Catre Jë Së Hmeke Tui Iesu
2 KOI 8 EIPEREM
NYIMA: 108, 74
Catre Jë Së Hmeke Tui Iesu
“Hmekëneju nyipunie me thith.”—MAT. 26:41.
NEMENE LA AQANE TRO NYIPUNIETI A SA?
Nemene la aqane tro sa amamane ngöne la aqane thithi së laka itre ka hmeke së?
Nemene la aqane tro sa amamane ngöne la huliwa ne cainöje laka itre ka hmeke së?
Pine nemene matre nyipi ewekë catre tro sa hmeke fene la itupath, nge nemene la nyine tro sa kuca?
1, 2. (a) Nemene la itre hnyinge hna aciane hnene la tulu ne aqane hmeke i Iesu? (b) Hapeu, ka loi kö la tulu ka pexeje i Iesu kowe la itre atr ka ngazo? Hamëne jë la ketre ceitun.
‘HAPEU, atreine kö tro sa hane hmeke tui Iesu? Nga ka loi Iesu, ke ka pexeje nyidrë! Ketre tha jole kö koi Iesu troa atre la itre ewekë ka troa traqa ngöne la itre drai elany, ngacama troa traqa la itre ewekë cili itre thauzane lao macatre thupen! Nga pine nemene hö la tro nyidrëti a hane hmek, nge ka pexeje pe?’ (Mat. 24:37-39; Heb. 4:15) Tro sa pane sa la lue hnyinge celë matre mama pi koi së la enyipiewekëne la troa hmek.
2 Hapeu, ka loi kö tro la atr ka pexeje a amamai tulu kowe la itre atr ka tha pexeje kö? Tha sihngödri kö koi së laka, maine ka lolo la aqane hamë ini hnei ketre nge ka amamai tulu ka loi mina fe, hawe, ketre tro ha loi la atre nyitipu angeic. Drei la pengöne la atr ka xötrei inine troa pehna. Thatreine kö troa aca tro eatre ju hi la ewekë hna mekune troa pehnan, ngo maine angeice a ajane troa maca, ke, loi e troa anyimua huji pehna. Tro angeice a pane goeëne hnyawa la atre ini angeice troa pehna, ke ka atrein. Kola goeëne hnyawa hnene la hnainin la aqane cile hnene la atre hamë ini, memine la aqane troa xolouthe la tane pehna. Kola tro la itre drai nge kola atre trotro hnene la hnainine la aqane troa huje la sine pehna; angeice a tuluthe hnyawa fe la aqane troa hule la sine pehna. Maine tro angeice a nyitipune hnyawa la aqane huji pehna ne la ka ini angeic, hawe, tro hë angeice a maca trotro nge pë hmaca ane pehna ka luz, troa eatre pala hi la itre hna pehnan. Kola tu së mina fe, laka, maine tro sa xötrethenge hnyawa pala hi la itre ini qathei Iesu me xome la tulu i nyidrë ka lolo, hawe, tro hë sa catre thele pala hi troa kökötr, easë itre Keresiano.
3. (a) Nemene la aqane amamane Iesu laka, ka nyipi ewekë fe koi nyidrëti troa hmek? (b) Nemene la hne së hna troa ce wange ngöne la hna cinyihane celë?
3 Nge tune ka la mekune celë, ene la troa hmek? Hapeu, nyipi ewekë fe koi Iesu la troa hmek? Kola mama laka, ka nyipi ewekë koi nyidrë. Easa öhne ngöne lo jidri tixenuë ne mele nyidrëti e celë fen, laka, hnei nyidrëti hna ithuecatre kowe la itre aposetolo i nyidrë me hape: “Ce hmekëneju me ini.” Öni nyidrëti fe ka hape: “Hmekëneju nyipunie me thith, mate tha lö kö kowe la itupath.” (Mat. 26:38, 41) Maine nyipici laka hnei Iesu pala hi hna hmeke ngöne la nöjei drai ne mele nyidrë, ngo nyipi ewekë catre tro hmaca kö nyidrëti a hetrenyi la aqane ujë cili ngöne lo itre hnepe hawa qëmekene troa humuthi nyidrë. Celë hi matre nyidrëti a hmeke catre me thele troa qale catre kowe la Tretretro i nyidrë. Atre hnyawa hi nyidrëti laka, nyipi ewekë catre mina fe troa hane hmeke la itretre drei nyidrë, tha eje hmekuje kö ngöne la ijine i nyidrë, ngo ngöne fe la itre hneijine ka troa xulu. Qa ngöne lai, loi e tro sa pane ce wange la kepine matre Iesu a ajane tro fe sa hane hmek. Thupene lai, tro sa ce wange la köni aqane troa nyitipu Iesu, matre tro sa hane atreine hmeke ngöne la nöjei drai ne mele së.
