Oxloqʼi li Jehobʼa rikʼin laabʼaanuhom
Oxloqʼi li Jehobʼa rikʼin laabʼaanuhom
«Li wank xnaʼlebʼ naxkʼe reetal bʼar yo chi xik» (PRO. 14:15, LI SANTIL HU, SOCIEDAD BÍBLICA DE GUATEMALA, SBG).
1, 2. a) Kʼaru tento tqakʼoxla naq tqasikʼ kʼaru xbʼaanunkil? b) Kʼaru ebʼ li patzʼom tqasume?
RAJLAL naqabʼaanu. Naabʼal rehebʼ moko wank ta xwankil abʼan junchʼol chik naru naxjal li qayuʼam. Chirix kʼaru yooko chi aatinak? Chirix li naqasikʼ xbʼaanunkil saʼ li qayuʼam. Abʼan, maakʼaʼ naxye kʼaru naqasikʼ xbʼaanunkil saʼ li qayuʼam li jwal wank xwankil aʼan naq tqakʼe xloqʼal li Yos (taayaabʼasi 1 Corintios 10:31).
2 Re naq chaabʼilaq li qawanjik rikʼin li Jehobʼa aajel ru naq tqatzol kʼaru li us ut li inkʼaʼ us re naq chi joʼkan li tqasikʼ xbʼaanunkil tixchap ribʼ rikʼin li naqapaabʼ ut maawaʼ rikʼin li nekeʼxye ebʼ li junchʼol (Rom. 12:1, 2; Heb. 5:14). Kʼaru chik xyaalal wank re naq tqatzol xsikʼbʼal chiʼus li naqaj? Kʼaʼut wank sut nachʼaʼajkoʼk chiqu xsikʼbʼal li tqabʼaanu? Kʼaru tento tqabʼaanu re naq li tqasikʼ xbʼaanunkil saʼ li qayuʼam tixkʼe xloqʼal li Yos?
Kʼaʼut naʼajmank naq tqasikʼ li tqabʼaanu?
3. Kʼaru ebʼ li naʼlebʼ inkʼaʼ raj t-okenq chirix li naqasikʼ xbʼaanunkil?
3 Wi nawiibʼank qachʼool chirix li naʼlebʼ li wank saʼ li Santil Hu, ebʼ li qechkʼanjel malaj qechtzolom naru teʼxkʼoxla naq inkʼaʼ naqapaabʼ li naxye li Santil Hu ut naq teʼruuq qaqʼunbʼesinkil re xbʼaanunkil li nekeʼraj. Maare nekeʼtikʼtiʼik, nekeʼbʼalaqʼik malaj nekeʼelqʼak ut moqon nekeʼxye naq tooʼokenq chirixebʼ malaj teʼxye qe naq maakʼaʼ tqaye chirix li nekeʼxbʼaanu. Abʼan aʼin naraj xyeebʼal «xik chirixebʼ» li xkʼihalil li kristiʼaan (Éxo. 23:2, SBG). Laj paabʼanel li naxnaw naq li naxsikʼ xbʼaanunkil naxkʼe xloqʼal li Yos moko naxkanabʼ ta naq li xxiw malaj xrahinkil naq tkʼulubʼaaq xbʼaanebʼ li junchʼol tixram chiru xyuʼaminkil li naxye li Santil Hu (Rom. 13:5).
