Bʼaanu li aajel ru. Li Santil Hu naxye qe naq tqakʼe reetal kʼaru li qʼaxal chaabʼil (Filipenses 1:10). Tzʼiibʼa li naʼlebʼ li taawaj xbʼaanunkil ut kʼe reetal bʼar wank li aajel ru. Maare wank li naʼlebʼ li wank xwankil abʼan moko aajel ta ru. Bʼaanu li aajel ru.

Kʼoxla li taabʼaanu. Eclesiastés 10:10, Li Santil Hu, Sociedad Bíblica de Guatemala, SBG, naxye: «Wi naxeretoʼk li chʼiichʼ ut inkʼaʼ nakʼeemank xqʼesnal, tento naq kaw chik tatyokʼoq chiru. Qʼaxal us xbʼaanunkil chixjunil saʼ xyaalal ut rikʼin chaabʼil naʼlebʼ». Joʼ tento xqʼesnankil laamaal naq toj maajiʼ nakaawoksi joʼkan ajwiʼ aajel ru xkʼoxlankil chiʼus li taabʼaanu re roksinkil chiʼus laahoonal. Maare tatruuq xbʼaanunkil moqon ebʼ li kʼanjel li moko aajel ta ru ut wi saʼ junpaat xaachoy xbʼaanunkil jun li kʼanjel us raj naq taabʼaanu junaq chik li ak tzʼiibʼanbʼil aabʼaan. Wi nakaakʼoxla chiʼus li taabʼaanu tatkʼanjelaq joʼ li winq li naxqʼesna li xmaal naq toj maajiʼ naʼok chi kʼanjelak, naabʼal li kʼanjel taabʼaanu.

Maatuubʼ laakʼanjel. Maabʼaanu li kʼanjel li maakʼaʼ xwankil ut yal naxmaqʼ laahoonal. Wi taatuubʼ laakʼanjel yal taatawasi aawibʼ ut moko sahaq ta chik laachʼool.

Chap saʼ yaal laakʼanjel. Eclesiastés 11:4, SBG, naxye: «Li ani yo xkʼaʼuxl chirix li iqʼ, inkʼaʼ taaʼawq, ut li nakaʼyank choql, inkʼaʼ taaqʼoloq». Jun laj awinel li junelik naroybʼeni naq chaabʼilaq ru li kutan re xbʼaanunkil li xkʼanjel yal naxsach li xhoonal xbʼaan naq moko naʼawok chi moko naqʼolok ta. Joʼkan ajwiʼ, wi tqoybʼeni naq chaabʼilaq chixjunil saʼ li qayuʼam moko tqabʼaanu ta li ak xqaye malaj naqakʼoxla naq tento tqanaw chixjunil li naʼokenk saʼ li naʼlebʼ re naq tqabʼaanu. Yaal naq wank li naʼlebʼ li aajel ru xkʼoxlankil chiʼus. Saʼ Proverbios 14:15 naxye naq li winq li wank xnaʼlebʼ naxkʼoxla bʼar yook chi xik. Abʼan relik chi yaal moko junelik ta chʼolchʼooq chiqu kʼaru tqabʼaanu (Eclesiastés 11:6).

Maakʼoxla naq inkʼaʼ tatpaltoʼq. Santiago 3:17, SBG, naxye: «Aʼut li choxahil naʼlebʼ […] naxkʼut […] li chaabʼilal». Chaabʼil naq naqaj xbʼaanunkil chiʼus li qakʼanjel abʼan wi junelik yooko xsikʼbʼal naq inkʼaʼ toopaltoʼq tchʼinaaq qachʼool. Jun eetalil li yook xtzolbʼal jun akʼ aatinobʼaal chʼolchʼooq chiru naq tixtaw ajwiʼ xnaʼlebʼ naq tpaltoʼq abʼanan wi naxuwak naq naxkʼoxla naq tpaltoʼq tchʼaʼajkoʼq chiru xtzolbʼal li aatinobʼaal. Joʼkan naq moko usta naq tixkʼe xbʼeen li naraj xbʼaanunkil. Joʼ naxye Proverbios 11:2, SBG: «Li ani naxkubʼsi ribʼ, aʼan wank xnaʼlebʼ». Li naxkubʼsi ribʼ moko naxkʼe ta xchʼool chirix li xpaltil yal naxseʼe bʼan.

Naʼlebʼan chiʼus chirix li kʼanjel ut li ajsink u. «Abʼanan qʼaxal us li hilank junpaataq chiru li kawil kʼanjelak» (Eclesiastés 4:6, SBG). Li naxkamsi ribʼ chi kʼanjelak maakʼaʼ chik xhoonal ut xmetzʼew re xtawbʼal rusilal li xkʼanjel. Li qʼem aj kristiʼaan naxsach xhoonal chi «hilank junpaataq». Li Santil Hu naxye qe naq choonaʼlebʼaq chiʼus. Naxye qe naq kaw tookʼanjelaq abʼan naxye ajwiʼ naq tqayal xsahil li qakʼanjel xbʼaan naq aʼan «qamaatan li nachalk rikʼin li Yos» (Eclesiastés 5:19, SBG).

