اقساقالدار «قۋانىشتى بولۋىمىز ٷشىن بىزبەن قىزمەتتەسىپ ٴجۇر»
«قۋانىشتى بولۋلارىڭ ٷشىن وزدەرىڭمەن قىزمەتتەسىپ ٴجۇرمىز» (قور. 2-ح. 1:24).
1. پاۋىلدىڭ قورىنتتاعى ماسىحشىلەر ٷشىن قۋانۋىنا نە سەبەپ بولدى؟
بۇل ب. ز. 55-جىلى ەدى. ترويا قالاسىندا جۇرگەن ەلشى پاۋىلدىڭ بار ويى قورىنتتاعى باۋىرلاستاردا بولدى. سول جىلدىڭ باسىندا پاۋىل ولاردىڭ اراسىندا الاۋىزدىق بار ەكەنىن ەستىپ، جۇرەگى اۋىرعان ەدى. اكەلەرىندەي قامىن ويلاعان ول قورىنتتىقتارعا حات جازىپ، ولاردى تۇزەتپەك بولادى (قور. 1-ح. 1:11؛ 4:15). بۇعان قوسا، قىزمەتتەسى تيتكە سوندا بارىپ-قايتۋدى تاپسىرادى. ال ٶزى قورىنتتىقتاردىڭ جاعدايى تۋرالى ەستۋدى اڭساپ، ونى ترويادا كۇتىپ جۇرەدى. وكىنىشكە قاراي، تيت قايتىپ كەلمەدى. ەندى پاۋىل نە ىستەمەك؟ ول ماكەدونياعا قاراي جول تارتىپ، سوندا جەتكەندە ٴتيتتى كەزدەستىرىپ، قاتتى قۋانادى. تيت قورىنتتاعى باۋىرلاستاردىڭ پاۋىلدىڭ جازعاندارىنا قۇلاق اسقاندارىن ٵرى ٶزىن كورۋگە قۇشتار ەكەندەرىن ايتادى. پاۋىل مۇنداي جاقسى حاباردى ەستىپ، «بۇرىنعىدان دا قاتتى قۋاندى» (قور. 2-ح. 2:12، 13؛ 7:5—9).
2. ا) پاۋىل قورىنتتىقتارعا سەنىم مەن قۋانىش جايلى نە جازدى؟ ٵ) ٴبىز قانداي سۇراقتاردى قاراستىرامىز؟
2 كوپ ۇزاماي پاۋىل قورىنتتىقتارعا ەكىنشى حاتىن جازدى. ول: «ٴبىز سەنىمدەرىڭە ۇستەمدىك ەتپەيمىز، قايتا، قۋانىشتى بولۋلارىڭ ٷشىن وزدەرىڭمەن قىزمەتتەسىپ ٴجۇرمىز. ويتكەنى سەندەر سەنىمدەرىڭنىڭ ارقاسىندا بەرىك تۇرسىڭدار»،— دەگەن (قور. 2-ح. 1:24). مۇنىمەن پاۋىل نە دەگىسى كەلگەن؟ بۇل سوزدەردەن بۇگىندە اقساقالدار نە نارسەگە ۇيرەنەدى؟
سەنىمىمىز بەن قۋانىشىمىز
3. ا) «سەندەر سەنىمدەرىڭنىڭ ارقاسىندا بەرىك تۇرسىڭدار» دەگەن سوزدەرىمەن پاۋىل نە ايتقىسى كەلدى؟ ٵ) بۇگىندەگى اقساقالدار پاۋىلدان قانداي ۇلگى الادى؟