4. Kʼaʼut nekeʼraj ebʼ li junchʼol okenk chirix li naqakʼoxla?
4 Moko chixjunilebʼ ta li nekeʼyehok qe chanru tqabʼaanu junaq li naʼlebʼ nekeʼxbʼaanu xbʼaan li xlabʼal xchʼool. Wankebʼ ajwiʼ li qamiiw li nekeʼraj qatenqʼankil nekeʼxmin qu re naq tqabʼaanu li nekeʼxye. Usta moko wanko ta chik saʼebʼ li rochoch li qanaʼ qayuwaʼ nekeʼraj xsikʼbʼal li tqabʼaanu xbʼaan naq nekeʼxkʼe xchʼool chiqix. Jun eetalil, ebʼ li naʼlebʼ li naʼoksimank saʼ li bʼaneʼk. Li Santil Hu chi chʼolchʼo ru naxye naq inkʼaʼ tqoksi li kikʼ (Hech. 15:28, 29). Abʼan li Santil Hu moko naxye ta chi chʼolchʼo ru kʼaru tbʼaanumanq saʼ wiibʼ oxibʼ li naʼlebʼ chirix li bʼaneʼk. Laj paabʼanel tento tixjultika naq li junjunq «tento tixkʼam li riiq» (Gál. 6:4, 5, SBG). Li jwal wank xwankil aʼan naq chaabʼilaq li qachʼool ut li qakʼaʼuxl chiru li Yos ut maawaʼ chiruhebʼ li winq (1 Tim. 1:5).
5. Kʼaru tqabʼaanu re naq inkʼaʼ tqakʼe saʼ chʼaʼajkilal li qapaabʼal?
5 Wi inkʼaʼ naqanaw xsikʼbʼal chiʼus li tqabʼaanu, tqachʼik qibʼ saʼ naabʼal li chʼaʼajkilal. Kʼaʼut naqaye aʼin? Laj Santiago kixye naq li nawiibʼank xchʼool «moko chʼolchʼo ta ru li xyuʼam» (Sant. 1:8, SBG). Joʼ jun li jukubʼ li maakʼaʼ xkʼanjelobʼaal re xbʼeresinkil, yalaq bʼar nakʼameʼk xbʼaan li kaqsut-iqʼ. Joʼkan ajwiʼ tixkʼul li kristiʼaan li inkʼaʼ naxnaw kʼaru xbʼaanunkil ut naxkanabʼ naq ebʼ li junchʼol teʼxye re li tento tixbʼaanu. Aʼin truuq xkʼebʼal saʼ chʼaʼajkilal li xwanjik rikʼin li Jehobʼa ut moqon xkʼebʼal saʼ xbʼeenebʼ li junchʼol li rahilal li yook xkʼulbʼal (1 Tim. 1:19). Kʼaru tqabʼaanu re naq inkʼaʼ tqakʼul aʼin? Tento tqayal qaqʼe re naq «kaw xaqxooq[o] saʼ li paabʼaal» (taayaabʼasi Colosenses 2:6, 7, SBG). Aʼin natawmank naq chʼolchʼo chiqu naq kaʼajwiʼ li Santil Hu truuq qatenqʼankil re xsikʼbʼal kʼaru tqabʼaanu saʼ li qayuʼam (2 Tim. 3:14-17). Abʼan wank jalanq chik ebʼ li naʼlebʼ li naru tooxkʼe saʼ chʼaʼajkilal re xsikʼbʼal li tqabʼaanu saʼ li qayuʼam. Bʼar wank rehebʼ aʼin?
Kʼaʼut wank sut nachʼaʼajkoʼk chiqu xsikʼbʼal li tqabʼaanu saʼ li qayuʼam?
6. Chanru nokooxkʼe saʼ chʼaʼajkilal li xiw?
6 Wi nachalk qaxiw xbʼaan naq nokoopaltoʼk, xbʼaan naq inkʼaʼ us naqabʼaanu junaq li naʼlebʼ malaj naq ebʼ li junchʼol nokooʼeʼxseʼe, aʼin naru nokooxchʼaʼajki naq naqasikʼ kʼaru tqabʼaanu saʼ li qayuʼam. Li ttenqʼanq qe re xqʼaxbʼal ru li qaxiw aʼan li qarahom chirix li Yos ut li Raatin. Li rahok aʼin tixbʼaanu naq tqasikʼ qanaʼlebʼ saʼ li Santil Hu ut saʼebʼ li tasal hu naq toj maajiʼ naqasikʼ kʼaru xbʼaanunkil saʼ li qayuʼam. Ut chi joʼkan moko tqachʼik ta qibʼ saʼ chʼaʼajkilal. Kʼaʼut? Xbʼaan naq li Santil Hu naxkʼe «xkʼaʼuxebʼ li inkʼaʼ nekeʼxnaw kʼoxlak» ut «xnaʼlebʼebʼ li toj saajebʼ re teʼxkʼoxla chi us kʼaru teʼxbʼaanu» (Pro. 1:4, SBG).
