Ma tu tsákamtal u lej kulbetnálak ku béletna’ jawa’ wa’ats ban Tsabál. U yanél ani naná’ i lej kulbetnálak ku k’alej tu belelél ju’táj ti wa’atsak i pakdha’ te’lom ani i itse’, utat ju’táj tu k’wajilak ti Jyväskylä. Jayej u lej kulbetnál an ko’nélchik. ¡Tam tin tsakamej u lé’ak ku muts’uk’na’ patal an pik’o’ ani an mitsuw’! Talbél , kom u tsu’uw abal u odhnábak an ko’nélchik, in tamkun k’al talchik i atikláb axi in k’aniyal abal yabáts ka odhnájchik. Taná’ u exla’ i atikláb axi jayej in kulbetnálak kin béletna’chik an ko’nél.

U kalelak al an bel abal ki uluw abal yabáts ka odhnáj an ko’nélchik ani ka tsemdháj. Talbél, talchik i atikláb ani naná’ u tamkun abal ki exa’ ki k’aniy an ko’nélchik. An éyalchik yab in kulbetnálak jawa’ i t’ajalak. Jaxtám, junchikíl ma u báliyat ti wík’axte’.

Jayej, wa’atsak k’e’at jant’oj axi tin t’e’pindhálak, jaxtám in tamkun k’al k’e’at i mudhél i atiklábchik abal ki k’aniy jita’chik u odhnáb, ani abal ki béletna’ patal jawa’ wa’ats ban Tsabál. Yabáts u t’ojnálak k’e’at jant’oj abal ku tólmiychik axé’ xi atikláb. Jayej u tólmiyalak an atiklábchik axi ts’ejwantál, axi yab in kwa’alak jant’oj kin k’apuw.

Pero talbél, u exbay abal yab u éjtowalak ku ts’ejka’ an k’ibataláb axi wa’ats ban Tsabál. Bélits abal junchikíl i bájuwalak jawa’ i lé’ak, wa’atsak k’e’at jant’oj axi in t’ajalak ka púwey an k’ibataláb. Pel ejtíl max an pójkaxchik in t’ajalak abal más ka odhnáj an atiklábchik. U ats’alak abal yab u éjtowalak ku t’aja’ jant’oj.

U ats’alak lej t’e’pidh kom yab u éjtowalak ku t’aja’ jant’oj, jaxtám in tujey ku tsalpay k’al a Dios ani tin kwéntaj an Biblia. Naná’ biyálits in tújenekak ku exóbna’ an Biblia k’al an ólchixchik k’al a Jehová, pero bélits abal jajá’chik in lé’ak ti kin tólmiy, naná’ yabayej u ats’alak abal ne’etsak ku ejtow ku jalk’uy u ejatal. Pero xowé’ u lé’ak ku t’aja’.

U aliy u Biblia ani u tujchij ku ajiy. Axé’ tin tólmiy abal ku ats’a’ alwa’ tu ichích. U ajiy yan i textos axi in olnál abal kwa’al ki béletna’ alwa’ an ko’nélchik. Jun i t’iplab, Proverbios 12:10 in ulal: «Axi alwa’ inik in beletnál in ko’nélil» (La Palabra de Dios para Todos). Jayej u exóbna’ abal yab pel a Dios axi in t’ajál ki yajchikna’. U t’aja’ ti kwéntaj abal jawa’ in t’ajamal abal ka lej yaney an k’ibataláb, játs kom an atiklábchik yab in belkál jawa’ Jehová in ulal. U ats’a’ lej kulbél tam tu exla’ abal a Jehová tu lej k’anidhál ani tu lej ko’onchal i k’ayataláb (Salmo 103:​8-14).

Talbél u ela’ jun i cupón in k’ál an libro ¿Qué enseña realmente la Biblia?, ani u aba’ jun i correo abal kin abchin. Wé’ talbél, tin tsa’biy jun i tomkinél axi pel i ólchix k’al a Jehová ani tin ucha’ abal in éjtowalak ti kin exóbchij k’al an Biblia. U bats’uw kin exóbchat. Jayej u tujchij kin k’alej k’al an tamkuntaláb axi in t’ajál an ólchixchik k’al a Jehová. K’ayum k’ayum, an exobchixtaláb in k’ál an Biblia tujey ti ulel ma tu ichích.

An Biblia tin tólmiy ku jalk’uy yan jant’oj tu ejatal. U jila’ tin juts’ul ani tin lej uts’ál, u exóbna’ kin tóltomin jant’ini’ in tomnál ani kin kawin tekedh. Jayej u jalk’uy u tsalápil tin kwéntaj an éyalchik (Romanos 13:1). Ani u jila’ ku t’aja’ yan i kidháb t’ajbiláb.

Pero jawa’ más k’ibat u ats’a’ pel ku jila’ ku tólmiy an atiklábchik axi in lé’ak kin ts’ejka’ an k’ibataláb. Yab u ejtow ku jalk’uy dhubat u tsalápil. U ats’alak abal kwa’al ku áynanchij ku tólmiychik. Pero u t’aja’ ti kwéntaj abal expidh in Eyaltal a Dios in éjtowal kin ts’ejka’ patal an k’ibataláb, jaxtám, u eyendha’ u ejatal abal ku tólmiy an atiklábchik abal kin exla’ tin kwéntaj axé’ xi Éyal (Mateo 6:33).

Ti biyál tam ti u tomolnálak an éyal, u exóbchalak an atiklábchik abal kin pojka’ jita’ yab u tsalpax ejtíl wawá’. Xowé’, yabáts u pojkál an atiklábchik ani u tsápnanchal ku tejwamédhanchij i k’anidhomtaláb (Mateo 5:44). Nixé’ xi k’anidhomtaláb u tejwamedhál tam u ólchal an atiklábchik tin kwéntaj in Eyaltal a Dios. In lej kulbél ku tsu’uw abal axé’ xi t’ojláb in tólmiyal an atiklábchik ka k’wajiy kulbél, kin ats’a’ koyat in ichích ani kin ko’oy jun i alabél aychixtaláb.

Ku exbay abal expidh a Jehová in éjtowal kin ts’ejka’ an k’ibataláb, in t’ajál abal ku ats’a’ koyat u ichích. U lej belál abal a Jehová yab ne’ets kin jila’ ka áynanchat ka odhnáj an ko’nélchik ani ka talabedháj patal jawa’ in ts’ejkamal. Ne’ets kin eyendha’ in Eyaltal abal kin ts’ejka’ patal an k’ibataláb (Isaías 11:1-9). Lej kulbél u ats’ál kom u exlamal patal axé’, pero jayej kom u éjtowal ku tólmiy an atiklábchik abal kin exla’. Yabáts u ats’ál max nanayej kwa’al ku ts’ejka’ an k’ibataláb.