La Bìblia la càmbia la vita dele persone

Come che un che ghe piase el rock punk e no ghe piase de star cole persone el ga imparà a amarle e a giutar i altri? Cossa che ga motivà un omo del Mèssico a no gaver pi una vita imoral? Parché che un siclista famoso del Giapon el ga assà el siclismo par servir a Dio? Vedemo la so stòria.

“Mi era sensa creansa, arogante, violento.” — DENNIS O’BEIRNE

ANO DE NASSIMENTO: 1958

PAESE: INGLATERRA

CHI ERO: ROCK PUNK CHE NO GHE PIASEA DELE PERSONE

EL ME PASSÀ: La fameia de me pare la ze dela Irlanda e son stà slevà come catòlico. Normalmente mi ndea in ciesa mi sol, mi no me piasea ma ancora cossita mi gavea tanta voia de imparar sora Dio. Mi disea sempre el Pare Nostro. Me ricordo che de note restea là par pensarghe sora e gavea el costume de spartir questa orassion in tochi par proar capir cossa che cada un el volea dir.

Quando mi era un toso me son metesto nel movimento Rastafari, me ga interessà anca la polìtica, come par esémpio el grupo contra el nazismo. Ma son restà insieme col movimento rock punk. Mi come lori era contra tuto, no me importea de gnente e de nissuni. Bevea tanto, riscea la vita, no me preocupea coi altri, doperea droghe ancora de pi macogna che fumea quasi tuti i giorni. Mi no me piasea restar coi altri, no parlea quasi con nissuni e parlea sol quel che me piasea. No me piasea che i altri me fesse foto. Ancoi capisso che mi era sensa creansa, arogante e violento. Era bon e generoso sol cole persone che era pi tacà.

Quando gavea intorno de 20 ani me son interessà dela Bìblia. Un me amigo che vendea droghe el gavea scominsià a léderla quando l’era in preson, ghemo discoresto tanto sora religion, la ciesa e quel che el Diaol el fà nel mondo. Go comprà una Bìblia e go scominsià a studiarla mi mi sol. Noantri feino cossita: mi e me amigo ledeino tochi dela Bìblia e dopo se cateino par parlarghene e insieme diseino quel che gaveino capio. Ghemo fato cossita par diversi mesi.

Arquante dele robe che ghemo capio le era queste: semo drio viver nei ùltimi giorni de questo mondo, i cristiani i ga de predicar le bone notìssie del Regno de Dio, no i ga de far parte de questo mondo gnanca dela polìtica e che la Bìblia la dà boni consili par la vita. Ghemo visto pròpio che la Bìblia la ga la verità e che ga de esserghe una vera religion. Ma qual? Ghemo pensà nele religion pi grande con tuto quel che lore le fà, i so costumi, le so ostentassion, che le se mete nela polìtica e ghemo visto che l’è tanto difarente de quel che Gesù fea. Par noantri l’era ciaro che Dio no l’era drio doperar quele religion, alora ghemo dessidio de peschisar religion manco famose par veder come che le era.

Noantri se cateino con arquanti de queste religion e ghe feino domande. Saveino belche cossa che la Bìblia la dise, cossita noantri podeino veder suito se quel che lori i rispondea l’era de acordo cola Parola de Dio o nò. Dopo de parlar con lori, mi ghe domandea sempre a Dio: ‘Se queste persone le ze dela vera religion, par piaser fame gaver voia de catarli nantra volta.’ Ma dopo de discorer par mesi con tante persone no go catà gnanca un che doperea la Bìblia par risponderne, e voia de catarme nantra volta con lori manco ancora.

In ùltima ghemo cognossesto le Testimònie de Geovà. Ghe ghemo fato le medèsime domande ma, difarente dei altri, lori i ga doperà la Bìblia par risponderne e quel che i disea l’era de acordo con quel che noantri belche gaveino imparà. Alora, ghemo scominsià farghe domande che noantri no gaveino gnancora catà una risposta nela Bìblia, par esémpio, sora cossa che Dio el pensa sora el fumo e le droghe, e i doperea sempre la Parola de Dio par risponderne. I ne ga anca convidà par ndar a una riunion nel Salon de Regno e ghe ghemo dito de si.

Ndar nte una riunion par mi l’è stà tanto fadiga. No me piasea ndar in meso dela gente e no me piasea gnanca che le persone col soriso e ben vestie me saludesse. Go fin pensà che ghen fusse qualcossa de drio, alora no go pi volesto ndar nte una riunion. Ma, come che fea sempre go domandà a Dio che el me desse la voia de star con lori nantra volta se i gavesse la vera religion. Alora me ze vegnesto una granda voia de studiar la Bìblia cole Testimònie de Geovà.

