Baibuli Ehindura Obwomeezi

KIKI ekyaletiire omusaija ow’akaba alekere kuhondera emisingi y’ediini eiyakuliiremu kwongera kugigenderaho? Omusaija owakaba ataine enkoraga enungi na ise akasobora ata kwehurra ngu aine ise ouyali naserra obwomeezi bwe bwona? Soma orole ekibarukutugambira.

“Nkaba ningonza kugaruka hali Yahwe.”​—ELIE KHALIL

AKAZAARWA: 1976

IHANGA: CYPRUS

EBYAFAAYO: OMWANA AYAZAAHIRE

OBWOMEEZI BWANGE OBWA KARA: Nkazaalirwa omu Cyprus baitu nkakurra omu Australia. Bazaire bange bali Bakaiso ba Yahwe, kandi bakakora kyona ekibarukusobora kurora kunyegesa hali Yahwe n’ekigambo kye Baibuli. Baitu omu myaka yange ey’obusigazi, nkatandika kubajeemera. Nayeyibaga kuruga muka ningenda kutangatangana ensingaanto ezindi. Tukaiba emotooka kandi twatunga ebizibu ebindi bingi.

Hakubanza, nakoraga ebintu binu omu nsita nintiina kubiihiza bazaire bange. Baitu mpora mpora okutiina oku kukandugamu. Nkanywana abantu abaali nibankira emyaka abatarukutiina Yahwe kandi nkatandika kwetwaza nkabo. Hakumalirra, nkagambira bazaire bange ngu tinkyagonza kuba mu diini yaabo. N’okugumiisiriza bakalengaho kunkonyera, baitu nkanga obukonyezi bwabo. Bazaire bange bakasaasa muno.

Hanyuma y’okuruga omuka, nkatandika kukozesa ebitokooza bwongo, kubibyara n’okutunda enjaahi omu bwingi. Nasiihanaga kandi namaraga obwire bwingi nincakara omu bbaara. Ekindi, nkatandika kubiihirwa bwangu. Omuntu obuyabazaaga rundi akakora ekintu ekintarukugonza, nabiihirwaga muno, kandi obwire oburukukira obwingi nacoomeraga abantu kandi mbateera. Nkakora ebintu byona ebinayegesiibwe ngu Omukristaayo tasemeriire kukora.

OMULINGO BAIBULI YAHINDWIRE OBWOMEEZI BWANGE: Nkanywana omusaija ayakozesaaga ebitokooza bwongo nka nyowe, baitu akafeerwa ise obw’akaba akyali muto. Obwire oburukukira obwingi twabazaaga kuhikya ekiro omwitumbi. Haroho obuyambalizaaga kuruga ha mutima, kandi nangambira nk’oku akaba nasaasa muno habw’okufeerwa ise. Nk’oku nkaba nimanya okunihira okw’okuhumbuuka, nkatandika kumugambira hali Yesu. Nkamugambira ngu akahumbuura abafu kandi n’araganiza kwongera kubahumbuura omu kasumi ak’omu maiso. (Yohana 5:28, 29) Namugambiraga ngu: “Tekerezaaho kwongera kurora sso, itwena nitwija kwomeera omu rugonjo orurungi hanu omu nsi.” Ebintu binu bikakwataho muno munywani wange.

Obwire obumu, munywani wange yabazaahoga ebirukukwata ha biro by’empero rundi enyegesa y’obusatu. Kandi nakozesaaga Baibuli ye kumwoleka amananu agarukukwata hali Yahwe Ruhanga, Yesu n’ebiro eby’empero. (Yohana 14:28; 2 Timoseo 3:1-5) Nk’oku nayeyongeraga kugambiraho munywani wange hali Yahwe, nukwo nayeyongeraga kumutekerezaaho.

Mpora mpora, amananu ga Baibuli agankaba nyegere nkyali muto, bazaire bange agabaali balengereho kunyegesa gakatandika kukura omu mutima gwange. Eky’okurorraho, obwire obumu obunabaga ha bugenyi n’abanywani bange nitukozesa ebitokooza bwongo, natandikaga kutekerezaaho Yahwe. Baingi ha banywani bange baagambaga ngu nibagonza Ruhanga, baitu engeso zaabo tizakyolekaga. Habwokuba nkaba ntarukugonza kuba muntu wa mulingo ogu, nkaba nimmanya ekinsemeriire kukora. Nkaba nsemeriire kugaruka hali Yahwe.

Nk’okutukimanyire, kyanguhire kumanya eky’okukora baitu tikyanguhire kukikora. Empindahinduka ezimu zikanyanguhira kuzikora, kitangumire kuleka kukozesa ebitookoza bwongo. Ekindi, nkecwaho abanywani abankaba nyine boona, kandi nkatandika kwega Baibuli n’omugurusi omu kitebe.

