Baibol na wene ohwo

DIE yen mu ọshare ọvo rọ rhọnvwa nene ihwo mu ugbeya-an rọ je djoma, vwo vwo ẹguọnọ rẹ ihwo efa je chọn ayen uko? Die yen mu ọshare ọvo vwẹ Mexico ro gbe ọfanrhiẹn vwo wene akpeyeren rọyen? Die yen nẹrhẹ ọshare ọvo vwẹ Japan ro titiri mamọ vwẹ onẹdjẹ rẹ idjighere dobọ rẹ onẹdjẹ tiọyen ji? E jẹ a mrẹ oborẹ ayen ta kpahọn.

“Mẹvwẹ ohwo ro yivwaro, rọ kparoma, rọ je djoma.”​—DENNIS O’BEIRNE

UKPE RE VWIẸRẸ: 1958

ẸKUOTỌ RO NURHE: ENGLAND

AKPỌ RO YERIN JOVWO: OHWO RỌ RHỌNVWA NENE IHWO MUẸ UGBEYA-AN, RỌ JE DJOMA

AKPỌ MI YERIN JOVWO: Ọsẹ mẹ ohwo rẹ Ireland, avwanre ihwo rẹ Ireland, ẹga rẹ Ifada yen me ra. Ọke buebun na, mẹvwẹ ọvo yen yan kpo ishọshi komobọ, jẹ ishọshi ẹra na je vwe-e. Ẹkẹvuọvo, mi vwo owenvwe mi vwo yono kpahen Ọghẹnẹ. Me nẹ Ẹrhovwo rẹ Ọrovwori na ọkieje, me karophiyọ nẹ mi de sherhẹn vwẹ ehwa vwẹ ason, mi roro kpahen obo ro mudiaphiyọ. Mi roro kpahọn je davwẹngba vwo vughe oborẹ ẹbẹre ọvuọvo ẹrhovwo na mudiaphiyọ.

Me vwọ hẹ omarẹ ẹgbukpe 16, mi vwobọ vwẹ irueru rẹ ẹko sansan ri gbevwọso usuon vẹ ihwo rehẹ ekogho me dia. Me reyọ ihuvwun egangan, ma rho kẹ igbo ri mi phopho kẹdẹ kẹdẹ. Mi de rhi vwo uruemu rẹ “ọyena te vwe-e,” me da udi gangan ji phiẹ arhọ mẹ phiyọ ẹdia rẹ imuoshọ, mi ji se ihwo gbemu-u. Me guọnọ rhiẹromrẹ ihwo-o, me tobọ ta ota kẹ ohwo vuọvo-o jokpanẹ ota na che fierere kẹ vwẹ. Me tobọ rhọnvwa nẹ a ghwẹ vwẹ phiyọ ifoto-o. Asaọkiephana, mi de roro kpahen oka rẹ akpọ ri mi yerin jovwo, ke me mrẹ nẹ mẹvwẹ ohwo ro yivwaro, rọ kparoma, rọ je djoma. Ohwo rọ kẹrẹ ovwẹ mamọ ọvo yen mi dje uruemu esiri ji ruẹse kẹ.

Me vwọ hẹ omarẹ ẹgbukpe 20, mi de rhi vwo urhurusivwe kpahen Baibol na. Ugbeyan mẹ ọvo rọ shẹ ihuvwun egangan, tuẹn ese rẹ Baibol phiyọ ọke rọ vwọ hẹ uwodi, kẹ avwanre ta ota ọke grongron kpahen ẹga, Ishọshi vẹ ẹbẹre rẹ Eshu kare vwẹ akpọ na. Me da dẹ Baibol je tuẹn ese rọyen phiyọ komobọ. Mẹ vẹ ugbeyan mẹ de se ẹbẹre evo vwẹ Baibol na nu, kẹ avwanre vwoma vwọ ta ota kpahen oborẹ avwanre yonori, avwanre me je jokaphiyọ ẹkpo ra ta ota kpahen na. Avwanre ru ọnana vwẹ emeranvwe evo.

