Te toca pagar i imposti?

POCHE persone ghe piase de pagar imposti. Tanti i pensa che i soldi dei imposti i ze butadi via parché quei che i tende dei soldi no i lo fà ben, i ciapa una roba che no la ze mia soa e anca i ciava i soldi sensa sentir vergogna. Ancora, ghen’è altri che no i ghe piase pagar i imposti parché i cata che no ze mia giusto pagarli. Le persone de una cità del Oriente Mèdio i ga spiegà sora la so dessision de no pagar i imposti. Lori i ga dito: “No volemo pagar le arme che le copa i nostri tosatei.”

Robe come queste no le ze novità e sucede in tanti posti. El lìder hindu, Mohandas K. Gandhi, el ga parlà quel che lu el pensea: “Stesso che una persona no la fà parte de un esèrsito ma la ghe dà el so apoio, la ze drio far parte del so pecato. Tuti i òmini, vèci o gióveni i fà parte del pecato quando i paga i imposti par la manutension del Stado.”

Dela stessa maniera, Henry David Thoreau, filòsofo del sècolo 19, no’l ga pagà mia i imposti doperadi par la guera e lu el ga spiegà parché che lu no’l catea giusto pagarli. Lu el ga domandà: “Parché che el omo el ga una cossiensa, se lu el paga una roba che la lege la domanda, ma che lu no l’è mia de acordo?”

Questo assunto l’è del interesse de tuti quei che i seghe a Cristo parché la Bìblia la insegna de maniera ciara che ghe ocore gaver una cossiensa neta in tute le situassion. (2 Timòteo 1:3) Par nantra banda la Bìblia anca la dise che i governi i ga la autorità par cobrar i imposti. Ela la dise: “Tuti i ga de star soto le autorità superior, parché no ghen’è autorità che no la vien de Dio. L’è Dio che el ga metesto queste autorità nele so posission. Par quela che ghemo de star soto la autorità, nò sol par paura de esser castigadi, ma anca par via dela vostra cossiensa. L’è par quela anca che valtri paghé le tasse, parché le autorità le ze al servìssio de Dio par el ben dele persone e le fà questo tuto el tempo. Gavé de dar a queste autorità quel che le mèrita: paghé le tasse a quei che i domanda le tasse.”— Romani 13:1, 5-7.

Par via de questo, l’è che i primi seghidori de Gesù i era cognossesti par sempre pagar i so imposti, ancora che una parte de questi soldi i fusse doperadi par la guera. Le Testimònie de Geovà de ancoi anca le fà cossita. Ma sarà che questo l’è giusto? Sarà che i seghidori de Gesù i ghe toca pagar i imposti stesso che far cossita va contra la so cossiensa?

Imposti e la cossiensa

Se pol dir che una parte dei imposti che i primi seghidori de Gesù i paghea i era doperadi par la guera, par questo motivo che dopo Gandhi e Thoreau no i ga mia pagà i imposti, parché la maniera che i era doperadi no l’era de acordo cola so cossiensa.

I seghidori de Gesù i obedia la òrdine de Romani capìtolo 13 no sol par no esser castigadi, ‘ma anca par via dela so cossiensa.’ (Romani 13:5) La cossiensa de un seghidor de Gesù in verità la comanda che lu el paghe i imposti, ancora che questi soldi i sia doperadi par far cose che lu no l’è mia de acordo. Par capir ben questo assunto, ghemo de saver una roba importante sora la nostra cossiensa. Ela la ze la voce rento de noantri che la ne dise quel che l’è giusto o sbalià.

Tuti gavemo questa voce rento de noantri, come Thoreau el ga dito, ma no l’è che podemo fidarse del tuto nela. Par assar Dio contento, la nostra cossiensa la ga de esser de acordo con quel che Dio el cata che l’è giusto o sbalià. Tante volte ne ocore giustar la nostra maniera de pensar cola de Dio, parché lu el ga de pi sabedoria che noantri. (Salmo 19:7) Alora, ghemo de sforsarse par capir come che Dio el vede i governi umani. Cossa che lu el pensa de lori?

Varda che el apòstolo Paolo el ga dito che i governi umani i ze “al servìssio de Dio.” (Romani 13:6) Cossa che questo vol dir? Vol dir che lori i laora parché le robe le sìpia in òrdine e par giutar le persone de arquante maniere. Fin i governi che i ciava de pi i ne dà robe come el servìssio de coreio, scola, bomberi e polìssia. Dio ne dà la òrdine de pagar i imposti, parché l’è lu che el assa che le autorità le governe. Lu el sà dele cose sbaliade che queste autorità le fà.

Ma lu l’è drio assar che le autorità le seite li par un tempo e noantri ghemo de rispetar questa dessision. Dio ndarà meter el so governo del cielo nel posto de tuti i governi umani e el ndarà finir con tuto el mal che questi governi i ga fato ale persone fin ancoi. (Daniel 2:44; Mateo 6:10) Alora, l’è sol par un tempo che Dio l’è drio assar queste autorità governar. Fin che Dio no’l càmbie i governi umani par el suo, lu el vol che i seghidori de Gesù i obedisse ale autorità e i paghe i imposti.