PINE NEMENE MATRE AJAI IESU FE TRO SA HANE HMEK
4. Pine nemene matre nyipi ewekë catre tro sa hmek?
4 Iesu a ajane tro sa hmek, pine laka hetre hne së hna thatre ngo hnene fe laka hetre hne së hna atre. Tune ka lo Iesu ekö e celë fen, atre asë kö nyidrëti la pengöne la itre drai ka troa traqa? Ohea, hnei nyidrëti hna atrehmekune cememine la hni ka ipië, me hape: “Ame la drai memine la haua cili, te, pëkö ate ate, kete tha ‘te kö la ite angela e hnengödrai, memine la Nekön, ngo Kakati hmekuje hi.” (Mat. 24:36) Ame petre kö ngöne la ijine celë, Iesu hi lo “Nekön,” nge thatre hnyawa kö nyidrëti la ijine troa apatrene la fene ka ngazo celë. Nge tune ka së enehila? Hapeu, atre asë hi së la pengöne la itre drai elany? Ohea! Ame hi la hne së hna atre, tre, tro Iehova a upe la Hupuna i Nyidrë troa apatrene la fene ka ngazo celë. Maine atrepengöne ju së la itre ewekë ka troa traqa elany, tro kö sa lapa hmek? Tune la hna qaja hnei Iesu, troa asesëkötrë së nge thatre una ju hi së elanyi la kola apatrene la fene ka ngazo celë.—E jë la Mataio 24:43.
5, 6. (a) Ame la easa atre la pengöne la itre ewekë ka troa traqa elany memine la itre mekuana i Akötresie, pine nemene matre easa catre hmek? (b) Nge ame fe la easa atre la pengö i Satana, nemene la ka upi së troa catre hmek?
5 Nyimutre la itre ewekë ka lolo hnei Iesu hna atre ka troa traqa elany, itre ewekë hna thatre hnene la itre atr ka alanyimu ka mele ngöne la hneijine i nyidrë. Thatre asë kö së la itre ewekë hna kuca hnei Iesu, ngo easë pe a olene koi nyidrëti la hna qejepengöne la Baselaia i Akötresie memine la hna troa kuca hnene ej ngöne la itre drai ka calemi. Ame la easa goeëne ngöne la hna ini, me hna huliwa, maine ngöne pena la götrane hne së hna cainöje ngön, kola mama hnyawa laka thatre kö la itre atr la itre nyipici cili. Celë hi kepine lai ka upi së troa hmek. Nyipi ewekë tro sa hane lapa hmeke tui Iesu, me thele la itre ijine troa hane ce thawa memine la itre xane la itre hne së hna atre göne la Baselaia i Akötresie. Ka sisitria asë hi la itre ijine cili; epi the tro kö sa aluzine la ketre hnep, ke nyine mele lai kowe la nöjei atr!—1 Tim. 4:16.
6 Hetrenyi la ketre ewekë hnei Iesu hna atrepengön, nge ka catre upi nyidrëti troa hmek. Atre hi nyidrëti laka, ka mekune hnyawa ha Satana troa tupathe me akötrë nyidrë, nge angeice mina fe a thele troa thë la aqane mele nyipici nyidrë. Pine laka ketre ithupëjia ka nyinyithina Satana, hawe, angeice pala hi a treqene la “kete ijine” matre troa tupathi Iesu. (Luka 4:13) Ka lapa hmeke pala hi Iesu, matre ame la kola traqa la itre ithupathi me itre icilekeu me iakötrë, atreine hi nyidrëti troa cile kow. Casi hi la hne së hna melëne me Iesu. Atre hi së laka, ame Satana, ceitui angeice me “liona a ho, kola thele tha i nyën.” Celë hi kepine matre Wesi Ula i Akötresieti a ithuecatre kowe la itre Keresiano asë, me hape: “Inamacanepi, me hmekënejë.” (1 Pet. 5:8) Matre nemene la aqane tro sa inamacane me hmek?
