1. Parché che i ansiani de Corinto i ga assà Paolo contento?

L’era el ano 55 D.C. El apòstolo Paolo l’era ntela cità de Tróade ndove che ghen’era un porto, ma lu no l’era bon de fermarse de pensar nela cità de Corinto. Un poco vanti in quel ano, l’è restà disgustà quando el ga savesto che i fradei de quela congregassion i era drio dirse su. Cossita come un pupà preocupà, Paolo el ga mandà una carta par giutarli. (1 Cor. 1:11; 4:15) Lu anca el ga mandà Tito par giutarli e dopo lu el ndaria dirghe tuto a Paolo quando i se catesse in Tróade. Adesso Paolo l’era drio spetar Tito in Tróade, e l’era pròpio premoso de saver quel che gavea sucedesto in Corinto. Ma Tito no l’è rivà e Paolo l’è restà tanto triste. Cossa che Paolo ndaria far? Lu l’è ndato de barco fin la Macedónia. Lì i se ga catà, e lu l’è restà contento. Tito el ga parlà che i fradei in Corinto i ga acetà i consili dela carta de Paolo e che i gavea tanto caro de véderlo. Quando el ga scoltà questa notìssia Paolo l’è “restà ancora pi contento”. — 2 Cor. 2:12, 13; 7:5-9.

2. (a) Cossa che Paolo el ga scrito ai fradei de Corinto sora la fede e la alegria? (b) Che domande ndaremo risponder?

² Poco tempo dopo, Paolo el ga scrito nantra carta ai fradei de Corinto. Lu el ga scrito: “No semo paroni dela vostra fede, ma laoremo insieme a valtri par contribuir cola vostra felicità. Parché valtri sì firmi par causa dela vostra fede.” (2 Cor. 1:24) Cossa che Paolo el ga volesto dir con questo? Come i ansiani de ancoi i seghe el esémpio de Paolo?

3. (a) Cossa che Paolo el volea dir quando ga scrito: “Valtri sì firmi par causa dela vostra fede”? (b) Come che i ansiani de ancoi i seghe el esémpio de Paolo?

³ Paolo el ga parlà de due robe tanto importante dela nostra adorassion: la fede e la alegria. Ricordemo quel che el ga scrito sora la fede: “No semo paroni dela vostra fede, . . . Parché valtri sì firmi par causa dela vostra fede.” Con queste parole, Paolo el ga volesto dir che i fradei de Corinto no i era firmi par causa de lu o par causa de nantra persona, ma sì par causa dela fede de lori in Dio. Cossita, lu el ga visto che no ghe ocorea controlar la fede dei fradei e lu no’l volea gnanca far questo. Lu el se fidea che lori i era fradei fedeli e che i volea far quel che l’è giusto. (2 Cor. 2:3) Ancoi, i ansiani i seghe el esémpio de Paolo quando lori i dimostra confiansa nela fede dei fradei e nela so motivassion par laorar par Geovà. (2 Tes. 3:4) Invesse de far dure règole par la congregassion, i ansiani i se fida nei prinsipi bìblichi e nela orientassion dela organisassion de Geovà. Tuto questo parché i ansiani ancoi no i ze paroni dela fede dei fradei. — 1 Pie. 5:2, 3.

4. (a) Cossa che Paolo el volea dir quando el ga scrito: “Laoremo insieme a valtri par contribuir cola vostra felicità”? (b) Come che i ansiani ancoi i fà compagno de Paolo?

⁴ Paolo el ga anca dito: “Laoremo insieme a valtri par contribuir cola vostra felicità”. Lu l’era drio dir questo de lu stesso e dei so amighi. Come che podemo saver questo? Parché nela medèsima carta Paolo el ga parlà ai fradei de Corinto sora due dei so amighi, quando el ga scrito: ‘Noantri, o sia, mi, Silvano e Timòteo ghemo predicà sora Gesù’. (2 Cor. 1:19) Anca, tute le volte che Paolo el ga doperà la parola “contribuir” nele so carte lu l’era drio parlar dei so amighi, come Apolo, Àquila, Prisca, Timòteo, Tito e altri. (Rom. 16:3, 21; 1 Cor. 3:6-9; 2 Cor. 8:23) Alora, quando Paolo el ga dito “laoremo insieme a valtri par contribuir cola vostra felicità”, lu el ga dato la garansia ai fradei che lu e i so amighi i volea far tuto quel che lori i podea parché tuti dela congregassion i gavesse alegria. I ansiani de ancoi i vol far compagno. I vol far tuto quel che i pol par giutar i so fradei a “servir a Geovà con alegria”. — Sal. 100:2; Fil. 1:25.

