Baibolo Likusintha Umoyo wa Ŵanthu

KASI ntchivichi chikawovwira munthu uyo wakatemwanga yayi kuchezga na ŵanthu kweniso kwimba sumu zakutuka kuti wambe kutemwa ŵanthu na kuŵawovwira? Kasi ntchivichi chikawovwira mwanalume munyake wa ku Mexico kuleka nkharo ziheni? Ntchivichi chikapangiska munthu munyake uyo wakaŵa nkhwantha pa kutchova njinga kuleka chiphalizgano na kwamba kuteŵetera Chiuta? Wonani ivyo ŵanthu aŵa ŵakuyowoya.

“Nkhaŵa Wakujitemwa, Mukali Kweniso Wambembe.”—DENNIS O’BEIRNE

CHAKA ICHO WAKABABIKIRA: 1958

UKO WAKABABIKIRA: ENGLAND

MBIRI YAKE: WAKATEMWANGA YAYI KUCHEZGA NA ŴANYAKE KWENISO WAKIMBANGA SUMU ZAKUTUKA

UMO NKHAŴIRA KALE: Adada mba ku Ireland, ndiko nkhababikira, nkhakulira mu tchalitchi la Katolika. Nkhatemwanga kuluta ku tchalitchi kweni mwa apo na apo. Ndipouli, nkhakhumbanga chomene kumanya vinandi vyakukhwaskana na Chiuta. Kanandi nkhatemwanga kulomba Lurombo lwa Fumu, nkhukumbuka kuti nkhatemwanga kugona pa bedi na kughanaghanirapo ivyo likung’anamura. Nkhaligaŵanga mu vigaŵa na kughanaghanirapo ivyo chigaŵa chilichose chikung’anamura.

Apo nkhaŵa na vyaka vya m’ma 17, nkhanjira gulu linyake la Chilasi. Nkhatemwangaso chomene tumagulu twa ndyali nga gulu la Anti-Nazi League. Kweniso nkhanjira gulu la kwimba sumu za rock. Nkhakhweŵangaso chomene chamba. Zuŵa lingajumpha cha kwambura ndudu ya chamba ku mulomo. Munthu nkhamuŵerenganga yayi, nkhamwanga chomene moŵa, kanandi umoyo wane ukaŵanga pangozi ndipo ŵanthu nkhaŵapwelerangako yayi. Nkhenderanga vya munthu yayi, nakuti nkhatemwanga yayi kuyowoyeskana na ŵanthu. Para nayowoyeskana na munthu mbwenu ndikuti pali nkhani yakuzirwa chomene. Nkhakanangaso kuti ŵanthu ŵanijamburenge vithuzi. Para nakumbuka vyakumasinda, nkhuwona kuti nkhaŵa mukali, wakujitemwa, kweniso wambembe. Nkhatemwanga kovwira ŵabali ŵane pera, panji munthu uyo tikupulikana chomene.

Apo nkhaŵa na vyaka vya m’ma 20, nkhamba kudokera vya kusambira Baibolo. Apo nkhaŵa mu jele, munyane uyo tikaguliskiranga lumoza munkhwala wakuzweteska wongo wakamba kuŵerenga Baibolo. Tikamba kudumbiskana kwa nyengo yitali. Tikadumbiskananga nkhani za kugaluka, Tchalitchi, kweniso ivyo Satana wakuchita mu charu. Pamasinda nane nkhagura Baibolo lane ndipo nkhamba kusambira panekha. Ine na munyane tikaŵerenganga mavesi ghachoko waka na kudumbiskana ivyo tasambirapo ndipo paumaliro tikafikanga pa fundo yeneko. Tikachita ivi kwa myezi yinandi.

