Naa kʉ̃risiachãu kãareba ãrĩã biʼia ɓuu bichia naa asei baita. Chi Bibliaba konsejo dea ɓuu kãare ãrĩã biʼia ɓuu ʉ̃rʉbena daiba asei baita (Filipenses 1:10). Ɓʉba joma bichia aseyuɗebena, sãarã biʼia ãrĩã ɓuu, mauɗe sãu isa asei nesita ɓuu. Kʉ̃risiaba sãarãba bichia asei nesita ɓuu, jari chiko koɗayu nedoɗe wãi baita, maka ɓumina jãu isa aseebai ɓuu, ɓoobaria chi aude isa asei baita jari barikiau programa televisorɗe ochiaiɗebena, maka ɓumina jãu aude importantewẽe ɓuu. *

Naeɗe kʉ̃risiaba chi pasai ɓuuɗebena. Eclesiastés 10:10ba jara ɓuu: “Poyaa tõobai ɓua chaara peɗeawãe ɓuuba, maamina biʼia era adaurã makarã isa tõotai ɓua. Chi biʼia asebarii kawa kʉ̃risiaburuuɗeeburu”. Chaara adaui naeɗe biʼia peɗea era adauyua, ara jãka nureaɗai ɓua dachirã siɗa, chi asei naeɗe kawa kʉ̃risiayua tiempo biʼia ãrĩã adauyua. Ase nibarã́ba chi bichi tiempo kitapeɗa bari kãsa kãriiɗebena biʼia ãrĩãwẽeɗebena. Bichi trajo akabatasiibʉ̃rã, kʉ̃risiáse june adauyua. Naeɗe ẽpesa koɓooyua, bichia kawa kʉ̃risiapeɗa ase niibʉ̃ra jari ẽbẽra kʉ̃risiadu ãrĩã nii kĩraka ɓooyua, biʼia peɗea era adauika chi chaara trajai naeɗe: jãkaɗakare mauba bichi biʼia ãrĩã trajabiyua.

Ara ɓaʼãraburu aseyua. Bichia chi ariɗe ɓuuwẽe tiempo perdeemaaba aserã́ba. Bichi trajo ãrĩã aseburuuba ãrĩã kãsapeɗa mauɗe kĩrajʉʉ ɓuuwẽe bayua.

Ɓurã́ba chi kaaɗe aseyu mauɗe kawayuwẽe koɓeerã́ba. Eclesiastés 11:4ba jara ɓuu: “Chi pũa kuɓuu ochia ɓeesirã uubai; chi jʉ̃rʉarã ochia niiba junaabai”. Chi ne uubarii niiba bari chi pũa kuɓuu maebʉrã chi kueche kuɓuudu ochia koɓeesirã, chi trajo aseebai ɓuu, jãuba chi tiempo kitapeɗa uuwẽekabapeɗa ni junawẽe bayua. Ara jãu kĩraka, dachi ãrĩã preokupaɗapeɗa mauba ãrĩã demorapeɗa mauɗe dachia ase kʉ̃riai baɗa asewẽa. Makawẽebʉrã naa chi kãare aseyu ãrĩã kʉ̃risiapeɗa mauba joma asewẽe bayua. Ɓoobaria biʼia kʉ̃risiabaraaɗai kãare aseyu ʉ̃rʉbena. Proverbios 14:15ba jara ɓuu chi ẽbẽra kʉ̃risia choroma niiba biʼia kʉ̃risiapeɗa chi asei kuɓuuɗebena. Jãuɗéburu kawa kʉ̃risiaabapeɗa kʉ̃risia nii chi kãare pasai kuɓuuɗebena (Eclesiastés 11:6).

Joma jipaburu poyaa aseebai ɓuu. Santiago 3:17ba jara ɓuu: “Chi biʼia kʉ̃risia kuɓuu chi ʉtaare ɓuu [chi Dachi Akõreɗe] kawa kʉ̃risia kuɓuu”. Joma biʼia aseeruudu biʼia ɓua. Jãuɗéburu joma biʼiaburu aseyu kʉ̃risia ɓuubʉrã waa nomaa ɓeebayua. Cha nii ẽbẽraba junebena beɗea kawamaa ɓuu kĩra bariara ichi ariɗe beɗeawẽe siɗa maka ɓumina mauba kawayua. Mauɗe chi nuree ẽbẽraba bustaɗakau ariɗewẽe jaraɗayu jãuba biʼia kawawẽe bayua. Jãuɗéburu kʉ̃risiayua joma kãaredu aseyu. Ara jãka Proverbios 11:2ba jara ɓuu: “Chi ẽbẽra kʉ̃risia choroma niiba waa kãareɗaaburu aseyu”. Bariara ãchi ne miadaa asepeɗaaɗa siɗa ara nauɗeburu kʉ̃risia nureaɗakaa.

Chi tiempo sakaba trajai baita mauɗe apii akʉ ɓeeyua biɗa. “Ara ɓua ɓaʼãra bari akʉ ɓooyu, ãrĩã traja akʉ ɓoi baɗabara” (Eclesiastés 4:6). Ẽbẽra ãrĩãdu traja nii ãrĩã kãsa ɓeepeɗa mauɗeeba kĩrajʉʉ niiwẽe. Chi koʼoa ãrĩã nii, ãrĩã bari koɓeepeɗa, mauɗe “tiempo ãrĩã” perde nii. Bibliaba jara ɓuu: aribia trajapeɗa, maabea apii akʉ ɓeeyu baita; “jãu kʉ̃ria ɓuu Dachi Akõreba” (Eclesiastés 5:19).