3 پاۋىل ماسىحشىلەردە بولۋ كەرەك ماڭىزدى ەكى قاسيەتتى اتاپ ٶتتى. بۇلار — سەنىم مەن قۋانىش. ول سەنىم جايىندا: «ٴبىز سەنىمدەرىڭە ۇستەمدىك ەتپەيمىز... ويتكەنى سەندەر سەنىمدەرىڭنىڭ ارقاسىندا بەرىك تۇرسىڭدار»،— دەپ جازدى. وسىلايشا پاۋىل قورىنتتاعى باۋىرلاستاردىڭ ونىڭ نە باسقا بىرەۋدىڭ ارقاسىندا ەمەس، قۇدايعا وزدەرى سەنگەندىكتەن بەرىك تۇرعانىن مويىندادى. سوندىقتان ول باۋىرلاستاردىڭ سەنىمىن قاداعالاۋدى قاجەت كورمەدى ٵرى بۇلاي ەتۋدى قالامادى دا. پاۋىل ولاردىڭ دۇرىس نارسەنى ىستەۋدى قالايتىن ادال ماسىحشىلەر ەكەنىنە سەنىمدى بولدى (قور. 2-ح. 2:3). بۇگىندەگى اقساقالدار دا پاۋىلدىڭ ۇلگىسىنە ەلىكتەپ، باۋىرلاستاردىڭ سەنىمدەرى بار ەكەنىنە جانە قۇدايعا تازا نيەتپەن قىزمەت ەتىپ جۇرگەندەرىنە سەنىمدى (سال. 2-ح. 3:4). ولار قاۋىمدا قاتال ەرەجەلەر ورناتپايدى، قايتا، جازبالارداعى پرينسيپتەرگە جانە ەحوبانىڭ ۇيىمى بەرگەن باسشىلىعىنا جۇگىنەدى. ولار باۋىرلاستاردىڭ سەنىمدەرىنە ۇستەمدىك ەتپەيدى (پەت. 1-ح. 5:2، 3).
4. ا) پاۋىلدىڭ «قۋانىشتى بولۋلارىڭ ٷشىن وزدەرىڭمەن قىزمەتتەسىپ ٴجۇرمىز» دەگەن سوزدەرى نەنى بىلدىرەدى؟ ٵ) پاۋىل بۇگىندەگى اقساقالدارعا قانداي ۇلگى قالدىردى؟
4 سونداي-اق پاۋىل: «قۋانىشتى بولۋلارىڭ ٷشىن وزدەرىڭمەن قىزمەتتەسىپ ٴجۇرمىز»،— دەگەن. بۇل سوزدەردى پاۋىل ٶزىنىڭ جانە جاقىن قىزمەتتەستەرىنىڭ اتىنان ايتقان. مۇنى قايدان بىلەمىز؟ قورىنتتىقتارعا جازعان سول حاتىندا پاۋىل: «ارالارىڭدا سيلۋان، تىموتە ۇشەۋمىز ۋاعىزداعان ٴماسىح يسا...»،— دەپ، ەكى قىزمەتتەسىنىڭ اتىن اتاعان (قور. 2-ح. 1:19). سونىمەن قاتار پاۋىل حاتتارىندا «قىزمەتتەس» دەگەن ٴسوزدى قولدانعاندا، اقيلا، پريسكا، تىموتە، تيت سياقتى جاقىن سەرىكتەستەرىنە نۇسقاعان (ريم. 16:3، 21؛ قور. 1-ح. 3:6—9؛ قور. 2-ح. 8:23). دەمەك، ول «قۋانىشتى بولۋلارىڭ ٷشىن وزدەرىڭمەن قىزمەتتەسىپ ٴجۇرمىز» دەۋىمەن قورىنتتىقتاردى مىناعان سەندىردى: ونىڭ ٶزى دە، قىزمەتتەستەرى دە قاۋىمنىڭ ٵربىر مۇشەسى قۋانىشتى بولۋ ٷشىن قولدان كەلگەندى ىستەۋدى قالاعان. بۇگىندە دە اقساقالدار وسىلاي ەتۋدى قالايدى. ولار باۋىرلاستارىنىڭ ەحوباعا «شاتتانىپ قىزمەت ەتۋلەرىنە» كومەكتەسۋ ٷشىن قولدان كەلگەندى ىستەۋگە دايىن (زاب. 99:2؛ ٴفىلىپ. 1:25).