Zinyake mwa fundo izo tikatoramo mu Baibolo ni izi: tikamanya kuti tikukhala mu mazuŵa ghaumaliro wa charu; Ŵakhristu ŵakwenera kupharazga makani ghawemi ghakuyowoya vya Ufumu wa Chiuta; Ŵakhristu ŵakwenera yayi kuŵa ku chigaŵa cha charu, kusazgapo ndyali; kweniso kuti Baibolo lili na ulongozgi uwemi wakukhwaskana na makhaliro ghawemi. Tikajiwonera tekha kuti Baibolo likuneneska kweniso kuti kukwenera kuti kuli chisopa chaunenesko. Kweni, kasi chisopa chaunenesko icho ni ntchi? Tikamba kughanaghanira vya matchalitchi ghakurughakuru kweniso ghakutchuka, kweni umo ghakachitiranga vinthu kweniso kunjilirangapo pa vya ndyali, mbwenu tikagongowa chifukwa Yesu wakachitangako yayi vyose ivi. Tikamanya kuti Chiuta wakaŵagwiliskiranga ntchito yayi, mbwenu tikamba kughanaghanira matchalitchi ghambura kutchuka na kuwona ivyo ghakachitanga.

Tikakumananga na ŵalaraŵalara ŵawo na kuŵaphurunga na mafumbo. Tikamanyanga kale ivyo Baibolo likuzgora vya mafumbo agho tikaŵafumbanga, kweni tikakhumbanga waka kumanya usange ivyo ŵakuzgora vikukolerana nadi na Baibolo. Apo tikakumananga na ŵanthu aŵa, nkhalombanga kwa Chiuta na kumuphalira kuti, ‘Usange ŵanthu ŵara ŵali mu chisopa chaunenesko nadi, chonde novwirani kuti nizakakumaneso nawo.’ Kweni nkhati nadumbiskana nawo kwa myezi yichoko waka, palije chisopa icho chikanizgora kufuma mu Baibolo. Nkhongono zikanimalira ndipo nkhaŵavyaso khumbo lakudumbiskana na gulu la chisopa chilichose.

Paumaliro, ine na munyake tikakumana na Ŵakaboni ŵa Yehova. Tikaŵafumba mafumbo agho tikafumbanga gulu lililose la chisopa, kweni iwo ŵakazgora kufuma mu Baibolo. Ivyo ŵakazgora vikakolerananga na ivyo tikasambira mu Baibolo. Ntheura tikalutilira kuŵafumba mafumbo agho nkhaŵavya mazgoro ghake. Mwachiyelezgero, nkhaŵafumbanga umo Chiuta wakuwonera nkhani ya kukhweŵa na kugwiliskira ntchito munkhwala ŵakuzweteska wongo. Apa napo, ŵakagwiliskira ntchito Baibolo pakutizgora. Tikapangana vya kuluta ku maungano ku Nyumba ya Ufumu.

Kweni kuyowoya unenesko vikanisuzganga chomene kuluta ku maungano. Nkhatemwanga yayi kuyowoya na ŵanthu, ntheura chikaŵanga chakusuzga chomene kuyowoya na ŵanthu awo ŵakavwaranga makora chomene. Nkhugomezga kuti ŵanyake ŵakaniwonanga mwakubudika. Ntheura nkhakhumbanga cha kulutaso ku maungano. Kweni nkhalekapo yayi kulomba kwa Chiuta kuti usange ŵanthu aŵa ŵali nadi mu chisopa chaunenesko, ŵangalekanga cha kwiza kunyumba kwane. Ndipo nkhadokeranga chomene kusambira Baibolo na Ŵakaboni ŵa Yehova.

UMO BAIBOLO LIKASINTHIRA UMOYO WANE: Nkhamanya kuti nkhwenera kuleka kugwiliskira ntchito munkhwala wakuzweteska wongo, ndipo na nyengo wuwo ha nkhaleka nadi. Kweni gutuli wakaŵa pa kuleka kukhweŵa. Nkhayezga kanandi waka kuti nileke, kweni vikanitondanga. Nkhati napulika kuti ŵanyake mu gulu la Yehova wali kulekapo kukhweŵa, nkhamuphalira Yehova kuti nane wanovwire. Yehova wakanovwira nadi, paumaliro nane nkhaleka kukhweŵa. Nkhasambira kumuphalira Yehova chilichose mu lurombo, kwambura kumubisa kalikose.