7. Kʼaru naqatzol rikʼin laj David?
7 Ma naraj xyeebʼal aʼin naq junelik tqabʼaanu li us? Inkʼaʼ, xbʼaan naq maaʼani tzʼaqal re ru xyuʼam (Rom. 3:23). Jun eetalil, laj David aʼan jun winq seebʼ ut tiik xchʼool abʼan naabʼal sut kipaltoʼk, kixchʼik ribʼ saʼ naabʼal li chʼaʼajkilal ut kixkʼe saʼ chʼaʼajkilal naabʼal li qas qiitzʼin (2 Sam. 12:9-12). Laj David moko kixkʼoxla ta naq saʼ xkʼabʼaʼ naq kipaltoʼk moko tsahoʼq ta chik xchʼool li Jehobʼa rikʼin li tixsikʼ xbʼaanunkil (1 Rey. 15:4, 5). Joʼ li awabʼej David, tento tqajultika naq li Jehobʼa naxkuy ut naxsach li qamaak ut junelik tixtenqʼa li nekeʼrahok re ut nekeʼabʼink chiru. Aʼin naxbʼaanu naq inkʼaʼ tchʼinaaq qachʼool xbʼaan li qapaltil (Sal. 51:3-6, 9-12).
8. Kʼaru naxkʼut chiqu li kixye laj Pablo chirix li sumlaak?
8 Kʼaru ttenqʼanq qe re naq inkʼaʼ tnumtaaq qakʼaʼuxl naq tqasikʼ kʼaru xbʼaanunkil? Xnawbʼal naq wank sut maare wank wiibʼ malaj oxibʼ li naʼlebʼ li tooruuq xbʼaanunkil. Qatzʼilaq rix li kixye li apóstol Pablo chirix li sumlaak. Aʼan kixtzʼiibʼa: «Wi wank junaq winq naxkʼoxla naq tento taasumlaaq rikʼin li tzʼaamanbʼil xbʼaan, xbʼaan ak tzʼaqal chik chi kʼameʼk li ixq, xbʼaanuhaq li taaraj. Moko maak ta: cheʼsumlaaq. Aʼut wi junaq winq ak xkʼoxla chi us li tixbʼaanu chi anchal xchʼool ut inkʼaʼ minbʼil ru, ut naraj roxloqʼinkil xtuqʼixqilal li ixq, chaabʼil tixbʼaanu naq inkʼaʼ taasumlaaq rikʼin. Joʼkan utan, li nasumlaak rikʼin li tuqʼixq tzʼaamanbʼil xbʼaan, us tixbʼaanu. Ut li inkʼaʼ nasumlaak, qʼaxal us wiʼ chik tixbʼaanu» (1 Cor. 7:36-38, SBG). Usta laj Pablo kixye naq qʼaxal us naq junaq wank xjunes, kixye ajwiʼ naq us wi junaq naraj xsumlaak.
9. Ma tento naq tqakʼe saʼ ajl li nekeʼxkʼoxla ebʼ li junchʼol? Chʼolobʼ.
9 Naq naqasikʼ xbʼaanunkil junaq li naʼlebʼ, ma tento tqakʼe saʼ ajl li nekeʼxkʼoxla ebʼ li junchʼol? Heeheʼ, tento tqakʼe saʼ ajl. Laj Pablo kiʼaatinak chirix li tzekemq li maare kiyeechiʼimank choʼq rehebʼ li pechʼbʼil yos. Kixye naq moko maak ta xtzekankil abʼan moko usta xbʼaanunkil wi aʼin tixbʼaanu naq junaq tluktaaq saʼ xpaabʼal. Kʼaru kixbʼaanu laj Pablo? «Wi li tzekemq taaluktesinq xchʼool li was wiitzʼin, maajoqʼe tintzekanq tibʼ chiruhebʼ, re naq inkʼaʼ tinluktesi xchʼool li was wiitzʼin» (1 Cor. 8:4-13, SBG). Laaʼo ajwiʼ tento tqakʼe saʼ ajl li nekeʼxkʼoxla ebʼ li junchʼol chirix li naqasikʼ xbʼaanunkil abʼan misach saʼ qachʼool naq li qʼaxal wank xwankil aʼan naq inkʼaʼ tqakʼe saʼ chʼaʼajkilal li qamiiwil rikʼin li Jehobʼa (taayaabʼasi Romanos 14:1-4). Kʼaru xnaʼlebʼ li Santil Hu truuq qatenqʼankil re naq li tqasikʼ xbʼaanunkil tixkʼe xloqʼal li Yos?