Ena yen erọnvwọn evo rẹ avwanre jokaphiyọ vwẹ oborẹ avwanre seri na: nẹ avwanre yerẹn vwẹ ẹdẹ re koba rẹ akpọ na; nẹ Inenikristi che ghwoghwo iyẹnrẹn esiri rẹ uvie rẹ Ọghẹnẹ; nẹ ayen cha ka ẹbẹre vuọvo rẹ akpọ nana-a, rẹ oseghe rẹ usuon dia ẹbẹre ọvo rọyen na; avwanre je riẹn nẹ Baibol na reyọ uchebro rẹ abavo vwọphia. O phẹnre dẹn nẹ Baibol na ọbe rẹ uyota, nẹ o ji vwo ẹga ọvo rọ dia ọ rẹ uyota. Kẹ, ọrhọ yen ẹga na? Avwanre de roro kpahen ishọshi ride vẹ irueru rayen, ọtiọyen ji te oseghe rẹ usuon rẹ ayen vwobọ vwọ, avwanre da rhe mrẹ nẹ Jesu vwobọ vwẹ oka rẹ irueru ọtiọye-en. Avwanre riẹn nẹ ọ dia Ọghẹnẹ yen reyọ ayen vwo ruiruo-o, kẹ avwanre brorhiẹn re avwanre vwo kpo ẹga efa ri ghwe titi-i rere avwanre vwọ riẹn oborẹ ayen ga ẹga rayen wan.

Avwanre ke nọ ihwo ri kpo ẹga tiọyena enọ sansan. Avwanre riẹn oborẹ Baibol na kpahenphiyọ onọ ọvuọvo rẹ avwanre nọ ayen na, ọtiọyena kẹ avwanre ghwa riẹn sẹ ẹkpahọnphiyọ rayen na shephiyọ vẹ oborẹ Ota rẹ Ọghẹnẹ tare. Ọkieje yen me vwọ nẹrhovwo rhe Ọghẹnẹ siẹrẹ avwanre vẹ ayen da vwoma nu: ‘Ọ da dianẹ ihwo nana yen ga ẹga rẹ uyota, biko mu uvwe vwọ rhoma bru ayen rhe obọ ọfa.’ Dede nẹ emeranvwe evo wanre rẹ avwanre vwọ vwoma vẹ ihwo etiọyen, jẹ me je sa mrẹ ẹko rẹ ihwo re kpahenphiyọ enọ rẹ avwanre nẹ Baibol na rhe; mi ji vwo owenvwe me vwọ rhoma vwoma vẹ ọvuọvo raye-en.

Ukuotọ rọyen mẹ vẹ ugbeyan mẹ da rhe mrẹ Iseri ri Jihova. Avwanre da je nọ ayen enọ vuọvo rẹ avwanre nọ na, ayen da vwẹ Baibol na vwọ kpahenphiyọ enọ na. Oborẹ ayen tare na shamu vẹ oborẹ avwanre yonori na. Ọtiọyena, avwanre da nọ enọ rẹ avwanre je rhe mrẹ ẹkpahọnphiyọ rayen vwẹ Baibol na-a​—kerẹ enọ kpahen ẹro rẹ Ọghẹnẹ vwo ni isigati ephopho vẹ ẹreyọ rẹ ihuvwun egangan. Ayen je reyọ Ota rẹ Ọghẹnẹ vwọ kpahenphiyọ enọ na. Avwanre da rhọnvwe nẹ avwanre che kpo omẹvwa vwẹ Ọguan Ruvie.

Ọ bẹn kẹ vwẹ mi vwo kpo omẹvwa. Dede nẹ ihwo na sẹn osẹnvwe rẹ abavo, ayen ji dede erhorha jẹ, me guọnọ nene ayen ta ota-a. Me vwẹroso aye-en, ọtiọyena me rha guọnọ kpo emẹvwa rayen ọfa-a. Kirobo ri mi ruẹ jovwo, me da nẹrhovwo rhe Ọghẹnẹ nẹ ọ kẹ vwẹ owenvwe ri mi se vwo kuomagbe ayen obọ ofa ọ da dianẹ ayen yen ẹga rẹ uyota na, mi de ghwe vwo owenvwe ọgangan ri mi vwo yono Baibol na vẹ Iseri na.