Chinthu chinyake chikuru chomene icho nkhasintha, ni nkhani ya kavwaliro na kujitozga. Pakwamba apo nkhalutanga ku maungano, sisi lane likaŵa na vitoweskero vinandi chomene kweniso litali. Kufuma apo, nkhalidaya ndipo zikaŵa za olenji. Nkhavwara jinzi, na chibachi chinyake icho chikaŵa na vimalemba pa msana. Nangauli Ŵakaboni ŵa Yehova ŵakaniphalirapo mwalusungu kuti nisinthe, kweni ine nkhawona kuti palije chifukwa cha kusinthira nane ni wanangwa wane kuvwara na kujitozga nthena. Kweni paumaliro nkhaghanaghanirapo lemba la 1 Yohane 2:15-17, ilo likuti: “Mungatemwanga charu yayi nesi vinthu ivyo vili mu charu. Usange munthu wakutemwa charu, wakutemwa Adada yayi.” Nkhawona kuti umo nkhavwaliranga na kujitozgera, vikalongoranga kuti nkhutemwa charu. Ntheura nkheneranga kusintha kuti nilongore kuti nkhutemwa Chiuta. Paumaliro, nkhasintha nadi.

Paumaliro nkhawona kuti Mbakaboni pera yayi awo ŵakukhumba kuti nilutenge ku maungano. Nkhaŵerenga lemba la Ŵahebere 10:24, 25 ndipo nkhawona kuti ni Chiuta uyo wakukhumba kuti niwunganenge. Nkhati namba kuluta ku maungano ghose, nkhamba kuŵamanya makora ŵabali na ŵadumbu ŵanandi. Nkhasankha kujipeleka kwa Yehova, ndipo paumaliro nkhabatizika.

UMO NASANGIRA CHANDURO: Icho chikunikondweska chomene ni umo Yehova wakutizomerezgera kuti tiŵe paubwezi na iyo. Chitemwa chake kweniso umo wakunipwelelera vikunovwira kuti nimutemwenge na kulondezga Mwana wake, Yesu Khristu. (1 Petrosi 2:21) Nasambira kuti nanga vinganisuzga kuŵa na mikhaliro ya Mkhristu, kweni nkhwenera kuyezgayezga kuti niŵe nayo. Nachitapo kanthu kuti niŵe na chitemwa kweniso kupwelelera ŵanyane. Nkhuyezgayezga kuchita vinthu makora na muwoli kweniso mwana wane. Kweniso nkhupwelelera chomene ŵabali na ŵadumbu mu mpingo. Kulondezga Yesu kwanovwira kuti nijichindikenge kweniso kuchindika na kutemwa chomene ŵanyane.

“Ŵakanichindikanga Chomene.”​—GUADALUPE VILLARREAL

CHAKA ICHO WAKABABIKIRA: 1964

UKO WAKABABIKIRA: MEXICO

MBIRI YAKE: WAKACHITANGA MIKHALIRO YIHENI

UMO NKHAŴIRA KALE: Mu banja lakwithu tikaŵamo ŵana 7. Nkhakulira ku Hermosillo, Sonora, Mexico. Kuchigaŵa ichi kukaŵa ukavu wazani muwone. Adada ŵakafwa apo nkhaŵa mwana, ntheura amama ndiwo ŵakagwiranga maganyu kuti ŵatisangire sopo na mchere. Amama wakaŵavya ndalama zakutigulira skapato, ntheura nyengo zose nkhendanga waka kwambura skapato. Apo nkhawa mwana, nkhamba kugwira manganyu kuti novwire banja lithu kusanga sopo na mchere. Taŵanthu ŵanandi tikakhalanga mu nyumba yimoza, umu ndimo ŵanthu ŵanandi ŵakakhaliranga ku malo agha.

