Bup Kudus Ngubah Pengidup

NAMA utai ke nulung siku pejudi enggau perumpak ngubah pengidup iya? Bacha meh cherita pengidup iya.

“Aku Rindu enggau Judi Lumba Kuda.”—RICHARD STEWART

TAUN ADA: 1965

MENUA ASAL: JAMAICA

SEJARAH: PEJUDI ENGGAU PENJENAYAH

PENGIDUP AKU SUBA: Aku dibesaika ba siti endur ke seranta di Kingston, iya nya indu bandar Jamaica. Mayuh orang nadai kereja sereta mayuh jenayah nyadi ba endur tu. Pia mega, endur tu bisi mayuh kongsi gelap, lalu ngenakutka mayuh orang. Nyauka ninting hari aku ninga bunyi orang betimbak.

Indai aku bendar gawa, ngambika kami semadi ulih sekula. Tang, aku enda minat sekula. Aku minat lumba kuda. Aku selalu ponteng sekula lalu enggau orang meda lumba kuda, aku mega nepan kuda dia.

Nyauka kelama, aku berengkah enggau orang bejudi ba lumba kuda. Pengidup aku enda bemoral laban aku balat gila indu, makai dadah, lalu ngerumpak kena aku ngulihka duit. Aku mega ngembuan mayuh senapang, tang baik meh nadai orang ke mati lebuh aku ngerumpak.

Pengujung iya aku ditangkap lalu dijil. Pengudah aku pansut ari jil, aku nyadi balat agi jai. Taja pan aku baka orang ke manah, tang iya ke amat, aku amat kieh, mangah sereta jai. Aku semina mentingka diri.

BAKA NI BUP KUDUS NGUBAH PENGIDUP AKU: Maya tu, indai aku udah nyadi siku ari Saksi-Saksi Jehovah. Aku ulih meda perangai iya jauh udah berubah, lalu tu ngiranka ati aku. Aku deka nemu, nama utai ke nulung indai aku, nya kebuah aku pan berengkah belajarka Bup Kudus enggau Saksi Jehovah.

Aku ngasaika ajar bala Saksi-Saksi Jehovah bebida ari pengarap bukai. Sida ngajar bepelasarka Bup Kudus, lalu sida mega nginjil ari rumah ke rumah baka orang Kristian dulu kelia. (Matthew 28:19; Surat Kereja Rasul 20:20) Lebuh aku meda pengerindu ti bendar ke diayanka sida, aku amat andal, aku udah tetemuka pengarap ti betul.—John 13:35.

Ari utai ke dipelajarka aku ba Bup Kudus, aku sedar Petara enda rinduka pengawa ti kamah, lalu Iya mega enggai aku ngamahka diri enggau pengawa ti enda bemoral, aku pan ngaga pemutus deka berubah. (2 Korint 7:1; Hebrew 13:4) Aku mega sinu ati lebuh aku nemu Petara Jehovah bisi asai ati. Nyadi pengawa aku ulih ngagaka ati Iya tauka ngenusahka ati Iya. (Jaku-Dalam 27:11) Nya kebuah, aku pan ngaga pemutus badu agi makai dadah, badu agi besimpanka senapang, lalu ngubah ulah aku. Tang ubah ti pemadu tusah nya, badu agi gila indu sereta ngetu bejudi.

Ba pun iya, aku enggai bala kaban aku nemu, aku belajarka Bup Kudus enggau bala Saksi Jehovah. Tang jaku Jesus ba Matthew 10:33 udah ngelembutka ati aku. Dia Jesus madahka, “Tang enti orang enggai ngaku diri murid aku ba mua orang mayuh, aku pan enggai ngaku iya murid aku ba mua Apai aku ti ba serega.” Nyadi, aku pan madahka bala kaban aku, aku benung belajar enggau bala Saksi. Sida amat tekenyit lalu tusah deka pechaya aku deka nyadi orang Kristian. Tang aku madahka sida, aku deka berubah, aku enggai baka suba agi.

PENGUNTUNG KE DIULIH AKU: Indai amat gaga meda aku nitihka ajar Bup Kudus. Diatu, iya enda ibuh irau agi sekalika aku ngereja utai ti jai tauka enda. Kaul kami duai indai aku mega majak rapat laban kami sama rinduka Jehovah. Lebuh aku berunding baru ke utai ke kala nyadi ba aku, aku empu pan enda pechayaka diri ulih berubah. Semina ari bantu Petara, aku ulih muai gaya pengidup ke suba.

Enti nyentukka seharitu aku bedau ga berubah, engka diatu aku agi dijil tauka udah mati. Diatu, pengidup aku lantang amat. Aku amat gaga ulih gawa ke Jehovah begulai enggau bini aku sereta anak indu kami. Aku mega beterima kasih laban bisi mayuh bala menyadi Kristian ke sayauka aku. Aku amat gaga bisi orang rela ngajar aku pemendar Bup Kudus. Utai ke pemadu ngagaka ati aku nya, pemanah Jehovah laban Iya sanggup nulung aku ngelala Iya lalu nyadi kaban Iya.

[Blurb]

“Aku mega sinu ati lebuh aku nemu Petara Jehovah bisi asai ati. Nyadi pengawa aku ulih ngagaka ati Iya tauka ngenusahka ati Iya”

[Gambar]

Begulai enggau bini sereta anak indu aku

[Gambar]

Indai aku udah mayuh berubah