1. Павелні Коринфтегі харындастардаңар хайдағ хабар ӧріндірген?

 55 ЧЫЛДА, пістің эрада, Павел илҷі портовай саарда Троадада полған, че аның сағыстары прай Коринфтегі харындас-пиҷелердеңер полған. Олох чылда Коринфтегі харындастарның аразында талас пол парған ӱчӱн, Павел олардаңар сағыссыраан. Нинҷе-де тус пазынаң оларны тӱзедер ӱчӱн, Павел оларға пічік пасхан паза оларзар аннаң хада нымысчыланчатхан Титті ысхан (1 Кор. 1:11; 4:15). Анаң Павел, Коринфтегі харындастардаңар хабарны истіп алар ӱчӱн, Титті Троадада сахтаан. Че Тит андар килбеен. Анаң Павел Македониязар парған. Анда, Титке тоғазып алып, ол уғаа тың ӧрін парған. Тит ағаа Коринфтегі харындастар ол пирген чӧптер хоостыра тудынғаннар паза ағаа тоғазып аларға хынчалар тіп чоохтаанда, Павел уғаа тың ӧрінген (2 Кор. 2:12, 13; 7:5—9).

2. а) Павел коринфтегілерге киртіністеңер паза ӧріністеңер ниме пасхан? б) Хайдағ сурығлар ӱзӱрібізербіс?

² Ӱр ниместең, Павел Коринфтегілерге ікінҷі пічік пас салған. Ол теен: «Анзы киртінізіңернең устапчатханыбысты таныхтабинча. Чох, сірерні ӧрінзіннер тіп, сірернең хада тоғынчабыс. Киртіністерің пик нооза» (2 Кор. 1:24). Пу сӧстернең Павел ниме чоохтирға хынған? Пу сӧстерге ах сағаллар хайди хайарға киректер?

3. а) Ноға Павел «киртіністерің пик нооза» теен? б) Амғы тустағы ах сағаллар хайди Павелдең кӧзідім алчалар?

³ Пу пічікте Павел киртіністеңер паза ӧріністеңер чоохтапча. Ол теен: «Анзы киртінізіңернең устапчатханыбысты таныхтабинча... Киртіністерің пик нооза». Коринфтегі харындас-пиҷілер аның чӧптерінің ӱчӱн нимес, че Худайға киртіністерінің ӱчӱн сыдамах турғаннарын Павел пілген. Аннаңар оларның киртіністерінең устирға хынмаан. Павел харындас-пиҷелернің орта тудынарға хынчатханнарында ікінҷілебеен (2 Кор. 2:3). Амғы тустағы ах сағаллар Павелдең кӧзідім алчалар. Харындас-пиҷелер ноға Худайға нымысчыланчатханнарында паза оларның киртіністерінде ікінҷілебинчелер (2 Фес. 3:4). Олар ӧмеде хатығ правилолар турғыспинчалар, че Библияның принциптеріне паза организацияның устағларына ізенчелер. Амғы ах сағаллар харындас-пиҷелернің киртіністерінің устабинчалар (1 Пет. 5:2, 3).

4. а) Павел, «сірерні ӧрінзіннер тіп, сірернең хада тоғынчабыс» теенде, ниме чоохтирға хынған? б) Хайди амғы ах сағаллар Павелнің кӧңні осхас, кӧңніліг тудынчалар?

⁴ Павел ідӧк пасхан: «Сірерні ӧрінзіннер тіп, сірернең хада тоғынчабыс». Іди тіп, Павел позынаңар паза аннаң хада нымысчыланған кізілердеңер пасхан. Ноға іди тирге чарир? Павел Коринфтегілерге пічікті пасханда, аннаң хада тоғынчатхан ікі кізідеңер пасхан, Силуа́ннаңар паза Тимофейдеңер (2 Кор. 1:19). Ағаа хоза, пасха даа пічіктерде аннаң хада тоғынчатхан кізілердеңер чоохтаза, Павел аннаң хада Худай Сӧзін искірген кізілердеңер чоохтаҷаң. Кӧзідімге, Аполлостаңар, Акиланаң Прискадаңар, Тимофейдеңер, Титтеңер паза пасхаларынаңар даа (Рим. 16:3, 21; 1 Кор. 3:6—9; 2 Кор. 8:23). «Сірерні ӧрінзіннер тіп, сірернең хада тоғынчабыс» тіп, Павел паза пасха харындастар коринфтегілер ӧрініснең нымысчыланзыннар тіп, прай кӱстерін салғаннарынаңар чоохтапча. Амғы христианскай ах сағаллар ідӧк тудынарға кӱстенчелер. Харындас-пиҷелер ӧрініснең нымысчыланзыннар тіп, прай кӱстерін салчалар (Пс. 100:2; Флп. 1:25).