5. باۋىرلاستارعا قانداي سۇراق قويىلدى جانە ولاردىڭ جاۋاپتارىن قاراستىرۋ بارىسىندا نە تۋرالى وي جۇگىرتكەنىمىز ٴجون؟
5 ٵرتۇرلى ەلدە تۇراتىن بىرنەشە قۇلشىنىستى باۋىرلاستار جاقىندا «اقساقالدىڭ قانداي سوزدەرى نە ىستەرى سەنىڭ قۋانىشىڭدى ارتتىردى؟» دەگەن سۇراققا جاۋاپ بەردى. تومەندە ولاردىڭ بەرگەن جاۋاپتارى كەلتىرىلەدى. ولاردىڭ ايتقاندارىن ٶزىمىزدىڭ جاۋابىمىزبەن سالىستىرىپ كورەيىك. سونداي-اق ٶز قاۋىمىمىزدىڭ قۋانىشىنا ۇلەس قوسۋ ٷشىن ٴارقايسىسىمىز نە ىستەي الاتىنىمىز تۋرالى ويلانايىق a.
«سۇيىكتى پەرسيداعا سالەم»
6، 7. ا) اقساقالدار يساعا، پاۋىلعا جانە باسقا دا قىزمەتشىلەرگە قالاي ەلىكتەي الادى؟ ٵ) نەلىكتەن باۋىرلاستاردىڭ ەسىمدەرىن ەستە ساقتاعانىمىز ولاردى قۋانتادى؟
6 باۋىرلاستارىمىزدىڭ كوبىسى اقساقال وزدەرىنە جەكە كوڭىل بولگەندە قاتتى قۋانعاندارىن ايتادى. باسقالارعا كوڭىل بولۋدە اقساقالدار ٴداۋىتتىڭ، ەليۋيدىڭ جانە يسانىڭ ۇلگىسىنە ەلىكتەيدى (پاتشالىقتار 2-جازبا 9:6؛ ٵيۇپ 33:1؛ لۇقا 19:5 وقى). ەحوبانىڭ بۇل قىزمەتشىلەرى ادامنىڭ ەسىمىن اتاۋ ارقىلى شىنايى قىزىعۋشىلىق بىلدىرگەن. پاۋىل دا باۋىرلاستاردىڭ ەسىمدەرىن ەستە ساقتاۋدىڭ ٵرى ەسىمدەرىن اتاۋدىڭ ماڭىزدى ەكەنىن بىلگەن. ول ٴبىر حاتىندا 25 تەن استام باۋىرلاستىڭ ەسىمىن اتاپ، ولارعا سالەم جولداعان. سولاردىڭ اراسىندا پەرسيدا دەگەن ٴماسىحشى ايەل دە بولدى. پاۋىل: «سۇيىكتى پەرسيداعا دا سالەم»،— دەگەن (ريم. 16:3—15).
7 كەيبىر اقساقالدارعا ەسىمدەردى ەستە ساقتاۋ وڭاي ەمەس. سويتسە دە وسىلاي ەتۋگە كۇش سالعاندا، ولار باۋىرلاستارىنا «سەن مەن ٷشىن باعالىسىڭ» دەگەندەي بولادى (مىس.ش. 33:12). «كۇزەت مۇناراسىن» زەرتتەۋ بارىسىندا نە باسقا كەزدەسۋلەردە باۋىرلاستار تۇسىنىكتەمە بەرۋ ٷشىن قول كوتەرگەندە، اقساقالدار ەسىمدەرىن اتاۋ ارقىلى ولاردىڭ قۋانىشىنا قۋانىش قوسادى (جوحان 10:3 سالىستىر).
ول «يەمىز ٷشىن كوپ ەڭبەك ٴسىڭىردى»
8. پاۋىل ەحوبا مەن يسانىڭ قانداي ۇلگىسىنە ەلىكتەگەن؟
8 پاۋىل شىن جۇرەكتەن ماقتاۋ ارقىلى دا باۋىرلاستارعا كوڭىل بولگەن. بۇل ولاردىڭ قۋانىشىن ارتتىرۋدىڭ تاعى ٴبىر ماڭىزدى جولى ەدى. قورىنتتىقتارعا جازعان حاتىندا ول: «وزدەرىڭدى قاتتى ماقتان تۇتامىن»،— دەگەن (قور. 2-ح. 7:4). بۇل سوزدەر قورىنتتىقتاردى ٴبىر مارقايتىپ تاستاسا كەرەك. پاۋىل باسقا دا قاۋىمداردى ماقتاعان (ريم. 1:8؛ ٴفىلىپ. 1:3—5؛ سال. 1-ح. 1:8). ريمدەگى قاۋىمعا جازعان حاتىندا ول پەرسيدا جايلى: «يەمىز ٷشىن كوپ ەڭبەك سىڭىرگەن»،— دەدى (ريم. 16:12). وسى سوزدەر بۇل ادال باۋىرلاسىمىزدىڭ كوڭىلىن قالاي ٶسىردى دەسەڭشى! پاۋىل باسقالاردى ماقتاۋدا ەحوبا مەن يسانىڭ ۇلگىسىنە ەلىكتەگەنى ٴسوزسىز (مارقا 1:9—11؛ جوحان 1:47 وقى؛ ايان 2:2، 13، 19).
