1. Nkinyi kibaadi kitakule Mpoolo bua kuikala na muloo pabitale bena Kidishitu ba mu Kodinda?

 BIBAADI mu kipua kia 55 B.B. Mpoolo mutumibua baadi mu kibundi kia Trowase ki ku bukunkula bua mema, kadi baadi’nka atentekiesha kibundi kia Kodinda. Kumbangilo kua kiakia kipua, bibaadi bimutonde ngofu pabaabadi bamulungule’shi bena Kidishitu ba mu Kodinda babaadi na tuleo munkatshi muabo. Biabia, bu bibaadi ekalakasha pa muanda wabo, baadi muibatumine mukanda bua kulumbula binangu biabo. (1 Kod. 1:11; 4:15) Dingi, baadi muibatumine muina mudimo naye Tite, na aye nkulumbula bua’shi Tite alukile bua kumupa luapolo ku Trowase. Biabia, Mpoolo baadi mutengiele Tite ku Trowase, na baadi na lukalo lukata lua kuuka bi bakuabo bena Kodinda. Anka, bibaadi binyingoshe Mpoolo ngofu muanda Tite tabaadi mualukile nya. Mpoolo badia kukita kinyi binobino? Bayile ku Masedwane, na muanda wa muloo, babaadi bafumankane kuakua. Tite baadi mumulungule’shi bakuetu ba mu Kodinda babaadi basankile mukanda wa Mpoolo na babaadi abatengiela bua kumumona n’eshimba kuiyilu. Pabaadi Mpoolo mupushe lualua luapolo luibuwa, ‘bapetele muloo ukile bukata.’​—2 Kod. 2:12, 13; 7:5-9.

2. (a) Mpoolo bafundile kinyi pabitale lukumino na muloo? (b) Nkonko kinyi yatukatalula?

² Mafuku apeela kunyima, Mpoolo baadi mufundile bena Kodinda mukanda wa kabidi. Bebalunguile’shi: ‘T’atukimbi kwinufînyika byanudya kukumîna, ooo, mwanda nwi bapwe kunyinga mu lukumîno lwenu. Anka, ky’atukyebe nkufuba nenu byanudya kwikala na mulô.’ (2 Kod. 1:24, EMM) Mpoolo baadi akiebe kuamba kinyi pabaadi mufunde ano mayi? Na ano mayi ngalombene kuikala na bukitshishi kinyi kui bakulu bena Kidishitu lelo uno?

3. (a) Mpoolo baadi akimbi kuakula kinyi pa bafundile’shi: “mwanda nwi bapwe kunyinga mu lukumîno lwenu”? (b) Bakulu bakuete kulonda kileshesho kia Mpoolo lelo uno naminyi?

³ Mpoolo baadi mutemune mianda ibidi i na muulo ukata mu lulanguilo luetu​—lukumino na muloo. Pabitale lukumino bafundile’shi: “T’atukimbi kwinufînyika byanudya kukumîna, ooo, . . . mwanda nwi bapwe kunyinga mu lukumîno lwenu.” Ku bukuashi bua ano mayi atumono’shi Mpoolo ashinguula’shi bakuetu ba mu Kodinda babaadi banyingie, kushi pa muanda waye sunga pa muanda wa ungi muntu, kadi nku bukuashi bua lukumino luabo mui Efile Mukulu. Biabia Mpoolo tabaadi mumone’shi bi na muulo kukunkusha lukumino lua bakuabo nya. Baadi mushinkamishe’shi mbena Kidishitu be na lulamato abakumina kukita mianda ibuwa. (2 Kod. 2:3) Lelo uno, bakulu abambula kileshesho kia Mpoolo pa kuikala na lukulupilo mu lukumino lua bakuabo na mu binangu abibatakula bua kufubila Efile Mukulu. (2 Tes. 3:4) Pamutue pa kuelela bena kakongie miiya ibukopo, bakulu abakulupila mayi a kulonda e muiyi di’Efile Mukulu na buludiki abufiki kui ndumbuluilo a Yehowa. Dingi, anka bu bibaadi bakulu ba mu siekele a kumpala, bakulu ba ano mafuku tabe na matalua ku lukumino lua bakuabo nya.​—1 Mp. 5:2, 3.

