Chapbunkutik jutuk akuxlejal.

Livokʼ ta sjabilal 1979 ta Estados Unidos. Kʼalal oxib toʼox jabilale, la xchʼak sbaik li jtot jmeʼe. Li jmeʼe la xchanubtasun talel kʼuchaʼal li skostumbre judioetike, jech xtok lichanunaj ta s-eskuela judioetik ti yeshivás sbie. Kʼalal vukub xa ox jabilale, libatkutik ta naklej ta Israel; li eskuela ti bu toʼox chikʼote jaʼ ta jun paraje ti bu tstsʼunolajike. Kʼalal echʼ xa ox jun jabile, libatkutik ta México.

Akʼo mi chʼabal junuk snail tsobobbail ti bu nakalunkutike, jech-o la jpas li kʼusi jchʼunojkutike. Jujun savadoe ta jtsan jkantela, ta jkʼel Torá [jaʼ li Tsʼibetik ta Ebreo Kʼope] xchiʼuk ta jkʼel jlik livro ti sidur sbie ti jaʼ tskoltaun spasel orasione. Lek chkaʼi yalbel jchiʼiltak ta chanun ti jaʼ melel li jrelijione. Muʼyuk bu jkʼeloj-o li Achʼ Testamento ti jaʼ chalbe skʼoplal li cholmantal xchiʼuk li chanubtasel laj yakʼ Jesuse; li jmeʼe yalojbun ti mu jkʼele, yuʼun chiʼ mi xchʼay li xchʼunel koʼontone.

¿Kʼu yuʼun lik achan li Achʼ Testamentoe?

Kʼalal 17 xa ox jabilale, lisut batel ta Estados Unidos sventa jtsutses li jchanune. Oy jun kamigo la yalbun ti xchʼunoj Kristoe xchiʼuk laj yalbun ti skʼan la jchʼun ta stojolal eke.

Xi la jtakʼbee: «Lajemik ta loʼlael li buchʼutik xchʼunojik Jesuse».

Xi la sjakʼbune: «¿Mi oy achanoj junuk velta li Achʼ Testamentoe?».

«Muʼyuk», xkut.

Xi laj yalbune: «Vaʼun chaʼa, ¿kʼu yuʼun jech chaval taje? Mu xuʼ kʼusi xaval mi mu xanabe lek skʼoplale».

Likʼexav-o yuʼun li kʼusi laj yale, yuʼun jech ta jnop ek. Mu lekuk ti oy kʼusi xkaltik kʼalal mu kʼusi jnabetik lek skʼoplale. Vaʼun, la jchʼambe li Svivliae, laj kichʼ batel ta jna xchiʼuk lik jchan li Achʼ Testamentoe.

¿Kʼu yelan laj avil li kʼusi la akʼele?

Labal sba tajek laj kaʼi ti jaʼ juda krixchanoetik la stsʼibaik li Achʼ Testamentoe. Jech xtok, kʼalal mas ta jchanbe batel skʼoplal li Jesuse, laj kakʼ venta ti toj lek yoʼontone xchiʼuk ti bikʼit yakʼoj sbae, ti oy ta yoʼonton tskʼan tskolta li krixchanoetike. Jech xtok, libat ta vivlioteka sventa jkʼel jaylikuk livroetik ti jaʼ chalbe skʼoplal li Jesuse. Pe mi junuk laj yakʼ jchʼun ti jaʼ Mesias li Jesuse. Junantike chalik ti jaʼ Dios li Jesuse, pe taje mu meleluk. Xi ta jnope: «Li Jesuse, ¿buchʼu tskʼopon kʼalal tspas orasione? ¿Mi tskʼopon sba stuk?». Jech xtok, cham li Jesuse, pe li Vivliae chal ti mu ‹snaʼ xcham› li Diose. *

¿Kʼusi la apas un chaʼa?