Baitu, empindahinduka ezimu zikangumira kuzikora. Kukira muno, kikangumira kulema ekiniga kyange. Obwire obumu nakoraga kurungi, baitu kandi habw’akasumi ngarukirra. Buli kasumi nagarukirraga, nayehurraga kubi, ntandika n’okutekereza ngu ndemerwe. Obunkaba mpoirwemu amaani, nkaserra obukonyezi hali omugurusi ayanyegesaaga Baibuli. Yangumiisirizaaga, anyoleka embabazi, kandi mali angarramuga amaani. Haroho akasumi nambere yanyekambisize kusoma ekicweka omu Watchtower ekyali nikyoleka obukuru bw’okutajwaha. * Tukabazaaho ebintu ebinkaba ninsobora kukora kakuba mbihirwa. Mpora mpora nintekerezaaho ekicweka eki, n’okusaba muno Yahwe nkasobora kulema ekiniga kyange. Hakumalirra, omu Apuli 2000, nkabatizibwa nk’omu h’Abakaiso ba Yahwe. Kandi mali bazaire bange bakasemererwa muno.

OMULINGO NGASIIRWE: Hati nyine obusinge omu mutima n’omuntu ow’omunda omurungi habw’okukimanya ngu tinkyasiisa omubiri gwange n’obusiihani hamu n’ebitokooza bwongo. Kyona kindukukora, kagube mulimo, kugenda omu nsorrokano rundi kwegonzaamu, nimpurra nsemeriirwe muno kukira kara. Ninyegondeza omu bwomeezi.

Ninsiima yahwe habw’abazaire bange, abatarajwahire kunkonyera. Ekindi, ntekerezaaho ebigambo bya Yesu ebirukusangwa omu Yohana 6:44: “Busaho muntu asobora okuija namberendi, Isenyowe ayantumire obwatamucunda.” Mali nikinkwataho muno kukimanya ngu nkasobora kugaruka hali Yahwe habwokuba akancunda.

“Nkaba Ningonza Kutunga Isenyowe.”​—MARCO ANTONIO ALVAREZ SOTO

AKAZAARWA: 1977

IHANGA: CHILE

EBYAFAAYO: AKABA ALI MU BANDI ERUKUTEERA EBIZINA EBIRUKUKURAKURANIZA OBUJEEMU

OBWOMEEZI BWANGE OBWA KARA: Nkakuzibwa nyina nyowe omu kiikaro ekirukwetwa Punta Arenas, orubuga orurungi oruli omu Magellan omu Amerika ey’Amasirimuka. Bazaire bange bakaahukana obunkaba nyine emyaka etaano, ekintu ekyandetiire kwehurra nsigirweho. Nkaba ningonza muno kutunga Isenyowe.

Nyina nyowe akeega Baibuli n’Abakaiso ba Yahwe, kandi yantwaraga omu nsorrokano ez’Ekikristaayo ha Kyombeko ky’Obukama. Baitu, tinagonzaaga kuba omu nsorrokano, kandi narraga omu muhanda obutwabaga nitugendayo. Obunahikize emyaka 13, nkalekeraho kuzigendamu.

Omu kasumi ako, nkaba ntandikire kugonza kuzina, kandi nkakyetegereza ngu nkaba nyine ekisembo omu kuzina. Nambere nahikiize emyaka 15, nkaba ninteera ebizina ebirukukurakuraniza obujeemu kandi ebirumu ekidongo ky’amaani ha mikoro, omu bbaara, n’omu magenyi. Enkoragana natungire n’abazini abandi ab’amaani ekandetera kugonza n’ebizina ebindi. Nkakatandika kwega eby’okuzina ha isomero ery’omu kiikaro eki. Ha myaka 20, nkagenda omu rubuga orukuru orwa Santiago, kwongera ha kusoma kwange. Kandi nkagumizaamu ninteera ebidongo n’abbandi ezindi.

Akasumi ako koona, nayehurraga nyine ekirukumburaho. Kusobora kweyihamu enyehurra egi, natamiiraga kandi ninkozesa ebitokooza bwongo n’abazini bagenzi bange abanatwaraga nk’eka yange. Nkaba nyine omutima ogw’obujeemu, ogwayeyolekeraga omu njwara yange. Najwaraga engoye ezirukwiragura zonka, nakuza omuleju, kandi naleka isoke lyange lyakura kuhika haihi n’enyugunyu.

Obwire oburukukira obwingi, omutima ogu gwandeteraga kurwana n’okucwa ebiragiro. Kiro kimu, obunkaba ntamiire, nkatahirra guruupu y’abarukutunda ebitokooza obwongo abaali nibatalibaniza nyowe na banywani bange. Abantu abo bankanteera kubi muno bancwa igufa ly’orusaya.

Baitu obusaasi obwakizireyo, bukaruga hali abo abakaba bandi haihi. Kiro kimu, nkakyetegereza ngu omwisiki wange akaba amazire emyaka nyingi nagonza omusaija ondi owakaba ali munywani wange nfenanfe, kandi banywani bange boona bakaba bakinserekere. Ekintu kinu kikamarramu muno amaani.