Biʼia kãi noɓooyua. “Mʉ jeeɗa biʼia ɓeepeɗa maabea kãi noɓeeyua”, jãu jaraɗa baɗa chi Biblia ɓʉbariiba (Salmo 4:8). Chi dawarau nureerã 8 horas kãi noɓeei ɓuu, ãchi kʉ̃risia mauɗe kakuaɗebena biʼia koɓooyu. Dachi kʉ̃risia baita kãi noɓooyu biʼia ɓua, jãuba dachi biʼia kʉ̃risiabipeɗa, ãrĩã aiɗa ɓuu, mauɗe akordabipeɗa waaburu kawayua. Mauɗe dachi ɓiɗĩikaburu kãi ɓuubʉrã ariɗewẽe ɓua: mauba ãrĩãdu ãyaa asebiɗapeɗa mauɗe ãrĩã kĩrubibarii.

Chi asei ɓuudu aseyua. “Aude biʼia ɓua chi dauba ochiaruuba, kaaɗe jari jãmacha ãda ɓoi kãyabãra” (Eclesiastés 6:9). Jãuba jara kʉ̃ria ɓuu ẽbẽra kʉ̃risia choroma ãrĩã nii kʉ̃risiakau chi wãʼãe nii, mauɗe aude kʉ̃risiawẽe chi poyaa adauiibai. Mauɗéburu chi unubi ɓuu propagandaɗe nedowẽe, ni chi paabayua chi nejarra prestawẽe. Mau biʼia nibayu chi ira ɓuu omeburu.

Kawa kʉ̃risias chi bichimaa jaradeapeɗaaɗa. Chi biʼia ɓee kawabipeɗaaɗa baɗa ɓistĩinka niiɗeeɗa jãarã biʼia ɓeeba dachi aiɗa kʉ̃risiabibarii kãare biʼia ãrĩã ɓuu. Dachirã ʉkiɗa kĩraka nii basirã, chi biʼia ɓee kawabipeɗaaɗa mau arco abadau kĩraka nia. Nauba dachi aiɗa kʉ̃risiabi ɓuu kãarerã chi biʼia ãrĩã ɓuuɗebena maabea dachi tiempo biʼia ãrĩã audayu. ¿Sama unuɗaiba jãarã konsejo biarã? Ẽbẽra ãrĩãba jʉrʉbadau Bibliaɗe, chi Bibliadu konsejorã biʼia ãrĩã ɓee baraa ɓuuɗeeba (Proverbios 2:6, 7).

Dachia kʉ̃ria niidu biʼia ãrĩã ɓuu dachi bibi niiɗe. Chi kʉ̃ria niiba jãuba “dachi ãbuaburu duanabibaria”, Colosenses 3:14ɗe jara ɓuu. Kʉ̃ria nii wãʼãebʉrã kĩrajʉʉ nibaabapeɗa dachi kʉ̃risia biʼia nibaabayua, ara jãka pasa ɓua dachi deɗabenarã ome. Jãka kʉ̃risiaɗakabʉrã bari trajaɗaidu kʉ̃risia nuree, mau bari chi nejarr baraa nibaidu kʉ̃ria nuree, jãka nureerã kĩrajʉʉ nureaɗakaa. Bibliaba ãrĩã jara ɓuu chi kʉ̃ria ɓuuɗebena biʼia ãrĩã ɓuu junebena biʼia ãrĩã ɓuu aude (1 Corintios 13:1-3; 1 Juan 4:8).

Tiempo sakaba Jeowa ʉ̃rʉbena kawai baita. Mukĩra ichi trʉ̃ Geoff wẽra kĩrawãrea ira basia, mauɗe warr ome kĩrawãrea ua ɓoosia, amiko biarã mauɗe trajo siɗa paramédico kĩra ira ɓoosii. Maamina ichi trajoɗeeba ãrĩãdu kiniɗapeɗa supri duanuu unu ɓoosia. Ichi du aɓauba naka wiɗi ɓoosii: “¿Jãu chi bida jãkaburu unuyue jãkara?”. Ɓes aɓa ichia karta Jeowa ɗebena Jaranũrẽrãɗe leasia ãrĩã bustasii jãma panausii chi ichia wiɗiɗa baɗa.

Geoffba jarasia chi ichia leaɗa baɗa ichi kima mauɗe ichi warrarãmaa, mauɗeeba ãchia biɗa kawaɗa kʉ̃riasiɗaa. Jomaurã deɗabenarãba Biblia ẽpesa kawasiɗaa, jãuba ãchi kĩrajʉʉ ãrĩã sentibisiɗaa maabea chi tiempo adausiɗaa biʼia aseyua. Maubapeɗa, ũkuru chi biʼia ãrĩãdu uruburuu esperabiasia (Apocalipsis 21:3, 4).

Geoff ʉ̃rʉbenaba akordabi ɓua Jesusba jaraɗa baɗa: “Chi kuitaa duanuu ãchia nesita panuu kawaɗai Dachi Akõre ʉ̃rʉbena kĩrajʉʉ nurea” (Mateo 5:3). ¿Bichi siɗa tiempo sakapeɗa Jeowa ʉ̃rʉbena kawai ɓue? Nau aserã bichi kĩrajʉʉ ãrĩã nibai ɓua bichi bidaɗe nauba bichi biʼia kʉ̃risiabi ɓua.