OBORẸ BAIBOL NA WENE UVWE WAN: Me riẹnre nẹ ofori nẹ me dobọ rẹ ihuvwun egangan ẹreyọ na ji, ọ lọhọ kẹ vwẹ mi vwo ru ewene yena. Ẹkẹvuọvo, me vwọ dobọ rẹ isigati ephopho ji lọhọ kẹ vwẹ kakaka-a. Me davwẹngba me vwọ dobọ rọyen ji abọ buebun, jẹ mi se ruo-o. Mi vwo nyo kpahen ihwo re dobọ rẹ isigati ephopho ji rẹ ayen gbi phopho ọfa-a, me da nẹrhovwo rhe Jihova kpahọn. Womarẹ ukẹcha ri Jihova me da rhe dobọ rẹ isigati ephopho ji. Ke me rhe riẹn obo rọ ghanre te re vwo rhievun ta ota kẹ Jihova vwẹ ẹrhovwo.

Irhuon vẹ osẹnvwe mẹ yen ewene ọfa kiriguo ri mi ruru. Ẹdẹ ri mi tu kpo Ọguan Ruvie, ẹto rẹ onogbozighi ra vwẹ ikọlọ ri blue vwo gbe ọyen mi muru. Ọke vwọ yanran, me da vwẹ ikọlọ rẹ orange vwo gbe ẹto na. Ijinsi vẹ ewun ra reyọ ophiẹn rẹ eranvwe vwo ru, re siẹ erọnvwọn vọn yen mi kuphiyọ. Dede nẹ mẹ vẹ Iseri na nabọ ta ota kugbe, jẹ me mrẹ oboresorọ mi vwo ru ewene-e. Ukuotọ rọyen, mi de roro kpahen 1 Jọn 2:​15-​17: “Ovwan guọnọ akpọ na-a, eyẹ obo re hẹ evun rẹ akpo na. Ọ da dianẹ ohwo guọnọ akpọ na, yẹ ẹguọnọ rẹ Ọsẹ na gbi rhe-e.” Me da rhe mrẹvughe nẹ eheri mẹ djephia nẹ mi vwo ẹguọnọ rẹ akpọ na, jẹ mi vwo djephia nẹ mi vwo ẹguọnọ rẹ Ọghẹnẹ, ko fori nẹ mi ru ewene. Mi de ru ewene.

Ọke vwọ yanran na, mẹ da rhe mrẹvughe nẹ ọ dia Iseri na ọvo yen guọnọ nẹ me vwomaba ayen vwẹ emẹvwa-a. Hibru 10:​24, 25 djere kẹ vwẹ nẹ ọna yen oborẹ Ọghẹnẹ guọnọ nẹ mi ru. Me vwọ ton emẹvwa eje ẹra phiyọ, ri mi ji vwo vughe ihwo na phiyọ re, mi de brorhiẹn re me vwọ vwomakpahotọ kẹ Jihova ji bromaphiyame.

ERERE RE ME MRẸRE: Uphẹn ri Jihova rhiephiyọ kẹ avwanre rẹ a vẹ ọyen vwo vwo uvi rẹ oyerinkugbe, te vwe ẹwẹn mamọ. Aruẹdọn kugbe ẹroevwote rọyen mu vwe vwọ vwẹrokere vẹ Ọmọ rọyen Jesu Kristi, rọ dia oniru kẹ vwẹ. (1 Pita 2:​21) Mi yonori nẹ, dede nẹ me davwẹngba mi vwo vwo iwan rẹ Onenikristi, me je sa jẹ ojẹ romobọ mẹ. Me wianre gangan me sa vwọ dia ohwo ro vwo ẹguọnọ vẹ ọdavwẹ rẹ ihwo efa. Me davwẹngba me vwọ vwẹrokere Kristi vwẹ obo ri mi nene aye vẹ ọmọ mẹ yerẹn wan. Mi ji vwo ọdavwẹ rẹ iniọvo rẹ eya vẹ eshare rehẹ ukoko na. Udje rẹ Kristi ri mi nene rhe nẹrhẹ me dia ohwo re muọghọ kẹ, mi gbi ji nẹ oma mẹ kueku-u, ọ je nẹrhẹ mi se dje ẹguọnọ kẹ ihwo efa.