Nkagaruka Punta Arenas, kandi natandika kwegesa kuzina kandi nakora n’omuteezi wa cello. Nkagumizaamu ninteera kandi ninkwata ebizina bya bbandi ezirukuteera ebidongo by’amaani. Nkatangana omwisiki omurungi arukwetwa Sussan, kandi twatandika kwikara hamu. Hanyuma y’obwire, Sussan akakyetegereza ngu nyina naikiririza omu nyegesa y’Obusatu kandi nyowe tinkugikiririzaamu. Akankaguza ati; “Hati, amananu nugo gaha?” Nkamugambira ngu nkaba mmanyire ngu obusatu eri nyegesa etahikire baitu tinsobora kukigumya ninkozesa Baibuli. Baitu nkaba mmanyire noha ow’asobora kusoborra habwaki etahikire. Nkamugambira ngu Abakaiso ba Yahwe bakaba nibasobora kumwoleka amananu kuruga omu Baibuli. Hanyuma nkakora ekintu ekinkaba mmazire emyaka nyingi ntarukukora. Nkasaba Ruhanga kandi namusaba ankonyere.

Hanyuma y’ebiro bike, nkarora omusaija akaba atali muhyaka hali nyowe, nkamukaguza obwaraaba ali omu h’Abakaiso ba Yahwe. N’obukiraaba ngu akantiina habw’enzooka yange, akagarukamu ebikaguzo byange ebirukukwata ha nsorrokano ha Kyombeko ky’Obukama. Nkakigumya ngu esaara yange ekaba egarukirwemu. Nkagenda ha Kyombeko ky’Obukama kandi naikarra enyuma nukwo hatagira ayamanyirra. Baitu, baingi bakanyijuka habwokuba naijaga omu nsorrokano nkyali muto. Bakantangirra, bangwa omu kifuba kandi natandika kuhurra obusinge bwingi muno. Kikasisana oti rundi ngarukire omu ka. Obunarozere omusaija ow’akaba ansomeseze Baibuli obunkaba nkyali muto, nkamusaba kwongera kunyegesa.

OMULINGO BAIBULI YAHINDWIREMU OBWOMEEZI BWANGE: Kiro kimu, nkasoma Enfumo 27:11, aharukugamba ngu: “Mwana wange, foka wamagezi, osemeze omutima gwange.” Kikansemeza kukimanya ngu omuntu n’asobora kuleetera Omuhangi w’ensi n’iguru kusemererwa. Nkakyetegereza ngu Yahwe nuwe Ise nyowe ounkaba ninserra obwomeezi bwange bwona!

Nkaba ningonza kusemeza Ise nyowe ow’omu iguru kandi nkole ebyarukugonza, baitu nkaba nfookere mwiru w’ebitokooza bwongo n’amaarwa kumara emyaka nyingi. Nketegereza enyegesa ya Yesu enyakuli omu Matayo 6:24, aharukugamba ngu “busaho muntu asobora okukorra bakama babiri.” Obunkaba nindengaho kukora empindahinduka, omusingi oguli omu 1 Abakolinso 15:33 gukankwataho muno: Nigugamba ngu “okuterana nababi nukusisa engeso enungi.” Nkakyetegereza ngu tinsobora kuleka engeso embi kakuba ntahindura ha biikaro ngendamu n’abantu nkoragana nabo. Obuhabuzi bwa Baibuli bukaba nibwetegerezebwa kurungi: Nkaba nyine kwecwaho ebintu ebikaba nibindetera kutabaijuka.​—Matayo 5:30.

Habwokuba nkaba ningonza ebidongo, kikangumira kubireka. Baitu habw’obukonyezi obw’abanywani omu kitebe, nkasobora kubyecwaho. Nkaleka kutamiira n’okukozesa ebitokooza bwongo. Nkasara isoke lyange n’omuleju kandi natandika n’okujwara n’engoye ez’erangi ezindi. Obunagambiire Sussan ngu ningonza kusara isoke lyange, akagonza kumanya habwaki. Akagamba ati, “ningonza kugenda ndole biki ebikorwa ha Kyombeko ky’Obukama!” Akagonza ebiyarozereyo, kandi nauwe yatandika kwega Baibuli. Hakumalirra, nyowe na Sussan tukataaha obuswere. Omu 2008, itwena tukabatizibwa nk’Abakaiso ba Yahwe. Kikatusemeza muno kweteranizaaho nyina nyowe kuheereza Yahwe.

OMULINGO NGASIIRWE: Nsoboire kuruga omu nsi enyakurumu okusemererwa okutarumu n’abanywani abagobya. Nkyagonza kuzina, baitu hati nsoroora obukihika ha bizina. Nkozesa obukugu bwange kugasira ab’omu ka yange n’abantu abandi, kukira muno ensingaanto. Ningonza kubakonyera kukirora ngu ebintu ensi egaba nibisobora kuzooka nk’ebirukusikiiriza, baitu hakumalirra byona biri “nkesabu.”​—Abafiripi 3:8.

Ntungire abanywani abesigwa omu kitebe Ekikristaayo nambere hali obusinge n’engonzi. N’ekirukukirayo, habw’okwirra haihi na Yahwe, nsoboire kutunga Ise nyowe.

[Obugambo obuli hansi]

[Ebigambo ebikomerwemu]

“Nsoboire kugaruka hali Yahwe habwokuba akancunda kugaruka hali uwe”