4. (a) Mpoolo baadi akimbi kuakula kinyi pa bafundile’shi: “Ky’atukyebe nyi nkufuba nenu byanudya kwikala na mulô”? (b) Bakulu abambulaa mmueneno a mianda a Mpoolo lelo uno naminyi?

⁴ Mpoolo bakuile dingi’shi: “Ky’atukyebe nyi nkufuba nenu byanudya kwikala na mulô.” Pabaadi muakule ano mayi, baadi akula pabimutale nabene na bantu babaadi akamba kufuba nabo. Buakinyi atuamba biabia? Muanda nka mu wawa mukanda umune, Mpoolo baadi mutentekieshe bena Kodinda bantu babidi ba ku baaba babaadi afubu nabo pabaadi mufunde’shi: “Yesu . . . abatudi bawukishe kwenu, ami na Silvanuse na Timote.” (2 Kod. 1:19) Dingi, misango yoso ibaadi Mpoolo akula pabitale ‘kufuba pamune’ mu mikanda yaye, baadi akamba kuakuila bantu babaadi akamba kufuba nabo bu Apolose, Akila, Priska, Timote, Tite na bangi. (Lom. 16:3, 21; 1 Kod. 3:6-9; 2 Kod. 8:23) Biabia, paye kuakula’shi: “Ky’atukyebe nyi nkufuba nenu byanudya kwikala na mulô,” Mpoolo baadi ashinkamiisha bena Kodinda’shi aye na benaaye babaadi abakumina kukita kioso kibaabadi balombene kukita bua’shi bena kakongie boso bekale na muloo. Bakulu bena Kidishitu namu lelo uno be na lualua lukalo lui mumune. Abakuminaa kukita kioso kiabadi balombene kukita buabadia kukuasha bakuabo bua ‘kufubila Yehowa na muloo.’​—Mis. 100:2; Fid. 1:25.

5. Atukatalula ngalulo ku lukonko kinyi, na abitungu’shi atue boso tukite kinyi?

⁵ Mu mafuku ashale, babaadi batekie kisaka kia bakuetu balume na bakashi abafubilaa Yehowa na kisumi mu ma mbalo elekene a mu nsenga, bua kualula ku luno lukonko: “Mmayi kinyi sunga bikitshino bia mukulu kampanda bibaadi bikukuashe bua kuikala na muloo?” Patukuete kutalula bibaadi bialule bakuete babaadi ba mu kiakia kisaka, puandikisha ngalulo yabo na biboodi mulombene namu kualula su babaadi bakuepushe luno lukonko. Dingi, atue boso tutalule biatudia kukuatshishena bua’shi kakongie ketu kekale na muloo. a

6, 7. (a) Bakulu mbalombene kuambula Yesu, Mpoolo na bangi bafubi b’Efile Mukulu naminyi? (b) Buakinyi kutemuna bakuetu mu mashina abo akuibapa muloo?

⁶ Bakuetu balume na bakashi be bungi abakula’shi abanyishaa kuikala na muloo nsaa i bakulu abebapasukila. Mushindo wibuwa ulombene bakulu kuibikita mpa kulonda kileshesho kia Davide, Eliwu, na Yesu. (Badika 2 Samwele 9:6; Yoobo 33:1; Luka 19:5.) Oso a ku bano bafubi ba Yehowa baadi muleshe’shi apasukila ungi muntu pa kumutemuna muishina diaye. Mpoolo namu baadi mumone’shi bi na muulo kutentekiesha na kutemuna mashina a bena Kidishitu naye. Baadi mufudiishe umune wa ku mikanda yaye pa kusema bakuetu balume na bakashi bakile pa 25 na kutemuna muntu ooso muishina diaye, pamune na Persise, mukuetu mukashi muina Kidishitu baadi Mpoolo muakule pa muanda waye’shi: “Semaayi nkashyaanaami a kifulo Persise.”​—Lom. 16:3-15.

⁷ Bangi bakulu tabakambaa kulamiina mashina a bantu. Anka, nsaa yabetatshisha bua kuibikita, be’nka bu abalungula bakuabo bena kukumina’shi ‘We na muulo kwandi.’ (Efi. 33:17) Bakulu abakuashaa bakuabo bena Kidishitu nabo bua kuikala na muloo pabebetanyina mu mashina abo nsaa yabebatekie bua kutusha ngalulo mu kulonga kua Kitenta kia Mulami, sunga mu bingi bisangilo.​—Puandikisha na Yowano 10:3.

