Mbimbiliya Ikatengulula Buyoye Bwa Banu

BIKA byakwasele munalume umo uje wakele na kweha bweho bwa linyanyamena na kwibila banu atengulule futisi yendi? Tuzibeni byanendeka.

“Njazemene manene bweho bwa kulihyana na tubalu.”—RICHARD STEWART

MWAKA WA KUSEMUKA: 1965

LIFUTI MWANASEMUKILA: JAMAICA

YOYESI YENDI YA LAJA: WAKELE NA KWEHA BWEHO BWA LINYANYAMENA, CO LALO WAPWILE CIKENYA

BUYOYE BWANGE BWA KUNIMA: Njakolele ku mutambela umo wa kuhutuwa muje mwakele banu babangi ku Kingston mu Jamaica. Kwakaluwile manene kuwana bipangi, co bukenya bwatumine manene. Bikenya balingisile banu bakale na lyoba. Njakele na kuziba cilumo ca buta ku litangwa na litangwa.

Banana bapangele manene na nzili mangana bakwase yange na shongo yange wa mukwenje na wa mumbanda. Co lalo, balinge mwoshe mubaselele mangana batutwale ku sikola. Oloni yange njazemene manene bweho bwa kulihyana na tubalu kutubakana sikola. Simbu imo kunjakele na kuya ku sikola, oloni njakele na kuya kubakele na kwehela bweho bwa kulihanyana na tubalu. Njakele na kulonda na ha tubalu.

Mukwita kwa simbu, njalikobelesele manene mu bweho bwa linyanyamena bwa kulihyana na tubalu. Co njayoyele buyoye bwa bukwizi na kulinga bupangala na banakazi babangi. Njakele na kusipa makaya a marijuana, co njakele na kwibila banu mangana njiwane bimbongo bya kuliyoyesela. Njakele na mata amangi, oloni mu kubezika kunjatsiile nambe munu umo munjakele na kwiba.

Mukwita kwa simbu, tupokola banjikwatele na kunjaka mu kamenga mwafwa ya milonga injakele na kulinga. Kunjikuta kukwalingisile njitengulule futisi yange mwafwa njakele na kutwalelelaho na futisi yange munima ya kunjipatula mu kamenga. Munima ya kunjipatula mu kamenga, futisi yange yakele na kuya mweka kutubakana muyakelelele kunima. Nameme njakele na kumoneka kuwa mbunge ha mesho, oloni kunjakele na kutaba kutengulula binjinendeka. Njakele na kulubala bwasi, co njakenyukile. Kunjakele mbunge munu woshe-woshe.

MBIMBILIYA MUYATENGULWILILE BUYOYE BWANGE: Ha simbu ei injongumukile, banana bakele na kulilongesa Mbimbiliya na kupwa umo wa Bakaleho ba Yehova. Njanangukile bifwa byabibwa bibashangumukile kukala nabyo, co njashakele kuzibuka byabalingisile ngoco. Njashakele kuzibuka byalingisile banana batenguluke, ngeci njashangumukile kusimutwiya na Bakaleho bya Mbimbiliya.

Njanangukile ngwange bibakele na kulongesa Bakaleho ba Yehova byalisezele nebi bibakele na kulongesa mu bulombelo bweka. Co bilongesa byabo byakundama ku Mbimbiliya. Bakaleho bakebo lika bakele na kwambulula ku njibo na njibo ngwe mubalingile baka-Klistu bakulibanga. (Mateu 28:19; Vilinga 20:20) Njazibisisile ngwange njinawana busunga munjalimwenenene cizemo ca busunga cibalimwesele kuli umo na mukwabo.—Yowano 13:35.

Byuma binjalilongesele mu Mbimbiliya byanjikwasele njimone seho ya kutengululako bimo mu kuyoya kwange. Njanangukile ngwange Yehova Njambi wazinda bupangala, co njapandele kwecela kulinga byuma bije bibiisa mubila wange mangana njimuzibise kubwaha. (2 Kolinte 7:1; Vahevelu 13:4) Njabwahelelele manene munjazibukile ngwange byuma binjilinga binasa kuzibisa Yehova kubwaha nambe kumulubalesa. (Visimo 27:11) Ngeci, njalyangwilile kulikela kusipa makaya a marijuana, kupangesa mata na kutengulula futisi yange. Oloni kwecela kulinga bupangala na kweha bweho bwa linyanyamena, kwanjikaluwilile manene.

Munjashangumukile kulilongesa Mbimbiliya na Bakaleho ba Yehova, kunjashakele ngwange babusamba bange bazibuke. Oloni njatengulwile biyongola byange munjatandele majwi a Yesu ali ku Mateu 10:33 aje endeka ngwawo: “Woshe anjibyana ku mesho a banu, nange njikamubyana ku mesho a Tate uje ali mwilu.” Awa majwi anjikwasele njishangumuke kuleka bakwetu ngwange njakele na kulilongesa Mbimbiliya na Bakaleho. Balikomokelele. Kwabakaluwilile kuzibisisa ngwabo munu wakufwa ngwe yange ashaka kupwa muka-Klistu. Njabalekele ngwange kunjashakele lalo kwilukila futisi yange ya laja.

BUBWA BUNATUNDUMO: Banana babwahelelele manene mubanjimwene njishangumuka kuyoya mu kulitombola na binangulo bya mu Mbimbiliya. Ha simbu ino kubesi na kulishoshomwena ngwabo hamo njinasa kulinga byuma byabibi. Tukasimutwiya ha byuma bikatulingisa tulikwatasane manene—cizemo cetu kuli Yehova. Bisimbu bimo munjikasinganyeka ha byuma binjakele na kulinga, njikalimwena ngwange ngwe Njambi kunjikwasa kwahi ngwe kunjasele kutenguluka. Hano kunjesi kushungwiya kuyoya buyoye bwa bupangala nambe kushakazeka bufuko.

Ngwe kunjatambwile muzimbu wa mu Mbimbiliya, hano ngwe njatsa laja nambe ngwe njili mu kamenga. Hano njili na naanga yaibwa manene. Njabwahelela manene kupangela Yehova Njambi hamolika na mwebwange wamubwa na munetu wa munakazi. Njakandelela manene kuli Yehova ha kunjitabesa kukala mukati ka bandolome na bandokazi ba cizemo mu kaye koshe. Njakandela manene mwafwa munu umo walifwitile kunjilongesa busunga bwa mu Mbimbiliya. Co njabezika kulinga eci cipangi ca kukwasa banu balilongese Mbimbiliya. Njakandelela manene kuli Yehova Njambi ku ngozi yananjimwesa ha kunjikokela kuli ikeye.

[Majwi]

“Njalilongesele ngwange bilinga byange byasa kuzibisa Yehova kubwaha nambe kumulubalesa”

[Cikupulo]

Yange na mwebwange na munetu wa munakazi

[Cikupulo]

Njanangukile bifwa byabibwa bibashangumukile kukala nabyo banana