Fon khint aan hat ich xon ti natuer kërn. Ich sin imer mit mayn familye maaye kang aan te wunerliche walte un xeene lakoos woo xteen um unser xtat rom, Jyväskylä, in Sentraal Finlant. Ich tuun aach ti tiere liipe. Wii ich een khint waar, wolt ich yeete kats un hunt woo ich kesiin hon um krayfe! Wii ich am wakse waar, ti xlecht aat wii ti layt ti tiere eftas pehantele, hot mich unruych kelos. Mit te tsayt, sin ich in een orkanisatsyoon rin kang woo hot kekhëmpft fer ti rechte fon te tiere xitse. Tat hon ich anere layt khëne kelërnt woo soo wii ich ketenkt hon.

Mer hon fiile kampaanye kemacht fer ti rechte fon te tiere xitse. Meyer hon informatsyoone aus keteelt un aach protëstos in kericht keeche ti kexefte plëtser woo hon haut ferkhaaft, un keeche ti laporatoorye woo hon proope in te tiere kemacht. Mer hon soo kaar een nay orkanisatsyoon kekriintet fer ti rechte fon te tiere xitse. Meyer hon mit ale kewalt kexaft fer unser mënunge aus prayte; tes weeche hate mer eftas propleeme mit te autoriteete. Ich waar ofts in kexpërt un kericht.

Ich hon mich ketanke iwer ti tiere kemacht, awer aach weeche ti anere propleeme welt wayt. Mit te tsayt, sin ich in haufe orkanisatsyoone rin kang, too tepay ti Anistia Internacional un te Greenpeace. Ich hon mayn kans kraft penutst fer tëne sayn aktiwiteete unerxtitse. Ich hon ti rechte fon te mënxe woo weenich klik im leepe hate kexitst, wii ti aarme un hungriche layt.

Awer, ich hon lamsam kemërkt tas ich khont net ti welt ënere. Opwool tiise orkanisatsyoone hon welche kleene propleeme resolwiirt kriit, hots aus kesiin tas ti kroose propleeme sin ploos xlimer kep. Es waar wii wën ti xlechtichkheet ti kans welt ketekt hat un nimant hot sich traus kemacht. Ich hon mich kans kleen kefun.

Wën ich kemërkt hon tas ich khont niks mache, sin ich aarich traurich kep. Awer, tan, hon ich aan kefang aan Kot un aan te Piipel tenke. Ich hat xon friier ti Piipel mit Yeehoowa sayn Tsayer xtutiirt. Opwool se liiplich waare un hon interes aan mich ketsaycht, ich waar noch net fërtich fer mayn leepe ënere. Awer yets ti tinge waare anerste kewees.

Ich hon ti Piipel kehool un aan kefang se leese. Es hot wërklich mayn phayn ferlaycht. Ich hon kemërkt tas fiile tekste in te Piipel lërne uns ti tiere mit liip pehantele. Tsum payxpiil, Provérbios 12:10 saat tas “kuute layt tuun sayn tiere kuut uf phase”. (Tëm noo ti Good News Translation.) Ich hon aach ferxtan tas Kot hot net ti xult fer ti propleeme woo uf te welt pasiire. Xtats tas, unser propleeme sin xlimer kep wayl ti meyerste layt tuun net Sayn oryentiirung noo keen. Es hot mich tiif kekrif wii ich kelërnt hon iwer Yeehoowa sayn liip un ketult. (Salmo 103:⁠8-14)

In tiise tsayt, hon ich een tseetelche kexikt fer tas puuch O Que a Bíblia Realmente Ensina? ferlange. Klaych, een pheyerche fon Yeehoowa sayn Tsayer is in mayn teer khom un hot mich een Piipel xtuutyum aan kepoot, un ich hon tas aan kenom. Ich hon aach aan kefang in te fersamlunge in tëm Raych Saal keen. Weeche tas, ti piiplix woerheet hot aan kefang wortsle un mayn hërts tsiie.

Weeche ti Piipel, khont ich fiile ënerunge mache. Ich hon noo kelos rauche un saufe. Ich hon ti aat wii ich aus kesiin un kexproch hon ferpesert. Un ich hon mayn aanxtelung noo ti mënxliche autoriteete keënert. (Romanos 13:⁠1) Noch etwas woo ich uf sayt kelos hon, waar mayn imoraalix leepe, woo khee krënse kehat hat.

Awer ti xlimste ënerung fer mich waar ti orkanisatsyoone woo tuun ti mënxe un ti tiere sayn rechte xitse in te richtich aat siin. Es hot tsayt ketauert. Am aanfang, hon ich ketenkt tas ich waar tiise orkanisatsyoone am hinerkeen wën ich raus fon tëne kang sin. Awer ich hon ferxtan tas Kot sayn Raych is ti eensiche woere hofnung fer ti welt. Yets, teet ich mayn kanse kraft penutse fer tiise Raych unerxtitse un anere helfe iwer tëm lërne. (Mateus 6:⁠33)

Wën ich hon fer ti rechte fon te mënxe un te tiere kekhëmpft, hon ich ti layt in tswaay krupe keteelt — ti kuute un ti xlechte — un ich waar imer fërtich fer keeche tii woo ich hon wii xlecht aan kesiin keen. Awer, weeche ti Piipel, tuun ich nii mee has keeche ti anere xpiire. Xtats tas, fersuuche ich ale kaar liipe. (Mateus 5:​44) Een aat woo ich liip tsayche is torich ti kuute oter fon Kot sayn Raych preetiche. Es frayt mich siin wii tiise liiplich aarwayt tuut friit un frooheet aan muute un kept ti layt woere hofnung.

Wayl ich ti sache in Yeehoowa sayn hënt lose, fine ich mich in friit. Ich sin mich sicher tas eyer, wii te Kriatoer, tuut net erlaupe tas ti tiere un ti mënxe fer imer xlecht pehantelt wëre. Un kewis, lost tee net tas unser xeen eyert fernicht wërt. Kans anerste, torich sayn Raych, tuut eyer klaych al ti xaat woo xon kemacht waar, fermache. (Isaías 11:1-9) Ich sin aarich froo net ploos wayl ich tiise woerheete khëne, awer aach, wayl ich khan anere helfe aan tëne klaape. Ich mëne net mee tas ich prauche ti welt ënere.