5. Che domanda ndaremo risponder e in cossa che ghemo de pensar?

⁵ No fà tanto tempo che la ze stata fata una domanda a un grupo de fradei e sorele zelosi de difarenti posti del mondo: “Cossa che ga dito o fato un ansiano che el te ga assà de pi contento?” Intanto che vedemo i comentari de questi fradei, vedi le so risposte e cossa che ti te gavarissi rispondesto. Anca, ndemo veder come che noantri podemo giutar i fradei e le sorele dela nostra congregassion a gaver de pi alegria. *

6, 7. (a) Quala che la ze una maniera dei ansiani imitar Gesù, Paolo e altri servi de Dio? (b) Parché che ai fradei i ghe piase che i ansiani i se ricorde del so nome?

⁶ Tanti fradei e sorele i ga dito che una roba che ghe dà de pi alegria l’è quando i ansiani i se interessa pròpio de lori. Una dele pi importante maniere de far questo l’è par meso de imitar i esempi de Davi, Eliù e del pròpio Gesù. (Ledi 2 Samuel 9:6; Giò 33:1; Luca 19:5.) Cada un de questi servi de Geovà i ga mostrà vero interesse nei altri ciamadoli par nome. Anca Paolo el savea la importansa de ricordar e doperar el nome dei fradei. Quando lu el ga finio una dele so carte, el ga mandà saludar par nome de pi de 25 fradei e sorele, anca una sorela ciamada Pèrside. Lu el ga dito: “Saludème la nostra cara Pèrside.” — Rom. 16:3-15.

⁷ Ghen’è ansiani che i fà fadiga ricordarse dei nomi. Ma, quando che i fà sforso par ricordarse, l’è come se i fusse drio dirghe a un fradel e una sorela: ‘Ti te sì importante par mi.’ (Éso. 33:17) I ansiani i giuta nela alegria dei fradei prinsipalmente quando i se ricorda dei so nomi quando li ciama par far comentari nel Stùdio de La Sentinela o in altre riunion. — Fà una comparassion con Gioani 10:3.

8. De che maniera importante Paolo el ga seghio el esémpio de Geovà e de Gesù?

⁸ Paolo anca el ga mostrà interesse nei altri quando el dea lode sinsiere. Questa la ze nantra maniera importante par far pi grande la alegria dei fradei. Par quela, nela medèsima carta che el ga parlà che el volea far pi granda la alegria dei fradei, lu el ga scrito: “Go tanto orgòlio de valtri”. (2 Cor. 7:4) Sicuramente queste lode le ga assà i fradei e le sorele de Corinto nantra volta animadi. Paolo el ga mostrà sentimenti someianti a altre congregassion. (Rom. 1:8; Fil. 1:3-5; 1 Tes. 1:8) Dopo de parlar de Pèrside nela so carta par la congregassion in Roma, Paolo anca el ga dito: “Ela la ga laorà tanto nela òpera del Signor”. (Rom. 16:12) Sicuro che questa lode la ga animà questa sorela fedele! Quando Paolo el lodea i altri, el seghia el esémpio de Geovà e de Gesù. — Ledi Marco 1:9-11; Gioani 1:47; Apo. 2:2, 13, 19.