Chathilanq chiʼus. Jun rehebʼ li kitzʼiibʼank re li Santil Hu kixye: «Saʼ tuqtuukil usilal ninyoklaak ut saʼ junpaat ninwark» (Salmo 4:9, SBG). Aajel ru naq chiqajunilo toowarq waqxaqibʼ (8) oor chiru li qʼoqyink re naq tixtaw wiʼ chik xmetzʼew li qajunxaqalil, li qakʼaʼuxl ut li qulul. Li wark moko sachok ta hoonal xbʼaan naq nokooxtenqʼa re naq ajʼajaq qu saʼ li qakʼanjel ut re naq li qulul tixtzol li akʼ naʼlebʼ. Abʼan naq inkʼaʼ sa nokoowark inkʼaʼ nokook’anjelak chiʼus kokʼaj saʼ toopaltoʼq, naru naqatochʼ qibʼ ut chʼiʼchʼiʼ tqekʼa qibʼ chiru li kutan.

Maakʼe xbʼeen li nakaawaj. «Jwal us xyalbʼal xsahil li kʼaru wank qe chiru naq junelik yooqo xrahinkil xtzʼaqobʼ aʼan» (Eclesiastés 6:​9, SBG). Kʼaru xyaalal li naʼlebʼ aʼin? Li kristiʼaan li wank xnaʼlebʼ moko naxkanabʼ ta naq li naxrahi ru ttaqlanq saʼ xbʼeen. Qʼaxal wiʼ chik naq moko wank ta saʼ ruqʼ li naxrahi ru. Moko saʼ junpaat ta naxik xchʼool chirix li esil re xtawbʼal li toʼ tumin. Naxkʼojobʼ bʼan xchʼool rikʼin li naru xtawbʼal.

Yuʼami li chaabʼil naʼlebʼ. Ebʼ li chaabʼil naʼlebʼ nokooxtenqʼa re rilbʼal kʼaru li jwal aajel ru. Kʼoxla ebʼ li naʼlebʼ li wank xwankil saʼ laayuʼam xbʼaan naq aʼin tatxtenqʼa re rilbʼal kʼaru li aajel ru ut roksinkil chiʼus laahoonal. Ut bʼar nokooruuk xtawbʼal? Naabʼalebʼ li kristiʼaan nekeʼxsikʼ xtenqʼ saʼ li Santil Hu xbʼaan naq aran nekeʼxtaw li choxahil naʼlebʼ (Proverbios 2:​6, 7).

Kʼutbʼesi li rahok. Li rahok naxbʼaanu naq junajaq ru «li qakʼaʼuxl ut tzʼaqalaq re ru li tqabʼaanu» (Colosenses 3:14, Li Santil Hu, Wycliffe Bible Translators. Akʼ tzʼiibʼ). Li rahok naxbʼaanu naq sahaq saʼ qachʼool saʼ li qajunkabʼal ut naq maakʼaʼ tqaxuwa. Li inkʼaʼ nekeʼxpaabʼ aʼin ut nekeʼxkʼe xwankil li kʼanjel, li tumin malaj li tzolok moko sahebʼ ta saʼ xchʼool. Li Santil Hu naabʼal sut naʼaatinak chirix li rahok ut naxye naq aʼin li naʼlebʼ li qʼaxal wank xwankil (1 Corintios 13:​1-3; 1 Juan 4:8).

Sikʼ aahoonal re wank saʼ amiiwil rikʼin li Yos. Laj Geoff wank li rixaqil, wiibʼ li xkokʼal, ebʼ li ramiiw ut li xkʼanjel aʼan xkʼambʼalebʼ li kristiʼaan saʼ li bʼanlebʼaal. Usta nawulak chiru li xkʼanjel rajlal kutan naril li rahilal ut li kamk. Joʼkan naq naxkʼoxla: «Ma aʼin tawiʼ xyaalal li yuʼam?». Saʼ jun kutan kixtaw jun li tasal hu rehebʼ laj testiiw re li Jehobʼa ut kikʼojlaak xchʼool rikʼin li xsumenkil li kixtaw.

Laj Geoff kixchʼolobʼ chiru li xjunkabʼal li yook xtzolbʼal ut aʼanebʼ ajwiʼ keʼraj xnawbʼal. Chixjunilebʼ keʼok xtzolbʼal li Santil Hu. Aʼin kixbʼaanu naq tchaabʼiloʼq li xyuʼam ut teʼoq roksinkil chiʼus li xhoonal. Xtzolbʼal li Santil Hu kitenqʼank rehebʼ re naq teʼxtaw xyaalal li xyuʼam ut teʼwanq roybʼenihomebʼ saʼ jun li Ruuchichʼochʼ bʼar maakʼaʼaq chik li rahilal (Apocalipsis 21:​3, 4).

Li kixkʼul laj Geoff naxjultika qe li aatin li kixye li Jesukriist: «Us xaq rehebʼ li nebʼaʼebʼ li xchʼool» malaj li nekeʼxkʼe reetal naq naʼajmank li Yos saʼebʼ li xyuʼam (Mateo 5:3, SBG). Ma twulaq raj chaawu xnawbʼal ru li Yos? Chi joʼkaʼin taawoksi chiʼus laahoonal.