AQANE TROA XATUA SË TROA HMEKE HNENE LA HNA THITHI LAPA
7, 8. Nemene la eamo hnei Iesu hna hamëne göi thith, nge nemene la tulu hnei nyidrëti hna hamën?
7 Kola amamane koi së hnene la Tusi Hmitrötr, ka hape, tro sa atreine hmeke me cilamaca ngöne la götrane ua, e tro sa thith. (Kol. 4:2; 1 Pet. 4:7) Hanawange la hnei Iesu hna qaja kowe lo itretre drei nyidrë thupene la nyidrëti a ithuecatre koi angatre troa ce lapa hmeke me nyidrë; öni nyidrë: “Hmekëneju nyipunie me thith, mate tha lö kö kowe la itupath.” (Mat. 26:41) Hapeu, nyidrëti kö lai a hape, tro hmekuje hi angatr a thithi ngöne la ijine cili, ijine kola catrehnine la itupath? Ohea, eamo lai nyine tro sa trongëne ngöne la nöjei drai ne mele së.
8 Ase hë Iesu amamai tulu ka loi ngöne la götrane la thith. Ca jidri ka pexeje ne pane thithi nyidrë kowe la Tretretro i nyidrë. Tro sa pane mekune la ewekë hna kuca hnei nyidrë. (E jë la Luka 6:12, 13.) Ame ngöne lai ijine cili, kola cia hlöeë la itre feja, nge maine jë Iesu a lapa ezine la traone Kaperenauma. Heji lapa ha, ame hnei Iesu hna tro pi me elë hune la wetr, nge nyidrëti a cile goeëne la hneopegejë Galilaea. E cili nyidrëti a öhne la kola hudrume la itre lame hna eathipe e Kaperenauma me itre xa lapa ju kö ezin. Ngo ame la Iesu a thithi koi Iehova, pë hmaca kö ketre ewekë hnei nyidrëti hna mekun. Kola tro la itre menetre me itre hawa nge kolo ha pi trotro lo itre lame me patre fe la treu; ketre pë fe hë mejene lo itre neköi öni ka ho e jidr. Iesu a pane thithi me sipone troa xatua nyidrë troa iëne la 12 lao aposetolo. Easa pane mekune lo Iesu a sipone kowe la Tretretro i nyidrë troa eatrongëne la itretre drei nyidrë me hamëne koi angatre la inamacan; kola mama la etrune la ihnimi nyidrë kowe la itretre dreng angatr isa ala cas, ngöne la aqane hnehengazo angatre hnei nyidrë, nge ngöne fe la itre mekune hnei nyidrëti hna hamën.
9. Nemene la ini hne së hna xome qa ngöne la jidri ka pexeje ne thithi Iesu?
9 Nemene la ini hne së hna xome qa ngöne la tulu i Iesu? Hapeu, troa qea me nyimu hawa ne tro sa thith? Ohea, pine laka, hnime nyidrëti la itretre drei nyidrë, öni nyidrëti ka hape: “Kola ajane la hni, ngo kucakuca la ngönetei.” (Mat. 26:41) Ngo ame pe, tre, ijije hi tro sa nyitipu Iesu. Drei la ketre ceitun, hane kö së pane thele la Tretretro së ekoho hnengödrai qëmekene troa axeciëne la ketre mekune ka troa hetre thangane koi së, me hnepe lapa së, maine itre trejine me easë ngöne la götrane la ua? Hapeue la itre thithi së, easë kö a hane mekune la itre trejine me easë ngöne la lapaun, trahmanyi me föe? Hapeue la itre hne së hna thithi fë, ka qa kö kuhu hni së maine easë hi a e gufane la itre mekune hna fejane hë? Ketre, hnei Iesu pala hi hna nyipine la itre ijine tro nyidrëti a pane ithanata memine la Tretretro i nyidrë. Ame ngöne la hneijine së enehila, tre, tru catre hnei jole së matre canga tro hi sa thëthëhmine la itre ka nyipi ewekë thatraqane la mele së. Tro hë sa hmeke catr, e hne së hna xome la nyimu ijine troa isa thithi koi Iehova cememine la hni ka pexej. (Mat. 6:6, 7) Tro hë sa easenyi catre koi Iehova, me kuca asë la hne së hna atreine matre troa acatrene hnyawa la aqane imelekeu së me Nyidrë, me neëne troa kuca la ketre ewekë ka troa ananazijëne la aqane imelekeu cili.—Sal. 25:14.
