Kuyambira nili mwana ningakonda maninge vinthu vachilengedwe. Banja yathu ingakonda kuyenda kukawona vachilengedwe kuthengo komasoti kunyanja yomwe yenze m’thaundi yathu ya Jyväskylä, mudera yapakati pa dziko ya Finlândia. Inepano nimbakonda maninge vinyama mwakuti peneze mwana nimbati nikawona mphaka panango mbwaya nimbandofuna kuikumbatira. Koma panidakula nidakhumudwa maninge kuwona momwe wanthu angadzudzira vinyama. Patsogolo pake nidangena mu gulu inango yowona va ufulu wa vinyama.

Timbachita vinthu vosiyanasiyana pomenyera ufulu wa vinyama. Mwakulinganiza, timbagawira mapepa komasoti kuchita viwonesero vowonesa kukalipa na wanthu womwe angapha vinyama nkumbagulisa ukuse wake komasoti wanthu womwe ambaphata vinyama kuti ayesere mankwala yosiyanasiyana. Tidakhazikisasoti bungwe yoteteza vinyama, ndawa yakuti nthawe inango tingachita vinthu voipa pochita viwonesero ndipo mapolisi yambatiphata. Nidamangiwako komasoti kuyendesewa ku tiribunali maulendo yanganani.

Kuthimizira pa kumenyera ufulu wa vinyama, ningakhumudwapomwe maninge na mabvuto yomwe yangachitika padziko iyi. Pamwapo nidangena pomwe mu mabungwe yosiyanasiyana yomenyera ufulu wa wanthu ninge ya Amnesty International na ya Greenpeace. Ningaphata basa modzipereka maninge ndipo ningamenyera ufulu wa wanthu osauka, alibe chakudya komasoti wanthu anango obonera.

Koma patsogolo pake nidazindikira kuti ningakwaniselini kuchinja vinthu padziko iyi. Olo kuti mabungwe mwaya yadakwanisa kumalisa mabvuto yanango, nimbawona kuti mabvuto yakuluyakulu yankuthimizirika. Vimbandowoneka ninge chimzimu choipa chameza dziko yose mwakuti palibe angachinje vinthu. Vimwevi vidanifokesa maninge.

Ndawa yokhumudwa kuti ningakwaniselini kuchinja vinthu, nidayamba kuganizira va Mulungu komasoti Baibolo. Nenze nidapfunzirako Baibolo na Mboni za Yahova m’mambuyo umu. Olo kuti ningawona kuti wa Mboni za Yahova ni wanthu wachifundo komasoti kuti angachitanane vinthu mwa kuniganizira, ningafunalini kuchinja khalidwe yangu. Koma pa nthawe mweyi vinthu venze vidachinja.

Nidatenga Baibolo yangu nkuyamba kuiwerenga. Vomwe nidawerenga vidanikhazika ntima pasi. Nidagumana malemba yanango yomwe yambalimbikisa kuti timbasamalira vinyama. Mwakulinganiza, lemba ya Miyambo 12:10 ichati: ‘Wolungama achasamalira moyo wa chiweto chake.’ (Good News Translation) Nidazindikira soti kuti Mulungu ndiyelini achachitisa mabvuto yomwe yali padziko iyi. M’malo mwake mabvuto yankuwandirawandira ndawa yakuti wanthu azinji achatewedzalini malangizo ya Mulungu. Nidakondwa maninge kudziwa kuti Yahova ni Mulungu wachikondi komasoti woleza moyo.—Salimo 103:8-14.

Panthawe mweyi nidagumana kapepa kochemerera bukhu yakuti, Vomwe Baibolo ichapfunzisa ndipo nidakatumiza. Pakalibe papita nthawe banja inango ya Mboni za Yahova idafika panyumba pangu nkunikumbira kuti ambanipfunzisa Baibolo ndipo nidabvuma. Nidayamba soti kusonkhana nawo ku Nyumba ya Ufumu. Vimwevi vidanithandiza maninge kuti nimbakonde vomwe nimbapfunzira.

Vomwe nimbapfunzira m’Baibolo vidanithandiza kuti nichinje maninge. Nidasiya kuledzera na kupepa komasoti nidayamba kudzisamalira. Nidasiya soti kutukwana. Nidachinja soti momwe nimbawonera malamulo ya boma. (Aroma 13:1) Komasoti nidasiya khalidwe ya chigololo yomwe nenze nidaizolowera maninge.

Koma chomwe chidanishupa maninge kuchinja ni kusiya kukonda maninge mabungwe yomenyera ufulu wa wanthu na vinyama. Vidanitengera nthawe itali kuti nisiyane na mabungwe mwaya. Pakuyamba nimbawona ninge kusiya mabungwe mwaya kungawonese ninge ndine munthu wosakhulupirira. Koma nidazindikira kuti ni Ufumu wa Mulungu yekha womwe ungakwanise kuchinja vinthu padziko yapasi. Ndipomwapa nidayamba kuphata basa yolalikira va Ufumu muyu.—Mateyu 6:33.

Panthawe yomwe nimbamenyera ufulu wa wanthu nimbawona kuti wanthu ali m’magulu yawiri, gulu ya wanthu oipa na ya wanthu wabwino ndipo nimbaipidwa na womwe ningawona kuti ni oipa. Koma ndawa yopfunzira Baibolo, nichaipidwalini na munthu aliyese. (Mateyu 5:44) Njira ibodzi yomwe nimbachitira vimwevi ni kuwalalikira va ntontholo wabwino wa Ufumu wa Mulungu. Nimbakondwa kuwona kuti basa mweyi imbalimbikisa ntendere, kuthandiza wanthu kuti ambakondwe komasoti kuwapasa chidikhiro.

Nimbakhala na ntendere wa muntima ndawa nimbadziwa kuti Yahova ndiye wati adzachinje vinthu. Nichakhulupirira kuti iye ninge Mulengi adzalakererelini kuti wanthu ambadzudze vinyama na wanthu anzawo mpaka kalekale komasoti kuti adzonge dziko yathu yokhuza. Mulungu adzaphatise basa Ufumu wake kukonza vinthu vose vomwe vadzongewa padziko iyi. (Yesaya 11:1-9) Nichakondwa maninge kudziwa vinthu vimwevi komasoti kuthandiza wanthu kuti ambakhulupirire vakuti vinthu vimwevi vidzachitike. Manjeuno nilibe soti maganizo yofuna kuchinja vinthu padziko ino.