Waqibʼ li naʼlebʼ li tooxtenqʼa
10, 11. a) Kʼaru ttenqʼanq qe re naq inkʼaʼ tqabʼaanu li moko wank ta qakʼulubʼ re xbʼaanunkil saʼ li junkabʼal? b) Kʼaru tento teʼxjultika ebʼ li cheekel winq naq teʼxbʼaanu junaq li naʼlebʼ saʼ li chʼuut?
10 Maabʼaanu junaq li naʼlebʼ li moko aakʼulubʼ ta xbʼaanunkil. Naq toj maajiʼ nakaabʼaanu junaq li naʼlebʼ, kʼoxla aʼin: «Ma wank inkʼulubʼ re xbʼaanunkil?». Li awabʼej Salomón kixye: «Li qʼetqʼetil nakʼehok saʼ xutaan; li ani naxkubʼsi ribʼ, aʼan wank xnaʼlebʼ» (Pro. 11:2, SBG).
11 Jun eetalil, li naʼbʼej yuwaʼbʼej naru tixkʼe xleseens junaq li xyum re naq tixbʼaanu junaq li naʼlebʼ abʼan aʼin moko naraj ta xyeebʼal naq naru tixbʼaanu chixjunil li naraj (Col. 3:20). Ebʼ li naʼbʼej malaj ebʼ li ixaqilbʼej naru teʼxbʼaanu junaq li naʼlebʼ re xtenqʼankil li xjunkabʼal abʼanan tento troxloqʼi naq li xbʼeelom aʼan li najolomink re li junkabʼal (Pro. 1:8; 31:10-18; Efe. 5:23). Ut li bʼeelomej tento naq troxloqʼi naq li Kriist najolomink re (1 Cor. 11:3). Ebʼ li cheekel winq nekeʼxbʼaanu wiibʼ oxibʼ li naʼlebʼ saʼ li chʼuut. Joʼkan naq chʼolchʼooq chiruhebʼ li naxye li Santil Hu: «Meeqʼax ru li ak tzʼiibʼanbʼil» (1 Cor. 4:6, SBG). Joʼkan ajwiʼ nekeʼxyal xqʼe chi xbʼaanunkil chixjunil li naʼlebʼ li naxkʼe li moosej tiik xchʼool ut wank xnaʼlebʼ (Mat. 24:45-47). Joʼkan naq, wi inkʼaʼ naqaj xchʼikbʼal qibʼ saʼ chʼaʼajkilal ut xchʼikbʼalebʼ saʼ chʼaʼajkilal ebʼ li junchʼol, us raj naq kaʼajwiʼ tqabʼaanu junaq li naʼlebʼ wi wank qakʼulubʼ re xbʼaanunkil.
12. a) Kʼaʼut naʼajmank naq xbʼeenwa taatzʼil rix li taabʼaanu? b) Kʼaru li naʼlebʼ naʼokenk chisaʼ?
