Biblia chi̱ndeétáʼan xíʼinna ña̱ na̱samana

¿NDÁAÑA chi̱ndeétáʼan xíʼin ta̱ sísikí ta íxakúʼinara veʼena ña̱ va̱ʼa na̱samara? Ná ka̱ʼa̱n miíra xa̱ʼa̱ ña̱ ndo̱ʼora.

“Xikutóoníi̱ ku̱ʼi̱n nu̱ú xi̱xinu tí caballo” (TA̱ RICHARD STEWART)

KU̱I̱YA̱ ÑA̱ KA̱KURA: 1965

PAÍS: JAMAICA

INKAKA ÑA̱ KÁʼA̱N XA̱ʼA̱RA: TA̱ SÁSIKÍ TA I̱XAKÚIʼNARA

ÑA̱ NDOʼI̱: Xa̱ʼnui̱ chí Kingston, capital ña̱ Jamaica, nu̱ú íyo ku̱a̱ʼání na̱ yiví ta ndáʼvinína chi kǒo chiñu kachíñuna xa̱ʼa̱ ña̱kán íyo ku̱a̱ʼání na̱ ku̱i̱ʼná. Na̱ yiví xi̱yiʼvínína xa̱ʼa̱ ña̱ ku̱a̱ʼání na̱ yiví kini íyo. Ndiʼi ki̱vi̱ xi̱xiniso̱ʼondi̱ ña̱ xi̱kinína.

Siʼíi̱ ndiʼi ki̱vi̱ ndeéní xi̱kachíñuñá ña̱ va̱ʼa taxiñá ndiʼi ña̱ xíniñúʼi̱ ta saátu ñanii̱ xi̱ʼin ku̱ʼvai̱ na̱ válika, ta xi̱kuni̱ñá ná kaʼvi va̱ʼandi̱. Soo, miíi̱ xi̱kutóoníi̱ ku̱ʼi̱n nu̱ú xínu caballo, nu̱úka ña̱ escuela. Ku̱a̱ʼání yichi̱ kǒo níxixa̱ʼi̱n escuela xa̱ʼa̱ ña̱ xi̱xaʼi̱n nu̱ú xínu tí caballo. Sava yichi̱ xi̱kanúi̱ á xi̱yosoi̱ savarí.

Loʼo kuití tiempo ni̱ya̱ʼa ta ki̱xáʼa kútóoníi̱ keʼíi̱ apuesta ta xi̱kutóoníi̱ kakai̱ xíʼin ku̱a̱ʼá na̱ si̱ʼí. Ta saátu xi̱kutóoníi̱ kaʼmii̱ marihuana. Ta xa̱ʼa̱ ña̱ va̱ʼa keʼíi̱ ndiʼi ña̱ xi̱kunii̱ yóʼo xi̱xiniñúʼu ixakúiʼnai̱, xa̱ʼa̱ ña̱kán ku̱a̱ʼání tu̱xi̱í xi̱kuumiíi̱. Soo, nda̱a̱ ni iin yichi̱ va̱ása níxaʼníi̱ iinna tá i̱xakúiʼnai̱.

Soo, ki̱xaa tiempo ña̱ ti̱inna yi̱ʼi̱ ta chi̱kaana yi̱ʼi̱ veʼeka̱a. Soo, ni̱ya̱ʼa loʼo tiempo kitai̱ tasaá ki̱xáʼa tukui̱ kéʼíi̱ ña̱yóʼo, ta kinika ña̱ ni̱xai̱ ke̱ʼíi̱. Xi̱naʼi̱ ña̱ ni va̱ása níxikeʼíi̱ ña̱ kini, soo, mií ña̱ nda̱a̱ kininí xi̱keʼíi̱ ta ku̱e̱ʼe̱ní ni̱xi̱yoi̱, iinlá xa̱ʼa̱ mií kuitíi̱ xi̱ndakanixi̱níi̱.