5. Хайдағ сурығларға нандырығлар ӱзӱрібізербіс паза нимедеңер піске сағынып аларға кирек?

⁵ Ӱр ниместе аймах-пасха хазналардағы прай чӱрекнең нымысчыланчатхан харындас-пиҷелердең сурғаннар: «Ах сағалларның хайдағ сӧстері паза тудыныстары сірерге ӧрініс ағылчалар?» Оларның нандырығларын ӱзӱрчетсебіс, сағын кӧріңер: сірер пу сурыға хайди нандырарҷыхсар? Ідӧк сағын кӧреелер, ӧмеде прай харындас-пиҷелер ӧрініснең нымысчыланзыннар тіп, піс ниме ит поларбыс? *

6, 7. а) Хайди ах сағаллар Иисусха, Павелге паза пасха даа киртістіг нымысчыларға кӧӧк поларлар? б) Ах сағаллар харындас-пиҷелерні аттарынаң адазалар, ноға олар ӧріністіг поларлар?

⁶ Пістің харындас-пиҷелерібіс, ах сағаллар оларға хайығ салчатсалар, уғаа ӧрінчелер. Іди ах сағаллар Давидке, Елиуйға паза Иисусха кӧӧкчелер. (2 Самуила 9:6; Иов 33:1; Лука 19:5 хығырыбыс.) Пу киртістіг нымысчыларның полғаны ла, кізілерні аттарынаң адап, оларға хайығ салчатханын кӧзіткеннер. Павел ідӧк кізілерні аттарынаң адирға кирек полчатханын пілген. Пір пічиин тоосчатханда, ол 25 харындас-пиҷенің адын адаан. Оларның санында Персида полған (Рим. 16:3—15).

⁷ Пірее ах сағаллар харындас-пиҷелернің аттарын ундут салчалар. Че ундутпасха кӱстензелер, олар харындас-пиҷелерні аарлыға санапчатханнарын кӧзідерлер (Исх. 33:17). «Сторожевой башня» ӱгренчетсе алай пасха даа чыылығда кем-де комментарий пирерге итчетсе, ах сағаллар фамилия пастыра сурзалар, харындас-пиҷелер ӧрінерлер. (Иоанн 10:3 тиңнестіріңер.)

8. Нимеде Павел Иисус паза Иегова чіли тудынған?

⁸ Павел харындас-пичілерні прай чӱрекнең махтаҷаң, анзы оларға ӧрініснең нымысчыланарға полысчаң. «Сірерні ӧрінзіннер тіп, сірернең хада тоғынчабыс» тіп пасхан пічікте Павел ідӧк пасча: «Сірернең тың махтанчам!» (2 Кор. 7:4). Анзы Коринфтегі харындас-пиҷелернің чӱректерін тың чылытхан полар. Павел пасха даа ӧмелерні махтаан (Рим. 1:8; Флп. 1:3—5; 1 Фес. 1:8). Римдегілерге пічікті пасханда, Персиданың адын адап, ол аннаңар піди теен: «Ол Хан-пигнің кирегінде кӧп тоғынған» (Рим. 16:12, НТ). Ол пиҷе, позынаңар андағ сӧстер истіп, уғаа ӧрінген полар! Кізілерні махтап, Павел Иегова паза Иисус чіли тудынған. (Марк 1:9—11; Иоанн 1:47 хығырыбыс; Аз. ч. 2:2, 13, 19.)

9. Хайди махтағ ӧмее ӧріністіг арах поларға полысча?