12 Tzʼil rix chiʼus. Laj Salomón kixye: «Li kʼaru kʼoxlanbʼil rix chi chaabʼil, qʼaxal us naʼelk; aʼut li naʼuxmank saʼ junpaat, taajukʼeʼq chi junwaakaj» (Pro. 21:5, SBG). Qatzʼilaq rix jun eetalil. Ma yookat xkʼoxlankil xloqʼbʼal junaq li kʼaʼaq re ru? Maakanabʼ naq li nakaawekʼa saʼ li hoonal aʼan ttaqlanq saʼ aabʼeen. Tzʼil rix chixjunil li tatruuq, patzʼ aatenqʼ re junaq li kristiʼaan li naxnaw chirix aʼin ut naʼlebʼa rix li naxye li Santil Hu (Pro. 20:18). Naq ak xaatzʼil rix chixjunil aʼin, tzʼiibʼa saʼ jun li hu li chaabʼil naʼlebʼ li taakʼul wi taabʼaanu ut saʼ jun chik li yibʼru aj naʼlebʼ li taakʼul wi taabʼaanu. Jultika naq laj paabʼanel li nanaʼlebʼak chiʼus xbʼeenwa naxkʼoxla rix li toj maajiʼ naxbʼaanu (Luc. 14:28). Maakʼoxla kaʼajwiʼ li rusilal li taataw, kʼoxla rix chanru tixkʼe saʼ chʼaʼajkilal laaʼamiiwil rikʼin li Jehobʼa. Aajel ru naq taakʼe aaqʼe ut aahoonal re xtzʼilbʼal rix chixjunil xbʼaan naq aʼin tixbʼaanu naq moko saʼ junpaat ta tatnaʼlebʼaq ut inkʼaʼ taachʼik aawibʼ saʼ chʼaʼajkilal.
13. a) Kʼaru naxyeechiʼi qe li Yos saʼ Santiago 1:5? b) Kʼaʼut naq qʼaxal us naq tqatzʼaama li choxahil naʼlebʼ re li Yos?
13 Tzʼaama li choxahil naʼlebʼ. Re naq li tqabʼaanu tixkʼe xloqʼal li Yos, aajel ru naq tqatzʼaama re li xtenqʼ. Laj Santiago kixye: «Wi wank junaq eere yo chi majeloʼk xnaʼlebʼ, chixtzʼaamaq re li Yos, ut taakʼeheʼq re, xbʼaan naq li Yos nakʼehok chi anchal xchʼool ut chi chaabʼil rehebʼ chixjunilebʼ» (Sant. 1:5, SBG). Moko xutaanal ta xyeebʼal naq naʼajmank li xtenqʼ li Yos re naq tqabʼaanu junaq li naʼlebʼ (Pro. 3:5, 6). Xbʼaan naq wi kaʼajwiʼ tqakʼojobʼ qachʼool rikʼin li qanaʼlebʼ naru tqakʼe qibʼ saʼ chʼaʼajkilal. Wi naqatzʼaama re li Jehobʼa naq tixkʼe qe li choxahil naʼlebʼ ut naqasikʼ qatenqʼ saʼ li Santil Hu, li santil musiqʼej tooxtenqʼa chi xtawbʼal ru kʼaʼut naqaj xbʼaanunkil junaq li naʼlebʼ (Heb. 4:12; taayaabʼasi Santiago 1:22-25).
14. Kʼaʼut moko us ta naq tqakanabʼ naabʼal li hoonal re xsikʼbʼal li naqaj xbʼaanunkil?
14 Maakanabʼ re jalan chik kutan li taasikʼ xbʼaanunkil. Tento naq tqatzʼil rix chixjunil li naʼlebʼ ut tootijoq chiru li Jehobʼa tojaʼ naq tqasikʼ kʼaru xbʼaanunkil. Xbʼaan naq li wank xnaʼlebʼ «naxkʼe reetal bʼar yo chi xik» (Pro. 14:15, SBG). Abʼan naq ak xqabʼaanu aʼin moko us ta naq tqakanabʼ naq tnumeʼq naabʼal li hoonal. Li nawiibʼank xchʼool naxsikʼ raatin re naq inkʼaʼ tixbʼaanu li naxye (Pro. 22:13). Inkʼaʼ naxkʼe reetal naq naxbʼaanu aʼin, naxkanabʼ naq ebʼ li junchʼol teʼsikʼoq re li tixbʼaanu.
15, 16. Kʼaru naʼajmank re xyuʼaminkil li xqasikʼ xbʼaanunkil?