Kanandi amama ŵakasangikangapo yayi pa nyumba, ntheura tikasoŵanga wakutivikilira. Apo nkhaŵa na vyaka 6, munyamata munyake wa vyaka 15 wakanikolelera. Wakanigonanga kanandi waka. Ivi vikapangiska kuti niwonenge mwambura kwenelera nkhani yakugonana. Paumaliro, nkhawonanga kuti ntchiwemi waka kudokera ŵanalume ŵanyane. Nkhaluta kukapempha wovwiri kwa madokotala kweniso ŵalara ŵa matchalitchi, kweni ŵakaniphalira kuti palije suzgo usange munthu wakudokera ŵanalume ŵanyake, ni maghanoghano ghawemi waka.

Apo nkhaŵa na vyaka 14, nkhajivumbura waka pakweru kuti nkhugonana na ŵanalume ŵanyane. Nkhalutilira kuchita ivi kwa vyaka 11, ndipo nkhagonananga na ŵanalume ŵakupambanapambana. Pamasinda, nkhamba kusambira vya kuluka na kutozga sisi, ndipo nkhaŵa na shopu yane. Kweni nkhakondwanga yayi. Nkhasuzgikanga chomene maghanoghano ndipo nkhawonga nga ŵanthu ŵakunendera mphiska. Nkhamanyanga kuti nkhuchita vinthu viheni. Ntheura nkhajifumbanga kuti, ‘Kasi ku charu kuno kuli ŵanthu ŵawemi nthena?’

Mudumbu wane wakamba kusambira Baibolo na Ŵakaboni ŵa Yehova ndipo paumaliro wakabatizika. Wakaniphaliranga ivyo wakasambiranga, kweni nkhaŵikangako mahara yayi. Kweni nkhadokeranga chomene umo wakakhaliranga mu banja mwake. Nkhawonanga kuti ŵakutemwana kweniso kuchindikana chomene na mfumu wake. Ŵakalongorananga lusungu. Pakati pajumpha kanyengo, nane nkhamba kusambira Baibolo na Kaboni wa Yehova. Pakwamba, nkhasambiranga mwa dango waka, nkhaŵikangako mahara yayi. Kweni paumaliro vinthu vikasintha.

UMO BAIBOLO LIKASINTHIRA UMOYO WANE: Ŵakaboni ŵakanichemera ku maungano, ndipo nkhaluta. Ivyo nkhawona uku nkhaŵa kuti nindaviwonepo pa umoyo wane. Kanandi ŵanthu ŵakutemwa kuŵayowoyera misinjiro Ŵakaboni ŵa Yehova. Kweni ŵakuŵapusikizgira waka. Nkhati nafika, ŵakanipokelera makora, ŵakanichindikanga chomene. Nkhakhwaskika chomene.

Nkhamba kuŵatemwa chomene Ŵakaboni ŵa Yehova. Nanga ŵangaŵa pa gulu, ŵanthu aŵa ŵakachitanga vinthu mwakugomezgeka kweniso mwaunenesko. Ntheura nkhati aŵa ŵakwenera kuti mbanthu ŵawemi chomene, nakuti ndiwo nkhapenjanga kwa nyengo yose iyi. Nkhazizwa chomene na chitemwa chawo, umo ŵakakolerananga pakuchita vinthu, kweniso umo wakagwiliskiranga ntchito Baibolo pakuzgora mafumbo. Paumaliro nkhamanya kuti ŵakuchita vyose ivi chifukwa ŵakulondezga fundo za mu Baibolo. Ntheura nkhawona kuti nane nkhwenera kusintha vinthu vinandi kuti niŵe nga ndiwo.