⁹ Кізіні махтааны нинҷе аарлығ полчатханын ах сағаллар пілчелер (Прит. 3:27; 15:23). Харындас-пиҷелерні махтазалар, ах сағаллар оларның итчеткен киректерін пілчеткеннерін кӧзітчелер. Сынында хынысты кӧзітчеткен сӧстер ӧмеде прайзына кирек. 50 азыра частығ пиҷе тіпче: «Тоғыста мині пірдеезі махтабинча, анда прайлары марығласчалар. Ӧмеде пірее ниме иткен ӱчӱн ах сағаллар махтазалар, минің кӧңнім кӧдірілче, аннаң андар киректер идерге кӱс хозылча паза Иегова мағаа хынчатханын кӧрчем!» Чалғызан ікі паланы ӧскірчеткен харындасты ӱр ниместе ах сағал махтаан. Аның сӧстері ағаа хайди теңеннер? Ол тіпче: «Ах сағалның махтааны мағаа уғаа полыс пирген!» Ах сағаллар харындас-пиҷелерні махтапчатсалар, оларның кӧңнілері кӧдірілче паза ӧріністіг арах полчалар. Анзы оларға чуртас чолынҷа, майыхпин, парарға полысча (Ис. 40:31).

10, 11. а) Хайди ах сағаллар Неемия чіли тудын поларлар? б) Ах сағалларға духовнай сыйыхнаң ӱлезерге ниме полызар?

¹⁰ Харындастарға оонаң хайығ салып, ӧменің кӧңнін кӧдірерге хынчатхан ах сағалларға ниме идерге кирек? Кӧңнілерін кӧдірерінде кирексінчеткен кізілерні сизініп, оларға полызарға. (Илҷілернің 20:28 хығырыбыс.) Іди тудынып, ах сағаллар пурунғы ах сағалларға кӧӧкчелер. Кӧзідімге, Неемия, еврей харындастарының кӧңнілері тӱс парғанда, ниме иткен? Библияда ол сах андох, турып алып, сӧстернең оларның кӧңнілерін кӧдірген тіп чоохталча (Неем. 4:14). Пӱӱн ах сағаллар ідӧк тудынарға кӱстенчелер. Олар харындас-пиҷелерге киртіністе пик турарға полызарға оңдай тілепчелер. Харындас-пиҷелернің кӧңнілерін кӧдірер ӱчӱн, пір дее ниме харығ полбаза, ах сағаллар оларның иблерінзер килчелер. Харындас-пиҷелернең іди чоохтазып, олар духовнай сыйыхтарнаң ӱлесчелер (Рим. 1:11). Ах сағалларға духовнай сыйыхтарнаң ӱлезерге ниме полызар?

¹¹ Ах сағалға чоохтазар кізідеңер сағынып аларға тус таап турарға кирек. Ол кізінің хайдағ сидіктер? Хайдағ сағыстар ағаа полыс пирерлер? Библиядағы хайдағ стих ағаа килістіре полар? Андағ тимненіс ах сағалға олаңай ла чоохтазып аларға нимес, че кізее тузалығ иде чоохтазып аларға полыс пирер. Хадарҷы тоғазии тузында ах сағал ситкеп истерге кирек (Иак. 1:19). Пір пиҷе чоохтапча: «Ах сағаллар прай чӱрекнең исчетселер, хайдағ чахсы» (Лука 8:18).

12. Ӧмеде кемге полызарға кирек паза ноға?

¹² Хадарҷы тоғазығлары кемге кирек? Павел илҷі ах сағалларға прай ӧмені кӧрерге чоохтаан. Сынында ӧмеде полған на кізее хабазарға паза аны тыыдарға кирек. Кӧп чыллар киртістіг нымысчыланчатхан пионерлернің паза искірігҷілернің кӧңнілерін кӧдірерге ідӧк кирек. Ноға? Андағ даа кӱстіг харындас-пиҷелер, пу чабал чир-чалбахха пастырып, майых парчалар. Ноға духовнай саринаң кӱстіг нымысчыларның кӧңнілерін кӧдірерге кирек полчатханын піліп алар ӱчӱн, Давидтің чуртазында полған киректі кӧр кӧреелер.

13. а) Ноға Иесвий Давидті сала ӧдір салбаан? б) Ноға Авесса Давидке полыс полған?