9. ماقتاۋ ٴسوز ايتۋ مەن ەستۋ نەلىكتەن قاۋىمنىڭ قۋانىشىن ارتتىرادى؟
9 بۇگىندە اقساقالدار باۋىرلاستاردى باعالايتىندارىن ايتۋدىڭ وتە ماڭىزدى ەكەنىن بىلەدى (ناق. س. 3:27؛ 15:23). وسىلاي ەتكەندە، ولار باۋىرلاستارعا بىلاي دەگەندەي بولادى: «مەن سەنىڭ ەڭبەگىڭدى بايقادىم. سەنىڭ جاعدايىڭ مەن ٷشىن ٴبارىبىر ەمەس». باۋىرلاستار اقساقالداردىڭ جىگەرلى سوزدەرىن ەستۋگە راسىندا دا مۇقتاج. جاسى 50 ٴدىڭ ورتاسىنا كەلىپ قالعان ٴبىر ايەل باۋىرلاس بىلاي دەپ ٴبولىستى: «جۇمىستا ماقتاۋ سوزدەردى وتە سيرەك ەستيمىن. ارىپتەستەرىم سۋىق ٵرى باقتالاسۋعا بەيىم. سول سەبەپتى قاۋىمدا اتقارعان ٸسىم ٷشىن اقساقال ماقتاعاندا، مەن سونداي سەرگىپ، شابىتتانىپ قالامىن. وسىدان كوكتەگى اكەمنىڭ مەنى قاتتى جاقسى كورەتىنىن سەزەمىن». ەكى بالانى جالعىز ٶزى تاربيەلەپ وتىرعان ٴبىر اكەنى اقساقال شىن جۇرەكتەن ماقتايدى. بۇل وعان قالاي اسەر ەتتى ەكەن؟ ول بىلاي دەيدى: «اقساقالدىڭ ايتقاندارى مەن ٷشىن ناعىز دەمەۋ بولدى». ٴيا، اقساقالداردىڭ ماقتاۋ سوزدەرى قاۋىمداعىلاردىڭ رۋحىن كوتەرىپ، قۋانىشىن ارتتىرادى. ال بۇل ٶز كەزەگىندە ولاردىڭ ەش شارشاماي، ٶمىر جولىندا بەرىك تۇرۋلارىنا كومەكتەسەدى (يشايا 40:31).