“Ayen muọghọ kẹ vwẹ.”​—GUADALUPE VILLARREAL

UKPE RE VWIẸRẸ: 1964

ẸKUOTỌ RO NURHE: MEXICO

AKPỌ RO YERIN JOVWO: AKPỌ RẸ ỌFANRHIẸN

AKPỌ MI YERIN JOVWO: Mẹvwẹ ọvo usun rẹ emọ rẹ ighwrẹn rẹ oni mẹ vwiẹre, Hermosillo vwẹ Sonora, Mexico yen me dia ghwanre rọ dia ekogho rẹ ivwiogbere vọnre. Ọke me vwọ hẹ omotete yen ọsẹ mẹ vwo ghwu, ọtiọyena oni mẹ kọ wian gangan ọ sa vwọ vwẹrote avwanre. Owọ fefe yen me vwọ yan kidie avwanre vwo igho a sa vwọ dẹ isabato-o. Me je hẹ omotete me vwọ tuẹn owian rẹ igho phiyọ rere me sa vwọ vwẹ ukẹcha kẹ orua mẹ. Kerẹ erua buebun, ubruwevwin yen avwanre dia kugbe.

Ọke buebun na, oni mẹ dia uwevwin ọ sa vwọ chochọn avwanre-e. Me vwọ hẹ ẹgbukpe 6 yen eghene ọshare ọvo ro te ẹgbukpe 15 vwo gbe vwe ẹgua. O gbe vwe ẹgua ọke grongron. Ukuko rọyen ki mi roro nẹ ọ chọre ọshare vwo vwo urhurusivwe rẹ ehware kpahen eshare-e. Me vwọ guọnọ ukẹcha mie idọktọ vẹ ilori rẹ ẹga, ayen da kẹ vwẹ imuẹro nẹ ọyena dia ebẹnbẹ-ẹn, nẹ ọ chọre mi vwo vwo urhurusivwe tiọyena-a.

Me vwọ hẹ ẹgbukpe 14, mi de brorhiẹn me vwọ vwẹ osẹnvwe vẹ iruemu mẹ vwo djephia nẹ mẹvwẹ ọshare ro nene ọshare vwerhẹn. Mi nene eshare sansan dia ji nene ayen vwerhẹn vwẹ ẹgbukpe 11 re vwọ kpahọn. Ukuko rọyen, mi de brorhiẹn mi vwo vwo ushoghwa ri mi de brẹ ji me ẹto. Ẹkẹvuọvo, mi vwo omavwerhovwẹ-ẹn. Akpọ mẹ kọ vọnre vẹ oja kidie ihwo ku vwe phiyotọ ọke buebun. Me da rhe mrẹvughe nẹ obo ri mi ruẹ na chọre. Ke me nọ oma mẹ, ‘Omamọ rẹ ihwo ra sa vwẹroso herọ?’

Mi de roro kpahen oniọvo mẹ rẹ ọmọtẹ. Ọ ton uyono ri Baibol phiyọ vẹ Iseri ri Jihova, o de rhi brọmaphiyame. Ọ vuẹ vwẹ kpahen obo ro yono na, ẹkẹvuọvo me davwerhọ-ọn. Dedena, orọnvwe rọyen vẹ akpeyeren rọyen je vwe. Me mrẹvughe nẹ ọ vẹ ọshare rọyen vwo ẹguọnọ rẹ omoma rayen ji muọghọ kẹ ohwohwo. Ayen dje uruemuesiri kẹ ohwohwo. Ọke vwọ yanran na, Oseri ri Jihova ọvo da ton uyono ri Baibol phiyọ vẹ ovwẹ. Ẹsosuọ, me da ton uyono na phiyọ jẹ oruru rẹ uyono na hẹ oma mẹ-ẹ. Ememerha na erọnvwọn de rhi wene.