8. Mpoolo baadi muambule kileshesho kia Yehowa na Yesu mu mushindo kinyi wi na muulo?

⁸ Mpoolo baadi dingi muleshe’shi apasukila bangi pa kuibatumbula n’eshimba dimune, uno nyi ungi mushindo wi na muulo wa kukuasha bakuetu bua kufiimisha muloo wabo. Mu wawa mukanda umune mubaadi muleshe lukalo luaye lua kukuasha bua’shi bakuabo bena Kidishitu bekala na muloo, Mpoolo bafundile’shi: ‘nkwete kwitumbisha pa mwanda wenu.’ (2 Kod. 7:4) Ano mayi a lutumbu abaadi akume bakuetu ba mu Kodinda kuishimba ngofu. Mpoolo baadi muleshe lutumbu lui mumune kui tungi tukongie. (Lom. 1:8; Fid. 1:3-5; 1 Tes. 1:8) Dingi, kunyima kua kutemuna Persise mu mukanda ubaadi mufundile bena Kodinda, Mpoolo baadi mukumbashe’shi: ‘Baadi mufube ngofu mu mwanana.’ (Lom. 16:12) Bino bibaadi bisankishe yawa mukuetu mukashi sha lulamato ngofu! Paye kutumbula bangi, baadi mulonde kileshesho kia Yehowa na Yesu.​—Badika Maako 1:9-11; Yowano 1:47; Kibaf. 2:2, 13, 19.

9. Buakinyi nsaa yatutumbula bakuetu mu kakongie na yabetutumbula namu abikuasha bua kuikala na muloo?

⁹ Lelo uno, bakulu abamonaa’shi bi na muulo ukata bua kulesha lutumbu luabo kui bena Kidishitu nabo. (Nki. 3:27; 15:23) Nsaa yoso i bakulu abakitshi biabia, bi’nka bushi abalungula bena Kidishitu nabo’shi: ‘Nammono bibokitshi. Ne mukutudile binangu.’ Bakuetu bena Kidishitu be na lukalo lua kupusha mayi a bakulu aebanyingisha. Ungi mukuetu mukashi e na bipua bikile pa 50 baadi muakule nka bu abiakulaa bantu be bungi’shi: “Ku mudimo wande tabakambaa kuntumbula. Bantu tabatalanaa na be na binangu bia kuipikena. Biabia, nsaa i mukulu antumbula bua muanda kampanda ubankitshi bua kakongie, abinyingishaa na kumpa bukome! Ambinkuasha bua kuipusha’shi nemufudibue na Nshami e muiyilu.” Ungi mukuetu mulume akusha bana baye babidi bupenka epushaa namu mu wawa mushindo umune. Mu mafuku ashale’mu, ungi mukulu baadi mumutumbule n’eshimba dimune. Bibaadi bikume yawa mukuetu mulume kuishimba naminyi? Amba’shi: “Mayi a yawa mukulu abaadi anyingishe bikata!” Biabia, pakutumbula bakuetu n’eshimba dimune, bakulu mbalombene kunyingisha bakuetu bikata na kutamisha muloo wabo. Bino abibapa bukome bua kutungunuka na kutambukila muishinda adituala ku muwa “kushi kukooka.”​—Yesh. 40:31.

10, 11. (a) Bakulu mbalombene kuambula kileshesho kia Neemiya naminyi? (b) Nkinyi kilombene kukuasha mukulu bua kutusha kia buntu kia mu kikudi nsaa yende mu kukuasha bakuabo?