«وتارعا باقىلاۋشى ەتىپ تاعايىندادى»
10، 11. ا) اقساقالدار نەحەمياعا قالاي ەلىكتەي الادى؟ ٵ) باقتاشىلىق ساپارمەن بارعاندا باۋىرلاسپەن «رۋحاني سيمەن ٴبولىسۋ» ٷشىن اقساقال نە ىستەي الادى؟
10 اقساقالدار ٷشىن باۋىرلاستارعا كوڭىل ٴبولۋدىڭ ٵرى قاۋىمنىڭ قۋانىشىن ارتتىرۋدىڭ ەڭ ماڭىزدى جولى قانداي؟ بۇل — جىگەرگە مۇقتاج جاندارعا كومەكتەسۋ ٷشىن ٴبىرىنشى بولىپ ارەكەت ەتۋ (ەلشىلەردىڭ ىستەرى 20:28 وقى). وسىلاي ەتۋ ارقىلى ولار ەرتەدەگى باقىلاۋشىلارعا ەلىكتەيدى. مىسالى، ياھۋدي باۋىرلارى رۋحاني السىرەي باستاعاندا، ادال باقىلاۋشى نەحەميانىڭ نە ىستەگەنىنە كوڭىل بولەيىكشى. كيەلى كىتاپتا ونىڭ «تۇرىپ»، حالىقتى جىگەرلەندىرگەنى جازىلعان (نەح. 4:14). بۇگىندە دە اقساقالدار وسىلاي ەتۋگە ىقىلاستى. ولار دا باۋىرلاستاردىڭ سەنىمى بەرىك بولۋعا كومەكتەسۋ ٷشىن «تۇرادى»، ياعني ٴبىرىنشى بولىپ ارەكەت ەتەدى. ماسىحشىگە جىگەر بەرۋ ٷشىن، مۇمكىن بولسا، ونىڭ ۇيىنە بارادى. وسىنداي باقتاشىلىق ساپارمەن بارعاندا، ولار «رۋحاني سيمەن ٴبولىسۋدى» قالايدى (ريم. 1:11). بۇلاي ەتۋ ٷشىن اقساقالدار نە ىستەي الادى؟
11 باۋىرلاسقا باقتاشىلىق ساپارمەن بارماس بۇرىن، اقساقالدىڭ ۋاقىت ٴبولىپ، ول تۋرالى ويلانعانى دۇرىس. ونىڭ قانداي قيىندىقتارى بار؟ قانداي ويلار وعان جىگەر بەرەر ەدى؟ كيەلى كىتاپتاعى قاي تارماق نە قاي كەيىپكەردىڭ وقيعاسى ونىڭ جاعدايىنا ساي كەلەدى؟ اقساقالدىڭ وسىنداي جايتتار تۋرالى الدىن الا ويلانعانى ۇيرەنشىكتى بولىپ قالعان ەمەس، باۋىرلاسقا شىنىمەن پايداسى تيەتىن سوزدەردى ايتۋىنا كومەكتەسەدى. وسىنداي ساپار كەزىندە اقساقالدار باۋىرلاستىڭ ىشىندەگىسىن اقتارىپ ايتۋىنا مۇمكىندىك بەرىپ، مۇقيات تىڭدايدى (جاق. 1:19). ٴبىر ايەل باۋىرلاس: «اقساقالدىڭ سەنى جۇرەگىمەن تىڭداعانى جىگەر بەرەدى ەكەن»،— دەيدى (لۇقا 8:18).
الدىن الا دايىندالعانى اقساقالعا باقتاشىلىق ساپارمەن بارعاندا «رۋحاني سيمەن بولىسۋگە» كومەكتەسەدى
12. قاۋىمدا كىمدەر جىگەرگە مۇقتاج جانە نەلىكتەن؟
12 اقساقالدار باقتاشىلىق ساپارمەن كىمدەرگە بارادى؟ پاۋىل وزىمەن قىزمەتتەس بولعان اقساقالدارعا: «بۇكىل وتارعا دا مۇقيات بولىڭدار»،— دەپ كەڭەس بەرگەن. ٴيا، قاۋىمنىڭ ٵربىر مۇشەسى جىگەرگە مۇقتاج، ولاردىڭ اراسىندا جىلدار بويى ادال قىزمەت ەتىپ كەلگەن جاريالاۋشىلار مەن ٸزاشارلار دا بار. نەلىكتەن ولار باعۋشىلاردىڭ قولداۋىنا مۇقتاج دەي الامىز؟ سەبەبى رۋحاني كۇيلەرى مىقتى باۋىرلاستار دا كەيدە وزدەرىن وسى زۇلىم زاماننىڭ قىسىمىنا توتەپ بەرە المايتىنداي سەزىنىپ جاتادى. سەنىمى بەرىك قۇداي قىزمەتشىسىنىڭ ٶزى كەيدە باسقا باۋىرلاستىڭ كومەگىن نەلىكتەن قاجەت ەتەتىنىن ٴتۇسىنۋ ٷشىن، ٴداۋىت پاتشانىڭ باسىنان وتكەن ٴبىر وقيعانى قاراستىرايىق.