OBORẸ BAIBOL NA WENE UVWE WAN: Iseri na vwo durhie uvwe kpo emẹvwa rayen ọvo, me da ra. Ọnana emu kpokpọ kẹ vwẹ. Ihwo efa reyọ ovwẹ vwọ jehwẹ, ẹkẹvuọvo Iseri na ru ọtiọye-en. Ayen muọghọ kẹ vwẹ je nabọ yeren uvwe sasasa. Ọnana te vwe ẹwẹn dẹn.

Ẹguọnọ ri mi vwo kpahen Iseri na de rhi kodophiyọ mi vwo kpo osikoko rayen. Me mrẹvughe nẹ vwẹ asan rẹ ayen de bun dede, ayen je emamọ rẹ ihwo kerẹ oniọvo mẹ na​​—ri vwo obọdẹn rẹ ẹguọnọ. Me da nọ oma mẹ sẹ ena yen emamọ rẹ ihwo ra sa vwẹroso re me guọnọ vwẹ ọke grongron cha re na. Ẹguọnọ vẹ okugbe rayen na gbevwunu mamọ, ọtiọyen ji te oborẹ ayen reyọ Baibol na vwọ kpahenphiyọ enọ eje re me nọre. Ke me rhe mrẹvughe nẹ Baibol na yen nẹrhẹ ayen se yeren omamọ rẹ akpọ na. Me je mrẹvughe nẹ o vwo ewene buebun ri mi che ru me ke sa dia ọvo vwẹ usun rayen.

Vwọrẹ uyota, mi che wene riẹriẹriẹ kidie mi yeren akpọ kerẹsiẹ a sa da mrẹ nẹ mẹvwẹ aye. Mi che wene obo re me ta vẹ obore me ta ota wan, iruemu, osẹnvwe, eka rẹ ẹto mi muẹ vẹ igbeyan ri mi nene. Igbeyan ri mi vwori jovwo ke vwẹ ovwẹ jehwẹ, kẹ ayen ta: “Diesorọ wo vwo ru ọnana? Oka rẹ ohwo ru wọ pha jovwo na yovwirin. Wo yono Baibol na-a. Wo vwo oborẹ wọ guọnọre eje.” Ewene rọ ma bẹn vwẹ eruo yen akpọ rẹ ọfanrhiẹn ri mi yerẹn na.

Dede nẹ ewene nana cha bẹn eruo, jẹ me riẹnre nẹ mi se ruo, eta ri Baibol na vwẹ 1 Kọrẹnt 6:​9-​11 te ẹwẹn mẹ: “Ovwan rha riẹn nẹ ihwo umwemwu cha sa reuku rẹ uvie rẹ Ọghẹnẹ na-a? Wo jẹ a phiẹn wẹ-ẹn; ọvwọfanrhiẹ, eyẹ ọgọẹdjọ, eyẹ o gbe igberadja, eyẹ ọshare ro duẹ ọshare . . . sa reuku rẹ uvie rẹ Ọghẹnẹ na-a. Ọtiọye evo vwẹ usun rẹ ovwan na epha jovwo. Ẹkẹvuọvo a họ ovwan, e ru ovwan fon.” Jihova chọn ihwo uko vwẹ ọke awanre vwo ru ewene, ọ je chọn vwẹ uko. Ọ reyọ ikpe buebun vẹ ẹgbaẹdavwọn ọgangan mi ki se ru ewene na, ẹguọnọ vẹ odjekẹ rẹ Iseri na chọn vwẹ uko mamọ.