Nkheneranga kusintha vinthu vinandi chomene, chifukwa pakwamba nkhachitanga vinthu nga mwanakazi. Nkheneranga kusintha umo nkhayowoyeranga, umo nkhachitiranga vinthu, umo nkhatozgeranga sisi, kweniso ŵanthu ŵakuchezga nawo. Ŵabwezi ŵane ŵapakwamba ŵakamba kuninena, ŵakatenge: “Chifukwa wuli ukuchita nthena? Pakwamba para ndipo ukaŵa munthu muwemi na. Leka waka kusambira Baibolo. Uli na chilichose, ungasuzgika yayi.” Kweni kuyowoya unenesko, vikanisuzga chomene kusintha nkharo yane.

Ndipouli, nkhamanyanga kuti ningakwaniska kusintha. Lemba la 1 Ŵakorinte 6:9-11 ndilo likanifika pamtima, lemba ili likuti: “Kasi mukumanya yayi kuti ŵanthu ŵambura urunji ŵazamuhara yayi Ufumu wa Chiuta? Mungapuluskikanga yayi. Kwali mbazaghali, ŵakusopa vikozgo, ŵaleŵi, ŵanalume awo ŵakuzomera kugoneka na ŵanalume ŵanyawo, ŵanalume awo ŵakugonana na ŵanalume ŵanyawo . . . ŵazamuhara yayi Ufumu wa Chiuta. Mwaŵanyake ndimo mukaŵira. Kweni mwageziskika mwatowa, mwatuŵiskika.” Yehova wakawowira ŵanthu ŵanyake kale kuti ŵasinthe, nane wakanovwira. Nangauli pakatora vyaka vinandi, kweniso vikanisuzganga kusintha, kweni wovwiri na chitemwa icho Ŵakaboni ŵakanilongoranga vikanovwira chomene ndipo paumaliro nkhasintha.

UMO NASANGIRA CHANDURO: Pasono, nili na umoyo uwemi, nili kutora, ndipo ine na muwoli wane tikusambizga mwana withu kuti walondezgenge fundo za mu Baibolo. Nili kuleka vyose ivyo nkhachitanga kumasinda, ndipo nkhukondwa chomene na vinthu viwemi kweniso mauteŵeti agho nili nagho. Ndine mulara mu mpingo, ndipo nawovwirapo ŵanthu ŵanandi kumanya unenesko wa mu Mazgu gha Chiuta. Amama ŵakakondwa chomene kuti nasintha nkharo yane, mwakuti nawo ŵakamba kusambira Baibolo, ndipo paumaliro ŵakabatizika. Mudumbu wane munyake uyo nayo wakaŵa na nkharo yawakawaka, sono ni Kaboni wa Yehova.

Ŵanthu awo ŵakanimanyanga, nawo ŵakujiwonera ŵekha kuti nili kusintha chomene, nakuti nili kusinthira ku uwemi. Nakuti nkhumanya uyo wali kunovwira kuti nisinthe. Kumasinda uku, nkhalutanga ku ŵanthu kuti ŵanovwire kusintha, kweni m’malo mwake ŵakanovwiranga kuti nilutilire kuchita vinthu viheni. Yehova ndiyo wali kunovwira kuti nisinthe nadi. Nangauli nkhajipulikanga kuti ndine wambura kuzirwa, kweni iyo wakaniwonanga nthena yayi, wakanilongora chitemwa, lusungu ndipo wakazikira nane. Chiuta wachitemwa, wamahara, kweniso walusungu ndiyo wakanitora na kunovwira kuti nisinthe na kuleka nkharo yane yiheni.

“Nkhakhorwanga Yayi, Nkhaŵa na Phukwa Kweniso Nkhajiwonanga Wambura Ntchito.”—KAZUHIRO KUNIMOCHI

