XANA u tshame u sihalala kutani u nga yingisi?— * Kumbexana u hlalele nongonoko wa le ka thelevhixini lowu mana wa wena kumbe tata wa wena va vuleke leswaku a wu fanelanga u wu hlalela. Swi nga ha endleka leswaku u ehlekete ha swona endzhakunyana naswona u tisorile hileswi u nga yingisangiki. Vito ra munhu loyi eku sunguleni a aleke ku yingisa i Namani. A hi voneni ndlela leyi a pfuniweke ha yona leswaku a nga ha pfuki a sihalarile.

Ehleketa hi ri karhi hi hanya emalembeni yo tlula 3 000 lama hundzeke. Namani a a ri mukongomisi wa vuthu ra Siriya. Hi yena loyi a a byela masocha yakwe leswi a ma fanele ma swi endla naswona a ma n’wi yingisa. Kambe Namani u khomiwe hi vuvabyi byo chavisa bya nhlonge lebyi vuriwaka nhlokonho. Byi n’wi endle a languteka a nga tsakisi naswona a a twa ku vava swinene.

Nsati wa Namani a a ri ni xinhwanyetana lexi a xi ri nandza wakwe lexi humaka eIsrayele. Siku rin’wana xinhwanyetana lexi xi byele nsati wa Namani hi wanuna loyi a vuriwaka Elixa loyi a humaka etikweni ra ka vona. Xi n’wi byele leswaku a nga n’wi horisa. Loko Namani a twa leswi, u lave ku ya eka Elixa hi nkarhi wolowo. U teke tinyiko to tala kutani a famba ni masocha yakwe a ya eIsrayele. U ye eka hosi ya le Israyele a yi byela xivangelo xo va a te etikweni ra yona.

Elixa u twe hi ta mhaka leyi kutani a rhumela rungula eka hosi leswaku yi tisa Namani eka yena. Loko Namani a fika endlwini ya Elixa, Elixa u rhume munhu a ya byela Namani leswaku a hlamba ku ringana minkarhi ya nkombo eNambyeni wa Yordani. Elixa u vule leswaku Namani a a ta hola loko a  endla tano. Xana u anakanya leswaku Namani u titwe njhani loko a byeriwa leswaku a hlamba eNambyeni wa Yordani?—

U hlundzukile. Hiloko a sihalala kutani a ala ku yingisa muprofeta wa Xikwembu. U byele masocha yakwe a ku: ‘Ku ni milambu yo antswa yo hlamba eka yona ekaya.’ Hiloko a vona swi antswa ku tlhelela ekaya. Kambe xana wa swi tiva leswi masocha yakwe ma n’wi vutiseke swona?— ‘Loko muprofeta a a ku byele nchumu lowu tikaka, xana a wu nga ta wu endla? Kutani, ha yini u nga yingisi loko a ku kombela ku endla nchumu wo tano wo olova?’

Namani u yingisile kutani a endla leswi masocha yakwe ma swi vuleke. U tlulele enambyeni ku ringana ka tsevu kutani a humela ehandle. Loko a huma ematini ra vunkombo, Namani u hlamarile—vuvabyi byakwe bya nhlonge a byi horile! A a vuyele exiyin’weni xakwe! U nambe a ya ekaya ra Elixa leri nga ekule hi tikhilomitara ta kwalomu ka 48 leswaku a ya n’wi nkhensa. A a lava ku nyika Elixa tinyiko to durha kambe muprofeta a nga tekanga ni yin’we ya tona.

Kutani Namani u kombele swin’wana eka Elixa. Xana wa swi tiva leswaku u te yini?— ‘Ndzi kombela leswaku u ndzi nyika ndzhwalo wa timeyila timbirhi leti rhwaleke misava leswaku ndzi ya na yona ekaya.’ Xana wa swi tiva leswaku ha yini a a lava swilo sweswo?— Namani u vule leswaku a a lava ku endlela Xikwembu xitlhavelo xa tinyiko emisaveni leyi humaka etikweni ra vanhu va Xikwembu, ku nga Israyele. U tshembise leswaku a nge pfuki a gandzele xikwembu xin’wana handle ka Yehovha! U tshike ku sihalala kutani a tiyimisela ku yingisa Xikwembu xa ntiyiso.

Xana wa yi vona ndlela leyi u nga fanaka na Namani ha yona?— Loko ku ri leswaku u tshame u sihalala ku fana na yena, u nga cinca. U nga amukela mpfuno naswona u nga ha sihalali.