AQANE TRO SA HMEKE NGÖNE LA EASA CAINÖJ
10. Nemene la ceitune ka amamane koi së la aqane hmekëne hnyawa Iesu la itre ijine troa tro fë la maca?
10 Hnei Iesu pala hi hna hmeke ngöne la nyidrëti a xome la huliwa hnei Iehova hna upi nyidrëti troa kuca. Hetrenyi la itre huliwa laka, ame la easa kuca, ngacama easë ju hë a mekune la ketre ewekë, ngo tha tro jë kö së a eatr. Ame pena itre xan, tre, nyipi ewekë tro sa hmekëne hnyawa, wanga troa hetre ethane koi së; ka tune hi lai la huliwa ne cainöj ne la Keresiano. Hnei Iesu pala hi hna lapa hmeke ngöne la huliwa celë, me xome la itre ijine troa ce thawa memine la itre atr la maca ka loi. Drei la ketre ceitun, thupene la ketre hmakanyi ne tro Iesu memine la itretre drei nyidrë, angatre a traqa ngöne la ketre traon, Sikara la ëjen; kola tro pi la itretre drenge troa thele xeni ngöne la traon. Hna lapa pëhë hnei Iesu ezine la ketre timi hna kuj ezine la traon, ngo hnei nyidrëti hna hmek, ene pe nyidrëti a öhne la ketre ijine troa cainöj. Kola traqa hnene la ketre föe ne Samaria troa tha tim. Maine ju tro hi Iesu a pane mano me memeköl. Hetrenyi la itre kepine ka sewe nyidrë troa porotrike memine la föe. Ngo hnei nyidrëti hna ithanata memine la föe ne Samaria, nge pine laka lolo catre la aqane cainöje nyidrëti koi nyidro, ene pe nyimutre fe hë la itre atrene la traone hna ketr hnene la maca. (Ioane 4:4-26, 39-42) Ijije kö tro sa hane tui Iesu, ene la troa lapa hmek; maine jë troa hmekëne hnyawa la itre ijine troa hane ce thawa la maca ka loi memine la itre atr hne së hna iöhnyi memine ngöne la nöjei drai?
11, 12. (a) Nemene la aqane ujë Iesu kowe la itre atr ka thele troa thepe nyidrëti qa ngöne la huliwa i nyidrë? (b) Nemene la eloine la aqane tulu ewekë i nyidrë ngöne la nyidrëti a xome la huliwa?
11 Ame ngöne la itre xa ijin, hnene la itre xa atr ka hni ka lolo hna thele troa ajeanyi Iesu qa ngöne la huliwa i nyidrë. Ame e Kaperenauma, tru catre la aqane ketr la itre atr ka alanyimu hnene la itre iamamanyikeu i Iesu, ene pe angatre hë a ajane tro Iesu a ce lapa pe me angatre e cili. Trotrohnine hi së lai. Ngo ame la hnëqa i Iesu, tre, ene la troa cainöje kowe la nöjei “mamoe ka pate ngöne la lapa i angete Isaraela,” tha kowe hmekuje kö la itre atr ngöne la traone cili. (Mat. 15:24) Celë hi matre hnei nyidrëti hna qaja kowe la itre atr cili, ka hape: “Qânge troa cainöjëne la maca ka loi ne la baselaia i Akötesie kowe la ite xa lapa pena ; ke hna upi ni thatraqane lai.” (Luka 4:40-44) Kola mama hnyawa laka, mele i Iesu hi la huliwa ne cainöj. Pëkö hnei nyidrëti hna nue troa sewe nyidrë troa cainöj.