ERERE RE ME MRẸRE: Enẹna, mi yeren akpọ rẹ Onenikristi. Me rọvwọn re, mẹ vẹ aye mẹ yono ọmọshare rẹ avwanre obo ro se vwo yeren akpọ nene iwan ri Baibol. Mi rhe yerẹn oka rẹ akpọ mi yerẹn jovwo-o, mi vwo omamọ oyerinkugbe vẹ Jihova je riavwerhen rẹ ẹga rọyen. Me ga kerẹ ọkpako vwẹ ukoko mẹ, me je chọn ihwo efa uko vwo yono kpahen uyota rẹ Ota rẹ Ọghẹnẹ na re. Ewene ri mi ruru vwẹ akpeyeren mẹ vwerhen oni mẹ oma mamọ te ẹdia ro de rhiabọreyọ uyono ri Baibol ji bromaphiyame kerẹ Onenikristi. Oniọvo mẹ ọmọtẹ ofa ro ji yeren akpọ rẹ ọfanrhiẹn jovwo, rhe dia Oseri ri Jihova re.

Ihwo evo re riẹn vwẹ vẹ oka rẹ akpọ mi yerin jovwo rhe mrẹvughe nẹ mi yovwin nẹ obo ri jovwo. Me riẹn obo re chọn vwẹ uko vwo ru ewene nana eje. Ọke re wanre, me guọnọ ukẹcha rẹ idọktọ jẹ, erharhe uchebro ọvo yen ayen kẹ vwẹ. Ẹkẹvuọvo, Jihova chọn vwẹ uko mamọ. Dede nẹ mi niro nẹ mi fiemu-u, o ni vwe so o de nene uvwe yerin vẹ ẹguọnọ ji vwo odirin mẹ. Ọmrẹvughe nẹ Ọghẹnẹ rọ vọnre vẹ igbevwunu, aghwanre kugbe ẹguọnọ na se vwo oniso mẹ je guọnọ nẹ mi yeren omamọ rẹ akpọ, yen mu vwe vwo ru ewene nana.

“Me hẹ ẹdia rẹ ọruvwohwo, oma je vwerhen ovwẹ-ẹ.”​—KAZUHIRO KUNIMOCHI

UKPE RE VWIẸRẸ: 1951

ẸKUOTỌ RO NURHE: JAPAN

AKPỌ RO YERIN JOVWO: OHWO RO SIVWIN OSEGHE RẸ ONẸDJẸ RẸ IDJIGHERE

AKPỌ MI YERIN JOVWO: Orere rọ pha riẹin vwẹ Shizuoka Prefecture, Japan yen me dia ghwanre, umuwevwin ọvo yen avwanre ihwo ẹrenren rehẹ orua avwanre diare. Ọsẹ mẹ vwo ushoghwa ra da rhuẹrẹ je shẹ idjighere. Nẹ ọke rẹ emọ yen ọsẹ mẹ vwo mu vwe kpo onẹdjẹ rẹ idjighere, rọ nẹrhẹ mi vwo omavwerhovwẹn kpahen eha na. Ọsẹ mẹ kọ jiroro rẹ obo re me vwọ dia ọwena rẹ onẹdjẹ rẹ idjighere. Me vwọ hẹ secondary school, ọsẹ mẹ da nabọ muomaphiyọ eyono mẹ rere mi se vwo phikparobọ. Me vwọ hẹ secondary school, a da kẹ vwẹ awọdu vwẹ onẹdjẹ rẹ idjighere abọ erha ọkpọkpahọn vwẹ onẹdje re ruẹ vwẹ ẹkuotọ rẹ avwanre kukpe kukpe. Mi vwo uphẹn ri mi vwo kpo yunivasiti ọvo, ẹkẹvuọvo, mi de brorhiẹn ri mi vwo kpo isikuru rẹ de yono onẹdjẹ. Me da rhe dia ọwena rẹ onẹdjẹ na ọkẹ mi vwo te ẹgbukpe 19.

