1. Cosa ya causa con Pablo para queda alegre na maga Cristiano na Corinto?

DEL 55 C.E., cuando si apostol Pablo talla na ciudad de Troas, gendeh le ta descanza pensa acerca con el maga de Corinto. Na aquel mismo año, triste le cuando ya sabe le que el maga hermano y hermana alla yan peleajan. Poreso como un amable tata, ya imbia le carta para corecta kanila. (1 Cor. 1:11; 4:15) Ya imbia tambien le con Tito y ya pidi que reporta con ele na Troas. Ta espera si Pablo con Tito na Troas y quierre le sabe si cosa el situacion del maga hermano y hermana na Corinto. Pero, bien triste si Pablo cay nuay llega si Tito. Cosa puede hace si Pablo? Ya anda le na Macedonia y bien alegre le cuando yan mirajan sila alla. Si Tito ya habla que ya acepta enbuenamente el maga hermano y hermana na Corinto con el carta de Pablo y ta esperanza sila que puede mira con ele. Cuando ya oi se si Pablo, “bien alegre gayot [le].”—2 Cor. 2:12, 13; 7:5-9.

2. (a) Cosa ya escribi si Pablo na maga de Corinto acerca na fe y alegria? (b) Cosa maga pregunta kita hay considera?

² Nuay tarda, ya escribi si Pablo con el de suyu segundo carta para na maga de Corinto. Ya habla le kanila: “Gendeh came ta precura domina el de ustedes fe. Ta trabaja lang came junto con ustedes para el de ustedes alegria, cay ustedes bien asegurao gayot na de ustedes fe.” (2 Cor. 1:24) Cosa quierre decir de Pablo? Y paquemodo debe afecta ese maga palabra con el maga anciano ahora?

3. (a) Cosa quierre decir de Pablo cuando ya escribi le: “Ustedes bien asegurao gayot na de ustedes fe”? (b) Paquemodo el maga anciano ahora ta sigui con el ejemplo de Pablo?

³ Ya menciona si Pablo dos importante aspeto na diaton adoranza—el fe y alegria. Acerca na fe, ele ya escribi: “Gendeh came ta precura domina el de ustedes . . . cay ustedes bien asegurao gayot na de ustedes fe.” Este maga palabra ta dale mira que sabe si Pablo que el maga hermano y hermana na Corinto ta esta fuerte, gendeh por causa con ele o na maskin quien gente, sino por causa na diila fe con Dios. Poreso, ya puede mira si Pablo que gendeh le necesita controla con el fe del de suyu maga hermano y hermana y no quierre le hace con ese. Tiene le grande confianza con el maga Cristiano y sabe le que quierre sila hace si cosa el justo. (2 Cor. 2:3) Ahora, el maga anciano ta sigui con el ejemplo de Pablo si ta dale sila mira confianza na fe y motivo del diila maga hermano y hermana para sirvi con Dios. (2 Tes. 3:4) En vez de hace maga istricto ley na congregacion, el maga anciano ta confia na maga principio na Biblia y direccion estaba na organizacion de Jehova. El maga anciano na diaton tiempo gendeh ta domina con el fe del diila maga hermano y hermana.—1 Ped. 5:2, 3.

4. (a) Cosa quierre decir de Pablo cuando ya escribi le: “Ta trabaja lang came junto con ustedes para el de ustedes alegria”? (b) Paquemodo el maga anciano ahora ta imita con Pablo?

⁴ Ya habla tambien si Pablo: “Ta trabaja lang came junto con ustedes para el de ustedes alegria.” Na ese maga palabra, ta refiri le con el de suyu mismo cuerpo y con el de suyu maga uban. Porque kita se puede habla? Na ese mismo carta, si Pablo ya hace acorda con el maga de Corinto acerca con el de suyu dos uban cuando ya escribi le: “Came de Silvano y Timoteo ya anuncia entre con ustedes con el Anak del Dios, si Cristo Jesus.” (2 Cor. 1:19) Si ta usa si Pablo con el termino “maga uban na trabajo” na de suyu maga carta, pirmi este ta refiri con el de suyu maga uban, igual con Apolo, Aquila, Prisca, Timoteo, Tito y otro pa. (Roma 16:3, 21; 1 Cor. 3:6-9; 2 Cor. 8:23) Poreso cuando ya habla le: “Ta trabaja lang came junto con ustedes para el de ustedes alegria,” ya dale asiguranza si Pablo con el maga de Corinto que ele y el de suyu maga uban quierre hace el todo para queda alegre el maga hermano y hermana na congregacion. Ahora, el maga anciano tiene tambien el igual deseo. Quierre sila hace el todo para ayuda con el diila maga hermano y hermana que “sirvi con Jehova con alegria.”—Sal. 100:2; Fil. 1:25.