15 Kʼanjelan chi kaw re naq li taasikʼ xbʼaanunkil us t-elq. Moko tzʼaqal ta rikʼin xyeebʼal li nakaawaj xbʼaanunkil tento bʼan naq taabʼaanu. Laj Salomón kixye: «Joʼchʼinal joʼnimal tatruuq xbʼaanunkil, bʼaanu chi anchal aachʼool» (Ecl. 9:10, SBG). Joʼkan ajwiʼ, tento tqoksi chixjunil li wank saʼ quqʼ re naq li tqasikʼ xbʼaanunkil us t-elq. Qakʼehaq jun li eetalil chirix jun laj puktesinel li naraj wank joʼ aj kʼamolbʼe saʼ li puktesink. Ma us t-elq saʼ li xkʼanjel? Maare moko us ta t-elq wi naroksi naabʼal li hoonal re xsikʼbʼal xtumin ut re rajsinkil ru ut maawaʼ re puktesink.
16 Usta chaabʼil naʼlebʼ li naqasikʼ xbʼaanunkil naru naq moko us ta t-elq chiqu. Aʼin nakʼulmank xbʼaan naq «chixjunil li ruuchichʼochʼ wank rubʼel xwankil li maaʼus» (1 Juan 5:19, SBG). Joʼkan naq «yooko [...] xyalbʼal qametzʼew [...], rikʼinebʼ [...] li [...] nekeʼawabʼejink saʼ xbʼeen li ruuchichʼochʼ aʼin li wank saʼ aakʼabʼ, rikʼinebʼ li maaʼus aj musiqʼej li wankatqebʼ taqeʼq» (Efe. 6:12, SBG). Joʼ kixye laj Pablo ut laj Judas, chixjunilebʼ li nekeʼraj xloqʼoninkil ru li Yos nekeʼxtaw chʼaʼajkilal (1 Tim. 6:12; Jud. 3).
17. Kʼaru naroybʼeni li Jehobʼa naq tqabʼaanu naq ak xqasikʼ kʼaru xbʼaanunkil?
17 Tzʼil rix ut jal junaq li naʼlebʼ wi naʼajmank. Li naqasikʼ xbʼaanunkil moko junelik ta naʼelk joʼ naqakʼoxla xbʼaan naq «inkʼaʼ naqanaw joʼqʼe tqakʼul junaq chʼaʼajkilal» (Ecl. 9:11, 12, SBG). Abʼan wank wiibʼ oxibʼ li naʼlebʼ li naqasikʼ xbʼaanunkil li moko tooruuq ta xjalbʼal usta tchʼaʼajkoʼq chiqu. Li Jehobʼa naroybʼeni naq tqabʼaanu li xqaye. Jun eetalil, li qaatin li naqaye naq nokoosumlaak ut naq naqaqʼaxtesi li qayuʼam re li Yos moko najalmank ta. Aʼan naraj naq tqabʼaanu li xqaye (taayaabʼasi Salmo 15:1, 2, 4). Wank sut li xkʼihalil li naʼlebʼ li naqasikʼ xbʼaanunkil moko wank ta xwankil. Li wank xnaʼlebʼ, rajlal naxtzʼil rix li naxsikʼ xbʼaanunkil ut wi naʼajmank moko naxkanabʼ ta naq li nimobʼresink ibʼ tixram chiru xjalbʼal malaj xkanabʼankil junaq li naʼlebʼ li ak kixsikʼ xbʼaanunkil (Pro. 16:18). Li jwal wank xwankil choʼq re, aʼan xkʼebʼal xloqʼal li Yos.