Vwẹ ọke yena, obo re me guọnọ ru vwẹ akpeyeren yen me vwọ dia ohwo rọ ma tẹn ona rẹ onẹdjẹ rẹ idjighere kparobọ vwẹ Japan. Mi vwo ẹwẹn mi vwo vwo igho buebun rere orua mẹ se vwo yeren omamọ rẹ akpọ. Mi de muomaphiyọ uyono mẹ. Kọke kọke mi de no nẹ uyono ra kẹ vwẹ, yẹrẹ onẹdjẹ na gan nọ kẹ vwẹ, ke me vuẹ oma mẹ nẹ, e vwiẹ vwẹ me vwo djẹ idjighere, ofori nẹ mi ruo yan dede nẹ ọ bẹn kẹ vwẹ! Mi ghini ruo. Ememerha na, me da mrẹ erere nẹ owian ọgangan mẹ na rhe. Vwẹ ukpe rẹsosuọ re me vwọ ro isikuru na, mi de mu ohwo rẹsosuọ vwẹ onẹ rẹ idjighere rẹ ihwo re ro isikuru na obọ djẹre. Vwẹ ukpe rivẹ, mi de muwan mi vwo vwobọ vwẹ onẹdjẹ re vwo vughe ohwo rọ ma tẹn ona rẹ onẹdjẹ rẹ idjighere vwẹ Japan eje. Abọ esan yin mi mu ohwo rivẹ vwẹ onẹdje na.

Ọ vwọ dianẹ me tẹn ona rẹ onẹdjẹ rẹ idjighere na, ihwo ki se vwe “owọ ọgangan ri Tokai,” ọyen odẹ rẹ ekogho ọvo vwẹ Japan. Mi sivwẹn oseghe rẹ onẹdjẹ mamọ. Ọke vwọ yanran na, ihwo re me vẹ ayen gba djẹ onẹ na ke djoshọ mẹ kidie mi gbe arodọnvwẹ kẹ ohwo vwẹ onẹdjẹ na-a. Ki mi rhi vwo igho buebun, re me sa vwọ dẹ kemu kemu re me guọnọre. Me da dẹ uwevwin ọvo ro vwo uvun ra da sasa oma vẹ ekuakua ra vwọ sasa oma ri me yovwin eje. Me da je dẹ imoto rẹ igho rọyen joma bun te igho ra vwọ dẹ uwevwin. Rere igho mẹ na se vwo bunphiyọ, mi de vwobọ vwẹ ekiẹchuọ rẹ etọ vẹ iwevwin kugbe erọnvwọn efa ọtiọyen.

Dede nẹ mi vwo erọnvwọn nana eje jẹ, me mrẹ nẹ me hẹ ẹdia rẹ ọruvwohwo, oma jẹ vwerhen ovwẹ-ẹ. Vwẹ ọke yena, me rọvwọnre ji vwiẹ emọ re, jẹ ọkieje yen mi vwo muophu kpahen orua mẹ. Erọnvwọn ri fiemu-u yen nẹrhẹ ophu mu vwe kpahen aye vẹ emọ mẹ. Ọkieje yen oshọ vwo muẹ ayen, kẹ ayen nẹ opharo mẹ ayen vwọ riẹn sẹ ẹwẹn mẹ na rha hra totọ re.

Ọke vwọ yanran na, aye mẹ da ton uyono ri Baibol phiyọ vẹ Iseri ri Jihova. Ọnana da so ewene buebun vwẹ akpeyeren avwanre. Aye mẹ tare nẹ ọ guọnọ kpo emẹvwa rẹ Iseri na, ọtiọyena, mi de brorhiẹn rẹ orua neje vwo kpo omẹvwa na. Me je karophiyọ ason ẹdẹ ọvo rẹ ọkpako ọvo vwo bru vwe rhe vwẹ uwevwin mẹ rhe ton uyono ri Baibol phiyọ vẹ ovwẹ. Obo ri mi yonori na te vwe ẹwẹn mamọ.

OBORẸ BAIBOL NA WENE UVWE WAN: Ukẹcha re me mrẹ nẹ isese rẹ Ẹfesọs 5:5 cha sa chọrọ ovwẹ ẹro-o. O da ta: “Ogbe ọfanrhiẹ eyẹ ohwo ro jẹfuọn, eyẹ ovwurhuru (kọye hẹ, ọgedjọ) vwo uku ọvuọvo vwẹ uvie ri Kristi kugbe Ọghẹnẹ na-a.” Ke me rhe mrẹvughe nẹ onẹdjẹ rẹ idjighere churobọ si idjogba, o ji titi urhuru evwo. Ẹwẹn obrorhiẹn mẹ ko kpokpo uvwe. Me da rhe mrẹvughe nẹ me da guọnọ ru obo re vwerhen Jihova oma, ko fori nẹ me dobọ rẹ onẹdjẹ na ji. Ẹkẹvuọvo, orhiẹn yena bẹn kẹ vwẹ mamọ.