5. Cosa ya pregunta con el cuanto maga hermano y hermana, y cosa tambien kita hay considera?

⁵ Del reciente, ya invita con el un grupo de maga activo hermano y hermana quien ta queda na diferente parte del mundo para contesta con el pregunta, “Cosa maga palabra y accion del un anciano el ya hace contigo alegre?” Mientras ta considera con el diila maga contestacion, compara con ese na de tuyu posible contestacion. Omento pa, considera tambien kita si cosa kita puede hace para contribui na alegria del diaton congregacion. *

6, 7. (a) Cosa el un manera que puede imita el maga anciano con Jesus, Pablo y otro maga siervo del Dios? (b) Porque ta queda mas alegre el maga hermano y hermana si ta acorda con el diila nombre?

⁶ Manada maga hermano y hermana el ta habla que ta queda sila mas alegre si el maga anciano ta dale mira personal interes kanila. El un manera que ta hace se el maga anciano amo si ta sigui sila con el ejemplo de David, Elihu y Jesus. (Le con el 2 Samuel 9:6; Job 33:1; Lucas 19:5.) El cada uno de este maga siervo de Jehova ya dale mira sincero interes con el otro persona cuando ya usa sila con el personal nombre de ese persona. Sabe tambien si Pablo que importante acorda y usa con el nombre del de suyu maga hermano y hermana. Na fin del uno del de suyu maga carta, ya menciona le con el nombre del mas de 25 hermano y hermana incluido ya si Perside con quien ya habla si Pablo: “Saludo para . . . con el dimio amiga si Perside.”—Roma 16:3-15.

⁷ El cuanto maga anciano tan dificil acorda maga nombre. Pero si ta hace sila esfuerzo, dol ta habla sila con el diila maga hermano y hermana, ‘Importante tu conmigo.’ (Ex. 33:17) Mas queda alegre el maga hermano y hermana si llama kanila el maga anciano na diila nombre si man comento sila na Estudiada del El Torre de Guardia o na otro pa maga miting.—Compara na Juan 10:3.

8. Cosa el un importante manera que ya sigui si Pablo con el ejemplo de Jehova y de Jesus?

⁸ Ya dale tambien mira personal interes si Pablo con otro cuando ya dale le kanila sincero comendacion—un manera que puede mas hace alegre con el maga hermano y hermana. Poreso na ese mismo carta donde ya habla le que quierre le hace alegre con el de suyu maga hermano y hermana, si Pablo ya escribi: “Bien orgulloso yo por causa de ustedes.” (2 Cor. 7:4) Este comendacion asigurao ya hace alegre con el maga hermano y hermana na Corinto. Ya dale tambien comendacion si Pablo con el otro maga congregacion. (Roma 1:8; Fil. 1:3-5; 1 Tes. 1:8) Gane, despues le menciona con Perside na de suyu carta para na congregacion de Roma, si Pablo ya omenta: “Ya trabaja [le] mucho na servicio del Señor.” (Roma 16:12) Asigurao, ese maga palabra ya hace gayot alegre con ese fiel hermana! Si ta dale comendacion si Pablo con otro, ta sigui le con el ejemplo de Jehova y de Jesus.—Le con el Marcos 1:9-11; Juan 1:47; Rev. 2:2, 13, 19.