LA BÌBLIA LA GA CAMBIÀ TANTO LA ME VITA: Mi savea che me tochea no doperar pi droghe, e son stà bon molarghela suito. Ma go fato una bela fadiga col sìgro. Go proà tante volte de fermarme ma no era mia bon. Go sentio parlar de persone che le gavea butà via i sigri e sensa tanta fadiga i se gavea fermà de fumar. Alora, go domandà a Geovà che el me giutesse. Dopo, col so aiuto, son stà bon de fermarme de fumar. Go imparà che l’è pròpio bon verder el cuor a Geovà e parlarghe de tuto quel che penso.

Nantro grando cambiamento che go bio de far l’è stà la me maniera de vestirme e de rangiarme. La prima volta che son ndato nel Salon del Regno mi gavea tuti i cavei in su con una strissa azul come el color del pavon. Dopo li go pintadi de naransa. Mi gavea braghe de brin e una giacheta con tante scrite sora. Mi pensea che no me ocorea cambiar ancora, anca se arquante Testimònie de Geovà me gavea parlà de maniera bondosa sora questo assunto. Ma go pensà sora 1 Gioani 2:15-17: “No sté amar el mondo gnanca le robe che ghen’è nel mondo. Se qualchedun el ama el mondo, el amor del Pare no l’è in lu.” Go capio che la me maniera de rangiarme la mostrea che mi amea el mondo e, par mostrar che mi amea a Dio, gavea de cambiar. Go fato pròpio cossita.

Pi avanti go capio che no era sol le Testimònie de Geovà che volea che ndesse ale riunion. Ma come dise Ebrei 10:24 e 25, l’è Dio che el vol. Quando go scominsià a ndar a tute le riunion e a cognosser meio i fradei, go dessidio de dedicarme a Geovà e batesarme.

COME SON STÀ GIUTÀ: Veder che Geovà el ne assa gaver una forte amicìssia con lu smìssia fondo nel me cuor. La so bontà e la so preocupassion me fà voler far compagno a so fiol Gesù Cristo nela me vita. (1 Piero 2:21) Go imparà che anca quando me sforso de far compagno a Cristo, posso ancora gaver la me maniera de esser. Me sforso par mostrar amor e darghe atension ai altri. Proo far compagno a Cristo come mi trato me sposa e me fiol e me preocupo tanto coi me fradei. Far compagno a Cristo me ga insegnà a volerme ben, no cavarme via la dignità e amar i altri.

“I me ga tratà con rispeto.” — GUADALUPE VILLARREAL

ANNO DE NASSIMENTO: 1964

PAESE: MÈSSICO

CHI ERO: GAVEA UNA VITA IMORAL

EL ME PASSÀ: Son stà slevà nte una fameia de sete fioi, nela cità de Hermosillo, Sonora, Mèssico, un posto che ghen’è tanti poareti. Me pare l’è morto quando mi era picinin e par quela me mama la ga bio de laorar par mantegner la fameia. Anca se mi go scominsià a laorar de picinin par giutar casa, no gaveino soldi gnanca par comprar le scarpe e ndea in giro sempre pié scalsi. Come sucedea in tante fameie, la nostra casa la era pìcola e èrino tuti imuciadi.

Come me mama laorea tuto el di, no la era con noantri par protegerne. Quando gavea sei ani, un toso de 15 ga abusà sessualmente de mi, e ga seità farlo par tanto tempo. Par quela, no capia se me piasea i òmini o le done. Dopo, go pensà che zera normal che me piasesse i òmini. Quando go parlà con mèdichi e preti, i me ga dito che quel che sentia l’era normal, che no gavea problemi.

Con 14 ani go dito a tuti che era omossessual. Go seità cossita par 11 ani e son stà insieme a tanti òmini. Go studià par esser cabelereiro e go verto un salon. Mi no era contento cola me vita, parché la era piena de sofrimento e traission. Mi sentia che no era drio far polito e go scominsià domandarme: ‘Sarà che in questo mondo ghen’è persone bone che se pol fidarse?’

Me go ricordà de me sorela. Ela la gavea scominsià studiar la Bìblia cole Testimònie de Geovà e la se gavea batesà. La me contea sora le robe che la imparea, ma mi no la badea. Ancora cossita, so vita e el so matrimònio me fea pensar. Se vedea che ela e so omo i se amea e i gavea rispeto un del altro del bon. Lori se tratea con amor. Col tempo, go scominsià studiar la Bìblia con una Testimònia de Geovà. Nel scomìnsio no gavea tanta voia, ma dopo le robe ze cambiade.