¹⁰ Ungi mushindo kinyi wibuwa ulombene bakulu kulesha’shi abapasukilaa bakuabo bena Kidishitu nabo na kukuasha kakongie bua’shi kekala na muloo? Mpa kuata mpango bua kunyingisha baaba be na lukalo na kunyingishibua. (Badika Bikitshino 20:28.) Nsaa i bakulu abakitshi biabia, abambula balami ba kala. Bu kileshesho, tala bibaakitshine ungi mukunkushi sha lulamato Neemiya nsaa ibamuene’shi bangi bakuabo bena Yuda babaadi babofule mu kikudi. Bible amba’shi bebuele musango umune aye nkuibanyingisha. (Ne. 4:14) Lelo uno, bakulu bakuete kukita namu nka biabia. ‘Abemanaa’​—sunga kuata mpango—​bua kunyingisha lukumino lua bakuabo bena Kidishitu. Bua kuibanyingisha mu wawa mushindo, abendaa mukutala bakuabo balume na bakashi ku mashibo abo su kui mushindo. Paapa pabende mu kuibatembela bua kuibanyingisha, abekalaa na lukalo lua ‘kwibatwadila kya buuntu kya mu kikudi.’ (Lom. 1:11) Nkinyi akikuashaa bakulu bua kukita biabia?

¹¹ Kumpala kua’shi ende mu kutala muntu bua kumunyingisha, abitungu mukulu aate nsaa ya kunangushena pabitale yawa muntu. Yawa muntu e na nkalakashi kinyi? Nkinyi kilombene kumunyingisha? Nkifundue kinyi sunga muisambo wa muntu kampanda a mu Bible awipushena na mianda yakuete kufumankana nayo? Kubadiila kuela binangu mu wawa mushindo akukuasha mukulu bua kuisamba na yawa muntu mu mushindo aumunyingisha. Pabakuete kuisamba, mukulu atadiila bakuabo balume na bakashi bua’shi bakule mianda i mu mashimba, na kuibatemesha kalolo kushi kuibatshiba ku mayi. (Shak. 1:19) Ungi mukuetu mukashi amba’shi: “Su mukulu kuete nkutemesha kalolo, abinyingishaa ngofu.”​—Luka 8:18.

12. Mba nnanyi abekalaa na lukalo lua kunyingishibua mu kakongie, na buakinyi?

¹² Bakulu mbalombene kuenda mu kutembela bakuetu kinyi? Mpoolo baadi mulungule bakulu naye bena Kidishitu bua ‘kulama . . . lombe loso lushima lua mikooko.’ Binyibinyi, bena kakongie boso be na lukalo lua kunyingishibua, mpa na balungudi na ba mbala-mashinda babaapu kufubila Yehowa na lulamato munda mua bipua bibungi. Buakinyi abitungu’shi bakulu bebanyingishe? Muanda sunga bekala banyingie mu kikudi, ingi nsaa abo namu abafumankanaa na nkalakashi ya mu uno ndumbuluilo ebubi. Bua kumona buakinyi sunga mufubi a Efile Mukulu munyingie mmulombene kuikala na lukalo na bukuashi, tubande kutala muanda ubaadi Mfumu Davide mufumankane nao.

13. (a) Nsaa kinyi ibaadi Yishebibe-Nobe mukimbe kuipaa Davide? (b) Abishaayi baadi mumupashe naminyi?

¹³ Mafuku apela kunyima kua Davide baadi nsongua kuedibua muimu bua kuikala mfumu, baadi mulue ngoshi na Golyate, umune a ku bena Refaime, baadi kilobo. N’eshimba dinyingie dioso, Davide bamuipayile. (1 Sam. 17:4, 48-51; 1 Mya. 20:5, 8) Kunyima kua bipua, nsaa ibaabadi abalu ngoshi na bena Filistine, Davide baadi mulue ngoshi na kingi kilobo. Eshina dia yawa muntu nyi Yishebibe-Nobe, ungi muina Refaime. (2 Sam. 21:16.) Bua uno musango, kubaadi kushale nka kapela bua’shi yawa muntu ayipee Davide. Buakinyi? Ta kuamba’shi Davide tabaadi dingi n’eshimba dinyingie nya, kadi mmuanda washi takiayikalanga dingi na bukome buibungi. Bible alesha’shi: “Davide baadi mupungile.” Pabaadi Yishebibe-Nobe mumone’shi Davide baadi mupungile, “baakyebanga kwipaa Davide.” Anka, kapindi kapela kumpala kua’shi yawa muntu ayipee Davide na lupete lua ngoshi, “Abishaayi mwan’a Seruya, baamulamwinyiine atapa mwina-Filistina amwipaa.” (2 Sam. 21:15-17) Eyendo, Davide baadi mupande lufu! Baadi na lutumbu lukata kui Abishaayi muanda baadi mumupasukile na bafikile bukidi bua kumukuasha pabaadi muwa waye mu masaku! Uno muisambo awitulongiesha kinyi?