«ٵبىشاي داۋىتكە كومەككە كەلدى»
13. ا) يشبي-بەنوب ٴداۋىتتىڭ قانداي كۇيىن پايدالانىپ قالعىسى كەلدى؟ ٵ) ٵبىشاي ٴداۋىتتى نەنىڭ ارقاسىندا قۇتقارا الدى؟
13 پاتشا بولىپ تاعايىندالعاننان كەيىن كوپ ۇزاماي ٴداۋىت الىپتار تاراعان رافا ۇرپاقتارىنىڭ ٴبىرى عولياتپەن جەكپە-جەككە شىعادى. سول جەكپە-جەكتە باتىل ٴداۋىت الىپتى ولتىرەدى (پات. 1-ج. 17:4، 48—51؛ شەج. 1-ج. 20:5، 8). بىرنەشە جىلدان سوڭ فىلىستىرلەرمەن بولعان شايقاستا يشبي-بەنوب دەگەن تاعى ٴبىر الىپ داۋىتكە قارسى شىعادى. ول دا رافانىڭ ۇرپاعى بولاتىن (پات. 2-ج. 21:16). بۇل جولى الگى الىپ ٴداۋىتتى ولتىرۋگە شاق قالادى. بۇلاي بولۋىنىڭ سەبەبى ٴداۋىتتىڭ قورقىنىشقا بوي الدىرعانىندا ەمەس، شارشاپ قالعانىندا ەدى. كيەلى كىتاپتا: «ٴداۋىتتىڭ ٵلى كەتىپ قالجىرادى»،— دەلىنگەن. يشبي-بەنوب ونىڭ السىرەگەنىن بايقاي سالىسىمەن ونى «ولتىرمەك بولدى». الىپ وعان سۇڭگىسىن قادايىن دەپ جاتقان ساتتە «سارۇيانىڭ ۇلى ٵبىشاي داۋىتكە كومەككە كەلدى دە، فىلىستىرگە تاپ بەرىپ، ونى ٶلتىرىپ تاستادى» (پات. 2-ج. 21:15—17). دەر كەزىندە كەلگەن كومەك دەپ وسىنى ايت! وزىنە نازارىن سالىپ جۇرگەنى جانە ومىرىنە قاۋىپ تونگەندە تەز ارادا كومەككە كەلگەنى ٷشىن ٴداۋىتتىڭ ٵبىشايعا شەكسىز ريزا بولعانى ٴسوزسىز. بۇل وقيعادان ٴبىز قانداي ساباق الامىز؟
14. ا) عولياتتاي قيىندىقتاردى قالاي جەڭە الامىز؟ ٵ) قالاي اقساقالدار باۋىرلاستارعا كۇش بەرىپ، قۋانىشتارىن جانداندىرا الادى؟ مىسال كەلتىر.
14 شايتان مەن ونىڭ قول استىنداعىلار ەحوبانىڭ قىزمەتشىلەرىنىڭ جولىنا بوگەت قويسا دا، ولار دۇنيەجۇزى بويىنشا قىزمەتتەرىن اتقارىپ ٴجۇر. كەيبىرىمىز وتە ۇلكەن قيىندىقتارمەن كەزىكتىك، بىراق ەحوباعا تولىق ارقا سۇيەۋدىڭ ارقاسىندا سول «عولياتتاردى» جەڭە الدىق. الايدا وسى دۇنيەنىڭ قىسىمىمەن ۇزدىكسىز كۇرەسە ٴجۇرىپ، ٴبىز كەيدە شارشاپ، جىگەرىمىز تاۋسىلىپ جاتادى. وسىلاي قاجىعان كەزدە، ٴبىز ٵلسىز بولامىز ٵرى بۇرىن جەڭىپ كەلگەن قيىندىقتار ەندى ٴبىزدى «ولتىرە» جازداۋى مۇمكىن. مۇنداي جاعدايدا اقساقالدىڭ دەر كەزىندە كورسەتكەن كومەگى قۋانىشىمىزدى قايتا جانداندىرىپ، كۇش بەرەدى. بۇنى كوپ باۋىرلاستار راستاي الادى. جاسى 60 تىڭ ورتاسىنا كەلىپ قالعان ٴبىر ٸزاشار بىلاي دەيدى: «ٴبىر كەزدەرى مەن ٶزىمدى ناشار سەزىندىم ٵرى قىزمەتتەن دە شارشاپ ٴجۇردىم. قاۋقارىمنان ايىرىلعانىمدى اقساقال بايقاپ، مەنىمەن سويلەستى. ٴبىز كيەلى كىتاپتان ٴبىر ٷزىندى وقىپ، جاقسى اڭگىمەلەستىك. مەن ونىڭ بەرگەن كەڭەستەرىن قولدانىپ، سونىڭ پايداسىن كوردىم. اقساقالدىڭ ٵلسىز كۇيىمدى بايقاپ، كومەك بەرگەنى قانداي جاقسى بولدى!» شىنىندا دا، ٴبىزدى نازارىندا ۇستاپ، ٵبىشاي سياقتى كومەككە كەلۋگە دايىن اقساقالداردىڭ بولعانى جۇرەككە جىلۋ بەرەدى ەمەس پە؟!