LA BÌBLIA LA GA CAMBIÀ TANTO LA ME VITA: Le Testimònie de Geovà me ga convidà par ndar a una dele so riunion e mi son ndà. Parea una roba de nantro mondo, parché i me tratea con rispeto e i era gentili con mi. L’era tanto difarente de come le persone me tratea, parché sempre i me tolea in giro. Son restà pròpio emossionà!

Me piasea le Testimònie de Geovà, ma me ga maraveià ancora de pi quando son ndà nte una assemblea. Go visto che anca quando i ze in tanti, lori i ze sinseri e boni, compagno ale qualità che me piasea de me sorela. Sarà che queste persone bone e de fidarse ze quele che mi vao in serca fa tanto tempo? Son stà maraveià del so amor, dela so union e anca parché i doperea sempre la Bìblia par risponder a tute le domande. Go capio che l’era la Bìblia che li fea esser cossita e che se anca mi volea esser compagno, gavaria de far tanti cambiamenti.

E l’è stà pròpio cossita! Mi gavea de cambiar del tuto, come del giorno par la note. Fea tuto come una dona: me estri, me moti, me cavei e anca me amighi. Mi gavea de cambiar tuto. Me veci amighi i ga scominsià torme in giro, e i disea: “Sito drio far che? Te stei ben vanti! No stà studiar la Bìblia, te sì aposto cossita”. La roba pi difìcile de far l’è stà assar la me vita imoral.

Anca cossita, mi savea che podea far grandi cambiamenti. Quel che l’è scrito in 1 Corinti 6:9-11 me ga incoraià tanto: “No savé che i ingiusti no i guadagnarà el Regno de Dio? No sté mia farve imbroiar. Quei che i fà imoralità sessual, i idòlatri, i adùlteri, i òmini che i aceta partissipar in ati omosessuai, i òmini che i fà ati omosessuai . . . no i guadagnarà el Regno de Dio. Questo l’è quel che arquanti de valtri eri. Ma valtri sì stati lavadi.” Come Geovà el gavea giutà le persone de quel tempo, el me ga giutà anca mi. Ghe ga volesto tanti ani e l’è stà fadiga, ma le orientassion e el amor dele Testimònie de Geovà me ga giutà tanto.

COME SON STÀ GIUTÀ: Ancoi go una vita normal. Son maridà, e mi e me sposa semo drio insegnarghe a nostro fiol come viver de acordo coi prinsipi dela Bìblia. Come vivea vanti, romai ze robe del passà. Go tante benedission e fao tanti laori nela organisassion de Geovà. Son ansian e go giutà tante persone a imparar la verità sora la parola de Dio. I cambiamenti che go fato ga assà me mama tanto contenta, che anca ela ga scominsià studiar la Bìblia e col tempo la se ga batesà. Anca una dele me sorele, che gavea una vita imoral, ze deventada Testimònia de Geovà.

Fin quei che ghe piasea come vivea vanti i ga visto che adesso mi son una persona meio. Nel passà, mi son ndà in serca de gaver consìlio e aiuto dei dotori, ma no li go catadi. Mi so quel che me ga giutà del bon: l’è stà Geovà. Anca se mi sentia che no meritea gnente, Geovà el me ga vardà e tratà con amor e passiensa. Cognosser un Dio con tanto saver, amor, che se preocupa con mi e che vol che gàpia una vita meio, me ga giutà e dato la forsa de far tuti questi cambiamenti nela me vita.

“Mi no era contento, me sentia vodo e tanto sol” — KAZUHIRO KUNIMOCHI

ANO DE NASSIMENTO: 1951

PAESE: GIAPON

CHI ERO: SICLISTA CHE VOLEA ESSER SEMPRE EL MEIO

EL ME PASSÀ: Son stà slevà nte una cità del Giapon, Shizuoka, darente el mar. Èrino in oto in fameia, steino nte una pìcola casa. Me pare el vendea bissiclete. Fin de quando mi era picinin me pare me portea a veder le carere de bissicleta, par quela ga scominsià piaserme questo sport. Me pare el volea farme deventar un siclista profissional, alora el ga scominsià trenarme quando gavea 14 ani. Nel ensino mèdio mi go vinsesto tre ani drio man, nte una competission nassional, dopo i me ga convidà a ndar nte una università, ma mi go dessidio de ndar drito nte una scola de siclismo. Con 19 ani mi era belche un siclista profissional.