Ma e se cossita come Gandhi te cati che l’è un pecato pagar imposti che i ze doperadi par la guera? Pensa un pochetin: se te vè su nte un posto pi alto te sarè bon de veder de pi robe. Dela stessa maniera, Dio el sa de pi che noantri e lu el vede de pi robe. Alora, quando pensemo nela capacità e nela sabedoria de Dio, podemo giustar la nostra maniera de pensar. Lu el ga doperà el profeta Isaia par parlar: “Come el cielo l’è par sora dela tera, cossita la me maniera de far le robe la ze superior ala vostra e i me pensamenti i ze superiori ai vostri.”— Isaia 55:8, 9.

Sarà che i ga tuta la autorità?

No l’è parché la Bìblia la dise che ghemo de pagar i imposti che i governi umani i ga tuta la autorità sora le persone. Gesù el ga insegnà che Dio no’l dà a questi governi tuta la autorità. Quando i ga domandà a Gesù se Dio el catea giusto pagar i imposti al governo romano de quel tempo, lu el ga rispondesto de una maniera che ne fà pensar. Lu el ga dito par pagar a Cèsar quel che l’è de Cèsar, ma a Dio quel che l’è de Dio.— Marco 12:13-17.

El Cèsar che el testo el ga parlà vol dir i governi. Lori i fà i soldi e i dise quanto che i vale. Cossita, par Dio, lori i ga el dirito de ricever i soldi in drio par meso dei imposti. Ma Gesù el ga dito che gnanca un governo umano el ga el dirito de gaver quel che l’è de Dio, o sia, la nostra vita e la nostra adorassion. Quando le lege dei òmini i va contra ale lege de Dio, i seghidori de Gesù “i obedisse a Dio come governante, e nò ai òmini.”— Ati 5:29.

La maniera che i soldi dei imposti i ze doperadi pol assar arquanti servi de Gesù intrigadi, ma stesso cossita lori no i se mete in quel che i governanti i fà, no i ghe va contra e gnanca i assa de pagar i imposti. Se i fesse cossita, lori i ndaria mostrar che no i se fida mia che Dio el ndarà risolver i problemi dela umanità. Lori i speta con passiensa el tempo che Dio el ndarà meterse nei assunti dei umani par meso del governo del so Fiol, Gesù, che el ga dito: “El me Regno no’l fà parte de questo mondo.”— Gioani 18:36.

Benedission de obedir a quel che la Bìblia la dise

Te pol guadagnar tante benedission par obedir a quel che la Bìblia la dise sora pagar i imposti. No te sarè castigà parché no te ghè mia obedio ale lege e gnanca te gavarè paura de ndar ala preson. (Romani 13:3-5) E el pi importante, te vè dar onor a Dio parché te ghè obedio ale lege e te gavarè una cossiensa neta davanti de lu. Ancora che no te ghè mia i soldi come quei che no i paga o i ciava i imposti, te pol fidarse nela promessa de Dio de tender dei so servi. Davi el ga scrito sora questo ntela Bìblia: “Mi ero gióveno e adesso son vècio, ma mai go visto un giusto abandonà gnanca i so fioi drio ndar in serca de pan.”— Salmo 37:25.

Alora, se te capissi e te obedissi al comandamento de Dio sora pagar i imposti te gavarè pace mental. Dio no’l cata che ti te ghè la colpa par quel che i governi i fà coi soldi dei imposti, cossita come la lege no te dà la colpa par quel che el paron dela to casa el fà coi soldi del afito che te paghi a lu. Un omo del sud dela Europa, che el ga nome Stelvio, el ga dito che vanti de imparar la verità dela Bìblia el ga lotà par ani par cambiar la polìtica. Lu el ga spiegà parché che lu el se ga fermà de proar cambiarla. Lu el dise: “Adesso mi so che le persone no le ze bone de portar la giustìssia, la pace e la union ntel mondo. Sol el Regno de Dio pol far che le persone le càmbie par meio.”

Anca ti te pol esser sicuro de questa verità cossita come Stelvio, se de maniera leal te paghi a Dio quel che l’è de Dio. Te podarè veder el tempo in che Dio el portarà un governo giusto a tuta la tera e che el finirà cola ingiustìssia e tuto el mal che i governi umani i ga fato.

[Comentàrio nela pàgina 22]

Dio el sa de pi che noantri e lu el vede de pi robe. Podemo giustar la nostra maniera de pensar cola de Dio.

[Comentàrio nela pàgina 23]

Te vè dar onor a Dio parché te ghè obedio ale lege e te gavarè una cossiensa neta davanti de lu, te pol fidarse nela promessa de Dio de tender dei so servi.

[Stampe nela pàgina 22]

’Paghé a Cèsar quel che l’è de Cèsar, ma a Dio quel che l’è de Dio’”

[Crèdito dela stampa]

Copyright British Museum