwaskikiya ndati ndaŵerenga lemba la Aefeso 5:5. Lemba ili likamba kuti: “Munthu weyosi yo wachita ureŵi pamwenga munthu wakufipiskika, pamwenga wambunu, ko kung’anamuwa kusopa ngoza, wazamuhara cha Ufumu waku Khristu kweniso waku Chiuta.” Ndinguwona kuti kutchova njinga kuchiska so kutchova juga ndipu venivi vichitiska ŵanthu kuja ndi mtima wambunu. Njuŵi yangu yingwamba kundisuzga. Ndinguwona kuti asani ndikhumba kukondwesa Yehova Chiuta, ndakhumbikanga kuleka maphara yanga. Kweni kukamba uneneska, kuchita venivi kwenga kwakusuzga ukongwa.

Mu chaka ichi vinthu vingundiyende umampha ukongwa pa maphara nga njinga kuluska kali, ndipu mtima wangu wakhumbisiskanga kuchita vinandi. Kweni ndinguwona kuti kusambira Bayibolu kungundiwovya kusaniya chimangu chamumtima kweniso kuti ndichitengi vinthu mwakuzikira, vo venga vakupambana ukongwa ndi vo ndachitanga kuti ndiwini maphara. Ndinguchitaku maphara nganjinga katatu pe kutuliya po ndingwambiya kusambira Bayibolu, kweni mumtima mwangu ndinguleke limu cha maphara yanga. Kweniso ndaziŵanga cha vo ndingachita kuti ndifiski kuphwere banja langu. Yapa venga nge kuti umoyu wangu wama, ndipu abali ŵangu angwamba kundisuzga chifukwa cha vo ndasambiranga. Ada anguguŵa ukongwa. Ndingusuzgika ukongwa maŵanaŵanu mwakuti ndingwamba kutama vilonda va mumoyu.

Kweni kulutirizga kusambira Bayibolu kweniso kusanirika pa maunganu nga Akaboni aku Yehova, ndivu vingundiwovya pa nyengu iyi. Kamana ndi kamana, chivwanu changu chingukuwa. Ndingupempha Yehova kuti wandimuki mapempheru ngangu. Ndingwamba kuvwaku umampha mumtima muwolu wangu wati wandikambiya kuti wakhumba cha kuja muchinyumba chikulu. Kamana ndi kamana, ndingwamba kuluta panthazi.

MO NDAYANDULIYA: Ndinguwona kuti mazu ngaku Yesu ngo nge pa Mateyu 6:33, ngauneneska nadi. Iyu wanguti: “Lutirizgani kupenja dankha Ufumu ndi urunji waki, ndipu vinthu vinyaki vosi venivi visazgikiyengeku kwaku yimwi.” Isi tikusoŵapu cha “vinthu vinyaki vosi” vo Yesu wangukamba, kung’anamuwa vinthu vakukhumbika pa umoyu. Chinanga kuti sonu ndisaniya ndalama zimana ukongwa panyaki maulendu 30 kuyeruzgiya ndi zo ndasaniyanga ndichichita maphara, kweni ini ndi banja langu tikugonapu cha ndi nja pa vyaka 20 vo vajumpha.

Kweniso chinthu chinyaki chakukhumbika ukongwa ntchakuti sonu ndikondwa ukongwa ndipuso ndikhorwa asani ndichita vinthu ndi Akhristu anyangu. Ndipu ndiwona nge kuti nyengu yitenda liŵi ukongwa. Banja langu nalu likondwa so ukongwa. Ŵana ŵangu atatu anthulumi ndipuso muwolu wangu, wosi mbateŵeti akugomezgeka aku Yehova.