CHAKA ICHO WAKABABIKIRA: 1951

UKO WAKABABIKIRA: JAPAN

MBIRI YAKE: WAKACHITANGA MASEŴERO GHAKUTCHOVA NJINGA

UMO NKHAŴIRA KALE: Nkhakulira mu msumba wa Shizuoka ku Japan. Mu nyumba mwithu tikaŵamo 8 ndipo tikakhalanga mu kanyumba kachoko waka. Adada ŵakaŵa na shopu iyo ŵakaguliskangamo njinga. Kufuma waka apo nkhaŵa mwana, adada ŵakatemwanga kuluta nane ku chiphalizgano chakwendeska njinga. Nkhamba kutoleka mtima ndipo nkhaghatemwanga chomene maseŵero agha. Adada ŵakamba kughanaghana vyakuti nizakaŵe nkhwantha pa maseŵero agha. Ntheura ŵakamba kunisambizga maseŵero agha. Apo nkhaŵa ku Yunivesite nkhawina viphalizgano vitatu vyakulondezgana waka. Kufuma apo, ŵakanitora kuti nilute ku Yunivesite yinyake, kweni nkhasankha kuluta ku sukulu iyo ŵakusambizga vya kutchova njinga. Apo nkhaŵa na vyaka 19, nkhaŵa nkhwantha pa maseŵero gha kutchova njinga.

Pa nyengo iyi, icho chikaŵa chakuzirwa chomene kwa ine chikaŵa chakuti niŵe nkhwantha pa kutchova njinga mu Japan mose. Nkhakhumbanga kuti niŵe na ndalama zinandi chomene kuti mbumba yakwithu yiŵe ya kuvikilirika kweniso kuti yileke kusuzgika. Ntheura nkhalimbikiranga chomene kunozgekera. Nyengo zinyake nkhachitanga wofi kweniso pakaŵanga masuzgo ghanyake ghakuti ghanitondeske kunozgekera. Kweni para vyanthena vyachitika mbwenu nkhajiphaliranga kuti, na munthu ine nkhababika kuti niŵe nkhwantha pa maseŵero agha mbwenu nilute waka. Ivi vikanovwiranga kuti nileke kugongowa! Mbwenu nkhulutanga waka kukanozgekera. Vinthu vikanenderanga makora chomene chifukwa chakuti nkhalimbikiranga. Chaka chakwamba, ndine nkhawina chiphalizgano. Mu chaka chachiŵiri, nkhazomerezgeka kukachitako chiphalizgano icho ŵakatoranga uyo waŵa pakwamba pa chiphalizgano mu Japan. Maulendo ghakukwana 6, nkhaŵanga wachiŵiri pa viphalizgano ivi.

Pakuti nkhawinanga chomene viphalizgano, ŵanthu ŵakanimanyanga kuti ndine munthu wakulimbikira chomene mu Japan. Ŵanthu ŵakaniwopanga chifukwa para nyengo ya chiphalizgano yafika, nkhalongoranga munthu lusungu yayi. Nkhamba kusanga ndalama zinandi chomene, ndipo nkhaguranga chilichose icho nakhumba. Nkhagura nyumba yikuru chomene iyo yikaŵaso na jimu. Nkhagulaso galimoto ya ndalama zinandi chomene, kuluska ndalama izo nkhagulira nyumba. Kuti nisunge ndalama, nkhagura munda ukuru chomene kweniso nkhapanganga bizinesi yamaseŵera cha!

Nangauli nkhapanga vinthu vyose ivi, kweni nkhakhorwanga yayi, nkhaŵa na phukwa kweniso nkhajiwonanga wambura ntchito. Nkhati natora, tikaŵa na ŵana kweni vikanisuzganga chomene kuzikira na mbumba yane. Nkhamukwiyiranga chomene, muwoli na ŵana ŵane nanga pangaŵa pa nkhani yichoko waka. Ntheura pakuchita nane vinthu ŵakambanga dankha kumanya umo nawukira zuŵa ilo.

Pakati pajumpha nyengo, muwoli wane wakamba kusambira Baibolo na Ŵakaboni ŵa Yehova. Vinthu vikasintha chomene. Wakaniphalira kuti wakukhumba kuluta ku maungano gha Ŵakaboni ŵa Yehova, ntheura nkhati mbwenu tilute tose nga banja. Nkhukumbuka zuŵa ilo mubali munyake mulara, wakiza kunyumba kuti wambe kusambira nane Baibolo. Ivyo nkhasambira vikanifika chomene pa mtima, ndipo nkhamba kughanaghanirapo.