9. Porque ta omenta el alegria na congregacion si ta dale y ta ricibi kita comendacion?

⁹ El maga anciano ahora sabe tambien que importante habla con el maga hermano y hermana que importante sila para kanila. (Prov. 3:27; 15:23) Si ta hace se el un anciano, dol ta habla le con el de suyu maga hermano y hermana: ‘Ya nota yo el cosa tu ya hace. Importante tu conmigo.’ Y necesita gayot oi el maga hermano y hermana con ese maga bonito palabra estaba na maga anciano. Un hermana que mas de 50 el edad ya habla: “Na de mio trabajo, ralo lang yo ta puede oi comendacion. Nuay queber el maga gente aqui y tan competencia con uno y otro. Poreso si el un anciano ta dale conmigo comendacion acerca na cosa yo ya hace para na congregacion, ta hace se alegre y ta anima gayot se conmigo. Ta sinti gayot yo que ta ama conmigo el de mio Tata na cielo.” Semejante tambien el cosa ya sinti el un hermano que solo ta hace engranda con el de suyu dos anak. Del nuevo lang, ya ricibi le comendacion estaba na un anciano. Paquemodo se ya puede afecta con el diaton hermano? Ele ya habla: “Ya anima gayot conmigo el cosa ya habla el anciano!” El sincero comendacion estaba na anciano ta puede anima y ta hace mas alegre con el maga hermano y hermana. Como resulta, ta dale este fuerza kanila para continua camina na camino de vida “y gendeh cansa.”—Isa. 40:31.

10, 11. (a) Paquemodo el maga anciano puede sigui con el ejemplo de Nehemias? (b) Cosa puede ayuda con el un anciano para dale espiritual regalo si ta visita le con el de suyu maga hermano y hermana?

¹⁰ Cosa el un importante manera que puede dale mira personal interes el maga anciano na maga hermano y hermana y omenta el alegria del congregacion? Si tiene sila el iniciativo que ayuda y anima con aquellos quien necesita con ese. (Le con el Maga Actividad 20:28, El Nuevo Testamento.) Si hace se el maga anciano, ta imita sila con el maga espiritual pastor de antes. Por ejemplo, nota si cosa ya hace si Nehemias cuando ya mira le que el cuanto del de suyu maga hermano Judio ya queda maluya na espiritual. El Biblia ya habla que ya actua dayun le para anima kanila. (Neh. 4:14) Ese tambien el cosa quierre hace el maga anciano ahora. Tiene sila el iniciativo para ayuda hace fuerte con el fe del diila maga hermano y hermana. Ta visita sila con el diila maga hermano y hermana na diila casa para anima si ta permiti el diila circumstancia. Durante ese visitada, quierre sila “comparti [kanila] maga regalo espiritual.” (Roma 1:11) Cosa puede ayuda con el maga anciano para hace con ese?

¹¹ Antes el visitada, el un anciano necesita dale tiempo para pensa con el persona con quien le visita. Cosa maga dificultad ta enfrenta ese persona? Cosa con ele puede anima? Cosa texto o experiencia del un caracter na Biblia el aplicable na de suyu circumstancia? Si pensa se el un anciano, puede se ayuda para el cosa le habla puede ayuda con el persona. Durante el visitada, el anciano hay deja con el de suyu maga hermano y hermana que habla si cosa sila ta sinti mientras ta oi le enbuenamente kanila. (Sant. 1:19) El un hermana ya habla: “Ta dale gayot conmigo comforta si el un anciano sincero ta oi.”—Luc. 8:18.

12. Con quien na congregacion el necesita anima y porque?

¹² Quien necesita visitada del maga anciano? Ya anima si Pablo con el de suyu maga uban anciano que “cuida . . . con todo el maga gente quien tiene fe.” Necesita anima con el todo maga hermano y hermana na congregacion, incluido ya el maga publisher y pioneer quien fiel ta hace con el diila ministerio por cuanto año. Porque sila necesita con el suporta del maga espiritual pastor? Cay tiene vez, maskin el maga fuerte na espiritual tan dificil tambien enfrenta con el maga dificultad na este mal mundo. Para ilustra si porque el un siervo del Dios que fuerte na espiritual posible tiene vez necesita el ayuda del otro, considera kita si cosa ya sucede na vida de Rey David.

13. (a) Cuando ya iscuji ataca si Isbi-benob con David? (b) Porque ya puede ayuda si Abisai con David?