Li kʼusi melele muʼyuk tsvalopatin sba, jaʼ yuʼun jpʼel ta koʼonton ta jsaʼ li kʼusi melele. Jaʼ yuʼun, ta sjunul koʼonton la jkʼopon li Diose xchiʼuk laj kokʼita xchiʼuk muʼyuk xa la jkʼel li slivroal j-orasione. Kʼalal tsuts kuʼun spasel orasione, la skʼojik stiʼ jna li stestigotak Jeovae. Li loʼilajkutik xchiʼuk laj yiktabeikun jun foyeto. Li foyeto xchiʼuk li kʼusi la jloʼiltakutik jayibuk velta ta tsʼakale laj yakʼbun jchʼun ti jaʼ melel li kʼusi xchʼunojike, yuʼun ta Vivlia tslokʼesik tal li kʼusi chalike. Jech kʼuchaʼal liʼe, li stestigotak Jeovae muʼyuk xchʼunojik ta sventa li Trinidade, yuʼun xchʼunojik ti jaʼ ‹Xnichʼon Dios› * li Jesuse xchiʼuk «jaʼ li buchʼu baʼyel pasat yuʼun Diose». *

Mu sjaliluke lisut batel ta México, te-o la jchan xchiʼuk stestigotak Jeova li albil kʼopetik ta sventa li Mesiase ¡Ep tajek li albil kʼopetik taje! Akʼo mi jech, te to xinaʼet jutuk, xi ta jakʼbe jbae: «¿Mi jaʼ noʼox ta stojolal Jesus kʼot ta pasel yuʼun li albil kʼopetike? ¿A ti jech noʼox tskuy sba ti jaʼ li Mesiase?».

¿Kʼuxi la atabe stakʼobiltak li kʼusi chajakʼbe abae?

Li stestigotak Jeovae laj yakʼbeikun ta ilel albil kʼopetik ti jaʼ noʼox kʼot ta stojolal li Jesuse. Jech kʼuchaʼal liʼe, kʼalal skʼan toʼox vukub sien jabile, li Mikease laj yal ti Mesiase chvokʼ ta Belen. * Muʼyuk buchʼu xuʼ stʼuj ti bu chvokʼe. Li Isaiase laj yal ti Mesiase ta xichʼ milel kʼuchaʼal jun vinik ti oy kʼusi chopol spasoje, pe ti chichʼ mukel kʼuchaʼal jun jkʼuleje. * Skotol li albil kʼopetik taje, jaʼ noʼox kʼot ta stojolal li Jesuse.

Li kʼusi laj yakʼ jchʼune jaʼ ti kʼuxi lik talel li Jesuse, li Vivliae chal ti Mesiase te chlik tal ta snitilulal li ajvalil Davide. * Li judaetike lek stsʼibaojik li snitilulalike, jaʼ yuʼun ti maʼukuk te lik tal ta snitilulal David li Jesuse, li yajkontratake xuʼ jamal laj yalik ti jechuke, pe mu jechuk la spasik, yuʼun snaʼojik lek ti jaʼ te lik tal ta snitilulal Davide. Maʼuk noʼox, yuʼun li epal krixchanoetike jamal laj yalik ti jaʼ «Xnichʼon Davide». *

Kʼalal kuarentatik xa ox jabil slajel li Jesuse, li yajsoltarotak Romae la sjinesik li Jerusalene xchiʼuk te chʼay svunal li snitilulalike, jaʼ yuʼun li Mesiase baʼyel skʼan xvul ta lokʼel sventa xichʼ ilel ti te lik tal ta snitilulal Davide.

¿Kʼusi kʼot ta nopel avuʼun kʼalal laj achan taje?

Li Deuteronomio 18:18 xchiʼuk 19, li Diose yaloj xa onoʼox ti tsvaʼan jun j-alkʼop kʼuchaʼal Moises li ta Israele xchiʼuk xi laj yale: «Chkichʼbe ye [o ta jakʼbe kʼu chaʼal] li buchʼu mu xchikintabun jkʼop ti yakal chal ta jbi li j-alkʼope». Kʼalal la jchan sliklej li Vivliae, kʼot ta chʼunel kuʼun ti j-alkʼop taje jaʼ li Jesus ta Nasarete.