UMO BAIBOLO LIKASINTHIRA UMOYO WANE: Nizamuluwa yayi umo lemba la Ŵaefeso 5:5 likanovwilira. Lemba ili likuti: “Palije muzaghali panji mukazuzi panji munthu muryezi, icho chikung’anamura kuŵa wakusopa vikozgo, uyo wazamuhara Ufumu wa Khristu na wa Chiuta.” Nkhamanya kuti chiphalizgano cha kutchova njinga chikuyana waka na kutchova njuga, kweniso kuti uyo wakuchita vinthu ivi wakuŵa na mzimu wa uryezi. Njuŵi yikamba kunisuzga chomene. Nkhamanya kuti usange nkhukhumba kukondweska Yehova Chiuta, nkhwenera kuleka kuchita chiphalizgano ichi. Kweni chikaŵa chipusu yayi kuchita nthena.

Nkhaŵa kuti namalizga waka chiphalizgano icho nkhakhorwa nacho chomene ndipo nkhawina ndalama zinandi. Nkhawona kuti kusambira Baibolo kukanowiranga kuŵa wakukondwa kweniso kuŵa na mtende wamtima. Kweni apo nkhachitanga chiphalizgano, chikaŵa chakusuzga kuchita nthena! Kufuma apo nkhambira kusambira Baibolo, nkhachitako viphalizgano vitatu pera, kweni mu mtima nkhalekerathu yayi. Nkhaghanaghanirangaso chomene umo ningawovwilira banja lane. Mahara ghakamalira. Nkhamanyanga yayi chakuchita, kuti nilutilire kuchita chiphalizgano panji yayi. Kweniso ŵabali ŵane ŵakamba kunisuska chomene, chifukwa cha ivyo nkhamba kugomezga. Adada nawo ŵakakhuŵara chomene. Nkhamba kusuzgika chomene maghanoghano ndipo nkhamba kulwara vilonda vya munthumbo.

Icho chikanovwira chomene kuzizipizga nkhuŵerenga Baibolo, kweniso kuluta ku maungano gha Ŵakaboni ŵa Yehova. Pachoko na pachoko chipulikano chane chikakhora chomene. Nkhapempha Yehova kuti ŵapulike na kuzgora ma lurombo ghane, kweniso kuti niwonenge ivyo wanichitira kale. Nkhamba kuleka kusuzgika maghanoghano muwoli wane wakati waniphalira kuti, iyo wakukhumba kukhala mu nyumba yikuru yayi kuti waŵe wakukondwa. Pachoko na pachoko nkhamba kusintha.

UMO NASANGIRA CHANDURO: Nkhakhorwa kuti mazgu gha Yesu gha pa Mateyu 6:33 ngaunenesko. Iyo wakati: “Ipo lutilirani kupenja dankha Ufumu na urunji wake, ndipo vinthu vinyake vyose ivi visazgikirengeko kwa imwe.” Kuyowoya unenesko, tindasoŵekepo nadi “vinthu vinyake vyose” ivyo Yesu wakayowoya, kung’anamura ivyo tikukhumbikwira kuti tilutilire kuŵa na umoyo. Nangauli nkhusanga ndalama zinandi yayi kuyaniska na izo nkhasanganga apo nkhachitanga chiphalizgano, kweni ine na banja lane tindasoŵepo kanthu vyaka vyose 20 ivyo vyajumpha.

Usange nkhumalira nyengo yinandi pakuchita vinthu vyauzimu, kweniso kuchezga na Ŵakhristu ŵanyane nkhukondwa chomene ndipo nkhukhorwa na ivyo nili navyo, kuluska kumanyuma kose. Mazuŵa ghakwenda luŵiro chomene. Banja lane nalo lasintha chomene. Ŵana ŵane wose ŵatatu na ŵawoli ŵawo nawo, mbateŵeti ŵakugomezgeka ŵa Yehova.