¹³ Nuay tarda despues iscuji con David como rey, ya anda le man contra con Goliat, uno del maga de Refaim que un gigante. Bien animoso si David y ya mata le con el gigante. (1 Sam. 17:4, 48-51; 1 Cron. 20:5, 8) Cuanto año despues, durante el guerra na maga Filisteo, yan contra otravez si David con el un gigante. El de suyu nombre amo si Isbi-benob que uno tambien del maga de Refaim. (2 Sam. 21:16) Pero na este tiempo, el gigante cerca ya mata con David. Porque? Gendeh por causa cay ya perde el animo de David sino cay ya queda le nuay fuerza. El Biblia ta habla: “Ya cansa si David.” Cuando ya puede nota si Isbi-benob que cansao si David, “ya plaña le mata con David.” Pero cuando para ataca ya le con David, “ya ayuda dayun si Abisai, el anak de Zeruia, y ya mata con el Filisteo.” (2 Sam. 21:15-17) Cerca ya muri si David! Asigurao, ya rindi le gracias con Abisai cay ya vicia con ele y ya ayuda dayun con ele cuando na peligro el de suyu vida! Cosa maga leccion kita puede aprende na este istoria?

14. (a) Paquemodo kita puede ganá con el maga dificultad que igual de grande con Goliat? (b) Paquemodo el maga anciano puede ayuda con otro hace bira el diila fuerza y alegria? Dale un ejemplo.

¹⁴ Na entero mundo, el maga Testigo de Jehova ta continua hace con el diaton ministerio maskin pa si Satanas y el otro ta causa dificultad kanaton. El cuanto kanaton ta enfrenta maga problema que dol igual na gigante. Pero cay ta confia kita con Jehova, ta ganá kita contra con ese maga dificultad. Pero tiene vez, ta sinti kita que nuay mas kita fuerza para enfrenta con ese maga dificultad. Na ese maga situacion, pronto lang kita tumba na maga problema que ta puede lang kita aguanta del otro. Ese el tiempo que necesita kita el suporta del maga anciano para ayuda kanaton hace bira el diaton alegria y fuerza, como cosa ya experiencia el manada. El un pioneer que mas de 60 ya el edad el ya habla: “Cuanto tiempo ya el ya pasa, malo yo ta sinti y ta cansa yo na ministerio. Ya puede nota el un anciano que maluya yo y ya atraca le conmigo. Ya anima le conmigo usando el Biblia. Ya aplica yo con el maga sugestion que ya dale le y ya beneficia yo.” Ya omenta le: “Bien amable gayot quel anciano cay ya nota le que maluya yo y ya ayuda le conmigo!” Si, alegre kita cay tiene kita maga anciano quien amable ta vicia kanaton y igual con Abisai, preparao sila para ayuda kanaton.

15, 16. (a) Porque el maga hermano y hermana ya ama gayot con Pablo? (b) Porque kita ta ama con el maga amable anciano na congregacion?

¹⁵ Gendeh facil el trabajo del maga anciano. Tiene vez, gendeh sila ta puede durmi enbuenamente cay malingasa sila acerca na diila maga hermano y hermana o cay necesita sila dale espiritual suporta kanila. (2 Cor. 11:27, 28) Pero, el maga anciano alegre hace con el diila responsibilidad, igual con Pablo. Ya escribi le con el maga de Corinto: “Preparao gayot yo para gasta todo maga cosa-cosa tiene yo, maskin el dimio mismo cuerpo, por causa de ustedes maga alma.” (2 Cor. 12:15) Por causa na de suyu amor para na de suyu maga hermano y hermana, ya usa si Pablo con el todo de suyu fuerza para hace fuerte kanila. (Le con el 2 Corinto 2:4; Fil. 2:17; 1 Tes. 2:8) Poreso, el maga hermano y hermana ya ama gayot con Pablo!—Act. 20:31-38.

¹⁶ Como maga siervo del Dios ahora, ta ama tambien kita con el maga amable anciano y ta rindi kita gracias con Jehova cay ya usa le kanila para cuida kanaton. Alegre kita cay ta dale sila mira personal interes kanaton. Ta queda kita fuerte si ta visita sila kanaton. Mas pa, alegre kita cay preparao sila ayuda kanaton si tan dificil kita enfrenta con el maga problema na este mundo. Si, el maga anciano ‘ta trabaja gayot para na diaton alegria.’