12 Hapeu, hnene laka mele i Iesu la huliwa ne cainöj, ke tro hë nyidrëti a nue mele menu thatraqane la huliwa cili? Hapeu, hna xome pala ha la mele i nyidrëti hnene la huliwa ne cainöj, matre tha hane hë nyidrëti wangatrune la itre ewekë hna ajane hnene la itre hnepe lapa? Ohea, ka atreine catre Iesu tuluthe la aqane troa melëne la itre ewekë. Ka madrine nyidrëti ngöne la mele i nyidrë, nge, ketre atraqatre mina fe la ajane i nyidrë troa ce madrine memine itre enehmu i nyidrë. Hnei nyidrëti hna nyipine la itre hnepe lapa, me amamane fe ka hape, ka tru koi nyidrëti la itre aja me itre jole hna cile kow hnei angatr, nge nyidrëti fe a amamane hnyawa la etrune la ihnimi nyidrë kowe la itre nekönatr.—E jë la Mareko 10:13-16.
13. Nemene la aqane tro sa xötrethenge la tulu i Iesu, ene la troa hmek me atreine tulu ewekë ngöne la kola xome la huliwa ne cainöj?
13 Pine laka easa xötrethenge la tulu i Iesu ngöne la troa hmek, nemene la aqane tro sa tulu ewekë hnyawa? Tha tro pi kö sa nue la fene celë troa thepe së qa ngöne la huliwa së. Kolo mina fe a sewe së hnene la itre enehmu së me itre sine së troa catre xome la huliwa ne cainöj, maine troa hane xome pena la aqane goeëne angatre la mel. Ngo maine nyipici laka easa xötrethenge la tulu i Iesu, tro hë sa xome la huliwa ne cainöje ceitu me xen. (Ioane 4:34) Tro la huliwa së a ithua së ngöne la götrane la ua me ithue madrine së. Ngo tha tro pi kö sa sasaithi tulu ngöne la aqane tro sa wai ewekë, ene la troa mele cas nge ka tha hane kö meku itre xan. Easa thele troa tui Iesu, troa madrin, nge tro fe sa itre hlue ne la “Akötesie tene manathith.”—1 Tim. 1:11.
AQANE TRO SA HMEK NGÖNE LA ITRE IJINE ITUPATH
14. Nemene la nyine tro sa kuca matre atreine troa cile kowe la itre itupath, nge pine nemen?
14 Tune la hne së hna ce wange hë, ame la itre hnei Iesu hna qaja matre troa hmeke la itre atr, tre, hmekune lo kola catrehnine la itupathi hnei nyidrëti hna cile kow. (E jë la Mareko 14:37.) Kola nyipi ewekë catre la tulu i nyidrë, ngöne la easa cile kowe la itre itupathi ka tru. Ame fene la itupath, nyimutre la itre atr ka thëthëhmine la trenge nyipici, ketre trenge nyipici ka nyipi ewekë catr, matre kola alua qaja hnene la tusi Ite Edomë ka hape: “Hete gojenyi ka meköti ngöne la mekune la at ; ngo ame la pun’ eje, te, jëne mec.” (Ite Edomë 14:12; 16:25) Maine tro sa mejiune kowe la sipu inamacane së ngöne la easa cile kowe la itre jole ka tru, tro ha hetre ethane kowe la mele së me kowe mina fe la itre atr hne së hna hnim.
15. Nemene la ewekë ka troa tupathe la ketre hene ne lapa ka melëne la itre hneijine kola elë la itre ejolene göi mani?
15 Drei la ketre ceitun, maine jë troa cile hnene la ketre hene ne fami kowe la ketre itupathi ka tru catr; jole koi angeice troa xome la hnëqa i angeic, ene la troa nyihnyawane “la ite sine i angeic” ngöne la götrane la ngönetrei. (1 Tim. 5:8) Maine jë tro angeice a mekune troa xome la ketre huliwa; ngo ketre huliwa lai ka sewe angeice troa sine la itre icasikeu i Keresiano, maine troa xomiujine la hmi ne la fami, maine troa hane sine la huliwa ne cainöj. Maine tro angeice a drengedrenge la mekuna i atr, hawe, tro hë angeice a xome la huliwa ke kola mekune ka hape celë hi nyine tro lai a kuca. Ngo ame hë la pune lai, tre, troa wezipo maine meci ngöne la götrane la ua. Drei la eloine la troa xötrethenge la eamo hna hamëne ngöne Ite Edomë 3:5, 6! Hna qaja hnei Solomona, ka hape: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin. Mekuneju koi nyidë ngöne la nöjei goje i ’ö asë, nge tro pena nyidëti a amekötine la ite jë i ’ö.”
