Sitjela ngemvelaphakho.

Ngabelethwa ngo-1979 e-United States. Nangineminyaka emithathu ababelethi bami badivosa. Umma wangikhulisa ngesiko lamaJuda, wangisa kuma-yeshiva namkha eenkolweni zamaJuda. Nangineminyaka elikhomba safudukela kwa-Israyeli sahlala unyaka lapho, ngangena isikolo endaweni ebizwa ngokuthi yi-kibbutz. Ngemva kwalokho, sinomma safudukela e-Mexico.

Nanyana bekunganasinagogo endaweni leyo, ngaragela phambili neenkolelo zami zobuJuda. Bengikhanyisa amakeresi ngeSabatha, ngifunde i-Torah bengithandaze nge-siddur namkha incwadi yokuthandaza. Esikolweni, bengihlala ngitjela abantu engifunda nabo ukuthi ikolwami ngiyo yamambala. Bengingakhenge khengifunde iTestamende eliTjha elidzimelele ekonzweni neemfundisweni zakaJesu Krestu. Kuhlekuhle, umma wangikhalimela bona ngingalifundi ngebanga lokusaba ukuthi ngizokusilaphazwa ziimfundiso zalo.

Khuyini ekwenze waqunta ukufunda iTestamende eliTjha?

Nangiba neminyaka eli-17 ngabuyela e-United States ngayokuqedelela isikolo khona. Nangilapho, umuntu ebengijayelene naye obekathi umKrestu wathi ukuphila kwami angekhe kwaphelela ngaphandle kwakaJesu.

Ngaphendula ngathi, “abantu abakholelwa kuJesu balahlekile.”

Wangibuza ukuthi, “ukhe walifunda iTestamende eliTjha?”

Ngaphendula ngathi, “awa.”

Wathi, “nangabe kunjalo kubayini uveza umbonwakho entweni ongayaziko?”

Amezwakhe ahlaba aphukela ngombana bengikuqala njengokuba budlhadlha ukuveza umbono ngento ongayaziko. Ngaphathwa ziinhloni, ngathatha iBhayibheli lakhe ngakhamba nalo ekhaya ngathoma ukufunda iTestamende eliTjha.

Kwakuthinta njani lokho owakufundako?

Kwangirara ukufumana ukuthi abatloli beTestamende eliTjha bebamaJuda. Nangisolo ngifunda, ngabona ukuthi uJesu bekamJuda onomusa, othobekileko, obekafuna ukusiza abantu ingasi ukubatlhagisa. Ngaya nelayibhrari ngayokuboleka iincwadi ezikhuluma ngaye. Nanyana kunjalo, akunanto nayinye eyangiqinisekisa ukuthi uJesu bekanguMesiya. Abanye bebathi unguZimu, ebekumbono ongazwisisekiko kimi. Okhunye, uJesu bekathandaza kubani, kuye? Ukungezelela kilokho, uJesu wahlongakala kodwana iBhayibheli lithi uZimu ‘akafi.’ a

Wazifumanaphi iimpendulo zemibuzo le?

Iqiniso aliziphikisi begodu bengizimisele ukulifumana. Ngathandaza kuZimu ngokudephileko ngilila, bekukokuthoma ngithandaza ngingasebenzisi i-siddur. Msinyana ngemva kokuthandaza, ngezwa kukokoda umuntu emnyango. BekuboFakazi bakaJehova ababili. Banginikela incwadi yokufunda iBhayibheli. Incwadi le kuhlanganise neenkulumiswano engibe nazo naboFakazi zangiqinisekisa ukuthi iinkolelo zabo zisekelwe eBhayibhelini. Ngokwesibonelo, aboFakazi abaqali uJesu njengengcenye kaZiqu-ntathu kodwana ‘njengeNdodana kaZimu’ b naloyo “osithomo sendalo kaZimu.” c

Msinyana ngemva kwalokho ngabuyela e-Mexico, ngafunda naboFakazi ngeemphorofido ezimalungana noMesiya. Kwangirara ukuthi kuneemphorofido ezinengi kangaka. Nanyana kunjalo, bengingaqiniseki. Ngazibuza: ‘Inga-kghani uJesu bekunguye kwaphela obekafanelekela ukuba nguMesiya?’ begodu ‘Kuthiwani nange bekamlingiswa ohlakaniphileko alingisa uMesiya?’

Khuyini eyakuqinisekisa?

AboFakazi bangitjengisa iimphorofido umlingiswa angekhe akghone ukuzilingisa. Ngokwesibonelo, bekusasele iminyaka ema-700 lokha umphorofidi uMikha athi ngoMesiya uzokubelethelwa eBhetlehema yeJudiya. d Ngubani ongazikhethela bona ufuna ukubelethelwa kuphi? U-Isaya watlola ukuthi uMesiya uzokubulawa njengesilelesi esikhohlakeleko kodwana uzokubulungwa nabaregileko. e Zoke iimphorofidwezi zazaliseka kuJesu.

Ingcenye yamaswaphela yobufakazi obuhlanganisa uJesu kukuthi uvelaphi. IBhayibheli lathi uMesiya bekazokuba sizukulwana seKosi uDavida. f Ngebanga lokuthi amaJuda wekadeni bekanerhelo lokulandelana kweenzukulwana, nange uJesu bekangasiserhelweni lomndeni kaDavida, amanabakhe bekazokutjela woke umuntu ngalokho. Kodwana akhenge akghone ukwenza njalo ngombana ukuhlobana kwakaJesu noDavida bengekhe kwaphikiswa. Isiqubuthu sambiza ngokuthi ‘uyiNdodana kaDavida.’ g

Ngo-70 C.E., ngemva kweminyaka ema-37 uJesu ahlongakele, amasotja weRoma atjhabalalisa iJerusalema begodu amarhelo wokulandelana kweenzukulwana walahleka namkha wonakaliswa. Bona kubonakale ukuthi uvela kiliphi irhelo lokubelethwa, uMesiya bekufuze avele ngaphambi kwaka-70 C.E.

Ukwazi lokhu kwakuthinta njani?

KuDuteronomi 18:18, 19, kwabikezelwa ukuthi uZimu uzokuvusa umphorofidi kwa-Israyeli onjengoMosi. UZimu wathi “umuntu ongekhe alalele amezwami akhulunywa mphorofidi loyo ngegama lami ngizomjezisa.” Ukufundisisa kwami iBhayibheli loke kwangiqinisekisa ukuthi uJesu weNazaretha bekamphorofidi loyo.