ولار پاۋىلدىڭ وزدەرىن سۇيەتىندەرىن ٴبىلدى
15، 16. ا) باۋىرلاستار پاۋىلدى نەلىكتەن قاتتى جاقسى كورگەن؟ ٵ) ٴبىز قاۋىمداعى اقساقالداردى نەلىكتەن جاقسى كورەمىز؟
15 اقساقالدار اۋىر ەڭبەك ەتەدى. ولار قۇدايدىڭ وتارى تۋرالى دۇعا ەتۋ ٷشىن نە باۋىرلاستارعا رۋحاني كومەك كورسەتۋ ٷشىن كەي كەزدەرى ۇيقىسىز تۇندەر دە وتكىزەدى (قور. 2-ح. 11:27، 28). دەسە دە ولار پاۋىلعا ەلىكتەپ، جاۋاپكەرشىلىكتەرىن تولىقتاي ٵرى قۋانىشپەن اتقارادى. پاۋىل قورىنتتىقتارعا: «سەندەردىڭ جاندارىڭ ٷشىن بارىمدى قۋانا بەرەمىن، ٶزىمدى دە ەش ايامايمىن»،— دەپ جازعان (قور. 2-ح. 12:15). ٴيا، ول باۋىرلاستارىن سۇيگەندىكتەن، ولاردى نىعايتۋ ٷشىن ٶزىن ەش اياماعان (قورىنتتىقتارعا 2-حات 2:4 وقى؛ ٴفىلىپ. 2:17؛ سال. 1-ح. 2:8). باۋىرلاستاردىڭ پاۋىلدى قاتتى جاقسى كورگەنىندە كۇمان جوق! (ەل. ٸس. 20:31—38).
16 بۇگىندە ٴبىز دە قامقور اقساقالدارىمىزدى جاقسى كورەمىز جانە ولاردى بەرگەنى ٷشىن ەحوباعا جەكە دۇعادا ريزاشىلىق بىلدىرەمىز. ولار ٴارقايسىسىمىزعا كوڭىل ٴبولۋ ارقىلى قۋانىشىمىزدى ارتتىرادى. باقتاشىلىق ساپارمەن كەلگەندە دە ايتقان سوزدەرىمەن بىزگە قانات بىتىرەدى. سونداي-اق وسى دۇنيەنىڭ قىسىمىنان قاجىعان كەزىمىزدە ولاردىڭ دەمەۋ بولۋعا دايىن تۇراتىندارى ٷشىن ريزامىز. ٴيا، وسىنداي بايقامپاز اقساقالدار، راسىندا دا، «قۋانىشتى بولۋىمىز ٷشىن بىزبەن قىزمەتتەسىپ ٴجۇر».
a جوعارىدا ايتىلعان باۋىرلاستارعا «سەن ٷشىن اقساقالدىڭ اسىرەسە قانداي قاسيەتى باعالى؟» دەگەن دە سۇراق قويىلدى. ولاردىڭ كوبىسى «اقساقالدىڭ جىلى شىراي تانىتاتىنى ٵرى ونىمەن ەركىن سويلەسۋگە بولاتىنى» دەپ جاۋاپ بەردى. بۇل ماڭىزدى قاسيەت جايىندا كەيىنگى ماقالالاردىڭ بىرىندە قاراستىرامىز.