16. (a) Nemene la ini hne së hna xome qa ngöne la aqane mejiune Iesu kowe la inamacane i Iehova? (b) Nemene la aqane nyitipu Iesu hnene la itre hene ne lapa ka melëne la itre hneijine ka jol?
16 Ame la Iesu a cile kowe lo itre tupath, tha hnei nyidrëti kö hna mejiune kowe la sipu inamacane i nyidrë. Drei la ketre ewekë nyine hain, laka, ketre atr ka inamacane Iesu, ngo tha hnei nyidrëti kö hna mejiune kowe la sipu inamacane i nyidrë. Hanawange la hnaithanata ka casi hnei Iesu hna qaja lapane ngöne lo kola tupathi nyidrë hnei Satana; öni nyidrë: “Ase hë cinyihan.” (Mat. 4:4, 7, 10) Nyidrëti a mejiune kowe la inamacane ne la Tretretro i nyidrë matre atreine nyidrëti cile kowe la itupath, nge celë hi ka aisa nyidrëti me Satana lo ka pëkö hni ne ipië, nge ka methinëne la thina cili. Hapeu, easë kö a hane nyitipu Iesu? Ame la hene ne fami ka xötrethenge la aqane hmeke Iesu, tre angeice hi lai a nue la wesi ula i Akötresie troa eatrongë angeic ngöne la itre ijine jol. Celë hi ewekë lai hna kuca hnene la ala milio lao hene ne lapa. Angatre a catre amë panëne la Baselaia i Akötresie memine la hmi ka wië i Nyidrë ngöne la mele i angatr, nge pine pë hë la itre ewekë ne ngönetrei. Celë hi aqane amamane angatre laka angatre a kukehnine la mele ne la itre lapa i angatr. Qa ngöne lai, tune la hna thingehnaeane hnei Iehova, tro kö Nyidrëti a amanathithi angatre me hamëne la ka nyipi ewekë koi angatre ngöne la götrane la ngönetrei.—Mat. 6:33.
17. Nemene la ka upi së troa nyitipune la aqane hmeke Iesu?
17 Tha nyine tro kö sa isenyin, Iesu hi la tulu ka sisitria göne la aqane troa hmek. Ame la tulu hnei Iesu hna hamën, tre ijije hi tro sa hane trongën, nge nyine loi me mele koi së. Tha tro pi kö sa thëthëhmine laka, ase hnyawa ha Satana mekune troa ameköle së ngöne la götrane la ua, matre nanazije pi së, uti hë la easa nyihlue i Iehova göi ejene pe hi me nuetrije la mele së ka pë ethan. (1 Thes. 5:6) The nue angeice pi kö troa nga së! Catre jë së thithi me cainöjëne la maca ka loi matre atreine hmeke tui Iesu, nge epi catre pi fe së hmeke ngöne itre ijine jol. Maine tro sa xome la aqane mele celë, hetre nyipi aliene hë la mele së nge tro fe sa mele madrine ngöne la itre drai tixenuë ne la fene ka ngazo celë. Ketre, tro mina fe la aqane mele celë a xatua së tro pala kö a hmek, uti hnyawa ha la ijine tro la Maseta së ka tru a apatrene la fene celë. Drei elanyi la aqane tro Iehova a madrine ngöne la Nyidrëti a troa nyijune koi së, pine la aqane mele nyipici së koi Nyidrë!—Hna ama. 16:15.
[Thying]
[Iatr ne la götran 6]
Hnei Iesu hna cainöje kowe la föe ngöne la ketre itimi hna kuj. Nemene la itre ijine hnei epuni hna xome matre troa cainöje ngöne la nöjei drai?
[Iatr ne la götran 7]
Maine tro nyipunie a thupëne hnyawa la hnepe lapa i nyipunie ngöne la götrane la ua, kolo hi lai a amamane ka hape ka lapa hmeke nyipunie