9. Parché che dar e ricever lode dà de pi alegria par la congregassion?

⁹ Ancoi i ansiani i vede che l’è importante dir in parole quel che i sente par i fradei. (Pro. 3:27; 15:23) In verità, sempre che un ansiano el fà questo, l’è come se lu el ghe disesse ai so fradei: ‘Me ga piasesto quel che te ghè fato. Mi me importo con ti.’ E i fradei sicuramente i ga bisogno de scoltar parole de incoraiamento dei ansiani. Una sorela che la ga intorno de 50 ani la ga parlà quel che tanti i pensa: “Par mi l’è tanto difìcile ricever qualche lode nel me laoro. Lì nissun se importa con nissun e tuti i vol esser meio de che i altri. Alora, quando un ansiano el me loda par qualcossa che go fato nela congregassion, me dà tanto ànimo e forsa. E questo me fà sentir che me Pare nel cielo el me ama.” Un fradel che l’è drio slevar due fioi lu sol anca lu el pensa cossita. No fà tanto tempo che un ansiano lo ga lodà. Come se galo sentio questo fradel? Lu el ga dito: “Le parole del ansiano le me ga animà tanto!” Alora, podemo veder che quando un ansiano el loda i fradei e le sorele de maniera sinsiera, el ghe dà ànimo e li assa de pi contenti. E questo el dà de pi forsa par seitar ndar nela strada dela vita ‘sensa restar strachi’. — Isa. 40:31.

10, 11. (a) Come che i ansiani i pol seghir el esémpio de Neemia? (b) Cossa che pol giutar un ansiano a dar un don spiritual quando el fà vìsite par incoraiar un fradel?

¹⁰ De che maniera tanto importante i ansiani i dimostra interesse par i so fradei che i giuta par la alegria nela congregassion? Quando i dà el primo passo par giutar un fradel che ga bisogno de incoraiamento. (Ledi Ati 20:28.) Quando i fà cossita, i seghe el esémpio dei pastori spirituai del passà. Par esémpio, varda cossa che Neemia el ga fato quando el ga visto che i so fradei giudei i era fiachi in senso spiritual. Quando el ga savesto l’è ndato presto incoraiarli. (Nee. 4:14) I ansiani ancoi i vol far compagno. Lori i fà presto par dar el primo passo par giutar i fradei a esser forti nela fede. Lori i visita i fradei nele so case, quando questo l’è possìbile, par dar incoraiamento. In queste vìsite, lori i vol “dar un don spiritual”. (Rom. 1:11) Cossa che ndarà giutar i ansiani a far cossita?

¹¹ Vanti de far una vìsita de incoraiamento, el ansiano el tol tempo par pensar nela persona che el va visitar. Quale zele le dificoltà de questa persona? Cossa che se pol dir par giutarla? Che testo o persona che la Bìblia la parla podarà giutarla nel so problema? Quando el ansiano el se parecia ben, questo ndarà giutar a gaver un bon resultado, e nò sol parlar par parlar. Nela vìsita, el ansiano el assa che i fradei i parle e el stà atento intanto che el scolta. (Tia. 1:19) Una sorela la ga dito: “L’è tanto consolador quando un ansiano el scolta con atension quel che ghe disemo.” — Luca 8:18.

¹² Chi che sarà benefissià de ricever queste vìsite de incoraiamento? Paolo el ga dito a altri ansiani par ‘star atenti a tute le piégore’. Sicuro che tuti nela congregassion i ga bisogno de incoraiamento, i predicadori e anca i pionieri che i fà un laoro fedele ano dopo ano. Parché che lori i ga bisogno del apoio dei pastori spirituai? Parché dele volte questi fradei che i ga una forte fede anca lori i ga dificoltà par causa de questo mondo. Vedemo quel che ga sucedesto col Rè Davi. Questo ne giutarà a capir che anca un servo che el ga una forte fede in Dio dele volte el ga bisogno del aiuto de un amigo.

13. (a) Cossa che Isbi-Benobe el volea far con Davi? (b) Come che Abisai el ga salvà Davi?