14. (a) Nkinyi akitukuashaa bua kutshimuna nkalakashi ikata i bu Golyate? (b) Bakulu mbalombene kukuasha bangi bua kupetuula muloo na bukome buabo naminyi? Tusha kileshesho.

¹⁴ Mu nsenga ishima, atue bafubi ba Yehowa atutungunukaa na kulungula mukandu wibuwa sunga mbiabetukiengiesha kui Satana na bantu baye. Bangi ba kuatudi mbafumankane na nkalakashi ikata, kadi pa kukulupila mui Yehowa n’eshimba dimune, tuibatshimune yaya nkalakashi i bu “Golyate.” Anka, kutungunuka na kulua na nkalakashi ya mu uno ndumbuluilo, akuitulekaa ingi nsaa bapungile na babofule. Mu yaya nsaa yatudi bakookie, mbibofule bua’shi nkalakashi yatudi balombene kukambila su tui na bukome itutshimune. Biabia, bukuashi buabetupa kui mukulu mu nsaa ilombane abuitukuasha bua kupetuula muloo na bukome buetu, anka bu abilesha bakuetu bebungi. Ungi mbala-mashinda e na bipua bikile pa 60 amba’shi: “kubapu kukila mafuku, ntshinadi nepusha bibuwa nya, na mudimo wa kulungula mukandu wibuwa ubaadi aunkokiesha. Ungi mukulu baadi mumone’shi ntshinadi na bukome, aye nkufika mu kunkuasha. Kifundue kia mu Bible kibaadi mumpe patubaadi atuisamba kibaadi kinyingishe ngofu. Nadi mufubishe mayele abaadi mundungule, abio nkunkuasha ngofu.” Amba dingi’shi: “Nadi musankie ngofu pabaadi yawa mukulu mumone’shi nemukookie na aye nkufika mu kunkuasha!” Eyendo, tui na muloo ukata wa kuikala na bakulu abetupasukilaa na kifulo kioso na ‘abafikaa mu kuitukuasha’ nka bu bibaadi Abishaayi mukuashe Davide.

15, 16. (a) Buakinyi bakuetu babaadi bafule Mpoolo ngofu? (b) Buakinyi atufulaa bakulu abetupasukila?

¹⁵ Kuikala mukulu nyi mbushito bukata. Ingi nsaa bakulu abakishaa bufuku bushima kushi kulala abekalasha pa kuteka bua mikooko y’Efile Mukulu sunga bua kukuasha bena Kidishitu nabo mu kikudi. (2 Kod. 11:27, 28) Sunga mbiabia, bakulu abakumbashaa midimo yabo kalolo na abeyifubaa na muloo, nka bu bibaadi abikitshi Mpoolo. Baadi mufundile bena Kodinda’shi: “Na muloo ooso, naatuusha byooso na kwipaana ami nabeene na bushima bwande pa mwande wenu.” (2 Kod. 12:15) Biabia, bu bibaadi Mpoolo mufule bakuabo, baadi muipaane ngofu bua kuibanyingisha. (Badika 2 Bena-Kodinda 2:4; Fid. 2:17; 1 Tes. 2:8) Nyi buakinyi bakuetu babaadi bafule Mpoolo bikata!​—Bikitshino 20:31-38.

¹⁶ Bu biatudi bafubi b’Efile Mukulu lelo uno, atue namu tuibafule bakulu bena Kidishitu abetupasukila na atutekaa Yehowa mu nteko yetu ya pa bupenka bua’shi ebakuashe. Abafiimisha muloo wetu nsaa yabapasukila muntu ooso pa bupenka. Abitunyingishaa pabafiki mu kuitutala. Dingi, tui na lutumbu lukata muanda abekalaa belumbule bua kufika mu kuitukuasha patudi na nkalakashi. Eyendo, baaba bakulu abetupasukila ‘abafubaa bua mulo wetu’ binyibinyi.