In quel tempo mi volea deventar el meio siclista de Giapon, volea guadagnar tanti soldi par farghe gaver ala me fameia una vita tranquila e sensa preocupassion, par quela mi trenea con tanto sforso. Quando mi gavea el treno tanto duro, fadiga e no me sentia sicuro, pensea: son vegnesto al mondo par esser un siclista. Gaver questo pensamento me giutea a ndar avanti e no rénderme, e l’è stà pròpio questo che go fato. In poco tempo tuti i me sforsi ga dato resultadi: nel primo ano son stato el meio intrà i novi siclisti e nel secondo ano go vinsesto la carera che scoliea quei che podea ndar nela competission par esser el meio siclista del Giapon. Par sei volte son rivà nel secondo posto.

Mi era cognossesto come le gambe forte del Tocai, una region de Giapon, parché nei ùltimi ani mi era sempre un dei meio siclisti e volea seitar esser cossita. Rivea sempre ndove che volea, par quela che i altri i gavea paura de mi. Ciapea sempre de pi soldi e pensea che podea comprar quel che volea. Go comprà una casa e go fato una sala coi meio apareli par far esersissi, go comprà un auto importà che costea quasi come una casa. Par tender de no perder i me soldi go scominsià a comprar propietà e parte dele imprese (ações).

Anca se gavea tute queste robe, mi no era contento, me sentia vodo e tanto sol. Mi era maridà e gavea fioi. Ma tante volte no gavea passiensa con lori. Mi restea inrabià con me sposa e me fioi par poco o gnente. Lori i era sempre su cole récie con mi cossita lori i vardea sempre la me fàcia par capir se mi era nervoso, parché tante volte perdea la calma con lori.

Un giorno la me dona la ga scominsià studiar la Bìblia cole Testimònie de Geovà. Cossita ga cambià tante robe. Ela la ga dito che la volea ndar ale riunion dele Testimònie de Geovà, alora go dessidio che tuti sarìssino ndati insieme. Me penso ancora quela sera che un ansian l’è vegnesto casa nostra e el ga scominsià a studiar la Bìblia con mi. Son stà tanto maraveià de quel che go imparà.

LA BÌBLIA LA GA CAMBIÀ TANTO LA ME VITA: Mi no me desmentegarò mai come me ga giutà el testo de Efesi 5:5, che dise: “Quei che i fà imoralità sessual, quei che no i ze puri, quei che i vol sempre de pi, che ze la medèsima roba de esser idòlatri, lori no i riceverà in eredità el Regno de Cristo e de Dio.” Go capio che par de drio dele carere de bissicleta ghen’era el giugar par soldi e che questo sport el fea cresser la voia de gaver sempre de pi. La me cossiensa ga scominsià intrigarme. Go visto che se volea contentar Geovà Dio gavea de assar le carere. L’era una dessision tanto fadiga de far.

Mi era nel meio perìodo dela me vita, ma volea ancora de pi. Difarente dei sentimenti che gavea nele competission, studiar la Bìblia me dea tanta pace. Dopo de gaver scominsià studiar la Bìblia, go partessipà sol che in tre carere, ma nel me cuor no gavea cavà via la voia del siclismo. Me sentia perso, sensa saver cossa far, parché no savea come che ndaria mantegner la me fameia. Me parenti i ga scominsià intrigarme parché gavea questa nova religion. Me pare l’è restà tanto disgustà con mi e no savea come mòverme. Gavea tanto stresse che me ze vegnesta fin una ùlsera.

Seitar studiar la Bìblia e ndar ale riunion dele Testimònie de Geovà ze pròpio quel che me ga giutà in questo perìodo difìcile. Pochetin par volta la me fede ze restada pi forte. Go domandà a Geovà che el scoltesse le me orassion e che el me giutesse a capir che lu lo fea pròpio. Me dona me ga giutà tanto quando la me ga dito che no ghe ocorea viver nte una casa granda par esser felice. Pian pianeto, le robe le era drio ndar meio.

COME SON STÀ GIUTÀ: Go capio che le parole de Gesù in Mateo 6:33 le ze pròpio vere. Lu el ga dito: “Seité a meter el Regno e la giustìssia de Dio nel primo posto, e cossita tute le altre robe le ve sarà dontade.” No semo mai restadi sensa le “altre robe” che Gesù gavea parlà, quel che ne ocore par viver. Ancoi, mi guadagno 30 volte manco de quel che guadagnea quando era un siclista, ma a mi e la me fameia no ne ga mai mancà gnente in questi ùltimi 20 ani.

E ancora de pi, quando son drio far le robe par Geovà coi me fradei son tanto felice e sento una roba che no gavea mai provà. Son contento con quel che go. El tempo passa che gnanca me nicordo. Anca me vita in fameia la ze tanto meio. I me tre fioi e so spose i ze deventadi servi fedeli de Geovà.