¹³ Poco dopo de Davi esser untà come rè, lu el ga infrontà Golia, un dei refain, che la era una rassa de giganti. Con coraio, Davi lo ga copà. (1 Sam. 17:4, 48-51; 1 Cró. 20:5, 8) Ani dopo, nte una batàlia coi filistei, nantra volta Davi el ga bio de infrontar un gigante. El so nome l’era Isbi-Benobe e anca lu l’era un dei refain. (2 Sam. 21:16; nota.) Sol che questa volta el gigante el ga quasi copà Davi. Parché? Davi no’l gavea mia perso el coraio, ma el gavea perso le forse. La Bìblia la dise: “Davi l’è restà tanto straco”. Quando el ga visto che Davi l’era straco, Isbi-Benobe el ga proà coparlo. Ma quando el gigante l’era quasi drio sbusar Davi cola lansa, “suito Abisai, fiol de Zeruia, el ga salvà Davi, el ga atacà e el ga copà el filisteo.” (2 Sam. 21:15-17) Davi el ga scampà par poco! Pol esser che lu el sìpia restà tanto grato a Abisai par lu esser stà atento e gaverlo salvà suito quando la so vita la era in perìcolo. Cossa che imparemo de questa stòria?

14. (a) Come che podemo soportar dificoltà someiante a Golia? (b) Come che i ansiani i pol giutar altri a gaver nantra volta forsa e alegria? Mensiona un esémpio.

¹⁴ In tuto el mondo, i servi de Geovà i ze drio predicar anca se Sàtana e quei che i lo apoia i vol fermarli. Arquanti de noantri semo drio infrontar dificoltà gigante ma, se se fidemo del tuto in Geovà, lotemo contra questi “Golia” e semo boni de darghene fora con lori. Ma, dele volte, seitar lotar contra queste dificoltà del mondo ne assa strachi e desanimadi. E quando che restemo fiachi, assemo che queste dificoltà, che sarissino boni de infrontar in altre situassion, le ne atache. In questi momenti, el apoio de un ansiano el pol giutarne a gaver nantra volta la alegria e la forsa che ghemo de bisogno, come ga belche sucedesto con tanti. Una pioniera che la ga intorno de 60 ani la ga dito: “Un tempo indrio, no me sentia mia ben, e el laoro de predicassion el me assea tanto straca. Un ansiano el ga visto questo e l’è vegnesto parlar con mi. Ghemo parlà de una stòria dela Bìblia che me ga dato tanto ànimo. Mi go fato quel che lu el me ga dito e questo me ga giutà tanto.” Anca la ga dito: “Questo ansiano l’è stà tanto amoroso parché lu el ga visto la me situassion e el me ga giutà.” In verità, l’è tanto bon saver che ghen’è ansiani che, de maniera amorosa, i se preocupa con noantri, e che, cossita come Abisai nel passà, i ze pronti par vegner giutarne.

15, 16. (a) Parché che i fradei i amea tanto a Paolo? (b) Parché che noantri amemo i ansiani dela congregassion che i ze sempre pronti par giutarne?

¹⁵ Esser pastor ghe vol dir gaver tanto da far. Dele volte, i ansiani i passa note sensa dormir, preocupadi coi fradei e fando orassion par lori o dando apoio spiritual ale piégore de Dio. (2 Cor. 11:27, 28) Ma cossita come Paolo, i ansiani i tende ben dele so responsabilità con alegria. Lu el ga scrito ai fradei de Corinto: “Ma mi gavarò tanto caro de dar tuto quel che go e de guastarme del tuto par valtri.” (2 Cor. 12:15) Sensa dùbio, par amor ai so fradei, Paolo ‘el se ga guastà del tuto’ par giutarli. (Ledi 2 Corinti 2:4; Fil. 2:17; 1 Tes. 2:8) Par quela podemo capir el grando amor che i fradei i gavea par lu! — Ati 20:31-38.

¹⁶ Anca noantri ancoi, come servi de Dio, amemo i nostri ansiani disposti e, quando preghemo a Geovà, ringrassiemo par el aiuto che lori i ne dà. Lori i fà pi granda la nostra alegria parché i se interessa par cada un de noantri. Le so vìsite de incoraiamento le ne dà ànimo nantra volta. Anca, semo grati che i ze sempre pronti par giutarne quando le dificoltà del mondo le ne schissa. Questi ansiani atenti i ‘contribue par la nostra alegria’.