ÑA̱ BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱: Tiempo ña̱ xi̱keʼíi̱ ku̱a̱ʼání ña̱ kini siʼíi̱ ki̱xáʼañá káʼviñá Biblia ta ni̱xa̱a̱ñá ndu̱uñá testigo Jehová. Xa̱ʼa̱ ña̱ na̱samaníñá xi̱kuniníi̱ kunda̱a̱-inii̱ xa̱ʼa̱ ña̱yóʼo. Xi̱kunii̱ kunda̱a̱-inii̱ nda̱chun na̱samaníñá xa̱ʼa̱ ña̱kán ki̱xáʼi̱ nátúʼi̱n xíʼin na̱ testigo Jehová xa̱ʼa̱ ña̱ káʼa̱n Biblia.

Ki̱ʼi̱n kuenta ndiʼi ña̱ sánáʼa̱ na̱yóʼo kǒo kítáʼanña xíʼin ña̱ sánáʼa̱ na̱ inka veʼe-ñu̱ʼu, ta ndiʼi ña̱ sánáʼa̱na nu̱ú Biblia va̱xi ndiʼiña. Iinlá na̱yóʼo xi̱keʼé táki̱ʼva xi̱keʼé na̱ cristiano na̱ xi̱ndoo tá siglo nu̱ú, ña̱ xi̱xaʼanna veʼe tá veʼe ña̱ ka̱ʼa̱nna xíʼin na̱ yiví xa̱ʼa̱ ña̱ sánáʼa̱ Biblia (Mateo 28:19; Hechos 20:20). Ña̱ sa̱xínu-inii̱ ña̱ ndixa kúúna religión ña̱ nda̱a̱ kúú ña̱ kúni̱na xínitáʼanna (Juan 13:35).

Tá ki̱xáʼíi̱ sákuaʼi̱ ña̱ káʼa̱n Biblia kunda̱a̱-inii̱ ña̱ xi̱niñúʼu nasamai̱ ndiʼi ña̱ va̱ása va̱ʼa kéʼíi̱. Jehová kúndasíníra na̱ ku̱a̱kiʼvi ku̱a̱chi xíʼin inkana, soo, tá kúnii̱ keʼíi̱ ña̱ sákusi̱í-inira xi̱niñúʼu sandákoi̱ keʼíi̱ ndiʼi ña̱ íxayaku̱a̱ kuñui̱ (2 Corintios 7:1; Hebreos 13:4). Nda̱kandaní-inii̱ tá ku̱ndaa-inii̱ ña̱ ndiʼi ña̱ kéʼíi̱ kivi sákusi̱íña ini Jehová á sákusuchíña-inira (Proverbios 27:11). Xa̱ʼa̱ ña̱kán nda̱kaxii̱n sandákoi̱ marihuana xíʼin tu̱xi̱í ta chi̱kai̱ ndee̱ ña̱ nasamai̱ ki̱ʼva ña̱ ni̱xi̱yoi̱. Iin ña̱ i̱xayo̱ʼvi̱ní xíʼi̱n sandákoi̱ kúú ña̱ kakai̱ xíʼin ku̱a̱ʼá na̱ si̱ʼí xíʼin ña̱ sandákoi̱ keʼíi̱ apuesta.

Tá xa̱ʼa̱ va̱ása níkutói̱ ña̱ kunda̱a̱-ini na̱ migoi̱ ña̱ ki̱xáʼíi̱ káʼvii̱ xíʼin na̱ testigo Jehová. Soo, na̱samai̱ ña̱ ndákanixi̱níi̱ tá ka̱ʼvii̱ tu̱ʼun ña̱ ni̱ka̱ʼa̱n ta̱ Jesús ña̱ va̱xi nu̱ú Mateo 10:33: “Tá iinna káʼa̱nna ña̱ va̱ása xíni̱na yi̱ʼi̱ nu̱ú na̱ yiví, saátu yi̱ʼi̱ ka̱ʼi̱n ña̱ va̱ása xíni̱i̱na nu̱ú yivái̱ ta̱ íyo chí ndiví”. Tasaá ndi̱ku̱n kama ki̱xáʼíi̱ káʼi̱n xíʼin na̱ migoi̱ xa̱ʼa̱ ña̱ kéʼíi̱. Ta ni iin tu̱ʼun kǒo níka̱ʼa̱nna xíʼi̱n: Saáchi kǒo níkandíxana ña̱ iin na̱ yiví táʼan yi̱ʼi̱ xa̱a̱ nasa̱ma, soo, nisaá ni̱ka̱ʼi̱n xíʼinna ña̱ xi̱kunii̱ nasa̱mai̱.