¹³ Хан поларға таңмалалған соонда, ӱр ниместең, Давид рефаим алыпнаң, Голиафнаң, тоғас парған. Махачы Давид аны ӧдірібіскен (1 Сам. 17:4, 48—51; 1 Лет. 20:5, 8). Чыллар пазынаң, филистимляннарнаң чааласчатханда, Давид пазох алып кізее тоғас парған. Ол ідӧк рефаим полған. Аның ады Иесвий полған (2 Сам. 21:16, сноска). Ол алып Давидті сала ӧдірібіспеен. Ноға? Давид хорых парбаан, че майых парған полған. Иесвий анзын сизін салып, Давидті ӧдірібізерге идібіскен. Аны кӧр салғанда, Авесса, ол алыпха тыыныбызып, аны ӧдірібіскен (2 Сам. 21:15—17). Давид сала ӧл парбаан! Чаа тузында Авесса Давидті харах кӧзінең чідірбеен ӱчӱн, ол Давидке кирек туста полыс пирген. Давид анзына хайди ӧрінген полар! Пу полған киректең піс нимее ӱгрен поларбыс?

14. а) Голиаф осхас сидіктерні нименің сылтаанда тобыр поларбыс? б) Хайди ах сағаллар пасхаларына кӱс кирініп аларға паза ӧріністіг поларға полысчалар? Кӧзідім кӧзіт пиріңер.

¹⁴ Сайтан паза чабал чир-чалбах Худайның чонына тоғырланзалар даа, прай чир ӱстӱнде Иеговаа нымысчыланыс тохтабинча. Кӧп харындас-пиҷелер алып осхас сидіктерге, Голиафтарға, урунчалар, че Иегованаң полызиинаң оларны тобыр парыбысчалар. Пірееде, пу чир-чалбахха пастырып, піс майых парчабыс паза кӱс чох халчабыс. Іди майых парған туста, пасха туста сыдас парыбызар сидіктерге пастыр саларға хорғыс пар. Андағ туста ах сағалларның полызии уғаа аарлығ. Олар піске кӱс кирчелер паза ӧрініс ағылчалар. 65-че частығ пионер пиҷе сағысха кирче: «Нинҷе-де тус мының алнында мағаа хомай полған. Нымысчыланыста уғаа майых парҷаң полғам. Ах сағал, анзын сизін салып, миннең чоохтас сыххан. Піс чахсы чоохтазып алғабыс, Библиядағы стихтарны ӱзӱрібіскебіс. Ол пирген чӧптер хоостыра тудынғаны мағаа полыс пирген. Ол харындас, минің майыхчатханымны сизініп, мағаа полыс пирген ӱчӱн уғаа алғыстығбын!» Авесса чіли, пісті харах кӧзінең чідірбинчеткен паза полызарға килерге тимде ах сағаллар пары хайдағ чахсы.

15, 16. а) Ноға харындас-пиҷелер Павелге хынғаннар? б) Ноға піс ӧмедегі ах сағалларға хынчабыс?

¹⁵ Ах сағаллар кӧп тоғынчалар. Олар Худайның ӧӧрізінеңер сағыссырап паза пазырып алай харындас-пиҷелерге духовнай полызығ пиріп, хараа даа узубинчалар (2 Кор. 11:27, 28). Андағ даа полза, ах сағаллар, Павел чіли, постарының тоғызын толдыразынаң паза ӧрініснең итчелер. Павел коринфтегілерге пасхан: «Сірер арачылан халар ӱчӱн, мин сірерге позымны даа тӱгеде пир саларға тимдебін» (2 Кор. 12:15). Павел, харындастарға хынып, оларны тыыдар ӱчӱн чуртазын хоратхан. (2 Коринфтегілерге 2:4 хығырыбыс; Флп. 2:17; 1 Фес. 2:8.) Аннаңар харындастар ағаа іди тың хынғаннар! (Илҷ. 20:31—38).

¹⁶ Піс ідӧк ах сағалларға хынчабыс паза олар пар ӱчӱн Иегованы пазырыста алғыстапчабыс. Олар, піске хайығ салып, пістің ӧрінізібіске ӧрініс хосчалар. Оларның хадарҷы тоғазығлары пісті тыытчалар. Пу чир-чалбахтың пасханына тоғырланарға сидік полыбысса, олар полызарға тимделер, анзының ӱчӱн піс уғаа алғыстығбыс. Андағ сизінҷек христианскай ах сағаллар сынап пістің ӧрінізібіске хабасчалар.