De che maniera sito stata slevada?

Mi son nassesta nel ano de 1979 nei Stati Unidi. I me genitori i se ga spartidi quando mi gavea tre ani. Me mare la me ga slevà nela religion giudaica e la me ga metesto nele ieshivas, o scole giudaiche. Quando mi gavea sete ani, semo ndate de star un ano in Israel, e mi ndea scola ndove che tuti i laorea e tuti i gavea parte insieme, ciamà kibutz. Dopo mi e me mare semo ndate de star nel Mèssico.

Ndove semo ndate de star no ghen’era gnanca una sinagoga, ma mi seitea doperar i costumi dei giudei. Nel giorno del sabo giudaico mi impissea candele, ledea la Torà e doperea el nostro libro sidur par far le orassion. Nela scola mi ghe disea ai me coleghi che la me religion la ze stata la prima che la ze vegnesta fora. Mi no gavea mai ledesto el Novo Testamento, che el parla de tuto quel che Gesù Cristo el ga insegnà. Me mare la me gavea dito che no gavea mia de léderlo parché la gavea paura che mi cambiesse la me maniera de pensar.

Parché gheto volesto leder el Novo Testamento?

Quando mi gavea 17 ani son ndata de star nantra volta nei Stati Unidi par finir i me studi. Lì, una persona che mi cognossea, che l’era un cristiano, el me ga dito che la me vita no la gavaria valor sensa Gesù.

Mi go rispondesto: “Le persone che le crede in Gesù le ze perse”.

Lu el me ga domandà: “Gheto belche ledesto el Novo Testamento?”

Mi go rispondesto: “Nò”.

Lu el me ga dito: “Alora, no te par che la ze una ignoransa parlar de quel che no te cognossi?”

Questo me ga fato pensar tanto, parché mi pensea che l’è una stupidessa giudicar una roba sensa saver el assunto. Alora go assà de banda el me orgòlio, go portà casa la so Bìblia e go scominsià a leder el Novo Testamento.

Come leder el Novo Testamento el ga cambià la to maniera de pensar?

Son restada maraveiada quando go visto che quei che i ga scrito el Novo Testamento i era ebrei. De pi che mi ledea, de pi mi vedea che Gesù l’era un ebreo bon e ùmile che el volea giutar le persone. Lu no’l volea mia passar indrio i altri. Anca, son ndata nte una biblioteca par ciapar libri che i parlea de lu. Ma gnanca un de quei libri el me ga fato creder che Gesù l’era el Messia. Arquanti fin i disea che Gesù l’era Dio e questo no volea dir gnente par mi. Mi pensea: “Gesù el preghea par lu stesso?” E nantra roba: “Gesù l’è morto, ma la Bìblia la dise sora Dio: “Ti no te mori mia”. a

Come gheto catà le risposte ale to domande?

Mi savea che ghen’era sol una verità e mi volea catarla. Alora, piandendo go fato una orassion sinsiera a Dio e, par la prima volta, sensa doperar el me libro de orassion. Pena dopo de gaver fato la orassion due Testimònie de Geovà le ze vegneste casa mia. Lore le me ga dato una revista par studiar la Bìblia. Questa revista e tuto quel che ghemo parlà insieme me ga fato creder che tuto quel che le me insegnea vegnea dela Bìblia. Par esémpio, lore no le crede che Gesù el fà parte de una Trinità ma che lu l’è “el Fiol de Dio” b e “el primo che Dio el ga creà” c.

Poco tempo dopo, son tornada al Mèssico e lì go seità studiar le professie del Messia cole Testimònie de Geovà. Son restada maraveiada parché ghen’era tante professie! Ma, ancora cossita, mi gavea tanti dubi. Mi me domandea: ‘Sarà che anca nantra persona la podaria gaver realisà queste professie? Sarà che Gesù el ga fato finta de esser el Messia?’

Cossa che l’è stà importante par ti no gaver pi dubi?

Le Testimònie de Geovà le me ga mostrà professie che sol Gesù el podea realisarle e nissun altro el podea far questo. Par esémpio, de pi de 700 vanti, el profeta Michea el ga dito che el Messia el nasseria in Belen dela Giudea. d No se pol scòlier el posto ndove nassemo, mia vera? Isaia el ga scrito che el Messia el ndaria morir come una persona rugna ma sepoltà in meso ai siori. e Tute queste professie le se ga realisade in Gesù.

Par mi la roba pi importante la ze stata la genealogia de Gesù. La Bìblia la disea che Gesù el vegnaria dela fameia de rè Davi. f I giudei antighi i metea via i registri genealogichi. Alora, se Gesù no’l fusse dela fameia del rè Davi, i so nemighi i gavaria dito questo a tuti! Ma lori no i ga mia fato questo parché nissuni podea provar el contràrio. Le persone fin lo ciamea de “el Fiol de Davi”. g

Nel ano 70 D.C., 37 ani dopo dela morte de Gesù, esèrsiti romani i ga destruto Gerusalen, e i registri genealogichi i se ga persi o i ze stati destruti. Cossita, par provar la genealogia del Messia, lu el gavaria de esser vegnesto vanti del ano 70 D.C.

Savendo de tuto questo, come gala cambià la to maniera de pensar?

In Deuteronómio 18:18, 19, Dio el ga dito che Israel el gavaria un profeta someiante a Moisè. Dio el gavea dito che quel “che el parla parole nel me nome, ma che no le scolta, sicuro che lo farò pagar par quel che el fà”. Adesso mi no go pi dubi. Far un bel stùdio dela tuta la Bìblia me ga assà sicura che questo profeta l’era Gesù de Nazarè.