ÑA̱ VA̱ʼA ÑA̱ NDÁKIʼI̱N: Siʼíi̱ ni̱kusi̱íní-iniñá tá xi̱toñá ña̱ ki̱xáʼíi̱ kéʼíi̱ ña̱ káʼa̱n Biblia, ta vitin va̱ása ndíʼi̱ka-iniñá xa̱ʼa̱ ndáaña kúú ña̱ keʼíi̱, u̱vi̱ saándi̱ kúsi̱íní-inindi̱ ña̱ nátúʼunndi̱ xa̱ʼa̱ ña̱ kúʼvi̱ní-inindi̱ xínindi̱ Jehová. Sava yichi̱, tá ndákaʼíi̱n xa̱ʼa̱ ña̱ xi̱keʼíi̱ tá ya̱chi̱ íxayo̱ʼvi̱ña xíʼi̱n kandíxai̱ ña̱ na̱samai̱ tíxa̱ʼvi̱ Ndióxi̱, vitin va̱ása kúni̱kai̱ keʼíi̱ ña̱ kini ña̱ xi̱keʼíi̱ tá ya̱chi̱, ni ña̱ kunii̱ koo ku̱a̱ʼá ña̱ʼi̱.

Tá kǒo níxiniso̱ʼi̱ ña̱ káʼa̱n Biblia, sana veʼeka̱a kundi̱kai̱ vitin á xa̱a̱ ni̱xi̱ʼi̱vai̱, soo, tíxa̱ʼvi ña̱ sa̱kuaʼi̱, vitin kúsi̱í-inii̱ íyoi̱ xíʼin na̱ veʼi̱. Ñá síʼíi̱ va̱ʼaní chíndeétáʼanñá xíʼi̱n ta ñá se̱ʼi̱ to̱ʼóníñá, ta ndiʼindi̱ kúsi̱íní-inindi̱ káchíñundi̱ nu̱ú Jehová, táxíníi̱ tíxa̱ʼvi ndaʼa̱ na̱ sa̱náʼa̱ yi̱ʼi̱ xa̱ʼa̱ tu̱ʼun Ndióxi̱. Xa̱ʼa̱ ña̱kán nátúʼi̱n xíʼin na̱ yiví xa̱ʼa̱ ña̱ káʼa̱n Biblia, táxiníi̱ tíxa̱ʼvi ndaʼa̱ Jehová xa̱ʼa̱ ña̱ ta̱xira ña̱ ndíkai̱ ti̱xin ñuura, soo táxiníkai̱ tíxa̱ʼvi ndaʼa̱ra xa̱ʼa̱ ña̱ nda̱kaxinra yi̱ʼi̱ ña̱ kachíñui̱ nu̱úra.

[Ña̱ káʼa̱n xa̱ʼa na̱ʼná]

“Nda̱kanda̱ní-inii̱ tá ku̱ndaa-inii̱ ña̱ ndiʼi ña̱ kéʼíi̱ va̱ʼa sákusi̱íñá ini Jehová á sákusuchíña inira”

[Na̱ʼná]

Xíʼin ñá síʼíi̱ xíʼin ñá loʼo se̱ʼi̱

[Na̱ʼná]

Xa̱ʼa̱ ña̱ na̱samaníñá xi̱kunii̱ kunda̱a̱-inii̱ xa̱ʼa̱ ña̱yóʼo