Mi ghwe ku onẹdjẹ rẹ idjighere mẹ ro me yovwin kparobọ phiyotọ nu obọ, urhuru rọyen ji sivwe mamọ. Mi se vwo phikparobọ vwẹ onẹdjẹ mẹ, mi che vwo ẹwẹn re vwo sivwin oseghe, jẹ obo ri mi yono vwẹ Baibol na kẹ vwẹ ufuoma vẹ ẹwẹn ri dọe! Me vwọ tuẹn uyono ri Baibol phiyọ nu, abọ erha ọvo yen mi vwobọ vwẹ onẹdjẹ rẹ idjighere na, ẹkẹvuọvo mi ji vwo ẹguọnọ rẹ onẹdjẹ na vwẹ ubiudu mẹ. Me rha riẹn emu ọfa ri mi se ru vwọ vwẹrote orua mẹ-ẹ. Me gbe sa yan obaro yẹrẹ kpuko vwẹ uyono ri Baibol mẹ vẹ onẹdjẹ mẹ-ẹ, ihwo rẹ orua mẹ ji keke uvwe fikirẹ esegbuyota kpokpọ mẹ na. Ọsẹ mẹ de no nẹ mi ku ọyen phiyotọ. Iroro na da rhe gan nọ te ẹdia rẹ ofu de dje vwe ri mi de rhi vwo ora rẹ evun.

Uyono ri Baibol rẹ ọkieje kugbe emẹvwa rẹ Iseri ri Jihova re me ra yen chọn vwẹ uko vwẹ ọke ọgangan yena. Ememerha na, esegbuyota mẹ kọ ganphiyọ. Me rẹ Jihova nẹ ọ kpahenphiyọ ẹrhovwo mẹ je chọn vwẹ uko vwọ mrẹvughe nẹ ọ kpahenphiyọ ayen. Ẹwan mẹ na ko rhi kpotọ vrẹ obo ri jovwo ọke rẹ aye mẹ vwọ vuẹ vwẹ nẹ ọ dia ọyen cha dia okpuwevwin tavwen oma ke vwerhọ-ọn. Ke me yan obaro memerha.

ERERE RE ME MRẸRE: Ke me rhe mrẹ nẹ eta ri Jesu rehẹ Matiu 6:​33 ghini uyota. Ọ da ta: “Ẹkẹvuọvo gba ka guọnọ uvie rẹ Ọghẹnẹ tavwe, kugbe ọvwata rọye, kọ vwẹ emu na ejobi ba kẹ kẹ wẹ.” “Emu na ejobi” ri Jesu ta ota kpahen na, re dia obo ra ma guọnọ vwẹ akpeyeren kanre avwanre-e. Dede nẹ igho re me mrẹ enẹna ghwe bun te ọ re me mrẹ ọke re me vwọ djonẹ rẹ idjighere-e, jẹ oborẹ mẹ vẹ orua mẹ guọnọre kanre avwanre vwẹ ẹgbukpe 20 re wanre na-a.

Vwọ vrẹ oyena, aghọghọ vẹ evunvọnvwẹ re me je rhe mrẹ dẹvo-o yen me mrẹ siẹrẹ mẹ vẹ iniọvo rẹ ukoko na da wian yẹrẹ ga kuẹgbẹ. Ẹdẹ ke djẹ phẹrẹ vwẹ ẹro mẹ kidie mi vwobọ vwẹ iruo ri Jihova. Akpeyeren rẹ orua mẹ rhi yovwinphiyọ vrẹ obo ri jovwo. Emeshare mẹ erha na vẹ eya rayen nabọ fuevun ga Jihova sasasa.