Qatenqʼaqebʼ li junchʼol re naq li teʼxsikʼ xbʼaanunkil tixkʼe xloqʼal li Yos
18. Chanru teʼxtenqʼa li naʼbʼej yuwaʼbʼej ebʼ li ralal xkʼajol re naq teʼxsikʼ chiʼus kʼaru xbʼaanunkil?
18 Li naʼbʼej yuwaʼbʼej naru nekeʼxtenqʼa ebʼ li ralal xkʼajol re naq li teʼxsikʼ xbʼaanunkil saʼ li xyuʼam tixkʼe xloqʼal li Yos. Li ttenqʼanq rehebʼ aʼan leechaabʼil bʼaanuhom (Luc. 6:40). Maare texruuq xchʼolobʼankil re wiibʼ oxibʼ li naʼlebʼ li xeebʼaanu naq xeesikʼ kʼaru xbʼaanunkil. Maare teekanabʼ naq aʼan tixsikʼ kʼaru tixbʼaanu saʼ junaq li naʼlebʼ. Wi us naʼelk, kʼehomaq xsahil xchʼool. Abʼanan wi moko us ta naʼelk li kixbʼaanu? Li nabʼaanumank xbʼeenwa aʼan xkolbʼal chiru li chʼaʼajkilal li tixkʼul. Abʼan wank sut moko us ta xbʼaanunkil aʼin. Jun eetalil, jun li yuwaʼbʼej naru naq tixkanabʼ naq li ralal trisi xleseens re xchʼeʼbʼal junaq li bʼelebʼaal chʼiichʼ. Qakʼoxlaq naq li saaj naxqʼet li chaqʼrabʼ ut naxkʼul jun li muult. Li yuwaʼbʼej naru xtojbʼal li muult, abʼanan wi naxye re naq tento tkʼanjelaq re xtawbʼal li tumin, aʼan tixkʼe reetal naq aajel ru naq weent tixbʼaanu rikʼin li xbʼaanuhom (Rom. 13:4).
19. Kʼaru tento tqakʼut chiruhebʼ li qatzolom ut chanru tqabʼaanu?
19 Li Jesús kixye naq tenebʼanbʼil saʼ xbʼeenebʼ li xtzolom xtzolbʼalebʼ li kristiʼaan (Mat. 28:20). Jun li naʼlebʼ li qʼaxal wank xwankil li tento tqakʼut chiruhebʼ li qatzolom aʼan naʼlebʼak chiʼus chirix li teʼxsikʼ xbʼaanunkil saʼ li xyuʼam. Re xtenqʼankilebʼ re naq chaabʼil li teʼxsikʼ xbʼaanunkil saʼ li xyuʼam moko us ta naq tqaye rehebʼ li tento teʼxbʼaanu saʼ jalan jalanq li naʼlebʼ. Qʼaxal us bʼan naq tqatenqʼahebʼ re naq teʼnaʼlebʼaq ut naq li teʼxsikʼ xbʼaanunkil tixchap ribʼ rikʼin li xnaʼlebʼ li Santil Hu. Xbʼaan naq «li junjunq saʼ qayanq tento toxchʼolobʼ li xyehom xbʼaanuhom chiru li Yos» (Rom. 14:12, SBG). Joʼkan bʼiʼ, chiqajunilo tento tqayal qaqʼe re naq li tqasikʼ xbʼaanunkil tixkʼe xloqʼal li Jehobʼa.
Kʼaru raj taasume?
• Kʼaʼut aajel ru naq tqatzol naʼlebʼak chiʼus chirix li naqasikʼ xbʼaanunkil saʼ li qayuʼam?
• Chanru nokooxchʼaʼajki li xiw ut kʼaru tqabʼaanu re xqʼaxbʼal ru?
• Kʼaru waqibʼ li naʼlebʼ tooxtenqʼa re naq li tqasikʼ xbʼaanunkil saʼ li qayuʼam tixkʼe xloqʼal li Yos?
[Ebʼ li patzʼom]
[Kaaxukuut ut li jalam u]
Li ttenqʼanq qe re naq chaabʼil li tqasikʼ xbʼaanunkil
1 Maabʼaanu junaq li naʼlebʼ li moko aakʼulubʼ ta xbʼaanunkil
2 Tzʼil rix chiʼus
3 Tzʼaama li choxahil naʼlebʼ
4 Maakanabʼ re jalan chik kutan li taasikʼ xbʼaanunkil
5 Kʼanjelan chi kaw re naq li taasikʼ xbʼaanunkil us t-elq
6 Tzʼil rix ut jal junaq li naʼlebʼ wi naʼajmank
[Jalam u]
Li nawiibʼank xchʼool chanchan jun li jukubʼ li maakʼaʼ xkʼanjelobʼaal re xbʼeresinkil saʼ jun li kaqsut-iqʼ